1. Ino nshiinshi musankwa Mwineklistu nshaeelete kucita kwaamba ayi abe ushimpite lwakumushimu?

 MUTUMWI Paulo wakalwiita Beneklistu baku Kolinto ayi: “Nobamakwesu mutabi anga mbaana mumiyeeyo, sombi mube . . . bamanene mumiyeeyo.” (1 Koli. 14:20) Beneklistu basankwa boonse balyeelete kukonkela kululika uku. Kwaamba ayi babe Beneklistu bashimpite lwakumushimu, balyeelete kwiiya kunyumfwila Lesa akukonkela njiisho shamu Baibo mushintu shoonse nshobacita. (Luka 2:52) Ino nceebonshi cilayandika abuumbi kwaamba ayi bamakwesu bacanike babe Beneklistu bashimpite lwakumushimu?

2-3. Ino nceebonshi cilayandika kwaamba ayi mukwesu wacanike abe Mwineklistu ushimpite lwakumushimu?

² Musankwa Mwineklistu alicite mikuli iinji iyandika mumukwashi amulibungano. Nobamakwesu bacanike, ncakutatoonsha kwaamba ayi mwakayeeyawo kale pamikuli njeshi mukabaayo kunembo. Inga mwasuna kusebensa mbuli painiya, musebenshi ucafwilisha alimwi mukuya kwaciindi mbuli munene mulibungano. Alimwi mpashi inga mwasuna kweeba akuba abaana. (Efe. 6:4; 1 Timo. 3:1) Mulyeelete kuba Mwineklistu ushimpite lwakumushimu kwaamba ayi mucikoonshe kucita sheeshi shoonse. b

³ Ino nshiinshi nsheenga mwaciita kwaamba ayi mube Mwineklistu ushimpite lwakumushimu? Kuli shintu shimwi shiyandika nshomweelete kwiiya kucita. Ano ino nshiinshi nsheenga mwaciita kwaamba ayi mulibambile kusebensa mikuli mpashi njeshi mukabaayo kunembo, akucikonsha kwiikumanisha?

4. Ino nkuli nkweenga mwacana shakubonenaako shibotu nsheenga mwakonkela? (Amubone acikope.)

⁴ Amusale shakubonenaako shibotu nsheenga mwakonkela. Mu Baibo muli shakubonenaako shiinji shibotu basankwa bacanike nsheenga bakonkela. Basankwa aba baambwa mu Baibo bakalinga kusuni Lesa alimwi bakalama bantu bakwe munshila shipusenepusene. Alimwi inga mwacana shakubonenaako shibotu sha basankwa bashimpite lwakumushimu mumukwashi wanu amulibungano. (Ebu. 13:7) Kwiilikaawo, Yesu Klistu wakatondesha cakubonenaako cibotu abuumbi nceenga mwakonkela. (1 Pit. 2:21) Ndyemutokwiiya shakubonenaako shabo cakubikila maano, amubone mibo ibotu njobakalinga kucite njeenga mwasuna kubaayo. (Ebu. 12:​1, 2) Lyalo amuyeeye mbweenga mwakonkela shakubonenaako shabo.

5. Ino inga mwacita buyani kwaamba ayi mwiiye kunoyeeya kabotu, alimwi ino nceebonshi kucita boobo kulayandika? (Kulumbaisha 119:9)

⁵ Amwiiye “kuyeeya kabotu” akukushitilisha. (Tus. 3:​21, NWT) Muntu uyeeya kabotu alayeeyawo cakubikila maano kaatana kusala shakucita. Aboobo amusebense cankusu kwiiya kuyeeya kabotu akutolelela kucita boobo. Ino nceebonshi? Nceebo cakwaamba ayi basankwa bacanike baanji munshiku shino balasalawo shakucita ceebo ca mbobayeeya ambobalinyumfwa. (Tus. 7:7; 29:11) Kwiilikaawo, shintu shiba pama TV, mumafilimu alimwi apa intaneti, inga shakuma mbomuyeeya anshomucita. Sombi ino nshiinshi nsheenga mwaciita kwaamba ayi mwiiye kunoyeeya kabotu? Cakutaanguna, amwiiye njiisho shamu Baibo akuyeeya shibotu shiswaamo na mwashikonkela. Lyalo amukonkele njiisho isho kwaamba ayi shimucaafwe kusala kucita shintu sheenga shasangalasha Yehova. (Amubelenge Kulumbaisha 119:9.) Na mweeya kucita cintu ici ciyandika, cilaakumucafwa kuba musankwa Mwineklistu ushimpite lwakumushimu. (Tus. 2:​11, 12; Ebu. 5:14) Amuyeeye mbweenga kuyeeya kabotu kwamucafwa mubukaalo ubu bobilo: (1) mbomucita shintu kubenankashi alimwi (2) ndyemutoosalawo shakucita pamakani ambomufwala ambomulibotesha.

