1. Ino nceebonshi bene Babiloni bakalinga kumusuni Danyelo?

 MUSHINSHIMI Danyelo wakalinga musankwa wacanike paciindi ndyaakatolwa mubusha ku Babiloni, musena wakalinga kulaale abuumbi aku Jelusalemu kumishaabo. Nabi kwaamba ayi Danyelo wakalinga wacanike, bacinenenene ba bene Babiloni bakalinga kumusuni. Bakabona ayi wakalinga kuboneka kabotu alimwi ayi wakashalilwa mumukwashi wa baami. (1 Samwe. 16:7) Aboobo bene Babiloni bakamwiisha kwaamba ayi inga watalika kusebensela muŋanda ya mwaami.​—Danye. 1:3, 4, 6.

2. Ino Yehova wakalinga kumubona buyani Danyelo? (Esekelo 14:14)

² Yehova wakalinga kumusuni Danyelo ceebo ca nshaakasalawo kucita mubuumi, kuteshi ceebo ca mbwaakalinga kuboneka na mikuli ilibetele njaakalinga kusebensa muŋanda ya mwaami. Cancine ncakwaamba ayi, Yehova ndyakaamba ayi Danyelo wakalinga kushomeka bweenka mbuli Nowa a Jobo, mpashi Danyelo wakalinga kucitebo myaaka pafwiifwi a 20. Aboobo Yehova wakalinga kubona ayi Danyelo musankwa wacanike, wakalinga kululeme bweenka mbuli Nowa a Jobo, abo bakamusebensela cakushomeka kwamyaaka iinji. (Mata. 5:32; 6:9, 10; Jobo 42:16, 17; amubelenge Esekelo 14:14.) Alimwi Danyelo wakalinga muntu usunikwi kuli Yehova, mubuumi bwakwe boonse.​—Danye. 10:11, 19.

3. Ino tutokwiiya nshi mumutwi uyu?

³ Mumutwi uyu, tutobandika pamibo yobilo yakapa kwaamba ayi Danyelo abe muntu usunikwi kuli Yehova. Cakutaanguna, tutobandika mbwakatondesha mubo womwi a womwi. Lyalo tutoobona Danyelo mbwakeeya kutondesha mibo iyo. Mukweelaako, tutobandika mbweenga twakonkela cakubonenaako cakwe. Nabi kwaamba ayi mutwi uyu wakalembelwa bacanike, soonse kuli nsheenga tweeya kuswa kucakubonenaako cakwe Danyelo.

4. Ino Danyelo wakatondesha buyani kutaloonda? Amwaambe cakubonenaako.

⁴ Bantu bataloondi inga baba aboowa, sombi tabasuminishi kulinyumfwa boobo kubapa kwaalilwa kucita shintu shiluleme. Danyelo wakalinga musankwa wacanike utaloondi. Amuyeeye pabukaalo bobilo Danyelo ndyaakatondesha kutaloonda. Bukaalo bwakutaanguna, cilyeelete nciindi ndyepakeenda myaaka yobilo kuswa ciindi bene Babiloni ndyebakanyonyoola Jelusalemu. Nebukadinesa mwaami wa bene Babiloni, wakalota ciloto ciloondesha ca cibumbwabumbwa cinene. Wakaamba ayi atoocaya basongo bakwe boonse kwiilikaawo a Danyelo na baalilwe kumwaambila ciloto ncaalota abusansulushi bwancico. (Danye. 2:3-5) Danyelo wakalinga kweelete kucitaawo comwi cakufwambaana, mukwiinga bantu baanji nakwiinga bakacaikwa. “Wakaya kuŋanda ya mwaami akumusenga ayi amupe ciindi, kwaamba ayi amusansulwite ciloto ico.” (Danye. 2:16) Ici cakatondesha ayi Danyelo wakalinga musankwa utaloondi alimwi ucite lushomo. Munshila nshi? Baibo taitondeshiiwo ayi paciindi ici Danyelo kaali wakasansululawo kale shiloto. Wakalwiita beshicibusa bakwe botatwe—Shadileki, Mishaki, alimwi Abedinego, kwaamba ayi “basenge nkuumbu kuli Lesa wa kwiculu ayi abasansulwite cintu ico cishisitwe.” (Danye. 2:18) Yehova wakakumbula mipailo yabo. Kwiinda mulucafwo lwakwe Yehova, Danyelo wakacikonsha kusansulwita Nebukadinesa ciloto ncaakalota. Aboobo Danyelo abeshicibusa bakwe tabakwe kucaikwa.

