1. Ino nceebonshi Abulaamu wakatolelela kulangila ayi alaakuba amwaana musankwa?

 YEHOVA wakashomesha Abulaamu shicibusa wakwe ayi mishobo yoonse yapacishi ilaakupekwa shoolwe kwiinda mu womwi wamu lunyungu lwakwe. (Mata. 15:5; 22:18) Mukwiinga Abulaamu wakalinga kucite lushomo luyumu muli Lesa, wakalinga kushomete cakutatoonsha ayi alaakukumanisha nshaakamushomesha. Nacibi boobo, nabi paciindi Abulaamu ndyaakalinga kucite myaaka 100 lyalo mukaakwe kaacite myaaka 90, beebene aba bashomeka tabakalinga kuciteewo mwaana. (Mata. 21:​1-7) Sombi Baibo ilaamba ayi: “Abulaamu wakashoma akulangila nakubi kwaamba ayi cakalinga kuboneka anga teshi cikacitike. Aboobo wakaba mushali wa mishobo yoonse.” (Loma. 4:18) Mulicishi kwaamba ayi Abulaamu ncaakalinga kulangila cakakumanishikwa. Wakaba a Isaki mwaana musankwa, uyo ngwaakalinga kulangila kwaciindi cilaamfu. Ino nceebonshi Abulaamu wakalinga kushomete ayi Yehova alaakukumanisha nshaakamushomesha?

2. Ino nceebonshi Abulaamu wakalinga kushomete cakutatoonsha ayi Yehova alaakukumanisha nshaakamushomesha?

² Ceebo cakwaamba ayi Abulaamu wakalinga kucite bushicibusa buyumu a Lesa, “wakalinga kushoma cancinencine” ayi Lesa alaakukumanisha nshaakamushomesha. (Loma. 4:21) Yehova wakalinga kukondetwe pali Abulaamu alimwi wakamubona ayi aliluleme ceebo calushomo lwakwe. (Jemu. 2:23) Kweelana a Bene Loma 4:18 mboyaamba, Abulaamu wakalinga kucite lushomo akulangila. Aboobo amuleke tubandike mutumwi Paulo nshaakaamba pakulangila, kweelana amakani ngotucana mu Bene Loma capita 5.

3. Ino nshiinshi Paulo nshaakaamba pakulangila?

³ Paulo wakaamba sheenga shatupa kushoma ayi ‘kulangila kwesu takulenshi nsoni.’ (Loma. 5:5) Alimwi wakatucafwa akushiba nsheenga twaciita kwaamba ayi tuyumye kulangila  kwesu. Ndyetutobandika Paulo nshaakaamba pa Bene Loma 5:​1-5, munooyeeya pabukaalo bwanu. Kucita boobo kutoomucafwa kushiba ayi kulangila kwanu kwayuminaako mubupusano ambocakalinga ndyemwakatalikabo kwiiya cancine. Alimwi nsheshi twiiye shitoomucafwa kushiba nsheenga mwaciita kwaamba ayi muyumye kulangila kwanu kwiinda mbokubete pacecino ciindi. Amuleke tutaangune kubandika pakulangila kubotu Paulo nkwaakaamba ayi teshi kukatulenshe nsoni.

4. Ino Baibo ilaamba nshi pa Bene Loma 5:​1, 2?

⁴ Amubelenge Bene Loma 5:​1, 2. Maswi aya Paulo wakaalembela bamulibungano lyaku Loma. Bashominyina bamulibungano ili bakeeya pali Yehova a Yesu, bakaba alushomo alimwi bakaba Beneklistu. Aboobo Lesa wakababona ayi baliluleme “ceebo ca lushomo,” alimwi wakabananika amushimu usalashi. Ncakwiila bakaba akulangila kubotu, nkobakalinga kushomete ayi kulaakukumanishikwa.

5. Ino nkulangila nshi bananikitwe nkobacite?

⁵ Ndipakeenda ciindi, Paulo wakalembela Beneklistu bananikitwe baku Efeso pakulangila Lesa nkwakabapa. Kulangila uko kwakalinga kwiilikaawo kutambula ‘shoolwe shabulemu Lesa nshaakashomesha basalalite.’ (Efe. 1:18) Alimwi Paulo ndyaakalembela bene Kolose, wakaamba ankweshi bakatambwite cilambu cabo. Wakaamba pacilambu ico ayi “Lesa nshaakamubambila kabotu kwiculu.” (Kolo. 1:​4, 5) Aboobo Beneklistu bananikitwe balalangila kubushikwa akuba abuumi butamaani kwiculu uko nkweshi bakeendeleshe pomwi a Klistu.—1 Tesa. 4:​13-17; Ciyu. 20:6.

