Mumutwi uyu, twakeeya ayi kuli makani aanji ayandika abuumbi atokuma bantu boonse alimwi abaanjelo: makani aya nkusalashikwa kwa liina lyakwe Yehova liinditeewo. Inga caba ayi bweendeleshi bwakwe Yehova buli kabotu nabi sobwe, bweendeleshi bwakwe ndubasu lwa kusalashikwa kwa liina lyakwe. Alimwi kushomeka kwa bantu alwalo ndubasu lwa kusalashikwa kwa liina lyakwe.

Ino nceebonshi pacecino ciindi tulaamba ayi makani ayandika abuumbi nkusalashikwa kwa liina lyakwe Yehova? Amuleke tubandike pa sheebo shotatwe.

Cakutaanguna, Satana wakabisha liina na impuwo yakwe Yehova, mumuunda wa Edeni. Mwiipusho Satana ngwakeepusha Efa wakalinga kusansulula ayi Yehova ngu mwiinyu alimwi ayi milawo njaakapa Adamu a Efa yakalinga iyumu kukonkela. Lyalo Satana wakaamba shipusene a Yehova nshakaamba. Munshila imwi wakalinga kusansulula ayi Yehova ngumubeshi. Aboobo wakasebanya liina lyakwe Yehova, akuba “Diabolosi” kusansulula ayi “shikubekesha.” (Joni 8:44, NWT) Mukwiinga Efa wakashoma bubeshi Satana mbwakaamba, taakwe kunyumfwila Lesa alimwi wakakaka bweendeleshi bwakwe Lesa. (Mata. 3:1-6) Kushika apacecino ciindi, Satana watolelela kwaamba makani akubeca pali Yehova. Abo bashoma makani akubeca Satana ngaamba, liinji balasalawo kutanyumfwila Yehova. Aboobo kubantu bakwe Lesa, kusebaanishikwa kwa liina lyakwe Yehova lisalalite, ncintu cibiibi abuumbi. Ici nceceebo cinene cipa kwaamba ayi bantu banopenga abuumbi mucishi alimwi musulebo shibiibi.

Cabili, kwaamba ayi shilengwa shoonse shikafubileemo, Yehova alishinishite kusalasha liina lyakwe, kububeshi boonse bwaambwa palinguwe. Ici ncintu ciyandika abuumbi kuli Yehova. Nceceeco ncakaambila ayi: “Ndakusalasha liina lyangu liindiitewo.” (Esek. 36:23) Alimwi Yesu wakatondesha patuba cintu ciyandika abuumbi, basebenshi bakwe Yehova boonse ncobeelete kunoopaililaawo ndyakaamba ayi: “Liina lyanu alisalashikwe.” (Mate. 6:9) Mankanda aanji, Baibo ilaamba pakuyandika kwa kulemeka liina lyakwe Yehova. Amuyeeye pashakubonenaako shiniini shitokonkelaawo: ‘Amulumbaishe liina lya bulemu lyakwe Yehova.’ (1 Maka. 16:29; Kulu. 96:8) “Amwiimbe nyimbo shisumpula liina lyakwe lya bulemu.” (Kulu. 66:2) “Ndanoolemeka liina lyanu lyoonse alyoonse.” (Kulu. 86:12, NWT) Ciindi cimwi Yehova mwiine ndyakaamba kuswa kwiculu, nciindi Yesu ndyaakalinga pa tempele ku Jelusalemu. Yesu wakaamba ayi: “Ta, amupe kwaamba ayi liina lyanu lilemekwe.” Yehova alakwe wakakumbula ayi: “Ndakapa kale kwaamba ayi lilemekwe alimwi ndaakupa kwaamba ayi likalemekwe.”​—Joni 12:28, NWT. a

