1. Ino nciinshi ceenga catucafwa kwaamba ayi tunoonyumfwa kabotu kwiiya bushinshimi bwamu Baibo?

 INO MULALINYUMFWA buyani pamakani akwiiya bushinshimi bwamu Baibo? Mukwesu wacanike waliina lya Ben wakaamba ayi, “Ndanyumfwa kabotu kwiiya bushinshimi bwamu Baibo.” Sa amwebo mbomulinyumfwa? Na mpashi mulaloonda kwiiya bushinshimi bwamu Baibo? Alimwi mpashi inga mwalinyumfwa ayi kwiiya bushinshimi kulanyumfwisha butolo. Nacibi boobo, na mwashiba Yehova ncaakasuminishila ayi bushinshimi bulembwe mu Maswi akwe, amwebo inga mwatalika kunyumfwa kabotu kwiiya bushinshimi.

2. Ino tutokwiiya nshi mumutwi uyu?

² Mumutwi uyu tutobandika ncotuyandikila kwiiya bushinshimi bwamu Baibo asheenga shatucafwa kwiiya bushinshimi. Lyalo tutobandika bushinshimi bobilo bulembetwe mulibuku lyakwe Danyelo akubona mbweenga kunyumfwishisha bushinshimi ubo kwatucafwa pacecino ciindi.

3. Ino nciinshi ncetuyandika kucita kwaamba ayi tucikonshe kunyumfwishisha bushinshimi bwamu Baibo?

³ Tulyeelete kusenga lucafwo kwaamba ayi tunyumfwishishe bushinshimi bwamu Baibo. Amuyeeye pacikoshanyo ici. Amuyeeye kwaamba ayi mwaya kumusena nkomuteshi kabotu, sombi shicibusa wanu ngomwayaakwe lakwe alikwishi kabotu. Alicishi kabotu pamusena mpomubete alimwi alicishi kabotu nshila yomwi ayomwi nkoitooya. Ncakutatoonsha inga mwasangalala ceebo cakwaamba ayi shicibusa wanu wakasumina kwaamba ayi muyaakwe. Yehova alakwe ali mbuli shicibusa uyu. Alicishi kabotu sheshi shikacitike kunembo. Aboobo kwaamba ayi tucikonshe kunyumfwishisha bushinshimi bwamu Baibo, tulyeelete kuliceesha akusenga Yehova kwaamba ayi atucaafwe.​—Danye. 2:28; 2 Pit. 1:19, 20.

4. Ino nceebonshi Yehova wakasalawo kwaamba ayi bushinshimi bulembwe mu Maswi akwe? (Jelemiya 29:11) (Amubone acikope.)

⁴ Bweenka mbuli mushali uli oonse uli kabotu, Yehova alisuni kwaamba ayi bana bakwe bakabe abuumi bubotu. (Amubelenge Jelemiya  29:11.) Sombi mubupusano amushali uli oonse, Yehova inga watulwiita sheshi shikacitike kunembo alimwi lyoonse nshaamba shilacitika. Yehova wakasala basankwa kulemba bushinshimi mu Maswi akwe kwaamba ayi tucikonshe kushiba shintu shiyandika, kashitana kucitika. (Isa. 46:10) Bushinshimi bwamu Baibo ncipo cibotu kuswa kuli Ishiwesu wakwiculu. Sombi ino nshiinshi sheenga shamucafwa kushoma cakutatoonsha ayi bushinshimi bwamu Baibo bulaakukumanishikwa?

5. Ino nshiinshi bacanike nsheenga beeya kuswa kucakubonenaako cakwe Max?

⁵ Kucikolo liinji bacanike balaba pomwi abantu batalemeki Baibo nshoyaamba. Shintu bantu abo nshobaamba akucita inga shapa kwaamba ayi Bakamboni bacanike batalike kutoonsha nshobashoma. Amunyumfwe shakacitikila mukwesu waliina lya Max. Wakaamba ayi: “Ndyendakalinga cikula bwangu, ndakatalika kutoonsha na bashali bangu bakalinga mubupailishi bwancine. Alimwi ndakatalika kutoonsha na Baibo yakatanjililwa a Lesa.” Ino bashali bakwe bakacita buyani? Wakaamba ayi: “Bakankalikila moyo, nabi kwaamba ayi ndakabona ayi balisukama.” Bashali bakwe Max bakasebensesha Baibo kukumbula miipusho njaakalinga kucite. Max alakwe kuli nshaakacita. Wakaamba ayi: “Ndakatalika kwiiya bushinshimi bwamu Baibo palwaangu. Alimwi ndakalinga kubandikaako abacanike bamwi mulibungano lyesu pamakani ngondakalinga kwiiya.” Ino nshiinshi shakaswaamo? Max wakaamba ayi: “Pesule lyakucita boobo, ndakesa mukushoma cakutatoonsha ayi Baibo yakatanjililwa a Lesa!”