6. Ino mukwesu umwi unanikitwe wakaamba nshi pakulangila kwakwe?

⁶ Beneklistu bananikitwe balikusuni abuumbi kulangila nkobacite. Mukwesu Frederick Franz uyo wakalinga kunanikitwe, alimwi wakasebensela Lesa cakushomeka kwamyaaka iinji, mu 1991 wakaamba mbwaakalinga kulinyumfwa pakulangila uku ndyaakaamba ayi: “Kulangila kwesu kulaakukumanishikwa alimwi womwi  awomwi waba 144,000 alaakutambula cilambu Lesa ncaakatushomesha. Cilambu cesu cilaakuba cibotu abuumbi kwiinda ambotwalinga kuciyeeyela. [Tucikusuni] abuumbi kulangila nkotucite. . . . Kulumba kwesu kulaya ciindaawo, ndyetutotolelela kulindila cilambu cesu. Tulilibambite kulindila cilambu cesu, nabi tulindile kwamyaaka iinji buyani. Pacecino ciindi ndikusuni abuumbi kulangila kwesu.”

7-8. Ino nkulangila nshi bantu baanji nkobacite? (Bene Loma 8:​20, 21)

⁷ Bantu baanji balambila Yehova munshiku shino tabalangili kukala kwiculu. Balicite kulangila Abulaamu nkwakalinga kucite—kwakukala kwamuyayaya pacishi paciindi Bwaami bwakwe Lesa ndyeshi bukanookweendelesha. (Ebu. 11:​8-10, 13) Paulo wakaamba pashoolwe shibotu nsheshi bakatambule abo bacite kulangila uku. (Amubelenge Bene Loma 8:​20, 21.) Ino nciinshi cakamusangalasha abuumbi ndyemwakeeyabo pashishomesho shamu Baibo nshomutolangila kunembo? Sa nkulangila ayi bushiku bumwi mulaakuba bamaninite akutanobishaawo? Nabi sa mwakasangalala kushiba ayi beshikamukowa abeshicibusa banu bakafwa balaakubushikwa akukala mu paladaiso pacishi? Ceebo cakulangila Lesa nkwakatupa, kuli shiinji shibotu nshomutolangila.

⁸ Inga caba ayi tutolangila kukala kwamuyayaya kwiculu na pacishi, tulicite kulangila kubotu kutupa kusangalala. Alimwi kulangila kwesu kusangalasha inga kwayuminaako. Shakakonkelaawo Paulo nshaakalemba inga shatucafwa kushiba mbweenga twacita boobo. Amuleke tubandike nshaakalemba pakulangila nkotucite. Kucita boobo kutootucafwa kushoma ayi kulangila kwesu kulaakutolelela kuyuminaako alimwi teshi kukatulenshe nsoni.

9-10. Kweelana ashakacitikila Paulo, ino nshiinshi Beneklistu nsheenga balangila? (Bene Loma 5:3) (Amubone ashikope.)

⁹ Amubelenge Bene Loma 5:3. Paulo wakaamba ayi na tutokwiinda mumapensho, kulangila kwesu inga kwayuminaako. Ano ici mpashi inga catukankamika. Nacibi boobo, bashikwiiya bakwe Klistu boonse inga balangila kwiinda mumapensho. Amuyeeye pa shakacitikila  Paulo. Wakalwiita Beneklistu baku Tesalonika ayi: “Nditwakalinga amwebo, twakamulwiitila limwi ayi tulaakupenshekwa alimwi kweelana ambomwishi ici cakacitika cancinencine.” (1 Tesa. 3:4) Alimwi wakalwiita Beneklistu baku Kolinto ayi: ‘Nobamakwesu, tulisuni kwaamba ayi mwishibe mapensho ngotwakeendaamo . . . Tetwakalinga kushoma kwaamba ayi inga katucili boomi.’—2 Koli. 1:8; 11:​23-27.

¹⁰ Munshiku shino, Beneklistu abalo inga balangila kwiinda mumapensho amwi. (2 Timo. 3:12) Sa mwakapenshekwawo kale ceebo cakwaamba ayi mwakashoma muli Yesu akuba shikwiiya wakwe? Mpashi beshicibusa abeshikamukowa banu balamuweluluka. Alimwi mpashi bamwi balamucitila ashintu shitabete kabotu. Na mpashi bakamunjisha ncito nabi mbomusebensaabo balamupensha ceebo cakwaamba ayi mulashomeka. (Ebu. 13:18) Sa bamumfulumeende bakamupenshawo kale ceebo cakwaamba ayi mulashimikilako bamwi pakulangila nkomucite? Tacicite mulandu amapensho ngeenga tweendaamo, Paulo wakaamba ayi tulyeelete kusangalala. Ino nceebonshi?

