1. Ino ngumwiipusho nshi ngweenga twaliipusha na twayeeya palushomo Abulaamu ndwaakalinga kucite?

 NABI kwaamba ayi bantu baanji bakanyumfwako makani amwi pali Abulaamu, balishibo makani aniini aamba pali nguwe. Nacibi boobo, mwebo mulicishi shiinji pali Abulaamu. Kucakubonenaako, mulicishi ayi Abulaamu wakalinga kwiitwa ayi ‘ishi wa baabo boonse bacite lushomo.’ (Loma. 4:11) Sombi mpashi inga mwaliipusha ayi, ‘Sa inga ndacikonsha kuba alushomo luyumu muli Lesa bweenka mbuli Abulaamu?’ Ee inga mwacikonsha.

2. Ino nceebonshi kwiiya cakubonenaako cakwe Abulaamu kulayandika? (Jemusi 2:​22, 23)

² Nshila yomwi mbweenga twaba alushomo luyumu bweenka mbuli Abulaamu, nkwiinda mukwiiya cakubonenaako cakwe. Lyoonse Abulaamu wakalinga kunyumfwila Lesa. Wakaya mukukala kulaale akumishaabo, kukala mu matente kwamyaaka iinji alimwi wakalinga kulibambite kubenga Isaki mwanaakwe ngwaakalinga kusuni abuumbi mbuli mulambu. Abulaamu wakacita sheeshi shoonse mukwiinga wakalinga kucite lushomo luyumu muli Yehova. Abulaamu wakasangalasha Yehova akuba abushicibusa anguwe ceebo ca lushomo amicito yakwe ibotu. (Amubelenge Jemusi 2:​22, 23.) Yehova alisuni kwaamba ayi soonse, kwiilikaawo andimwe, tunoomusangalasha akuba abushicibusa anguwe. Aboobo wakatanjilila Paulo a Jemusi kulemba makani aamba pacakubonenaako cakwe Abulaamu. Amuleke tubandike makani ngotucana mu Bene Loma capita 4 a Jemusi capita 2, ayo aamba pacakubonenaako cakwe Abulaamu. Paulo a Jemusi boonse bakaamba makani amwi ayandika abuumbi pali Abulaamu.

3. Ino ndilembo nshi Paulo a Jemusi mpobakakusha maswi amwi ngobakalemba?

³ Paulo a Jemusi boonse bakaamba pamaswi ngotucana pa Matalikilo  15:​6, apo paamba ayi: ‘Abulaamu wakashoma Yehova, aboobo Lesa wakamwaamba ayi uliluleme.’ Yehova alabona ayi muntu aliluleme na kaatacite kampenda alimwi kaacita shimusangalasha. Cilakankamika kwaamba ayi Yehova inga wabona muntu utamaninite alimwi ucita shibiibi ayi taacite kampenda! Ncakutatoonsha kwaamba ayi mulisuni ayi Yehova anoomubona ayi muliluleme. Alimwi inga cakonsheka kucita boobo. Ano tutobandika pacakapa kwaamba ayi Yehova anoobona Abulaamu ayi aliluleme anshotweelete kucita kwaamba ayi aswebo anootubona ayi tuliluleme.

4. Ino nciinshi cipa kwaamba ayi citubete ciyumu kuba bantu baluleme?

⁴ Munkalata Paulo njaakalembela bene Loma, wakaamba ayi bantu boonse balabisha. (Loma. 3:23) Aboobo sa inga cakonsheka kuba baluleme akucita shisangalasha Lesa? Paulo wakaamba pacakubonenaako cakwe Abulaamu kwaamba ayi acafwe Beneklistu balibambite kwaaluka, kucana cikumbulo kumwiipusho uyu.

5. Ino nceebonshi Yehova wakaamba ayi Abulaamu ngumuntu ululeme? (Bene Loma 4:​2-4)

⁵ Yehova wakaamba ayi Abulaamu ngumuntu ululeme paciindi ndyaakalinga kunookala ku Kenani. Ino nceebonshi Yehova wakaamba ayi Abulaamu ngumuntu ululeme? Sa nceebo cakwaamba ayi Abulaamu wakalinga kukonkela Milawo yakwe Mose yoonse? Sobwe napaceyi. (Loma. 4:13) Bene Isilaeli bakapekwa Milawo iyi pesule lya myaaka 400 kuswa ciindi Yehova ndyaakaamba ayi Abulaamu ngumuntu ululeme. Aboobo ino nceebonshi Yehova wakaamba ayi Abulaamu ngumuntu ululeme? Yehova wakatondesha nkuumbu kuli Abulaamu akumwaamba ayi ngumuntu ululeme ceebo ca lushomo lwakwe.—Amubelenge Bene Loma 4:​2-4.