5. Ino nciinshi acimwi cakacitika Danyelo ndyaakalinga kweelete kutondesha kutaloonda?

⁵ Ndipakeenda ciindi kuswa ciindi Danyelo ndyaakasansulula ciloto ca cibumbwabumbwa cinene, kuli acimwi cakacitika ndyaakalinga kweelete kutondesha kutaloonda. Nebukadinesa wakalota ciloto acimwi ciloondesha. Wakalota cisamu cinene abuumbi. Cakutaloonda Danyelo wakasansulwita mwaami ciloto ncaakalota, kwiilikaawo akumulwiita ayi alaakucinkuka, akukushikwaawo pa bwaami kwakaciindi. (Danye. 4:25) Mwaami nakwiinga wakayeeya ayi Danyelo wamupondokela, alimwi nakwiinga wakacaya Danyelo. Sombi Danyelo wakatondesha kutaloonda akusansulwita mwaami ciloto.

6. Ino nshiinshi mpashi shakacafwa Danyelo kuba muntu utaloondi?

⁶ Ino nshiinshi mpashi shakacafwa Danyelo kuba utaloondi mubuumi bwakwe boonse? Ncakutatoonsha kwaamba ayi Danyelo ndyaakalinga mwanike, wakeeya shiinji kuswa kucakubonenaako ca baishi abanyina. Bakalinga kunkonkela milawo Yehova njaakapa bashali bene Isilaeli, alimwi bakaiisha mwanaabo milawo yakwe Lesa. (Duto. 6: 6-9) Danyelo wakalinga kwiishi milawo ili 10 alimwi ashakalinga kwiilikitweemo mumilawo iyo. Kucakubonenaako, wakalinga kucishi mwine Isilaeli nshaakalinga kweelete kulya a nshaatakalinga kweelete kulya. b (Lefi. 11:4-8; Danye. 1:8, 11-13) Danyelo wakeeya amakani aamba pa bantu bakwe Lesa, alimwi wakalinga kucishi ashakalinga kubacitikila na baalilwa kukonkela milawo yakwe Yehova. (Danye. 9:10, 11) Shintu Danyelo nshaakeendaamo mubuumi bwakwe, shakamucafwa kushoma cakutatonsha ayi Yehova alimwi abaanjelo bakwe bacite nkusu balaakumucafwa nabi weenda mubukaalo buli buyani.​—Danye. 2:19-24; 10:12, 18, 19.

7. Ino nshiinshi shimwi shakacafwa Danyelo kuba muntu utaloondi? (Amubone acikope.)

⁷ Danyelo wakalinga kwiiya makani bashinshimi bakwe Lesa ngobakalemba, kwiilikaawo abushinshimi Jelemiya mbwaakalemba. Ceebo cakwiiya bushinshimi ubu, Danyelo wakesa mukushiba kwaamba ayi baJuda abo bakekala mubusha ku Babiloni kwamyaaka iinji, bakalinga kusa mukuswa mubusha coonono. (Danye. 9:2) Kubona bushinshimi bwamu Baibo mbobwakakumanishikwa, kwakacafwa Danyelo kunooshoma muli Yehova abuumbi. Alimwi abo bashoma muli Lesa abuumbi, inga baba bantu bataloondi. (Amweelanye a Bene Loma 8:31, 32, 37-39.) Alimwi ciyandika abuumbi, liinji Danyelo wakalinga kupaila kuli Ishi wakwiculu. (Danye. 6:10) Wakasenga kulekelelwa kuli Yehova pashibiibi shakwe alimwi wakamulwiita mbwaakalinga kulinyumfwa. Alimwi wakasenga ayi Yehova amucaafwe. (Danye. 9:4, 5, 19) Bweenka mbuli ndiswe soonse, Danyelo taakwe kushalwa kaacite mubo wakutaloonda. Sombi wakeeya kuba amubo uyu kwiinda mukwiiya, kupaila alimwi akucinka manungo muli Yehova.