11. Ino nceebonshi tulyeelete kuba bashinishite kuliyumya nabi twiinde mumapensho ali buyani?

¹¹ Inga twasangalala ndyetutokwiinda mumapensho mukwiinga tulicishi ayi kwiinda mumapensho inga kwatucafwa kuba amubo umwi uyandika. Bene Loma 5:3 ilaamba ayi, “mapensho ngaaisha muntu kutaboola pesule na kuliyumya.” Beneklistu boonse balaakwiinda mumapensho, aboobo boonse balyeelete kuba amubo wakuliyumya. Tulyeelete kuba bashinishite kuliyumya nabi twiinde mumapensho ali buyani. Tulaakutambulabo cilambu ncetutolangila, na twatolelela kuliyumya. Tatusuni kuba anga mbantu Yesu mbwaakalinga kuyeeyawo ndyaakaamba cikoshanyo ca mbuto shakalokela pa bulongo bwa mabwe. Pakutaanguna bakatambula maswi calusangalalo. Sombi ndyebakapolelwa “makatasho nabi mapensho,” bakaboolela mwisule. (Mate. 13:​5, 6, 20, 21) Ncakwiila kwaamba ayi kupikishikwa nabi kupenshekwa takusangalashiiwo. Sombi kuli shibotu shiswaamo na twaliyumya akutolelela kusebensela Yehova. Munshila nshi?

12. Ino nshibotu nshi shiswaamo na twatolelela kuliyumya ndyetutokwiinda mumapensho?

¹² Shikwiiya Jemusi wakaamba shibotu shiswaamo na twatolelela kuliyumya ndyetutokwiinda mumapensho. Wakalemba ayi: “Kutaboola pesule na kuliyumya kwanu kulyeelete kutolelela kushikila mukabule kampenda nakaceyi mulushomo lwanu.” (Jemu. 1:​2-4) Aboobo Jemusi wakaamba ayi kuliyumya kulicite luyaando. Ino nduyaando nshi? Inga kwamucafwa kunookalika moyo abuumbi, kuba alushomo luyumu akunoocinka manungo muli Lesa. Nacibi boobo, kuli cintu cimwi ciyandika ciswaamo na twaliyumya ndyetutokwiinda mumapensho.

13-14. Ino nshiinshi shiswaamo na twaliyumya, alimwi ino kulangila kwesu kulaba buyani? (Bene Loma 5:4)

¹³ Amubelenge Bene Loma 5:4. Paulo wakaamba ayi kuliyumya kulatucafwa kuba a “bwikaalo buyanda Lesa.” Na mwatolelela kuliyumya mulasangalasha Yehova. Ano ici tacaambi ayi Yehova alasangalala na mutokwiinda mumeelesho nabi mumapensho. Sombi alasangalala ceebo cakwaamba ayi mwatolelela kuliyumya cakushomeka. Cilayuminisha abuumbi kushiba ayi na twatolelela kuliyumya, Yehova alasangalala!—Kulu. 5:12.

¹⁴ Amwiibaluke ayi Abulaamu wakeenda mumapensho alimwi ndyaakaliyumya cakushomeka, Yehova wakasangalala. Yehova wakamubona ayi ngushicibusa wakwe alimwi ayi aliluleme. (Mata. 15:6; Loma. 4:​13, 22) Ubu mbweenga caba akuli ndiswe. Yehova alasangalala pali ndiswe kuteshi ceebo ca ncito njotumusebensela na mikuli njetucite. Yehova alasangalala pali ndiswe na twatolelela kushomeka nabi ndyetutokwiinda mumapensho. Alimwi tacicite mulandu aciimo ncotubetewo, bukaalo na  nshetucikonsha kucita, soonse inga twacikonsha kuliyumya. Sa kuli lipenshi ndyemutokwiindaamo ndyemutoliyumya cakushomeka? Na mboboobo, amushibe kwaamba ayi mutosangalasha Lesa. Na twashiiba ayi tutosangalasha Lesa, kulangila kwesu kulayuminaako mushishomesho nshaakatushomesha.

15. Ino nshiinshi Paulo nshakaamba nshotucana pa Bene Loma 5:​4, 5, alimwi ino ngumwiipusho nshi mpashi bamwi ngweenga baliipusha?

¹⁵ Kweelana a Paulo mbwakaamba, tulasangalasha Yehova na twatolelela kushomeka akuliyumya ndyetutokwiinda mumapensho. Amunyumfwe shakakonkelaawo Paulo nshakaamba: ‘Bwikaalo buyanda Lesa mbobuleta kulangila. Akwalo kulangila uku takulenshi nsoni.’ (Loma. 5:​4, 5) Ano ici inga capa kwaamba ayi bamwi bapilinganishikwe. Ino nceebonshi? Mukwiinga kweelana ambotweeya, pa Bene Loma 5:​2, Paulo wakaamba ayi Beneklistu baku Loma bakalinga kucite kale kulangila kwakutambula “bulemu bwakwe Lesa.” Aboobo muntu inga waliipusha ayi, ‘Na Beneklistu aba bakalinga kucite kale kulangila, ino nceebonshi alimwi Paulo wakaamba pakulangila munkalata njakalemba?’

