NCAKUTATOONSHA kwaamba ayi mulasangalala pashipo shipusenepusene Yehova nshaakamupa alimwi mulalumba pakumupa nkusu sha kusala mbweenga mwasebensesha shipo isho. Cisangalasha ncakwaamba ayi, Baibo ilatondesha ayi waini ncipo kuswa kuli Lesa ndyeyaamba ayi: ‘Shakulya shilapa kwaamba ayi bantu kabaseka, alimwi waini ulasangalasha moyo.’ (Shiku. 10:19; Kulu. 104:15) Nacibi boobo, mpashi mwakabona ayi bantu bamwi bakacana mapensho ceebo cakunwa bwalwa. Alimwi bantu nsengwe yoonse balabona makani akunwa bwalwa munshila shipusenepusene. Aboobo ino nshiinshi sheenga shacafwa Beneklistu kunoosala cabusongo pamakani akunwa bwalwa?

Tacicite mulandu amusena nkotukala na bukaalo mbotwakakomenenaamo, kunoobona bwalwa bweenka Lesa mbwaabubona, kulaakutupa kuba alusangalalo mubuumi.

Mpashi amwebo mwakabonaawo ayi bantu baanji mucishi, liinji balanwa bwalwa alimwi balanwa cakwiindilila. Bamwi inga banwa bwalwa ceebo cakwaamba ayi bulabapa kunyumfwa kabotu. Bamwi balanwa kwaamba ayi batanoolisukama pamapensho ngobatokwiindaamo. Alimwi mumisena imwi, bantu banwa bwalwa abuumbi balababona ayi mbayumu.

Nacibo boobo, Beneklistu bakapekwa butanjilishi buli kabotu kuswa ku Mulengi wabo shilusuno. Kucakubonenaako, wakatulwiita shintu shibiibi abuumbi shiswaamo na muntu kaanwa cakwiindilila. Mpashi twakabelengaawo kale pa Tushimpi 23:​29-35 apo pasansulula kabotu muntu mbwaaba na wakolwa amapensho amwi ngaacana. a Munene umwi mulibungano waliina lya Daniel uyo ukala ku Europe, aleebaluka mbwaakalinga kaatana kuba Mwineklistu wancine. Wakaamba ayi: “Kunwa bwalwa cakwiindilila kwakapa kwaamba ayi ntanoosala kabotu shakucita. Alimwi ndakacita shintu shibiibi abuumbi isho shimpa kulinyumfwa cibiibi na ndashiyeeya.”

Ino nshiinshi nsheenga Mwineklistu wacita kwaamba ayi anoosala kabotu shakucita pamakani akunwa bwalwa akuleya mapensho esa ceebo cakunwa cakwiindilila? Tulyeelete kunootanjililwa anjiisho shakwe Lesa ndyetutosalawo shakucita.

Amuleke tubandike Baibo nshoyaamba pamakani akunwa bwalwa ashipa kwaamba ayi bamwi banoonwa bwalwa.

Baibo taikashiiwo kunwa bwalwa mukweelanya. Alimwi ilaamba ayi kunwa waini inga kwatusangalasha. Ilaamba ayi: “Kolya shakulya shako akusangalala, konwa waini wako amoyo wakusangalala.” (Shiku. 9:7) Yesu wakanwako waini paciindi cimwi, alimwi basebenshi bakwe Yehova bamwi abalo bakalinga kunwaako.—Mate. 26:​27-29; Luka 7:34; 1 Timo. 5:23.

Nabi kwaamba ayi Baibo taikashiiwo kunwa bwalwa mukweelanya, ilakasha kukolwa. Ilaamba cakuteenda mweela ayi: “Amucileeke kukolwa.” (Efe. 5:18) Alimwi ilaamba ayi ‘bacakolwa . . . teshi bakenjile mu Bwaami bwakwe Lesa.’ (1 Koli. 6:10) Ncakwiila, Yehova alakasha kunwa cakwiindilila abucakolwa. Muciindi cakukonkelabo nshobacita bantu bakumusena nkotukala, tulasalawo shakucita sheenga shasangalasha Lesa.

Bamwi balalinyumfwa ayi inga banwa bwalwa buunji abuumbi kwakubula kukolwa. Nacibi boobo, ico inga cabaletela mapensho anene. Baibo ilaamba cakuteenda mweela ayi kuba “busha kukunwa waini uunji” inga kwapa kwaamba ayi muntu acite shilubo shinene akunyonyoola bushicibusa bwakwe a Yehova. (Taitasi 2:​3, NWT; Tus. 20:1) Alimwi Yesu wakacenjesha ayi ‘bucakolwa’ inga bwapa kwaamba ayi muntu atakenjili mucishi cipya. (Luka 21:​34-36) Aboobo ino nshiinshi sheenga shacafwa Mwineklistu kuleya mapensho esa ceebo cakunwa bwalwa?

