1. Ino nshiinshi nshotweelete kucita kwaamba ayi tube Beneklistu bashimpite lwakumushimu?

 CILAKANKAMIKA kubona mwaana mbwaakula cakufwambaana akuba munene. Cilaboneka anga mwaana alakulabo kwakubula kucitaawo comwi. Nacibi boobo, kwaamba ayi muntu akomene na kuba Mwineklistu ushimpite lwakumushimu, alyeelete kucitaawo comwi. b (1 Koli. 13:11; Ebu. 6:1) Kwaamba ayi tucikoonshe kucita boobo, tulyeelete kuba abushicibusa buyumu a Yehova. Alimwi tulayandika lucafwo lwa mushimu usalashi ndyetutokwiiya kuba amibo ya Bwineklistu, kwiiya kucita shintu sheenga shatucafwa andyetutolibambila kusebensa mikuli njeshi tukabaayo kunembo.—Tus. 1:5.

2. Ino Matalikilo 1:27 ilatwiisha nshi, alimwi ino nshiinshi nsheshi twiiye mumutwi uyu?

² Yehova wakalenga bantu kwaamba ayi kababa basankwa na banakashi. (Amubelenge Matalikilo 1:27.) Ncuubu kubona ayi musankwa amwanakashi balipusene mbobaboneka, sombi kuli nshila ashimwi mbobapusene. Kucakubonenaako, Yehova wakalenga basankwa abanakashi kwaamba ayi kabakumanisha mikuli imwi. Aboobo balayandika kuba amibo akushiba bwakucita shintu shimwi sheenga shabacafwa kukumanisha mikuli yabo. (Mata. 2:18) Mumutwi uyu, tutobandika nsheenga benankashi bacanike bacita kwaamba ayi babe Beneklistu bashimpite lwakumushimu. Mumutwi utokonkelaawo, tulaakubandika nsheenga bamakwesu bacanike bacita.

3-4. Ino nkuli nkweenga benankashi bacanike bacana shakubonenaako shibotu nsheenga bakonkela? (Amubone acikope.)

³ Baibo ilaamba pa shakubonenaako shiinji shibotu sha banakashi abo bakalinga kusuni Yehova alimwi bakalinga kumusebensela.  (Amuye pa jw.org akubona mutwi wamu Chitonga waamba ayi “Ino Ncinzi Ncotukonzya Kwiiya ku Bamakaintu Baambidwe mu Bbaibbele?”) Bakatondesha mibo yaambwa mulilembo paswa mutwi uyu mbuli ‘kutacita shintu cakwiindilisha’ alimwi a ‘kushomeka mushintu shoonse.’ Kwiilikaawo, benankashi bacanike inga bacana shakubonenaako shibotu sha benankashi bashimpite lwakumushimu bali mulibungano lyabo isho nsheenga bakonkela.

⁴ Nobenankashi bacanike, amuyeeye pabenankashi mbomushi abo bacite cakubonenaako cibotu nceenga mwakonkela. Amubikile maano kumibo ibotu njobacite lyalo akuyeeya mbweenga amwebo mwatondesha mibo iyo. Mumapalagilafu atokonkelaawo, tutobandika pa mibo yotatwe iyandika benankashi bashimpite lwakumushimu njobeelete kubaayo.

5. Ino nceebonshi kuliceesha ngumubo uyandika mwanakashi ushimpite lwakumushimu ngwaeelete kubaawo?

⁵ Kuliceesha ngumubo uyandika Mwineklistu ushimpite lwakumushimu ngwaeelete kubaawo. Na mwanakashi kaaliceesha, alaakuba abushicibusa bubotu a Yehova alimwi abamwi. (Jemu. 4:6) Kucakubonenaako, mwanakashi usuni Yehova cakuliceesha alakonkela butanjilishi Ishi wakwiculu mbwakabikaako bwaamba pabaabo bakapekwa nkusu shakutanjilila mulibungano amumukwashi.—1 Koli. 11:​3, NWT. c

