1. Ino nshiinshi shipa kwaamba ayi basankwa bamwi baalilwe kulama kabotu mukwashi wabo?

INO kuba “mutwi” cilaamba nshi? Basankwa bamwi balaalilwa kulama kabotu mukwashi wabo ceebo cakukonkela milawo ankulilo yabo. Amunyumfwe shakaamba nankashi waliina lya Yanita, ukala ku Europe, wakaamba ayi: “Nkonkala bantu baanji balabona ayi banakashi tabacindeme kwiinda basankwa alimwi balyeelete kunoobonwa anga mbasha.” Mukwesu waliina lya Luke, ukala ku America wakaamba ayi: “Bashali basankwa bamwi balaiisha bana babo basankwa ayi banakashi taakuwo nceenga baamba ciyandika aboobo basankwa tabeelete kukutika nshobaamba.” Nacibi boobo, ubu teshi Yehova mbwaasuni kwaamba ayi basankwa banoosebensesha nkusu shabo shakutanjilila. (Amweelanye a Maako 7:13.) Ano ino musankwa inga wacita buyani kwaamba ayi anootanjilila kabotu mukwashi wakwe?

2. Ino mutwi wa mukwashi alyeelete kushiba nshi, alimwi ino nceebonshi?

² Kwaamba ayi musankwa anootanjilila kabotu mukwashi wakwe, cakutaanguna alyeelete kushiba Yehova nshaasuni ayi anoocita. Alimwi alyeelete kushiba Yehova ncaakapeta bamwi nkusu shakutanjilila, alimwi ambweenga wakonkela cakubonenaako cakwe Yehova a Yesu mbobasebensesha nkusu shabo shakutanjilila. Ino nceebonshi ncociyandikila kumusankwa kushiba sheeshi? Nceebo cakwaamba ayi Yehova wakapa mitwi ya mikwashi nkusu shakutanjilila, alimwi alabalangila kusebensesha kabotu nkusu isho.​—Luka 12:48b.

3. Kweelana 1 Bene Kolinto 11:3, ino mbubaambo nshi Yehova mbwaakabika mumukwashi wakwe woonse?

³ Amubelenge 1 Bene Kolinto 11:3. Lilembo ili lilasansulula Yehova mbwaabambite mukwashi wakwe kwiculu apacishi capanshi. Mukwiinga ngomutwi wa mukwashi uyu, ngoocite nkusu shoonse shakutanjilila. Kwiinda mububaambo bwakwe, wakapako bamwi nkusu shakutanjilila, sombi alaakuboombolosha pamakani ambobasebensesha  nkusu nshaakabapa. (Loma. 14:10; Efe. 3:14, 15) Yehova wakapa Yesu nkusu shakutanjilila libungano, sombi alabikila maano Yesu mbwasebensesha nkusu nshaakapekwa. (1 Koli. 15:27) Alimwi Yehova ngowakapa basankwa nkusu shakutanjilila mukwashi wabo, sombi balaakoomboloshekwa kuli nguwe a Yesu pamakani ambobalama mukwashi wabo.​—1 Pit. 3:7.

4. Ino Yehova a Yesu balicite nkusu shakucita nshi?

⁴ Mukwiinga Yehova ngomutwi wa mukwashi wakwe wakwiculu apacishi capanshi, alicite nkusu shakupangila bana bakwe milawo akushinisha kwaamba ayi baikonkela. (Isa. 33:22) Yesu alakwe mbuli mutwi walibungano lya Bwineklistu, alicite nkusu shakupanga milawo akushinisha kwaamba ayi Beneklistu baikonkela.​—Gala. 6:2; Kolo. 1:18-20.