16. Ino nshiinshi sheenga shacafwa muntu kwaamba ayi ayumye kulangila kwakwe? (Amubone ashikope.)

¹⁶ Inga twanyumfwisha Paulo ncaakalinga kusansulula na katwiibaluka ayi kulangila inga kwayuminaako. Kucakubonenaako, sa mutokwiibaluka ciindi cakutaanguna ndyemwakanyumfwabo pakulangila kubotu nkotucana mu Maswi akwe Lesa? Mpashi paciindi cilya tamwakalinga kushomaawo ayi ncakwiila inga mwekala kwamuyayaya mu paladaiso pacishi. Nacibi boobo, ndyemwakeeya shiinji pali Yehova ashishomesho shakwe shamu Baibo, mwakashoma cakutatoonsha ayi nshomutolangila shilaakukumanishikwa.

17. Ino nshiinshi nshomweelete kucita kwaamba ayi mutolelele kuyumya kulangila kwanu pesule lya kwaaba buumi bwanu kuli Yehova akubombekwa?

¹⁷ Nabi pesule lyakwaamba ayi mwaaba buumi bwanu kuli Yehova akubombekwa, mwakatolelela  kwiiya shiinji pali nguwe akushimpa lwakumushimu, lyalo kulangila kwanu kwakayuminaako. (Ebu. 5:13–6:1) Mpashi shaambwa pa Bene Loma 5:​2-4 shakamucitikilaawo. Mwakeenda mumapensho apusenepusene, sombi mwakaliyumya alimwi mwakabona ayi Yehova wakalinga kusangalete pali ndimwe. Mukwiinga mulishi kwaamba ayi Yehova alimusuni alimwi alisangalete pali ndimwe, mulashoma cakutatoonsha ayi alaakukumanisha nshaakamushomesha. Kulangila kwanu kwayuminaako kwiinda mbokwakalinga ndyemwakatalikabo kwiiya cancine. Alimwi kulangila nkomucite mulikusuni abuumbi. Kulakuma shintu shoonse nshomucita mubuumi bwanu akwaalula nshomucita ku bamumukwashi wanu, mbomusala shakucita alimwi ambomusebensesha ciindi ncomucite.

18. Ino ngamaswi nshi Paulo ngakaamba eenga atupa kushoma cakutatoonsha ayi Yehova alaakukumanisha nshaakatushomesha?

¹⁸ Mutumwi Paulo wakaamba citeente cimwi ciyandika abuumbi pakulangila nkomucite ceebo cakwaamba ayi mulacita shisangalasha Lesa. Paulo wakaamba ayi nshomutolangila shilaakukumanishikwa. Ino nceebonshi inga mwashoma ayi shilaakukumanishikwa? Kwiinda mukutanjililwa amushimu usalashi Paulo wakalembela Beneklistu maswi aya atokonkelaawo eenga atupa kushoma cakutatoonsha. Wakaamba ayi: “Kulangila uku takulenshi nsoni ceebo Lesa alitusuni abuumbi kwiinda mu mushimu usalashi uyo ngwaatupa.” (Loma. 5:5) Inga mwashoma cakutatoonsha ayi Yehova alaakukumanisha nshaakamushomesha.

19. Ino nciinshi nceenga mwashoma cakutatoonsha pashintu nshemutolangila?

¹⁹ Munoyeeya pacishomesho Yehova ncakashomesha Abulaamu anshakacita kwaamba ayi asangalashe Lesa akuba abushicibusa anguwe. Abulaamu nshaakalinga kulangila shakakumanishikwa. Baibo ilaamba ayi: “Abulaamu wakalindila camoyonteeka, aboobo wakatambula sheesho Lesa nshaakamushomesha.” (Ebu. 6:15; 11:​9, 18; Loma. 4:​20-22) Ncakutatoonsha kwaamba ayi taakwe kulenshekwa nsoni. Amwebo inga mwashooma ayi na mwatolelela kushomeka, mulaakutambula shoolwe nshomutolangila. Kuli sheebo shiinji sheelete kumupa kusangalala mukwiinga mulishi ayi nshomutolangila shilaakukumanishikwa; teshi mukalenshekwe nsoni! (Loma. 12:12) Paulo wakalemba ayi: ‘Ndaseenga ayi Lesa uyo ulengesha ayi munoolangila asushe kusangalala kwancinencine mumyoyo yanu alimwi aluumuno kwiinda mulushomo ndomucite muli nguwe, kwaamba ayi nkusu sha mushimu usalashi shinooyumya kulangila kwanu.’—Loma. 15:13.