6. Ino nciinshi nceenga benankashi bacanike beeya pamakani akuliceesha kuswa kucakubonenaako cakwe Labeka?

⁶ Amuyeeye pacakubonenaako cakwe Labeka. Wakalinga mwanakashi musongo uyo wakalinga kusalawo kucita shintu paciindi ceelete alimwi munshila ili kabotu, mubuumi bwakwe boonse. (Mata. 24:58; 27:​5-17) Nacibi boobo, wakalinga muntu utondesha bulemu alimwi unyumfwila. (Mata. 24:​17, 18, 65) Na kamuliceesha bweenka mbuli Labeka akunyumfwila baabo Yehova mbwaakapa nkusu shakutanjilila, mulaakutondesha cakubonenaako cibotu ku bamumukwashi wanu amulibungano.

7. Ino benankashi bacanike inga bacita buyani kwaamba ayi bakonkele cakubonenaako cakwe Esita cakutondesha kulibombya?

⁷ Kulibombya ngumubo aumwi Beneklistu bashimpite lwakumushimu ngobeelete kubaawo. Baibo ilaamba ayi “balibombya mbobasongo.”  (Tus. 11:​2, NWT) Esita wakalinga muntu ulibombya, alimwi musebenshi wakwe Lesa ushomeka. Kuliceesha kwakamucafwa kutalisumpula ndyakeebwa ku mwaami. Wakakonkela nshaakamulwiita Modekayi mupyala wakwe. (Esita 2:​10, 20, 22) Amwebo inga mwatondesha kulibombya kwiinda mukusenga kululikwa kubamwi lyalo akukonkela nsheenga bamulwiita.—Taitasi 2:​3-5.

8. Kweelana a 1 Timoti 2:​9, 10, ino kulibombya inga kwamucafwa buyani nankashi kunoosala kabotu pamakani ambwaafwala ambwalibotesha?

⁸ Kuli nshila aimwi Esita mbwaakatondesha kulibombya. Wakalinga “kwiimfwi kabotu alimwi mubotu kuciwa”; nacibi boobo, taakalinga kulibonesha. (Esita 2:​7, 15) Ino benankashi inga bacikonkela buyani cakubonenaako cakwe Esita? Nshila yomwi nkwiinda mukukonkela kululika nkotucana pa 1 Timoti 2:​9, 10. (Amubelenge.) Palilembo ili mutumwi Paulo wakaamba ayi banakashi Beneklistu balyeelete kufwala cabulemu alimwi cakulibombya. Maswi amu ciGiliki akasebenseshekwa palilembo ili alatondesha ayi banakashi Beneklistu balyeelete kufwala shakufwala shipa bulemu kuli Lesa, akuyeeyelako bamwi mbweenga balinyumfwa pa shakufwala nshobafwala. Tulimusuni abuumbi nobenankashi nomufwala cakulibombya!

9. Ino nshiinshi nsheenga tweeya kuswa kucakubonenaako cakwe Abigelo?

⁹ Kunyumfwisha shintu ngumubo aumwi benankashi boonse bashimpite lwakumushimu ngobatondesha. Ino kunyumfwisha shintu cilaambanshi? Nkushiba ciluleme acitaluleme lyalo akusalawo kucita ciluleme. Amuyeeye pacakubonenaako cakwe Abigelo. Ibaye wakasalawo kucita cintu cakalinga kusa mukuleta mapensho anene ku bamumukwashi wakwe boonse. Abigelo wakacitawo comwi peenkaapo. Ceebo cakwaamba ayi wakatondesha mubo wa kunyumfwisha shintu, wakapulusha bamumukwashi wakwe. (1 Samwe. 25:​14-23, 32-35) Alimwi kunyumfwisha shintu kulatucafwa kushiba ciindi ndyetweelete kwaamba andyetweelete kuumuna. Alimwi ndyetutobandika abamwi, kulatucafwa kutabepusha pamakani ngotuteelete kushiba na ngeenga babula kwaanguluka kutulwiita.—1 Tesa. 4:11.

10-11. Ino kwiiya kulemba akubelenga kabotu inga kwamucafwa buyani akucafwa bamwi? (Amubone acikope.)