6. Ino nciinshi ncomweelete kucita na mwatalika kutoonsha, alimwi ino nceebonshi?

⁶ Na amwebo mwatalika kutoonsha na Baibo nshoyaamba nshancine bweenka mbuli Max, tamweelete kulinyumfwa cibiibi. Sombi mulyeelete kucitawo comwi cakufwambaana. Kutoonsha kuli anga ni ndalabwa. Na ndalabwa mwashilekabo, inga shanyonyoola cintu cimwi ciyandika abuumbi. Kwaamba ayi mutalike kukushako “ndalabwa” shoonse kulushomo lwanu, mulyeelete kuliipusha ayi, ‘Sa ndashoma Baibo nshoyaamba pasheshi shikacitike kunembo?’ Na mulatoonsha, nkokwaamba ayi mulyeelete kutalika kwiiya bushinshimi bwamu Baibo bwakakumanishikwa kale. Amuleke tubandike mbweenga mwacita boobo.

7. Ino nshiinshi shakacafwa Danyelo kwiiya bushinshimi bwamu Baibo? (Danyelo 12:10) (Amubone acikope.)

⁷ Danyelo wakatondesha cakubonenako cibotu ca mbweenga tweeya bushinshimi. Wakalinga kwiiya bushinshimi aluyaando lweelete, lwakwaamba ayi ashibe cancine. Alimwi Danyelo wakalinga kuliceesha, mukwiinga wakalinga kucishi ayi Yehova inga wamucafwa kunyumfwishisha bushinshimi na watolelela kuba abushicibusa buyumu anguwe akunoomunyumfwila. (Danye. 2:27, 28; amubelenge Danyelo 12:10.) Wakatondesha ayi wakalinga kuliceesha kwiinda mukucinka manungo mulucafwo lwakwe Yehova. (Danye. 2:18) Kwiilikaawo, Danyelo wakalinga kwiiya bushinshimi cakubikila maano. Wakalinga kuyandoola shikumbulo mumbasu sha Malembo akalingaako paciindi cilya. (Jele. 25:11, 12; Danye. 9:2) Ino cakubonenaako cakwe Danyelo inga mwacikonkela buyani?

8. Ino nciinshi cipa bamwi kwiiya bushinshimi bwamu Baibo, sombi ino nciinshi ncotweelete kucita?

⁸ Amuyeeye pa luyaando ndomutokwiiyila bushinshimi. Sa mutokwiiya bushinshimi bwamu Baibo ceebo cakusunishisha kushiba cancine? Na ubo mbocibete, Yehova alaakumucafwa. (Joni 4:23, 24; 14:16, 17) Nacibi boobo, bantu bamwi baleeya bushinshimi bwamu Baibo ceebo ca sheebo  shimwi. Bamwi balacita boobo ceebo cakuyeeya ayi inga bacana bumboni butondesha ayi Baibo taina kutanjililwa a Lesa. Balayeeya ayi na bacana bumboni butondesha ayi Baibo taina kutanjililwa a Lesa, nkokwaamba ayi inga batalika kulisalila cibotu acibiibi. Nacibi boobo, tulyeelete kuba aluyaando lweelete ndyetutokwiiya bushinshimi bwamu Baibo. Kwiilikaawo, kuli mubo umwi uyandika ngotweelete kubaawo kwaamba ayi tunyumfwishishe bushinshimi bwamu Baibo.