Na twasalawo kunwa bwalwa ceebo cakukonkela nshobacita bantu bakumusena nkotukala, inga twalicana mulipenshi linene. Beneklistu balasalawo kucita shisangalasha Yehova na cesa kumakani akulya akunwa. Baibo ilatulwiita ayi: ‘Kulilabo ncemutoocita, kulya nabi kunwa, amulemeke Lesa mushintu shoonse nshemutoocita.’ (1 Koli. 10:31) Inga twayeeya pamiipusho anjiisho shamu Baibo shitokonkelaawo:

Sa ndanwa bwalwa kwaamba ayi bamwi batanonseka? Kulonga 23:2 ilaamba ayi: “Mutanookonkela likoto lya bantu.” Palilembo ili Yehova wakalinga kucenjesha bene Isilaeli kutakonkela cakubonenaako ca bantu abo bakalinga kucita shintu shitamusangalashi. Uku nkucenjesha kubotu Beneklistu abalo nkobeelete kukonkela munshiku shino. Na twatalika kukonkela bamwi nshobayeeya anshobasalawo kucita pamakani akunwa bwalwa, mukuya kwaciindi inga twacileka kukonkela njiisho shakwe Yehova alimwi bushicibusa bwesu anguwe inga bwamana.—Loma. 12:2.

Sa ndanwa bwalwa kwaamba ayi bamwi banombona ayi ndimuyumu? Mumisena imwi, liinji bantu balanwa bwalwa cakwiindilila alimwi balabona ayi kucita boobo kulibo kabotu. (1 Pit. 4:3) Ano amunyumfwe 1 Bene Kolinto 16:13 ncoituyuminisha kucita: “Amucenjele, mwiimikane cakutatenkaana mulushomo. Amube bantu batacite boowa, bayumu.” Sa ncakwiila bwalwa inga bwacafwa muntu kuba muyumu? Sobwe napaceyi. Bwalwa inga bwapa kwaamba ayi muntu acileeke kunooyeeya kabotu akutanosala kabotu shakucita. Aboobo kunwa bwalwa cakwiindilila takutondeshi ayi muntu ngumuyumu, sombi kulatondesha ayi ngumuluya. Isaya 28:7 ilaamba pamuntu usoweka ceebo cakunwa bwalwa ayi alatalantanta alimwi alaalilwa koombolosha kabotu.

Yehova ngwaatupa nkusu shakucita shiluleme alimwi tulyeelete kucenjela akwiimikana cakutatenkaana mulushomo, kwaamba ayi tube ankusu isho. (Kulu. 18:32) Tulacita boobo kwiinda mukuba bacenjete akuleya shintu sheenga shatunjisha mumapensho alimwi akusala kucita shintu sheenga shabula kunyonyoola bushicibusa bwesu a Yehova. Yesu wakalinga kucite bushicibusa buyumu a Yehova alimwi bantu baanji bakalinga kumupa bulemu ceebo cakwaamba ayi wakalinga muntu utaloondi alimwi ushinishite kucita shiluleme.

Sa ndanwa bwalwa kwaamba ayi ntanolisukama pamapensho ngontokwiindaamo? Kwiinda  mukutanjililwa amushimu usalashi, shikulumbaisha wakalemba ayi: ‘Kulisukama ndikwakalinga kuncata, mwebo [no Yehova] mwakanjumya.’ (Kulu. 94:19) Na mapensho amukomenena abuumbi, amupaile kuli Yehova kwaamba ayi amucaafwe, kuteshi kunwa bwalwa. Cintu ciyandika ceenga camucafwa kutanoolisukama bunene, nkupaila abuumbi kuli Yehova. Alimwi baanji bakacana kwaamba ayi kusenga lucafwo kuli shicibusa wabo ushimpite lwakumushimu kulabacafwa. Cancine ncakwaamba ayi, na muntu kaanwa bwalwa kwaamba ayi bumucaafwe ndyaatokwiinda mumapensho, inga capa kwaamba ayi atabi ushinishite kucita shiluleme. (Osi. 4:11) Ba Daniel mbotwalinga twaambaawo bakaamba ayi: “Ndakalinga kulisukama akulipa mulandu. Ndakalinga kunoonwa kwaamba ayi ntanolisukama bunene, sombi mapensho ndyaakafulilaako. Kwiilikaawo, bushicibusa bwangu abamwi bwakamana alimwi ndakatalika kulibona ayi taaku mbombete.” Ino nciinshi cakacafwa ba Daniel? Bakaamba ayi: “Ndakesa mukushiba ayi ndakalinga kuyandika lucafwo lwakwe Yehova, kuteshi bwalwa. Kwiinda mulucafwo lwakwe Yehova, ndakacikonsha kuliyumya akukoma mapensho ngondakalinga kwiindaamo.” Lyoonse Yehova alilibambite kutucafwa, nabi shintu shiboneke anga teshi shikaalukeewo.—Filip. 4:​6, 7; 1 Pit. 5:7.