¹⁰ Mwanakashi Mwineklistu alyeelete kwiiya kucita shintu sheenga shamucafwa. Shintu shimwi mwanakashi nsheenga weeya kubwanike shilaakutolelela kumucafwa mubuumi bwakwe boonse. Atubandike pashakubonenaako shiniini shitokonkelaawo.

¹¹ Amwiiye kulemba akubelenga kabotu. Mumisena imwi, bantu balabona ayi kulemba akubelenga teshi shintu shiyandika mwanakashi nsheenga weeya. Nacibi boobo, ishi nshintu shiyandika Mwineklistu uli woonse nshaeelete kwiiya. d (1 Timo. 4:13) Aboobo mutasuminishi cili coonse kumupa kwaalilwa kwiiya bwakulemba akubelenga kabotu. Ino nshibotu nshi sheshi shikasweemo na mukeeye kucita boobo? Na mweeya kucita boobo, inga camucafwa  kucana ncito akutolelela kusebensa. Alimwi kucita boobo kulaakumucafwa kucishiba kabotu bwakwiiya Baibo akunookwiishako bamwi nshomutokwiiya. Ciinditeewo ncakwaamba ayi, mulaakuba abushicibusa buyumu a Yehova ndyeshi mukanoobelenga Maswi akwe akukutumana kuyeeyawo.—Joshu. 1:8; 1 Timo. 4:15.

12. Ino Tushimpi 31:26 inga yamucafwa buyani kwiiya bwakubandika kabotu?

¹² Amwiiye kubandika kabotu. Beneklistu balyeelete kwiiya kubandika kabotu. Shikwiiya Jemusi wakaamba kululika kubotu ndyaakatulwiita ayi: “Mulyeelete kuba bantu bafwambaana kukutika, bacelwa kwaamba.” (Jemu. 1:19) Na kamukutika cakubikila maano bamwi ndyebatokwaamba, mulatondesha ayi mulabayeeyelaako. (1 Pit. 3:8) Na tamuna kunyumfwishisha muntu nshaatokwaamba na mbwaatolinyumfwa, amumwiipushe miipusho yeelete. Lyalo amukutumane akuyeeyawo kamutana kwaamba. (Tus. 15:28.) Amuliipushe ayi: ‘Sa nshonsuni kwaamba nshancine alimwi shilayuminisha? Sa shili kabotu alimwi shitotondesha ayi ndicite bulemu?’ Amwiiye kuswa kubenankashi bashimpite lwakumushimu abo bacishi kubandika kabotu. (Amubelenge Tushimpi 31:26.) Amubikile maano ku mbobabandika. Na mweeya bwakubandika kabotu, mulaakuba abushicibusa bubotu abamwi.

13. Ino nshiinshi nsheenga mwaciita kwaamba ayi mwiiye bwakusebensa kabotu incito shapaŋanda? (Amubone acikope.)

¹³ Amwiiye bwakusebensa incito shapaŋanda. Mumisena iinji, banakashi mbobasebensa ncito shiinji shapaŋanda. Banyinawanu na nankashi umwi inga bamucafwa kwiiya bwakusebensa ncito isho. Nankashi waliina lya Cindy wakaamba ayi: “Cintu ciyandika abuumbi ncondakeeya kuli bama ncakwaamba ayi na kosebensa cankusu, ulaba alusangalalo. Mukwiinga bakanjiisha kucishiba kabotu kuteleka, kubotesha, kutunga shakufwala, alimwi akusebensesha kabotu maali ndyentokuula shintu, ndakacikonsha kulilama akucita shiinji muncito yakwe Yehova. Kwiilikaawo, bama bakanjiisha kuba amubo wakutambula beensu, alimwi cakapa kwaamba ayi nshibane abamakwesu abenankashi abo bakalinga kucite cakubonenaako cibotu nceenga ndakonkela.” (Tus. 31:​15, 21, 22) Mwanakashi usebensa cankusu, ucite mubo wakutambula beensu alimwi wakeeya bwakusebensa kabotu incito shapaŋanda, alapa kwaamba ayi mumukwashi amulibungano mube lusangalalo.—Tus. 31:​13, 17, 27; Milimo 16:15.