Catatu, lyoonse kuyanda kwakwe Yehova kulakuma liina na impuwo yakwe. Amuyeeye pakuyandika kwa liina lyakwe Yehova pesule lya kweeleshekwa kwakweelaako, kumamanino a Buleelo Bwakwe Klistu Bwa Myaaka 1,000. Ino baanjelo boonse alimwi abantu balaakulinyumfwa buyani paliina lyakwe Yehova paciindi ici? Kwaamba ayi tucane cikumbulo kumwiipusho uyu, amuleke tubandike pa mbasu shobilo  shikumite kukusalashikwa kwa liina lyakwe Yehova—kushomeka kwa bantu kuli nguwe, aweelela kweendelesha kwiculu apacishi. Paciindi ici bantu teshi bakayandike kutondesha kushomeka kuli Yehova, mukwiinga balaakuba bamaninite alimwi balaakuba bantu bakeeleshekwa kale. Alimwi paciindi ici balaakunoocite kale buumi butamaani. Sa makani aweelela kweendelesha kwiculu alimwi apacishi, alaakutolelela kuba makani ayandika kubantu boonse alimwi a baanjelo? Sobwe. Alimwi teshi kukayandike kutondesha ayi bweendeleshi bwakwe Yehova buli kabotu nabi sobwe. Paciindi ici, baanjelo boonse alimwi abantu balaakunoocatene alimwi balaakusumina bweendeleshi bwakwe Yehova. Ano sa paciindi ici liina lyakwe Yehova lilaakunoocili makani ayandika kubantu bakwe?

Paciindi ici, liina lyakwe Yehova lilaakunooli lyasalashikwa kale cakumaninina. Nacibi boobo, liina lyakwe Yehova lilaakutolelela kuba makani ayandika abuumbi kubasebenshi bakwe boonse. Ino nceebonshi? Mukwiinga balaakunoobona shintu shikankamika Yehova nsheshi akatolelele kucita. Amuyeeye paceeci: Mukwiinga Yesu alaakuliceesha akuboosha bweendeleshi boonse kuli Yehova, Lesa alaakuba ‘mweendeleshi washintu shoonse.’ (1 Koli. 15:28) Na Yesu akacite boobo, bantu boonse pacishi balaakusangalala “kutambula bulemu alwaanguluko bweenka mbuli bana bakwe Lesa.” (Loma. 8:21) Alimwi Yehova alaakukumanisha kuyanda kwakwe kwakuba amukwashi womwi ucatene wa bana bakwe bakwiculu abapacishi capanshi.​—Efe. 1:10.

Ino mukwashi wakwe Yehova wakwiculu a wapacishi capanshi ulaakulinyumfwa buyani na shintu shoonse ishi shikacitike? Ncakutatoonsha kwaamba ayi tulaakunoocisunishishi kulemeka liina libotu lyakwe Yehova. Shikulumbaisha Defedi wakatanjililwa amushimu kulemba ayi: ‘Aalumbaishikwe Yehova Lesa . . . Alilumbaishikwe lyoonse alyoonse liina lyakwe lya bulemu.’ (Kulu. 72:18, 19) Tulaakutolelela kucana nshila shipya alimwi shisangalasha shakulumbaisha liina lyakwe Yehova kwamuyayaya.

Liina lyakwe Yehova, lileemikaninaako shintu shoonse pali nguwe. Na twayeeya pa liina lyakwe Yehova, tulayeeya palusuno ndwaacite. (1 Joni 4:8) Lyoonse tunanokwiibaluka lusuno Yehova ndwaakatutondesha ndyaakatulenga alimwi andyaakatupa cilubula. Kwiilikaawo, lyoonse tunanokwiibaluka ayi bweendeleshi bwakwe buliluleme, alimwi ayi aleendelesha calusuno. Sombi tulaakutolelela kubona Yehova mbwatondesha lusuno kushilengwa shakwe. Tulaakusuna kutolelela kuba abushicibusa anguwe mbuli Ishiwesu, akwiimba nyimbo shakulumbaisha liina lyakwe libotu kwamuyayaya.​—Kulu. 73:28.