6. Ino kuyeeya kabotu inga kwamucafwa buyani mukwesu wacanike kunotondesha bulemu kubenankashi?

⁶ Kuyeeya kabotu kulaakumucafwa kunotondesha bulemu kubanakashi. Cilibo kabotu mukwesu wacanike kusuna kuba abushicibusa anankashi. Nacibi boobo, musankwa wacanike uyeeya kabotu inga taambi, kulemba na kucita cintu cili coonse  ceenga capa kwaamba ayi nankashi ayeeye ayi alisuni kumweeba, kakuli mukwesu uyo taacitewo amuyeeyo wakumweeba. (1 Timo. 5:​1, 2) Na kuli nankashi ngwaasuni kweeba, inga washitilisha mpuwo ibotu njaacite kwiinda mukutaba pomwi anguwe na balibo bobilo.—1 Koli. 6:18.

7. Ino kuyeeya kabotu inga kwamucafwa buyani mukwesu wacanike ndyatosalawo shakucita pamakani ambwafwala ambwalibotesha?

⁷ Nshila aimwi mukwesu wacanike mbwaatondesha ayi wakeeya kuyeeya kabotu, nkwiinda mukusala kabotu shakucita pamakani ambwafwala ambwalibotesha. Liinji bantu bapanga shakufwala sha mafashoni aconoono mbantu batalemeki Yehova na bacita shintu shibiibi. Aboobo balapanga shakufwala shicata abuumbi na shipa kwaamba ayi basankwa banoboneka anga mbanakashi. Musankwa wacanike utokwiiya kuba Mwineklistu ushimpite lwakumushimu, alakonkela njiisho shamu Baibo ashakubonenaako shibotu sha bamwi mulibungano ndyatosalawo shakufwala nsheenga wafwala. Inga waliipusha ayi: ‘Sa nshonsalawo pamakani akufwala shilatondesha ayi ndayeeya kabotu alimwi ndayeeyelako bamwi? Sa mbomfwala bamwi inga bashoma ayi ndi musebenshi wakwe Lesa?’ (1 Koli. 10:​31-33; Taitasi 2:6) Mukwesu wacanike uyeeya kabotu alapekwa bulemu ku bamakwesu abenankashi alimwi akuli Ishi wakwiculu.

8. Ino nshiinshi nsheenga mukwesu wacanike wacita kwaamba ayi abe muntu bamwi ngweenga bashoma?

⁸ Amube muntu bamwi ngweenga bashoma. Mukwesu wacanike bamwi ngweenga bashoma, alasebensa cankusu kukumanisha mikuli yoonse njeenga wapekwa. (Luka 16:10) Amuyeeye pacakubonenaako cibotu Yesu ncaakatondesha. Taakalinga kushicitilamobo shintu. Sombi wakakumanisha mikuli yoonse Yehova njaakamupa nabi ndyecakalinga ciyumu kucita boobo. Wakalinga kubasuni bantu—bunene bunene bashikwiiya bakwe—alimwi wakalyaaba kubafwita. (Joni 13:1) Kwaamba ayi mukonkele cakubonenaako cakwe Yesu, amusebense cankusu kukumanisha mukuli uli woonse ngweenga mwapekwa. Na tamucishi kabotu mbweenga mwakumanisha mukuli ngomwapekwa, amuliceeshe akusenga lucafwo ku bamakwesu bashimpite lwakumushimu. Mutabi batolo, sombi amusebense cankusu. (Loma. 12:11) Na kamusebensa ncito ili yoonse kamucishi ayi ‘mutoocitila Yehova kuteshi bantu,’ mulaakweelesha kusebensa kabotu ncito iyo akwiikumanisha. (Kolo. 3:23) Ncakwiila tamumaninite, aboobo munooliceesha akusumina na mwaciita cilubo.—Tus. 11:2.