14. Ino nshiinshi nshomweeya kuswa kucakubonenaako caba Crystal, alimwi ino nshiinshi nshomweelete kunokwiibaluka?

¹⁴ Amwiiye kulicitila shintu shimwi. Beneklistu boonse balyeelete kwiiya kulicitila shintu shimwi. (2 Tesa. 3:​7, 8) Nankashi waliina lya Crystal wakaamba ayi: “Bashali bangu bakanjuminisha kwiiya lwiiyo lumwi ndyendakalinga kucikolo, kwaamba ayi lukancaafwe kunembo. Bata bakanjuminisha kunookwiiya mucikolo mobakalinga kwiiya sha bwakulemba abwakulama maali asebenseshekwa pa kampani. Lwiiyo ulu lwakancafwa abuumbi.” Kwiilika pakwiiya lwiiyo lweenga lwamucafwa kucana ncito, amweeleshe kwiiya bwakusebensesha kabotu maali ngomucana. (Tus. 31:​16, 18) Na kamukwana ashintu nshemucite akuleya kuula shintu nsheenga tamucikoonshi, mulaakucikonsha kucita shiinji muncito yakwe Yehova.—1 Timo. 6:8.

15-16. Ino nceebonshi benankashi bateebetwe balayandika abuumbi? (Maako 10:​29, 30)

¹⁵ Na mwaba amibo ya Bwineklistu akwiiya bwakucita shintu shimwi sheenga shamucafwa, mulaakucikonsha kusebensa kabotu mikuli njeshi mukabaayo kunembo. Amuleke tubandike pashintu shiniini nsheenga mwaciita.

¹⁶ Inga mwasalawo kulindilaako paniini kamutana kweebwa. Kweelana amaswi Yesu ngaakaamba, benankashi bamwi balasalawo kuteebwa nabi kwaamba ayi bantu bakumusena nkobakala balayuminisha kweebwa. (Mate. 19:​10-12) Bamwi balasalawo kuteebwa ceebo cashintu shimwi. Amushibe kwaamba ayi Yehova a Yesu balabona ayi Beneklistu bateebetwe balayandika. Nsengwe yoonse, benankashi bateebetwe balatondesha cakubonenaako cibotu mulibungano. Mukwiinga balatondesha lusuno akubikila maano kubamwi, kubantu baanji balaba anga mbenankashi shabo alimwi anga mbanyinawabo.—Amubelenge Maako 10:​29, 30; 1 Timo. 5:2.

17. Ino nshiinshi nsheenga nankashi wacanike wacita kwaamba ayi alibambile kutalika ncito yaciindi coonse?

¹⁷ Inga mwasebensaako ncito yaciindi coonse. Banakashi Beneklistu balasebensa cankusu muncito yakushimikila nsengwe yoonse. Sa inga mwasuna kusebensaako ncito yaciindi coonse? Inga mwasebensa mbuli painiya, kucafwilisha muncito yakuyaka, na kusebensela ku Bethel. Amupailileewo paceeco ncomusuni kucita. Amubandike abaabo bakacikonsha kucita nshomusuni kucita, kwaamba ayi mushibe nsheenga mwaciita kwaamba ayi mweelele kusebensaako ncito iyo. Lyalo amucite sheenga shamucafwa kukumanisha nshomwasala. Na mwatalika ncito yaciindi coonse, mulaakuba acoolwe cakucita shiinji shisangalasha muncito yakwe Yehova.