8. Ino nshiinshi nsheenga twaciita kwaamba ayi twiiye kuba bantu bataloondi?

⁸ Ino nshiinshi nshotweelete kucita kwaamba ayi tube bantu bataloondi? Bashali besu inga batuyuminisha kuba bantu bataloondi, sombi inga tabapi kwaamba ayi tube amubo uyu na balo mbantu bataloondi. Kwiiya kuba bantu bataloondi kuli anga nkwiiya kucita cintu cimwi. Nshila yomwi mbweenga mweeya kucita cintu cimwi, nkwiinda mukulangilisha cakubikila maano uyo utomwiisha mbwatoocita, lyalo akukonkela cakubonenaako cakwe. Aswebo inga tweeya kuba bantu bataloondi, kwiinda mukulangilisha cakubikila maano bamwi mbobatondesha mubo uyu, lyalo akukonkela cakubonenaako cabo. Aboobo ino nshiinshi nshotweeya kuswa kucakubonenaako cakwe Danyelo? Bweenka mbuli Danyelo, tulyeelete kwaashiba kabotu Maswi akwe Lesa. Tulyeelete kuyumya bushicibusa bwesu a Yehova kwiinda mukunoobandika anguwe lyoonse, akunoomulwiita mbotutolinyumfwa. Alimwi tulyeelete kucinka manungo muli Yehova, akushoma cakutatonsha ayi ananootucafwa lyoonse. Lyalo na lushomo lwesu lukeeleshekwe, cilaakuba cuubu kutondesha kutaloonda.

9. Ino kuba bantu bataloondi kulatucafwa buyani?

⁹ Kuba bantu bataloondi kulatucafwa munshila shiinji. Amuyeeye shakacitikila Ben. Wakalinga kwiiya pacikolo cimwi mu Germany, apo bantu boonse mpobakalinga kushoma ayi shintu shakasandukabo alimwi ayi makani amu Baibo aamba pakulengwa kwashintu ngakubeca. Bushiku bumwi ndyebakalinga mucikolo, Ben wakapekwa coolwe cakwiimikana kunembo lya beshicikolonyina, akubasansulwita cakalinga kumupa kushoma ayi shintu shicite buumi shakalengwa. Cakutaloonda wakabasansulwita nshaakalinga kushoma. Ino nshiinshi shakaswaamo? Ben wakaamba ayi: “Batica bakakutika cakubikila maano alimwi bakalemba makani ngondakasebensesha kusansulula nshonshoma, akupako shicikolo womwi a womwi mucikolo cesu.” Ino beshicikolonyina bakacita buyani? Ben wakaamba ayi: “Baanji bakakutika nshendakaamba alimwi bakatalika kuntondesha bulemu.” Bweenka cakubonenaako cakwe Ben mbocatondesha, liinji bantu batondesha kutaloonda balapekwa bulemu kubamwi alimwi inga bapa kwaamba ayi bamwi basune  kwiiya pali Yehova. Ncakutatoonsha kwaamba ayi kuli sheebo shibotu sheelete kutupa kwiiya kuba bantu bataloondi.