6. Ino nceebonshi Yehova inga wabona muntu ucita shibiibi ayi aliluleme?

⁶ Paulo wakaamba ayi na muntu waba alushomo muli Lesa, “Lesa ulamubona ayi uliluleme kwiinda mulushomo lwakwe.” (Loma. 4:5) Paulo wakeelikaawo akwaamba ayi: ‘Ici nceceeci Defedi ncaakaambila ayi ulicite coolwe muntu uyo Lesa ngwaalulamika ceebo calushomo, kuteshi ceebo ca milimo ibotu njaacita. Wakaamba ayi: ‘Balicite coolwe abo Lesa mbaalekelela shibiibi shabo, abo bacite shibiibi nshaakashiminganya; balicite coolwe abo Yehova mbwaateebalukili shibiibi shabo.’’ (Loma. 4:​6-8; Kulu. 32:​1, 2) Lesa alalekelela shibiibi sha baabo baba alushomo muli nguwe. Alabalekelela cakumaninina alimwi taibaluki shibiibi shabo. Alabona ayi mbantu batacite kampenda alimwi baluleme ceebo calushomo lwabo.

7. Ino nceebonshi nceenga twaambila ayi basebenshi bakwe Lesa bakale kale bakalinga kululeme?

⁷ Nabi kwaamba ayi Lesa wakalinga kubona Abulaamu, Defedi alimwi abasebenshi bakwe bamwi bashomeka ayi baliluleme, tabakalinga kumaninitewo alimwi bakalinga kubisha. Sombi Lesa wakalinga kubabona ayi baliluleme ceebo ca lushomo lwabo, mubupusano abaabo batakalinga kucite lushomo muli nguwe. (Efe. 2:12) Munkalata Paulo njaakalembela bene Loma, wakaamba ayi tulyeelete kuba alushomo kwaamba ayi tube abushicibusa a Lesa. Abulaamu a Defedi bakalinga beshicibusa bakwe Lesa ceebo calushomo ndobakalinga kucite muli nguwe. Aswebo inga twaba abushicibusa a Lesa na katucite lushomo muli nguwe.

8-9. Ino nshiinshi shiteshi shancine bamwi nshobashoma pamakani Paulo a Jemusi ngobakalemba, alimwi ino nceebonshi?

⁸ Kwamyaaka iinji, bamatanjilili babupailishi balapikishanya pamakani akuba alushomo akuyandika kwa micito. Bamatanjilili babupailishi bamwi balaiisha ayi ncoweeletebo kucita kwaamba ayi ukapulushikwe, nkushoma mu Mwaami Yesu Klistu. Mpashi mwakanyumfwaawo bamwi kabaamba ayi, “Amushome muli Yesu lyalo mulaakupulushikwa.” Bamwi balaamba ayi Paulo wakalinga kwiisha makani aya mukwiinga  wakaamba ayi: ‘Ulicite coolwe muntu uyo Lesa ngwaalulamika ceebo calushomo, kuteshi ceebo ca milimo ibotu njaacita.’ (Loma. 4:6) Nacibi boobo, bamwi balaamba ayi inga wapulushikwa na kooya kumisena beshi maceeci njobabona ayi ilisalalite akucita shibotu kubamwi. Mpashi inga baamba maswi ngotucana pa Jemusi 2:24 ayo aamba ayi: “Muntu ulalulamikwa pameenso akwe Lesa kwiinda mumicito kuteshibo mulushomo lweenka.”

⁹ Ceebo cakupusana uku kwashintu beshibupailishi nshobashoma, bantu bamwi bakeeya Baibo abuumbi balaamba ayi Paulo a Jemusi bakapikishanya pashintu muntu nshaeelete kucita kwaamba ayi asangalashe Lesa. Bamatanjilili babupailishi bamwi inga baamba ayi Paulo wakalinga kushoma ayi muntu inga waba ululeme na kaacite lushomo kuteshi ceebo ca micito, sombi Jemusi lakwe wakalinga kushoma ayi micito ilayandika kwaamba ayi muntu asangalashe Lesa. Muntu umwi wakeeya shabupailishi abuumbi wakaamba ayi: “Jemusi taakwe kunyumfwishisha Paulo ncaakaambila ayi muntu [inga wabonwa ayi uliluleme] ceebo ca lushomo lweenka kuteshi ceebo ca micito.” Sombi Yehova ngowakatanjilila Paulo a Jemusi kulemba makani ngobakalemba. (2 Timo. 3:16) Aboobo kuli nshila yuubu mbweenga twanyumfwisha nshobakalemba. Tulyeelete kubona makani amwi ngobakalinga kwaambawo mumakani ngobakalemba.