9. Ino ngumubo nshi ngotuyandika kubaawo kwaamba ayi tucikoonshe kunyumfwishisha bushinshimi bwamu Baibo? Amusansulule.

⁹ Amube baliceesha. Yehova wakashomesha kucafwa baabo baliceesha. (Jemu. 4:6) Aboobo tulyeelete kupaila kuli nguwe kumusenga kwaamba ayi atucaafwe kunyumfwishisha bushinshimi bwamu Baibo. Alimwi tulyeelete kushiba ayi tulayandika lucafwo lwa musebenshi ushomeka uyo Yehova ngwatosebensesha kutupa shakulya shakumushimu paciindi ceelete. (Luka 12:42) Yehova ngu Lesa ucita shintu munshila ibambitwe kabotu, aboobo inga twalangila ayi inga wasebenseshabo nshila yomwi kwaamba ayi atucaafwe kunyumfwishisha cancine cili mu Maswi akwe.​—1 Koli. 14:33; Efe. 4:4-6.

10. Ino nshiinshi nshomweeya kuswa kucakubonenaako cakwe Nankashi Esther?

¹⁰ Amwiiye cakubikila maano. Amutaangune kwiiya bushinshimi bumusangalasha alimwi akulangoola makani aamba pabushinshimi ubo. Ishi nshaakacita nankashi waliina lya Esther. Wakalinga kusuni kwiiya shiinji pabushinshimi bwaamba pakusa kwakwe Mesiya. Wakaamba ayi: “Ndyendakalinga kucite myaaka 15, ndakatalika kulangoola bumboni butondesha ayi bushinshimi ubu bwakalembwa paciindi Yesu kaatana kusa pacishi.” Makani ngaakeeya kuswa mumabuku akupeta amu Lweenge Lufwite, akamucafwa kushoma cakutatonsha pamakani aya. Wakaamba ayi: “Bushinshimi bumwi bwakalembwa mumabuku aya, bwakalembwa Klistu kaatana kusa pacishi. Aboobo cilyeelete kwaamba ayi bushinshimi bulembetweemo bwakatanjililwa a Lesa.” Esther wakatolelela akwaamba ayi: “Ndakabelenga bushinshimi ubu mankanda aanji kwaamba ayi mbunyumfwishishe.” Sombi alikondetwe ceebo cakweelesha cankusu kwiiya bushinshimi ubu. Pesule lyakwiiya cakubikila maano bushinshimi buunji bwamu Baibo, wakaamba ayi, “Ndakashoma cakutatonsha ayi Baibo nshoyaamba nshancine!”

11. Ino kushoma cakutatoonsha ayi Baibo nshoyaamba nshancine kulatucafwa buyani?

¹¹ Na twaboona bushinshimi bumwi bulembetwe mu Maswi akwe Lesa mbobwakakumanishikwa, tulamushoma abuumbi Yehova amubutanjilishi buli boonse mbwaatupa. Kwiilikaawo, bushinshimi bwamu Baibo bulatucafwa kutolelela kulangila ayi buumi bulaakubota kunembo, nabi twiinde mumapensho ali buyani pacecino ciindi. Amuleke tubandikeko pa bushinshimi bobilo Danyelo mbwaakalemba ubo butokumanishikwa pacecino ciindi. Kunyumfwishisha bushinshimi ubu inga kwatucafwa kusalawo kabotu shakucita.

12. Ino shimpanta sha “nshimbi isenkene abulongo” shileemikaninaako nshi? (Danyelo 2:41-43)

¹² Amubelenge Danyelo 2:41-43. Muciloto Danyelo ncaakasansulwiita Mwaami Nebukadinesa, shimpanta sha cibumbwabumbwa mwaami ncaakabona, shakalinga sha “nshimbi isenkene abulongo.” Na tweelanya bushinshimi ubu ku bushinshimi bumwi bulembetwe mulibuku limwi lyakwe Danyelo alya Ciyubululo, inga twaamba ayi shimpanta  shileemikaninaako buleelo bucite nkusu abuumbi pacecino ciindi, bwa Anglo-America. Kwaamba pa buleelo ubu bucite nkusu abuumbi nsengwe yoonse, Danyelo wakaamba ayi “buleelo ubu bulaakuba buyumu mushipansha shimwi alimwi butacite nkusu mumwi.” Ino nceebonshi tabucite nkusu mumwi? Mukwiinga bantu batapukite na bantubo, abo beemikaninwaako abulongo, balapa kwaamba ayi buleelo ubu bwaalilwe kusebensesha bunene nkusu nabi kuba buyumu abuumbi bweenka mbuli nshimbi. b