9. Ino nceebonshi mukwesu wacanike alyeelete kwiiya kucita shintu shimwi sheenga shamucafwa?

⁹ Kwaamba ayi mube musankwa Mwineklistu ushimpite lwakumushimu, mulyeelete kwiiya kucita shintu shimwi sheenga shamucafwa. Kwiiya kucita shintu isho inga kwamucafwa kukumanisha mikuli mulibungano, kucana ncito kwaamba ayi kamulicafwa na kucafwa mukwashi wanu alimwi akuba abushicibusa bubotu abamwi. Amuyeeye pashintu shiniini shitokonkelaawo nsheenga mweeya.

10-11. Ino kwiiya kulemba akubelenga kabotu inga kwamucafwa buyani mukwesu wacanike akucafwa libungano? (Kulumbaisha 1:​1-3) (Amubone acikope.)

¹⁰ Amwiiye kulemba akubelenga kabotu. Baibo ilaamba ayi muntu usangalete alimwi uswitilila,  alabelenga Maswi akwe Lesa bushiku abushiku akukutumana kuyeeyawo. (Amubelenge Kulumbaisha 1:​1-3.) Kubelenga Baibo bushiku abushiku, kulamucafwa kushiba Yehova mbwayeeya, ico ceenga camucafwa kunooyeeya kabotu akukonkela nshatokwiiya. (Tus. 1:​3, 4) Basankwa beenga bacikonsha kucita boobo batoyandika mulibungano. Ino nceebonshi?

¹¹ Bamakwesu abenankashi balayandika lucafwo lwa basankwa bashimpite lwakumushimu beenga bacikoonsha kwiisha kabotu akupa butanjilishi bwamu Baibo. (Taitasi 1:9) Na kamucishi kulemba akubelenga kabotu, inga kamwaamba makani ashikumbulo sheenga shacafwa bamwi akuyumya lushomo lwabo. Alimwi mulaakunocikonsha kulemba shiteente sheenga shamucafwa ndyemutoocita ciiyo capalwanu, ndyemutokutika makani a Baibo kumabungano ansondo ansondo, pakubungana kwalubasu apakubungana kunene. Shiteente isho shilaakumucafwa kuyumya lushomo lwanu akuyuminisha bamwi.

12. Ino nciinshi ceenga camucafwa kwiiya kunobandika kabotu?

¹² Amwiiye kubandika kabotu. Musankwa Mwineklistu alyeelete kwiiya kubandika kabotu. Ici cilaamba ayi alyeelete kukutika akunyumfwishisha bamwi nshebatoyeeya ambobatolinyumfwa. (Tus. 20:5) Inga weeya kushiba muntu mbwaatoyeeya ambwatolinyumfwa kwiinda mukunyumfwa liswi mbolitonyumfwika, mbwaatoboneka paciwa alimwi ambwatosebensesha mubili. Inga tamucikoonshi kwiiya kucita boobo kwakubula kunoocana ciindi cakuba pomwi abantu. Na liinji mulabandika abamwi kusebensesha fooni na tabuleti mbuli kwiinda mukutuma mameseji na nshila shimwi, cilaakumubeta ciyumu kunobandika abantu na muli pomwi ambabo. Aboobo, amweeleshe kucana nshila sha mbweenga mwabandika abamwi ndyemuli pomwi ambabo.—2 Joni 12.