10. Ino Lesa alashomeka kuli baani?

¹⁰ Liinji Baibo ilaamba “pakushomeka” na “lusuno lutamaani,” ulo Yehova ndwatondesha kubeshicibusa bakwe. Baibo ilaamba apakushomeka bantu bakwe Lesa nkobatondeshanya. (2 Samwe. 9:6, 7) Inga tweeya kuba bantu bashomeka abuumbi. Amuleke tubandike shakacafwa Danyelo kuba muntu ushomeka abuumbi.

11. Ino Danyelo wakatondesha buyani kushomeka ndyaakalinga wacembela? (Amubone cikope cili papeeji yakutaanguna.)

¹¹ Kuli shintu shiinji shakacitika mubuumi bwakwe Danyelo, shakalinga kweelete kumupa kutolelela kushomeka kuli Yehova nabi sobwe. Sombi paciindi ndyaakalinga kucite myaka iindilila 90, kuli cintu cimwi cakamucitikila cakamuyumina abuumbi. Paciindi ici, bene Mediya a Pesha bakakoma ndabala ya Babiloni alimwi yakalinga kweendeleshekwa a Mwaami  Dalyasi. Bacinenenene bakalinga kusebensela Mwaami Dalyasi, bakalinga kumupatite Danyelo alimwi tabakalinga kulemeka Lesa wakwe. Aboobo bakayeeya mbweenga Danyelo wacaikwa. Bakapa mwaami kusaina mulawo, uyo wakapa kwaamba ayi Danyelo asaleewo kushomeka kuli Lesa na kumwaami. Danyelo ncaakalinga kweeletebo kucita kwaamba ayi atondeshe kushomeka kumwaami alimwi ataanishikwi, nkucileka kupaila kuli Yehova kwanshiku shili 30. Sombi Danyelo wakasalawo kutolelela kushomeka kuli Yehova. Aboobo bakamuwaala mucilindi ca nkalamu. Sombi Yehova wakapulusha Danyelo ceebo cakushomeka kwakwe, kwiinda mukupa kwaamba ayi inkalamu shitamulyi. (Danye. 6:12-15, 20-22) Ino inga twacita buyani kwaamba ayi tutolelele kushomeka kuli Yehova bweenka Danyelo mbwaakacita?

12. Ino nshiinshi shakacafwa Danyelo kutolelela kushomeka kuli Yehova?

¹² Kwaamba ayi tunooshomeka kuli Yehova, tulyeelete kumusuna abuumbi. Danyelo wakatolelela kushomeka kuli Yehova, mukwiinga wakalinga kumusuni abuumbi Ishi wakwiculu. Ncakutatoonsha kwaamba ayi Danyelo wakalinga kumusuni abuumbi Yehova, mukwiinga wakalinga kucana ciindi cakukutumana kuyeeya pa mibo Yehova njaacite ambwaaitondesha. (Danye. 9:4) Alimwi Danyelo wakalinga kukutumana kuyeeya pashintu shibotu Yehova nshaakamucitila anshaakacitila bantu bakwe, alimwi wakalinga kulumba.​—Danye. 2:20-23; 9:15, 16.

13. (a) Ino kushomeka kwa bacanike kuleeleshekwa buyani? Amwaambe cakubonenaako. (Amubone acikope.) (b) Kweelana a vidyo, ino inga mwakumbula buyani na bamwi bamwiipusha Bakamboni Bakwe Yehova mbobabona makani akoonana kwabasankwa na banakashi beenka beenka?