13. Ino ngamakani nshi ancine ayandika ngotwiiya kuswa kubushinshimi ubu?

¹³ Tuleeya makani aanji ancine kuswa ku ciloto ca cibumbwabumbwa Danyelo ncaakasansulula, bunene bunene kushimpanta sha cibumbwabumbwa ico. Cakutaanguna, buleelo bucite nkusu abuumbi nsengwe yoonse bwa Anglo-America bwatondesha ayi bulicite nkusu. Kucakubonenaako, buleelo ubu bwakalinga kucite lubasu luyandika abuumbi mukukoma Nkondo Yapacishi Coonse Yakutaanguna alimwi a Yabili. Nacibi boobo, buleelo ubu tabucite nkusu mushipansha shimwi alimwi bulaakutolelela kutaba ankusu mushipansha shimwi ceebo cakwaamba ayi balelwa balalwana beene abeene alimwi akulwana mfulumeende. Cabili, buleelo ubu mbobuleelo bwakweelaako kweendelesha, Bwaami bwakwe Lesa kabutana kunyonyoola maleelo abantu amwi oonse. Nabi kwaamba ayi cimwi ciindi shishi shimwi shilalwana buleelo bwa Anglo-America, teshi shikabukusheewo pabweendeleshi. Tulishi boobo mukwiinga “libwe” ilyo liimikaninaako Bwaami bwakwe Lesa, lilaakupwayoola shimpanta sha cibumbwabumbwa isho shiimikaninaako buleelo bwa Anglo-America.​—Danye. 2:34, 35, 44, 45.

14. Ino kunyumfwishisha bushinshimi bwaamba pa shimpanta sha nshimbi isenkene abulongo inga kwatucafwa buyani kunoosala kabotu shakucita?

¹⁴ Sa mulashoma cakutatoonsha ayi bushinshimi Danyelo mbwaakalemba bwaamba pa shimpanta sha nshimbi isenkene abulongo butokumanishikwa? Na ubo mbocibete, mulaakunoosala kabotu shakucita mubuumi bwanu. Teshi mukabikile maano ku kweelesha kuba amaali aanji na shintu shiinji lwakumubili mukwiinga mulicishi kwaamba ayi conoonobo cishi cino cibiibi cilaakunyonyoolwa. (Luka 12:16-21; 1 Joni 2:15-17) Alimwi kunyumfwishisha bushinshimi ubu kulaakumucafwa kubona kuyandika kwa ncito yakushimikila akwiisha bantu. (Mate. 6:33; 28:18-20) Ano pesule lyakwaamba ayi tweeya bushinshimi ubu, amuliipushe ayi, ‘Sa nshonsala kucita shilatondesha ayi ndashoma cakutatoonsha ayi conoonobo Bwaami bwakwe Lesa bulaakukushaawo mfulumeende shabantu shoonse?’

15. Ino “mwaami wakumatwa” alimwi “amwaami wakumalenge” aleemikaninaako nshi? (Danyelo 11:40)

¹⁵ Amubelenge Danyelo 11:40, NWT. Danyelo capita 11 ilaamba pa bamaami bobilo na mfulumeende isho shatolelela kulwana, mukwiinga yomwi ayomwi ilasuna kuba ankusu kwiinda ibye. Na tweelanisha bushinshimi ubu kubushinshimi bumwi bwamu Baibo, inga twaamba ayi “mwaami wakumatwa” aleemikaninaako mfulumeende ya Russia ashishi shisebensela pomwi anjiyo. Lyalo “mwaami wakumalenge” aleemikaninaako buleelo bucite nkusu abuumbi nsengwe yoonse bwa Anglo-America. c

16. Ino nshiinshi “mwaami wakumatwa” nshaacita kubantu bakwe Lesa?

¹⁶ Bantu bakwe Lesa batopenshekwa ku “mwaami wakumatwa.” Bakamboni bamwi bakoomwa akubikwa mujeele ceebo ca lushomo lwabo. Muciindi cakwaamba ayi bamakwesu baloonde ceebo cakupenshekwa ku mwaami wakumatwa, kupenshekwa kwayumya lushomo lwabo muli Yehova amu Maswi akwe. Ino nceebonshi? Mukwiinga bamakwesu balicishi kwaamba ayi kupenshekwa kwa bantu bakwe Lesa kutookumanisha bushinshimi mbotucana mulibuku lya Danyelo. d (Danye. 11:41) Kushiba makani  aya inga kwatucafwa kutolelela kulangila buumi bubotu kunembo akutolelela kushomeka kuli Yehova.