10. Ino ni “micito” nshi Paulo njaakalinga kwaambawo? (Bene Loma 3:​21, 28) (Amubone acikope.)

¹⁰ Ino ni “micito” nshi Paulo njaakalinga kwaambaawo mu Bene Loma capita 3 a 4? Cinene ncaakalinga kwaambaawo nkukonkela Milawo yakwe Mose iyo bene Isilaeli njobakapekwa. (Amubelenge Bene Loma 3:​21, 28.) Citoboneka ayi muciindi cakwe Paulo, Beneklistu baJuda bamwi bakalinga kunoocikonkela Milawo yakwe Mose. Aboobo Paulo wakaamba pacakubonenaako cakwe Abulaamu kwaamba ayi atondeshe ayi muntu tayandiki kukonkela Milawo yakwe Mose  kwaamba ayi Lesa amuboone ayi aliluleme. Sombi Paulo wakaamba ayi tulyeelete kuba alushomo. Ici cilayuminisha mukwiinga cilatwiisha ayi na twaba alushomo muli Lesa amuli Klistu, inga watubona ayi tuliluleme.

11. Ino ni “micito” nshi Jemusi njaakalinga kwaambawo?

¹¹ Nacibi boobo, “micito” yakaambwawo mu Jemusi capita 2 teshi kukonkela Milawo yakwe Mose. Jemusi wakalinga kwaamba pamicito, na shintu Beneklistu nshobacita bushiku abushiku. Micito iyo ilatondesha na Mwineklistu alicite lushomo lwancinencine muli Lesa nabi sobwe. Amuleke tubandike pashakubonenaako shobilo Jemusi nshaakaamba.

12. Ino nshakubonenaako nshi Jemusi nshaakaamba shitondesha lushomo amicito mbosheendelana? (Amubone acikope.)

¹² Mucakubonenaako cakutaanguna, Jemusi wakaamba ayi Beneklistu tabeelete kuba akasalulushi. Wakasansulula citeente ici ndyaakaamba pa musankwa wakatondesha nkuumbu kumuntu mubile sombi utakwe kutondesha nkuumbu ku mukandu. Jemusi wakaamba ayi musankwa uyo inga walyaamba ayi alicite lushomo, sombi nshaakalinga kucita shakalinga kutondesha ayi taaciteewo lushomo. (Jemu. 2:​1-5, 9) Mucakubonenaako cabili, Jemusi wakaamba pamuntu wakabona ‘mukwesu nabi nankashi utacite shakufwala nabi shakulya,’ sombi utakwe kumucafwa. Nabi kwaamba ayi muntu uyo wakalinga kwaamba ayi alicite lushomo, nshaakacita shakatondesha ayi taacitewo lushomo. Kweelana a Jemusi mbwaakalemba, “lushomo lutacite micito lulifwite.”—Jemu. 2:​14-17.

13. Ino ncakubonenaako nshi Jemusi ncaakaamba kutondesha ayi tulayandika kuba alushomo akulutondesha kwiinda mushintu nshotucita? (Jemusi 2:​25, 26)

¹³ Jemusi wakaamba pacakubonenaako cakwe Laabu uyo wakatondesha ayi wakalinga kucite lushomo kwiinda mushintu nshaakacita. (Amubelenge Jemusi 2:​25, 26.) Wakanyumfwako makani amwi pali Yehova alimwi wakashiba  ayi wakalinga kucafwa bene Isilaeli. (Joshu. 2:​9-11) Wakatondesha ayi wakalinga kucite lushomo kwiinda mukushitilisha basenseshi bobilo bene Isilaeli ndyebakalinga kusuni kucaikwa. Aboobo nabi kwaamba ayi Laabu taakalinga kumaninitewo alimwi taakalinga mwine Isilaeli, Lesa wakamubona ayi aliluleme, bweenka mbocakalinga kuli Abulaamu. Cakubonenaako cakwe cilatwiisha ayi cilayandika abuumbi kutondesha ayi tulicite lushomo kwiinda mushintu nshotucita.