Na cimwi ciindi mulanwa, mpashi inga mwalilanga langa na mutoyandika kwaalulako kufula kwa mankanda ngomunwa bwalwa akufula kwa bwalwa mbomunwa. Amuliipushe ayi: ‘Sa wamumukwashi wangu na shicibusa ngonyumfwanaakwe abuumbi wakatongokaawo kale pamakani ambonwa bwalwa?’ Na ubo mbocibete, ici inga catondesha ayi mwatalika kuba acilabo citabete kabotu mwebo cakuteshiba. ‘Sa ndanwa bwalwa kwiinda mbondakalinga kunwa kale kale?’ Kucita boobo inga kwapa kwaamba ayi muntu atalike kushibila kunwa bwalwa na kwaalilwa kukala kwakubula kunwa. ‘Sa cilanjumina kukalabo kwakubula kunwa bwalwa kwanshiku shiniini na kwaciindi cilaamfu?’ Na ubo mbocibete, mpashi kunwa bwalwa kwakaba cilabo ciyumu kucileka na kwaalilwa kukala kwakubula kunwa. Aboobo mpashi inga mwayandika lucafwo lwakucipatela kwaamba ayi mukome lipenshi ili.

Mukwiinga kunwa bwalwa kulaleta mapensho aanji, Beneklistu bamwi bakasalawo kutanwa nabibo paniini. Bamwi balasalawo kutanwa bwalwa ceebo ca mbobunyumfwika. Na shicibusa wanu umwi wasalawo  kucita boobo, inga mwatondesha ayi mulayeeyelako bamwi kwiinda mukulemeka nshaasala kwakubula kunoomuseka.

Mpashi mwakasalaawo ayi ncibotu kulibikila pakweela ndyemutoonwa bwalwa. Na mpashi mwakasalawo kufula kwa mankanda ndyemweelete kunwa bwalwa. Inga caba ayi linkanda lyomwi mu nsondo na kunwaako bwalwa buniini ndyemutolya. Bamwi bakasalawo mishobo ya bwalwa mbweenga banwa, mbuli kunwako waini mukweelanya na bwalwa bumwi buteshi bukali. Sombi tabanwiiwo bwalwa bukali nabibo kububika mu madilinki. Na muntu walibikila pakweela kunwa bwalwa amishobo ya bwalwa mbweenga wanwa, cilaba cuubu kukonkela nshaasala. Alimwi Mwineklistu ushimpite lwakumushimu taaelete kunyumfwa nsoni na wasalawo kucita boobo akuba ushinishite kukonkela nshaasala.

Ndyetutosalawo shakucita pamakani abwalwa, tulyeelete kuyeeyelako bamwi mbweenga balinyumfwa. Bene Loma 14:21 ilaamba ayi: ‘Ncibotu kucileka kulya nyama, kunwa shibilite nabi kucita cintu cimwi cili coonse ceenga calengesha mushominyinaanu kubisha.’ Ino nshiinshi nsheenga mwaciita kwaamba ayi mukonkele kululika uku? Amutondeshe lusuno kubamwi. Na mutobona ayi kunwa bwalwa inga kwakalasha umwi, inga mwatondesha lusuno kumuntu uyo kwiinda mukutanwa paciindi ico. Na mwacita boobo, mulatondesha ayi mulalemeka bamwi, mulibasuni alimwi mulabikila maano kushintu nshebasuni kwiinda nshemusuni.—1 Koli. 10:24.

Kwiilikaawo, mfulumeende inga yabika milawo pamakani akunwa bwalwa. Alimwi Mwineklistu alyeelete kukonkela milawo iyo. Mpashi inga babika milawo yaamba paciimo muntu ndyeenga watalika kunwa bwalwa na kukasha kweensha motoka nabi kusebensesha mashini imwi na muntu kaanwite.—Loma. 13:​1-5.

Yehova wakatupa shipo shiinji shibotu, alimwi cipo comwi ncaakatupa ndwaanguluko lwakulisalila mbweenga twasebensesha shipo nshaakatupa. Alimwi ici cileelikaawo akusalawo nsheenga twalya ansheenga twanwa. Aboobo atube bashinishite kunotondesha kulumba palwaanguluko ndotucite kwiinda mukunoosala kucita shintu shisangalasha Ishiwesu wakwiculu.