13. Ino nciinshi cimwi musankwa wacanike ncaeelete kwiiya? (1 Timoti 5:8) (Amubone acikope.)

¹³ Amwiiye kulilama. Musankwa Mwineklistu ushimpite lwakumushimu alyeelete kuba muntu weenga wacikonsha kulilama mwiine akulama mukwashi wakwe. (Amubelenge 1 Timoti 5:8.) Mushishi shimwi, bamakwesu bacanike baleeya bwakusebensa ncito shimwi kuli baishiwabo na kuli shikamukowa umwi. Lyalo mushishi shimwi, basankwa bacanike inga beeya bwakusebensa ncito shimwi ndyebacili kucikolo caku sekondali. Lyoonse cili kabotu kwiiya bwakucita shintu shimwi sheenga shamucafwa kucana ncito. (Milimo 18:​2, 3; 20:34; Efe. 4:28) Amube muntu bamwi ngobeshi ayi alasebensa cankusu akushinisha ayi mwamanisha ncito njeenga mwapeekwa. Na mwacita boobo, cilaakumubeta cuubu kucana ncito akutolelela kusebensa. Alimwi kuba amibo njotwabandikaawo akwiiya kucita shintu nshotwabandikaawo, kulayandika kwaamba ayi musankwa Mwineklistu akacikonshe kukumanisha mikuli njeshi akabaayo kunembo. Amuleke tubandike pamikuli imwi njeenga mwabaayo kunembo.

14. Ino mukwesu wacanike inga wacita buyani kwaamba ayi alibambile kutalika ncito yaciindi coonse?

¹⁴ Incito yaciindi coonse. Basankwa Beneklistu baanji bashimpite lwakumushimu, bakatalika ncito yaciindi coonse ndyebakalinga bacanike. Kusebensa bupainiya inga kwacafwa musankwa wacanike kwiiya bwakusebensa kabotu abantu bapusenepusene. Alimwi kulamucafwa kwiiya bwakunosebensesha kabotu maali ngaacana. (Filip. 4:​11-13) Cintu comwi ceenga camucafwa kutalika bupainiya bwaciindi coonse, nkutaanguna kusebensako bupainiya bwakucafwilisha. Baanji balasebensako bupainiya bwakucafwilisha kwa myeenshi iniini, alimwi kucita boobo kulabacafwa kutalika bupainiya bwaciindi coonse. Kusebensa bupainiya inga kwamupa coolwe cakusebensaako ncito yaciindi coonse mbuli, kucafwilisha muncito yakuyaka, na kusebensela ku Bethel.

15-16. Ino nshiinshi nsheenga mukwesu wacanike wacita kwaamba ayi eelele kusebensa mbuli musebenshi ucafwilisha na munene mulibungano?

¹⁵ Musebenshi ucafwilisha na munene. Bamakwesu boonse balyeelete kusebensa cankusu kwaamba ayi beelele akuba amibo iyandika kusebensa mbuli bamanene mulibungano kwaamba ayi basebensele bamakwesu abenankashi. Baibo ilaamba ayi basankwa bacita nsheenga bacikonsha kwaamba ayi bapekwe mukuli uyu, nkokwaamba ayi ‘balisuni mulimo ubotu.’ (1 Timo. 3:1) Mukwesu kaatana kutalika kusebensa mbuli munene, alyeelete kutaanguna kweelela kusebensa mbuli musebenshi ucafwilisha. Basebenshi bacafwilisha balacafwilisha bamanene munshila shiinji shipusenepusene. Bamanene abasebenshi bacafwilisha balasebensela bamakwesu abenankashi cakuliceesha akusebensa cankusu muncito yakushimikila. Bamakwesu bacanike inga beelela kusebensa mbuli basebenshi bacafwilisha nabi kabacitebo myaaka pakati ka 17 a 19. Lyalo musebenshi ucafwilisha ushimpite abuumbi lwakumushimu alimwi weelela inga wasalwa kusebensa mbuli munene nabi kaacitebo myaaka 20.