 ¹³ Bweenka mbuli Danyelo, bacanike balaba pomwi abantu batalemeki Yehova anjiisho shakwe. Bantu bamushobo uyo, inga kabatasuniiwo muntu uli woonse ushoma shintu shipusene anshebashoma. Bamwi inga beelesha kupensha bacanike kwaamba ayi bacileke kushomeka kuli Yehova. Kucakubonenaako, amunyumfwe shakacitikila musankwa wacanike waliina lya Graeme, ukala ku Australia. Wakeenda mubukaalo buyumu abuumbi ndyaakalinga kucikolo caku sekondali. Batica bakeepusha beshicikolo nsheenga bacita, na shicikolonyinaabo wabalwiita ayi aloonana abasankwanyina na banakashinyina. Batica bakalwiita beshicikolo boonse ayi, abo batosuminisha ayi koonana kwabasankwa na banakashi beenka beenka kulibo kabotu beemikane kulubasu lumwi, lyalo abo bakalinga kukaka ayi takubete kabotu beemikane kulubasu lumwi. Graeme wakaamba ayi, “Beshicikolo boonse bakeemikana kulubasu lwabaabo bakalinga kusuminisha ayi koonana kwabasankwa na banakashi beenka beenka kulibo kabotu, kukushilakobo nebo a Kamboni umwi.” Lyalo shintu shakabica abuumbi cakwaamba ayi Graeme wakalinga kweelete kutondesha ayi alashomeka kuli Yehova. Graeme wakaamba ayi, “Kwa liwoola lyomwi, beshicikolo bamwi alimwi abatica bakatalika kutucobola. Ndakacita nsheenga ndacikonsha kubasansulwita nshonshoma cakukalika moyo alimwi munshila ili kabotu, sombi tabakwe kunkutikawo.” Ino Graeme wakalinyumfwa buyani? Wakaamba ayi, “Nshina kunyumfwa kabotu beshicikolo bamwi ndyebakalinga kutucobola, sombi ndakakondwa abuumbi mukwiinga ndakatolelela kushomeka kuli Yehova alimwi ndakaamba nshonshoma.” c

14. Ino nciinshi comwi nceenga twaciita kwaamba ayi tutolelele kushomeka kuli Yehova?

¹⁴ Aswebo inga twatolelela kushomeka kuli Yehova bweenka Danyelo mbwaakacita, na tweeya kusuna Yehova abuumbi. Tuleeya kusuna Yehova abuumbi na tweeya pamibo njaacite. Kucakubonenaako, inga tweeya shintu nshaakalenga. (Loma. 1:20) Na mulisuni kwiiya kusuna Yehova akunoomulemeka abuumbi, inga mwabelenga makani acanika palubasu lwaamba ayi “Shitondesha Kwaamba ayi Kuli Mulengi” na kweebela mavidyo. Alimwi inga mwabelenga makani acanika mubuloshuwa yamu Cisungu icite mutwi waamba ayi Was Life Created? alimwi a yaamba ayi The Origin of Life—Five Questions Worth Asking. Nankashi wacanike waliina lya Esther ukala ku Denmark wakaamba pa mabuku aya ayi: “Mabuloshuwa aya akasansululwa kabotu, taakulwiiti nsheenga washooma; alaamba makani ancine, lyalo omwiine ulyeelete kusalawo shakucita.” Ben ngotwalinga twaambawo wakaamba ayi: “Makani ngondakabelenga palubasu ulu alimwi amakani ngondakabelenga mu mabuloshuwa aya, akayumya lushomo lwangu abuumbi. Akancafwa kushoma ayi Lesa ngowakalenga shintu shicite buumi.” Na mukabelenge makani ali palubasu ulu alimwi amakani ali mu mabuloshuwa aya, mpashi amwebo mulaakutalika kushoma maswi ngotucana mu Baibo aamba ayi: ‘Uleelela, Yehova, O Lesa wesu, kutambula bulemu, akulemekwa alimwi ankusu mukwiinga ndiwe wakalenga shintu shoonse.’​—Ciyu. 4:11. d