5. Ino mutwi wa mukwashi Mwineklistu alicite nkusu shakucita nshi, alimwi ino nkusu shakwe shileela pali?

⁵ Bweenka mbuli Yehova a Yesu, mutwi wa mukwashi Mwineklistu alicite nkusu shakusala sheenga shakuma mukwashi wakwe. (Loma. 7:2; Efe. 6:4) Nacibi boobo, nkusu shakwe shilicite mposheela. Kucakubonenaako, ndyaatopanga milawo ya mukwashi wakwe, alyeelete kukonkela njiisho nshetucana mu Maswi akwe Lesa. (Tus. 3:5, 6) Alimwi taacite nkusu shakupangila milawo abo batabete lubasu lwa mukwashi wakwe. (Loma. 14:4) Na bana bakwe basankwa abanakashi bakula akutalika kulikalila, taatoleleli kubapangila milawo na kubatanjilila mbuli mutwi wabo.​—Mate. 19:5.

6. Ino nceebonshi Yehova ncaakapetako bamwi nkusu shakutanjilila?

⁶ Yehova wakapako bamwi nkusu shakutanjilila ceebo cakwaamba ayi alisuni mukwashi wakwe. Ncipo ncaakapa bamwi. Bubaambo ubu bulapa kwaamba ayi mumukwashi wakwe Yehova munooba luumuno ashintu kunokweenda kabotu. (1 Koli. 14:33, 40) Kwakubula bubaambo bwakutanjilila, naakwiinga mumukwashi wakwe Yehova taamuwo lucatano alimwi alusangalalo. Kucakubonenaako, naakwiinga takwalingaawo kushiba weelete kwaamba shakucita alimwi awakushinisha kwaamba ayi isho shaambwa shacitwa.

7. Kweelana a Bene Efeso 5:25, 28, sa Yehova wakalinga kusuni ayi basankwa banoolyatilila bakaabo?

⁷ Na bubaambo bwakwe Lesa bwakupako bamwi nkusu shakutanjilila mbubotu, ino nceebonshi banakashi baanji munshiku shino balabona ayi beebaabo balabalyatilila alimwi akubapensha? Nceebo cakwaamba ayi basankwa baanji tabakonkeli njiisho shakwe Yehova sheelete kukonkela mukwashi, sombi balasalawo kunokonkela milawo yakumusena nkobakakulila. Alimwi bamwi balanyumfwa kabotu kupensha bakaabo. Kucakubonenaako, musankwa inga kaapensha mukaakwe kwaamba ayi anoomupa bulemu, na ceebo cakusuna kutondesha ayi “ngumusankwa.” Mpashi cimwi ciindi inga kayeeya ayi nabi kwaamba ayi taakakatishi mukaakwe kumusuna, inga wacikonsha kupa kwaamba ayi anoomuloonda. Alimwi inga wacita boobo kwaamba ayi anokweendelesha mukaakwe. * Kuyeeya kwa mushobo uyu takubete kabotu, mukwiinga kulapa banakashi kutapekwa bulemu mbobeelete, alimwi kucita boobo kulipusene kulaalebo a Yehova nshaasuni.​—Amubelenge Bene Efeso 5:25, 28.

8. Ino musankwa inga wacita buyani kwaamba ayi anootanjilila kabotu mukwashi wakwe?

⁸ Musankwa inga watanjilila kabotu mukwashi wakwe na kakonkela cakubonenaako cakwe Yehova a Yesu mbobasebensesha kabotu nkusu shakutanjilila. Amuyeeye pamibo yobilo itondesha Yehova a Yesu, akubona mbweenga mutwi wa mukwashi wakonkela mibo iyi ndyaatotanjilila mukwashi wakwe.

9. Ino Yehova alatondesha buyani ayi alaliceesha?

 ⁹ Kuliceesha. Yehova ngumusongo kwiindaawo; nacibi boobo, alakutika kumiyeeyo yaamba basebenshi bakwe. (Mata. 18:23, 24, 32) Alasuminisha abaabo mbwaeendelesha kwaamba nshebatoyeeya. (1 Baam. 22:19-22) Yehova taacite kampenda, nacibi boobo, taatulangili kucita shintu anga mbantu bamaninite. Sombi alatucafwa mbuli basebenshi bakwe batamaninite kuswitilila muncito yakwe. (Kulu. 113:6, 7) