1. Ino nciinshi cipa kwaamba ayi mukwashi wakwe Yehova ube ucatene?

TULIKONDETWE kuba mumukwashi wakwe Yehova. Ino nceebonshi mumukwashi wesu muli luumuno alucatano? Cili boobo mukwiinga soonse tuleelesha cankusu kulemeka baabo Yehova mbwaakapa nkusu shakutanjilila. Alimwi kunyumfwisha kabotu bubaambo bwakutanjilila Yehova mbwaakabikaako, kulaakutucafwa kuba bacatene abuumbi.

2. Ino njimiipusho nshi njeshi tubandike mumutwi uyu?

² Mumutwi uyu, tutobandika pabaabo bakapekwa nkusu shakutanjilila mulibungano. Kwiilikaawo, tutobandika ashikumbulo kumiipusho itokonkelaawo: Ino benankashi balicite lubasu nshi? Sa mukwesu uliwoonse ngumutwi wa benankashi? Sa nkusu sha bamanene mulibungano shilyeelene ankusu sha mutwi wa mukwashi? Cakutaanguna, amuleke tubandike mbotweelete kubona benankashi.

3. Ino nciinshi ceenga catucafwa kulumba pancito isebensa benankashi?

³ Tulabalumba abuumbi benankashi basebensa cankusu kulama mikwashi yabo, kushimikila makani abotu, alimwi akucafwa bamwi mulibungano. Inga twatolelela kubalumba abuumbi na twayeeya Yehova a Yesu mbobababona. Alimwi tutokwiiya ambweenga twakonkela cakubonenaako ca mutumwi Paulo mbwaakalinga kubona banakashi.

4. Ino Baibo ilatondesha buyani ayi Yehova alabona ayi basankwa abanakashi balayandika?

⁴ Baibo ilatondesha ayi Yehova alabona ayi banakashi abasankwa  balayandika. Kucakubonenaako, ilaamba ayi muciindi ca batumwi, Yehova wakapa mushimu usalashi banakashi abasankwa, alimwi ankusu shakucita shaankamiko, mbuli kwaamba mishobo ipusenepusene. (Mili. 2:1-4, 15-18) Pabaabo bananikitwe amushimu usalashi beshibakaye kwiculu mukweendelesha a Klistu pali basankwa abanakashi. (Gala. 3:26-29) Alimwi pabaabo beshibakatambule cilambu cakuba abuumi butamaani pacishi capanshi pali basankwa abanakashi. (Ciyu. 7:9, 10, 13-15) Alimwi incito yakushimikila akwiisha bantu makani abotu yakapekwa kubasankwa abanakashi. (Mate. 28:19, 20) Kucakubonenaako, libuku lya Milimo lilaamba pali nankashi waliina lya Pulisila. Kwiinda mukusebensela pomwi abeebaye ba Akula, bakacafwa Apolosi uyo wakalinga kwiite abuumbi kunyumfwishisha kabotu cancine.​—Mili. 18:24-26.

5. Ino lilembo lyakwe Luka 10:38, 39, 42 lilatondesha buyani ayi Yesu wakalinga kulemeka banakashi?

⁵ Yesu wakalinga kulemeka banakashi. Taakalinga kukonkela milawo yaba Falisi batakalinga kutondesha bulemu kubanakashi. Ba Falisi tabakalinga kubandika abanakashi pabantu alimwi tabakalinga kweelesha kubandika Malembo abanakashi. Sombi Yesu lakwe wakalinga kubandika abanakashi alimwi abasankwa makani ayandika amu Malembo. * (Amubelenge Luka 10:38, 39, 42.) Alimwi wakalinga kusuminisha banakashi kuyaakwe muncito yakushimikila. (Luka 8:1-3) Alimwi wakabapa acoolwe cakuya mukwaambilisha kubatumwi bakwe ayi wabushikwa.​—Joni 20:16-18.

6. Ino mutumwi Paulo wakatondesha buyani ayi wakalinga kulemeka banakashi?

⁶ Mutumwi Paulo wakeebalusha Timoti kulemeka banakashi. Wakamulwiita ayi anoobona ‘banakashi bacinene mbuli banyina’ alimwi ‘banakashi bacanike mbuli nankashi shakwe.’ (1 Timo. 5:1, 2) Nabi kwaamba ayi Paulo wakacita shiinji kwaamba ayi acafwe Timoti kuba Mwineklistu ushimpite, wakalinga kucishi kwaamba ayi banyina abakambiyaakwe Timoti mbobakalinga bakutaanguna kwiisha Timoti “malembo asalalite.” (2 Timo. 1:5; 3:14, 15) Munkalata Paulo njaakalembela bene Loma, wakaansha banakashi akubaamba meenaabo. Taakwe kweelabo pakubona nshebakacita sombi wakabalumba pancito njobakasebensa.​—Loma. 16:1-4, 6, 12; Filip. 4:3.

7. Ino njimiipusho nshi njeshi tubandike?

⁷ Bweenka mbotweeya mumapalagilafu akwisule, Baibo tayaambiwo ayi bamakwesu balayandika kwiinda benankashi. Benankashi bacite lusuno abwaabi balacafwilisha abuumbi mulibungano, alimwi bamanene balabashoma mukwiinga balayuminisha luumuno alucatano mulibungano. Nacibi boobo, kuli miipusho imwi njotweelete kucana shikumbulo. Kucakubonenaako: Ino nceebonshi Yehova wakaamba ayi nankashi alyeelete kufwala citambala kumutwi cimwi ciindi? Mukwiinga bamakwesu mbobasalwa mbuli bamanene alimwi abasebenshi bacafwilisha, sa ici cilaamba ayi mukwesu uliwoonse ngumutwi wa benankashi mulibungano?

8. Kweelana a Bene Efeso 5:23, sa mukwesu uliwoonse ngumutwi wa benankashi? Amusansulule.

⁸ Sa mukwesu uliwoonse ngumutwi wa benankashi mulibungano? Sobwe! Klistu ngomutwi walibungano. (Amubelenge Bene Efeso 5:23.) Mumukwashi, musankwa ngoocite nkusu pamukaakwe. Mwaana musankwa wakabombekwa teshi ngomutwi wa banyina. (Efe. 6:1, 2) Mulibungano, nkusu shakutanjilila bamakwesu abenankashi shicite bamanene shilicite mposheela. (1 Tesa. 5:12; Ebu. 13:17) Banakashi batekali abashali babo balatolelela kulemeka bashali babo alimwi abamanene mulibungano. Nacibi boobo, bweenka mbuli bamakwesu mulibungano, abalo mutwi wabo ngu Yesu.

9. Ino nceebonshi cimwi ciindi benankashi balyeelete kufwala citambala kumutwi?

 ⁹ Ncakwiila kwaamba ayi Yehova wakapa basankwa bakasalwa mukuli wakutanjilila akwiisha mulibungano, alimwi uyu teshi mukuli ngwaakapa benankashi. (1 Timo. 2:12) Ino nceebonshi? Bweenka mbwaakasala Yesu kuba mutwi wa musankwa, Yehova wakasala basankwa mulibungano kwaamba ayi shintu shinokweenda kabotu kwakubula kupilingana. Na ceebo cabukaalo bumwi nankashi wapekwa lubasu lweelete kucitwa amukwesu, Yehova wakabika mulawo wakwaamba ayi alyeelete kufwala citambala kumutwi. * (1 Koli. 11:4-7) Yehova wakalwiita benankashi kucita boobo kwaamba ayi batondeshe bulemu kubaabo mbwaakapa nkusu shakutanjilila kuteshi ceebo cakwaamba ayi mba panshi. Amuleke tubandike mwiipusho utokonkelaawo: Ino mitwi ya mikwashi abamanene balicite nkusu nshi?

10. Ino nciinshi ceenga capa kwaamba ayi munene asune kubika milawo mulibungano?

¹⁰ Bamanene balimusuni Klistu, alimwi a “mbelele” Yehova a Yesu nshobakabika mumaansaabo kwaamba ayi balame. (Joni 21:15-17) Mukwiinga munene alabikila maano kulibungano, inga kaalibona mbuli mushali wabamakwesu abenankashi. Aboobo inga watalika kuyeeya ayi na mutwi wa mukwashi ngoocite nkusu shakubika milawo mumukwashi kwaamba ayi abashitilishe, nkokwaamba ayi munene inga wabika milawo njaatoobona ayi inga yashitilisha mbelele shakwe Lesa. Alimwi bamakwesu abenankashi bamwi inga bapa kwaamba ayi bamanene banooyeeya munshila iyi na kababasenga ayi babasalile shakucita. Ano sa bamanene balicite nkusu mulibungano bweenka mbuli shicite mutwi wa mukwashi?

11. Ino mikuli icite mutwi wa mukwashi ilikoshenye buyani amikuli icite munene mulibungano?

 ¹¹ Mutumwi Paulo wakatondesha ayi mikuli icite mutwi wa mukwashi ilikoshenyeeko amikuli icite munene mulibungano. (1 Timo. 3:4, 5) Kucakubonenaako, Yehova alisuni ayi abo bali mumukwashi banonyumfwila mutwi wa mukwashi. (Kolo. 3:20) Alimwi alisuni kwaamba ayi bamakwesu abenankashi mulibungano banonyumfwila bamanene. Kwiilikaawo, Yehova alalangila bamanene amitwi ya mikwashi kulama kabotu lwakumushimu abo mbobatootanjilila. Alimwi balyeelete kushinisha kucafwa baabo mbobatootanjilila kulinyumfwa ayi balisunikwi. Alimwi bweenka mbuli mutwi wa mukwashi utanjilila kabotu, bamanene balashinisha kwaamba ayi bamakwesu abenankashi bapekwa lucafwo muciindi camapensho. (Jemu. 2:15-17) Kwiilikaawo, Yehova alalangila bamanene amitwi ya mikwashi kucafwa bamwi kukonkela milawo yakwe. Alabacenjesha ayi tabeelete ‘kwiindilila shilembetwe’ mu Baibo.​—1 Koli. 4:6.

12-13. Kweelana a Bene Loma 7:2, ino nkusu shicite mutwi wa mukwashi shilipusene buyani ankusu shicite munene mulibungano?

¹² Nacibi boobo, mikuli yobilo iyi kuli mboipusene. Kucakubonenaako, Yehova wakapa bamanene kuteshi mitwi ya mikwashi nkusu shakoombolosha makani, akukusha mulibungano abo bacita shibiibi batasuni kwaana.​—1 Koli. 5:11-13.

 ¹³ Nacibi boobo, kuli nkusu shimwi nshaakapa mitwi ya mikwashi nshaatakwe kupa bamanene. Kucakubonenaako, wakapa mutwi wa mukwashi nkusu shakubika milawo mumukwashi akushinisha kwaamba ayi uliwoonse wakonkela milawo iyo. (Amubelenge Bene Loma 7:2.) Kucakubonenaako, mutwi wa mukwashi alicite nkusu shakubika mulawo waciindi baana ndyebeelete kushika paŋanda. Alimwi alicite nkusu shakwaanisha bana bakwe na baalilwa kukonkela milawo njaakabika. (Efe. 6:1) Nacibi boobo, mutwi wa mukwashi ucite lusuno alataanguna kubandika amukaakwe kaatana kubika milawo ya mukwashi, lakwe amukaakwe “ngumubili womwi.” *​—Mate. 19:6, NWT.

14. (a) Kweelana a Maako 10:45, ino nceebonshi cileelela kwaamba ayi Yehova wakasala Yesu kuba mutwi walibungano? (b) Ino bamu Likoto Litanjilila balicite mukuli nshi? (Amubone kabokosi kacite mutwi utokwaamba ayi “ Mukuli Walikoto Litanjilila.”)

¹⁴ Kwiinda mucilubula, Yehova wakoola boonse bali mulibungano alimwi a uliwoonse weenga washoma muli nguwe. (Amubelenge Maako 10:45; Mili. 20:28; 1 Koli. 15:21, 22) Aboobo cileelela kwaamba ayi wakasala Yesu uyo wakaaba buumi bwakwe mbuli cilubula kuba mutwi walibungano. Mbuli mutwi wesu, Yesu alicite nkusu shakubika milawo yeelete kukonkela muntu womwi awomwi, mikwashi, alimwi a libungano. Alimwi alicite ankusu shakushinisha kwaamba ayi milawo iyo yakonkelwa. (Gala. 6:2) Nacibi boobo, Yesu teelibo pakubika milawo. Alitusuni alimwi alatubikila maano.​—Efe. 5:29.

15-16. Ino nshiinshi nshomweeya pamakani akaamba ba Marley alimwi amukwesu waliina lya Benjamin?

¹⁵ Benankashi balatondesha ayi balalemeka Klistu kwiinda mukukonkela butanjilishi bwa basankwa mbwaakasala kubalama. Benankashi  baanji balalinyumfwa bweenka mbuli nankashi waliina lya Marley, uyo ukala ku America wakaamba ayi: “Ndalumba abuumbi palubasu ndooncite mbuli mwanakashi weebetwe alimwi anankashi mulibungano. Ndicishi kwaamba ayi ndyeelete kutolelela kusebensa cankusu kwaamba ayi ntondeshe ayi ndalemeka bubaambo Yehova mbwaakabika. Alimwi beebaangu abamakwesu mulibungano balapa kwaamba ayi ici cibe cuubu mukwiinga balandemeka akundumba pancito nshonsebensa.”

¹⁶ Bamakwesu balatondesha ayi balanyumfwishisha kabotu bubaambo bwa mutwi walibungano kwiinda mukutondesha bulemu kubenankashi. Mukwesu waliina lya Benjamin ukala ku England wakaamba ayi: “Ndeeya shiinji abuumbi ku shikumbulo sha benankashi kumabungano, nshobacita ndyebatoocita ciiyo capalwaabo alimwi abwakusebensa kabotu muncito yakushimikila. Ndabona ayi balasebensa ncito iyandika abuumbi.”

17. Ino nceebonshi tulyeelete kulemeka bubaambo Yehova mbwaakabika?

¹⁷ Na uliwoonse mulibungano​—musankwa, mwanakashi, mutwi wa mukwashi, alimwi abamanene​—wanyumfwishisha akulemeka bubaambo bwakwaamba ayi Yehova wakapa bamwi nkusu shakutanjilila, mulibungano mulaba luumuno. Alimwi ciyandika abuumbi, kucita boobo kulapa kwaamba ayi Ishiwesu shilusuno Yehova alumbaishikwe.​—Kulu. 150:6.