15. Ino nciinshi cimwi nceenga twaciita kwaamba ayi tuyumye bushicibusa bwesu a Yehova?

¹⁵ Nshila aimwi mbweenga tweeya kusuna Yehova abuumbi, nkwiinda mukwiiya cakubikila maano makani aamba pabuumi bwakwe Yesu, Mwanaakwe. Ishi nshaakacita nankashi wacanike waliina lya Samira, ukala ku Germany. Wakaamba ayi: “Ndakesa mukumushiba kabotu Yehova kwiinda mukwiiya pali Yesu.” Ndyaakalinga wacanike, Samira  wakalinga kwaalilwa kunyumfwisha ayi Yehova inga waba shicibusa wakwe alimwi ayi alimusuni. Sombi wakalinga kunyumfwisha Yesu mbwaakalinga kulinyumfwa. Wakeelikaawo akwaamba ayi: “Ndakalinga kumusuni Yesu mukwiinga cakalinga cuubu kubandika akwe alimwi wakalinga kubasuni baana.” Kwiiya shiinji pali Yesu, kwakamucafwa kumushiba kabotu Yehova akumusuna abuumbi. Ino nceebonshi? Wakaamba ayi: “Paniini paniini ndakatalika kunyumfwisha ayi Yesu wakalinga kukonkela cakubonenaako ca Baishi cakumaninina. Wakatondesha mibo iinji Baishi njebacite. Ndakesa mukushiba ayi ici nceebo comwi cakapa kwaamba ayi Yehova atume Yesu pacishi capanshi, kwaamba ayi cikonsheke bantu kumushiba kabotu Yehova.” (Joni 14:9) Na mulisuni kuyumya bushicibusa bwanu a Yehova, amweeleshe kucana ciindi cakwiiya shiinji pali Yesu. Na mwacita boobo, mulaakumusuna abuumbi Yehova alimwi mulaakutolelela kushomeka kuli nguwe.

16. Ino nceebonshi tulyeelete kuba bantu bashomeka? (Kulumbaisha 18:25; Mika 6:8)

¹⁶ Na katushomeka kubamwi, inga twaba abushicibusa buyumu ambabo alimwi abalo inga kabashomeka kuli ndiswe. (Lute 1:14-17) Alimwi na katushomeka kuli Yehova, inga twalinyumfwa kukalikana, akukwana anshetucite. Ino nceebonshi? Mukwiinga Yehova wakashomesha ayi alaakunooshomeka ku baabo bashomeka kuli nguwe. (Amubelenge Kulumbaisha 18:25; Mika 6:8.) Amuyeeye paceeci—nabi kwaamba ayi tulibaniini abuumbi na nkulyeelanya ku Mulengi shinkusu shoonse, watushomesha ayi alakutolelela kutusuna! Alimwi na twaba abushicibusa buyumu a Yehova, taakuwo ceenga catupansaanya kuli nguwe, inga caba ayi nkwiinda mumapensho, kupikishikwa nabi lufu. (Danye. 12:13; Luka 20:37, 38; Loma. 8:38, 39) Aboobo ncintu ciyandika abuumbi kukonkela cakubonenaako cakwe Danyelo akutolelela kushomeka kuli Yehova!

17-18. Ino nshiinshi shimwi nsheenga tweeya kuswa kucakubonenaako cakwe Danyelo?

¹⁷ Mumutwi uyu, twabandikabo pamibo yobilo Danyelo njaakalinga kucite. Sombi kuli shiinji nsheenga tweeya kuswa kuli nguwe. Kucakubonenaako, Yehova wakapa kwaamba ayi Danyelo abone shili anga nshiloto alimwi ashiloto shiinji, alimwi wakamupa ankusu shakusansulula makani abushinshimi. Bushinshimi buunji mbwaakalemba bwakakumanishikwa kale. Lyalo bushinshimi bumwi mbwaakalemba bulaamba pa sheshi shikacitike kunembo, isho sheshi shikakume bantu boonse pacishi capanshi.

¹⁸ Mumutwi utokonkelaawo, tulaakwiiya pabushinshimi bumwi bobilo Danyelo mbwaakalemba. Kunyumfwishisha kabotu bushinshimi ubo, kulaakutucafwa soonse kusalawo kabotu shakucita, inga caba ayi tuli bacanike nabi bacinene. Alimwi bulaakutucafwa kulibambila sheshi shikacitike conoono mukwiinga tulaakuba bantu bataloondi alimwi bashomeka abuumbi kuli Yehova.