18. Ino nceebonshi nankashi alyeelete kusala kabotu mukwesu ngweshi akeebanaakwe? (Amubone acikope.)

¹⁸ Inga mwasalawo kweebwa. Kuba amibo njotwabandikaawo akwiiya kucita shintu nshotwabandikaawo, kulaakumucafwa kuba mwanakashi uli kabotu na mukeebwe. Kwalo, na mutoyeeya kweebwa, mulyeelete kusala kabotu ngomusuni kweebanaakwe. Uku nkusala kuyandika abuumbi nkweshi mukacite mubuumi bwanu. Munokwiibaluka ayi mukwesu ngweshi mukeebanaakwe, ngweshi akabe mutwi wamukwashi. (Loma. 7:2; Efe. 5:​23, 33) Aboobo amuliipushe ayi: ‘Sa ngu Mwineklistu ushimpite lwakumushimu? Sa alabika sha Bwaami panembo mubuumi bwakwe? Sa alasala kabotu shakucita? Sa alasumina na wacita cilubo? Sa alatondesha bulemu ku banakashi? Sa alaakucikonsha kuncafwa kutolelela kuba abushicibusa buyumu a Yehova, kumpa nshenjandika lwakumubili akuba shicibusa wangu uli kabotu? Sa alasebensa kabotu  mikuli njeenga wapekwa? Kucakubonenaako, ino njimikuli nshi ya mulibungano njaacite alimwi ino alaisebensa buyani?’ (Luka 16:10; 1 Timo. 5:8) Kwalo, na mulisuni kwaamba ayi mukacane musankwa uli kabotu wakwebanaakwe, mulyeelete kulibambila kuba mwanakashi uli kabotu.

19. Ino nceebonshi mwanakashi inga wasangalala kwiitwa ayi ngu ‘mucafwi’ kuli ibaye?

¹⁹ Baibo ilaamba ayi mwanakashi uli kabotu ngu ‘mucafwi’ kuli ibaye alimwi ‘ngumubye.’ (Mata. 2:18) Ano sa ici cilaamba ayi mwanakashi taakuwo mbwaabete? Sobwe! Mukuli mwanakashi ngwaacite mbuli mucafwi, ngumukuli uyandika. Munokwiibaluka ayi alakwe Yehova liinji Baibo ilamwaamba ayi ‘mucafwi.’ (Kulu. 54:4; Ebu. 13:6) Mwanakashi alaba mucafwi wancinencine kuli ibaye na kamucafwa. Kucakubonenaako, na ibaye wasala kucita shintu sheenga shakuma mukwashi, mwanakashi alakonkela ibaye nshaasala kwaamba ayi shiswitilile. Alimwi ceebo cakwaamba ayi alisuni Yehova, alasebensa cankusu kwaamba ayi ibaye abe ampuuwo ibotu. (Tus. 31:​11, 12; 1 Timo. 3:11) Inga mwalibambila kweebwa kwiinda mukuyumya lusuno ndomucite pali Yehova akunoocafwako bamwi paŋanda amulibungano.

20. Ino nshibotu nshi nsheenga mushali mwanakashi wacitila mukwashi wakwe?

²⁰ Inga mwaba mushali mwanakashi. Pesule lyakweebwa, mwebo abeebanu inga mwaba abaana. (Kulu. 127:3) Aboobo ncibotu kuyeeyela limwi nsheshi mukayandike kucita kwaamba ayi mukabe mushali mwanakashi uli kabotu. Kuba amibo njotweeya akwiiya kucita shintu nshotweeya, kulaakumucafwa na mukeebwe andyeshi mukabe mushali. Na kamutondesha lusuno, kubota moyo, akukalika moyo, mulaakucafwa mukwashi wanu kuba alusangalalo alimwi bana banu balaakulinyumfwa kushitilishikwa akulinyumfwa ayi mulibasuni.—Tus. 24:3.

21. Ino tulalinyumfwa buyani pabenankashi, alimwi ino nceebonshi? (Amubone cikope cili papeeji yakutaanguna.)

²¹ Tulimusuni nobenankashi bacanike, ceebo ca shintu shoonse nshomucitila Yehova abantu bakwe. (Ebu. 6:10) Mulasebensa cankusu kwiiya kuba amibo ya Bwineklistu, kwiiya kucita shintu sheenga shamucafwa akucafwa bamwi, alimwi akulibambila kabotu kusebensa mikuli njeshi mukabaayo kunembo. Mulayandika abuumbi mulibunga lyakwe Yehova!