¹⁶ Ino inga mwacita buyani kwaamba ayi mweelele kupekwa mikuli iyi? Baibo ilaambabo pamibo njomweelete kunotondesha. Nacibi boobo, kwaamba ayi mube amibo iyi mulyeelete kunookwiiya Baibo, kusuna Yehova, mukwashi wanu alimwi abamakwesu abenankashi. (1 Timo. 3:​1-13; Taitasi 1:​6-9; 1 Pit. 5:​2, 3) Amweeleshe kunyumfwisha comwi acomwi ncomweelete kucita kwaamba ayi mweelele akupaila kuli Yehova kwaamba ayi amucaafwe kweelela. c

17. Ino mukwesu wacanike inga wacita buyani kwaamba ayi alibambile kweeba akuba mutwi wamukwashi? (Amubone acikope.)

¹⁷ Kweeba akuba mutwi wamukwashi. Kweelana a Yesu mbwaakaamba, basankwa bamwi bashimpite lwakumushimu balasalawo kuteeba. (Mate. 19:12) Nacibi boobo, na mwasalawo kweeba, mulaakuba  mutwi wamukwashi. (1 Koli. 11:3) Yehova alalangila musankwa kusuna mukaakwe, kumupa nshayandika lwakumubili, kuba shicibusa wakwe uli kabotu, akumucafwa kutolelela kuba abushicibusa buyumu a Ishi wakwiculu. (Efe. 5:​28, 29) Kuba amibo njotwabandikaawo akwiiya kucita shintu nshotweeya mumutwi uyu mbuli kwiiya kuyeeya kabotu, kutondesha bulemu kubanakashi, akuba muntu bamwi ngweenga bashoma, shilaakumucafwa kuba musankwa uli kabotu na mukeebe. Mulaakuba balibambite kukumanisha mikuli yanu na mukeebe akuba mutwi wamukwashi.

18. Ino mukwesu wacanike inga wacita buyani kwaamba ayi alibambile kuba mushali musankwa?

¹⁸ Mushali musankwa. Pesule lyakwaamba ayi mweeba, inga mwaba mushali musankwa. Ino nshiinshi nsheenga mweeya kuswa kuli Yehova pamakani akuba mushali musankwa ulikabotu? Nshiinji nsheenga mweeya. (Efe. 6:4) Yehova wakalwiita Yesu Mwanaakwe ayi alimusuni alimwi ayi alikondetwe pali nguwe. (Mate. 3:17) Na mukabe mushali musankwa, amukashinishe ayi lyoonse mukanoolwiita bana banu ayi mulibasuni. Mukanobalumba pashintu shibotu nsheshi bakanoocita. Bashali basankwa bakonkela cakubonenaako cakwe Yehova balacafwa bana babo kuba basankwa abanakashi bashimpite lwakumushimu. Inga mwalibambila kusebensa mukuli uyu kwiinda mukunotondesha lusuno ku bamumukwashi aku bamulibungano alimwi akunoobalama kabotu. Kwiilikaawo, amwiiye kunoobalwiita ayi mulibasuni alimwi balayandika kuli ndimwe. (Joni 15:9) Kucita boobo kulaakumucafwa kukumanisha mikuli njeshi mukabaayo na mukeebe akuba mushali musankwa. Pacecino ciindi, mulaakuba muntu uyandika abuumbi kuli Yehova, mumukwashi wanu amulibungano.

19-20. Ino nshiinshi sheenga shacafwa bamakwesu bacanike kuba Beneklistu bashimpite lwakumushimu? (Amubone cikope cili papeeji yakutaanguna.)

¹⁹ Nobamakwesu bacanike, mulyeelete kusebensa cankusu kwaamba ayi mukabe Beneklistu bashimpite lwakumushimu. Mulyeelete kusala shakubonenaako shibotu nsheenga mwakonkela, kwiiya kuyeeya kabotu, kuba muntu bamwi ngweenga bashoma, kwiiya kucita shintu sheenga shamucafwa, alimwi akulibambila kusebensa mikuli njeshi mukabaayo kunembo.

²⁰ Na mwayeeya pashintu shoonse nshomweelete kucita, inga mwayeeya ayi shafulisha. Sombi inga mwacikonsha. Munokwiibaluka ayi Yehova alisunishishi kumucafwa. (Isa. 41:​10, 13) Bamakwesu abenankashi mulibungano abalo balaakumucafwa. Na mwaba Mwineklistu ushimpite lwakumushimu, mulaakuba alusangalalo mubuumi bwanu akulinyumfwa kukwana. Nobamakwesu bacanike, tulimusuni! Alimwi Yehova amupe shoolwe ndyemutoocita nsheenga mwacikonsha kwaamba ayi mube basankwa bashimpite lwakumushimu.—Tus. 22:4.