17. Ino nga mapensho nshi bantu bakwe Lesa beendeleshekwa a “mwaami wakumalenge” ngobeendaamo?

¹⁷ Kale kale, “mwaami wakumalenge” alakwe wakapenshawo bantu bakwe Yehova. Kucakubonenaako, paciindi ca Nkondo Yapacishi Coonse Yakutaanguna alimwi a Yabili, bamakwesu bamwi bakaangwa ceebo cakukaka kuya ku nkondo. Alimwi baana bamwi bakatandwa kushikolo ceebo cakukaka kutondesha bulemu ku fulagi. Mumyaaka yaconoono, kushomeka kwa bantu bakwe Yehova abo beendeleshekwa a “mwaami wakumalenge” kwakeeleshekwa munshila shipusenepusene. Kucakubonenaako, na kuli shakuvoota mpashi Mwineklistu inga weeleshekwa kuba kulubasu lwa kabunga kamwi ka mapolitiki na kusuna shimapolitiki umwi. Nabi kwaamba ayi inga taavotiiwo, inga kaalinyumfwa ayi inga cabota na kabunga kamwi ka mapolitiki kawiina. Nacibi boobo, kwaamba ayi tutaabanimo lubasu nabibo paniini mu shamapolitiki, tulyeelete kucenjela ashintu nshetucita, nshetuyeeya alimwi ambotulinyumfwa!​—Joni 15:18, 19; 18:36.

18. Ino tulacita buyani na twabona “mwaami wakumatwa” mbwatopikishanya a “mwaami wakumalenge”? (Amubone acikope.)

 ¹⁸ Abo batacite lushomo mu bushinshimi bwamu Baibo, inga balisukama abuumbi na babona “mwaami wakumalenge” mbwatoshindikana a “mwaami wakumatwa.” (Danye. 11:40) Bamaami boonse bobilo balicite maboomu akali abuumbi eenga anyonyoola shintu shoonse shicite buumi pacishi. Sombi tulishi kwaamba ayi Yehova teshi akasuminishewo cintu camushobo uyu kucitika. (Isa. 45:18) Aboobo muciindi cakuloonda pasheshi shikacitike kunembo, kupikishanya kuli pakati ka “mwaami wakumatwa” a “mwaami wakumalenge” kulayumya lushomo lwesu. Kulatondesha ayi mamanino acishi cino ali pafwiifwi.

19. Ino nciinshi ncotweelete kushiba pa bushinshimi bwamu Baibo?

¹⁹ Tatucishiwo bushinshimi bumwi bwamu Baibo mbweshi bukakumanishikwe. Nabibo mushinshimi Danyelo taakwe kunyumfwishisha shintu shoonse nshaakalemba. (Danye. 12:8, 9) Ano na swebo katutacishi kabotu bushinshimi bumwi mbweshi bukakumanishikwe, tacaambi ayi teshi bukakumanishikweewo. Inga twashoma cakutatoonsha ayi Yehova alaakutucafwa kunyumfwishisha makani amwi paciindi ceelete, bweenka mbwaakacita kale kale.​—Amo. 3:7.

20. Ino mbushinshimi nshi bwamu Baibo busangalasha bweshi bukakumanishikwe conoono, alimwi ino nciinshi ncotweelete kutolelela kucita?

²⁰ Shishi shilakwaambilisha ayi kuli “luumuno akuliiba.” (1 Tesa. 5:3, NWT) Lyalo mfulumeende sha bantu shilaakulwana bupailishi bwakubeca akubunyonyoola. (Ciyu. 17:16, 17) Pesule lyakucita boobo, shilaakulwana bantu bakwe Lesa. (Esek. 38:18, 19) Lyalo nkoondo yakweelaako ya Amagedoni ilaakutalika. (Ciyu. 16:14, 16) Inga twashoma cakutatonsha ayi shintu ishi shilaakucitika conoono. Kushikila ciindi ico cikashiike, atutolelele kutondesha kulumba kuli Ishiwesu wakwiculu kwiinda mukubikila maano ku bushinshimi bwamu Baibo akucafwa bamwi kucita boobo.