14. Ino nceebonshi nceenga twaambila ayi makani Paulo a Jemusi ngobakalemba aleendelana?

¹⁴ Aboobo Paulo a Jemusi bakalinga kusansulula lushomo amicito munshila shobilo shipusene. Paulo wakalinga kulwiita Beneklistu baJuda ayi Yehova inga taababoni ayi mbantu baluleme kwiinda mukukonkelabo Milawo yakwe Mose. Jemusi wakalinga kucafwa Beneklistu boonse kushiba kuyandika kwakutondesha lushomo lwabo kwiinda mukucitila bamwi shibotu.

15. Ino nshiinshi nsheenga twaciita kwaamba ayi tutondeshe ayi tulicite lushomo? (Amubone ashikope.)

¹⁵ Yehova taatulwiiti ayi tulyeelete kucita shintu sheenka Abulaamu nshaakacita, kwaamba ayi atuboone ayi tuliluleme. Cancine ncakwaamba ayi, kuli nshila shiinji mbweenga twatondesha ayi tulicite lushomo kwiinda mumicito yesu. Inga twatambula bapya mulibungano, kucafwa bamakwesu abenankashi abo batoyandika lucafwo, akucita shibotu ku bamumukwashi wesu. Kucita sheeshi kulaakusangalasha Lesa alimwi alaakutupa shoolwe. (Loma. 15:7; 1 Timo. 5:​4, 8; 1 Joni 3:18) Cintu comwi cibotu ncotucita kutondesha ayi tulicite lushomo, nkusebensa cankusu muncito yakushimikila makani abotu. (1 Timo. 4:16) Kwiinda mushintu nshotucita, soonse inga twatondesha ayi tulashoma ayi shishomesho shakwe Yehova shilaakukumanishikwa alimwi ayi shoonse nshaacita shili kabotu. Na twacita boobo, tulashoma cakutatoonsha ayi Lesa alaakunotubona  ayi tuliluleme alimwi tulaakuba abushicibusa anguwe.

16. Ino nciinshi Abulaamu ncaakalinga kulangila alimwi ncaakalinga kushoma ayi cilaakucitika?

¹⁶ Bene Loma capita 4 ilaamba paciiyo acimwi ciyandika nceenga tweeya kuswa kucakubonenaako cakwe Abulaamu: kuyandika kwa kulangila. Yehova wakashomesha ayi Abulaamu ‘alaakuba mushali wa mishobo iinji’ alimwi ayi kwiinda muli nguwe “mishobo yoonse” ilaakutambula shoolwe. Amuyeeyebo pakulangila uku kubotu Abulaamu nkwaakalinga kucite! (Mata. 12:3; 15:5; 17:4; Loma. 4:17) Nacibi boobo, nabi paciindi Abulaamu ndyaakalinga kucite myaaka 100 lyalo Saala 90, tabakalinga kuciteewo mwaana. Cakalinga kuboneka anga Abulaamu a Saala teshi bakabewo amwaana. Sombi ubu bwakalinga mbweelesho bunene kuli Abulaamu. Nacibi boobo, “Abulaamu wakashoma akulangila nakubi kwaamba ayi cakalinga kuboneka anga teshi cikacitike. Aboobo wakaba mushali wa mishobo yoonse.” (Loma. 4:​18, 19) Alimwi mukuya kwaciindi, Abulaamu ncaakalinga kulangila cakakumanishikwa. Wakaba a Isaki mwaana musankwa, uyo ngwaakalinga kulangila kwaciindi cilaamfu.—Loma. 4:​20-22.

17. Ino tulishi buyani ayi Lesa inga kaatubona ayi tuliluleme alimwi inga twaba abushicibusa anguwe?

¹⁷ Inga twaciita shintu shisangalasha Lesa, inga kaatubona ayi tuliluleme akuba abushicibusa anguwe bweenka mbocakalinga kuli Abulaamu. Aya ngomakani Paulo ngakaambawo ndyaakalemba ayi: “Maswi aya aamba ayi, ‘Lesa wakamubona ayi uliluleme,’ taambi shapali Abulaamu eenka. Sombi alaamba apali ndiswe sweshi tukalulamikwe pameenso akwe Lesa ceebo ca lushomo ndotucite muli nguwe wakabusha Yesu.” (Loma. 4:​23, 24) Bweenka mbuli Abulaamu, tulyeelete kuba alushomo akutondesha lushomo ulo kwiinda mumicito yesu akushoma cakutatoonsha ayi Lesa nshaakatushomesha shilaakukumanishikwa. Paulo wakatolelela kwaamba pamakani akulangila mu Bene Loma capita 5, ayo ngeshi tukabandikeewo mumutwi utokonkelaawo.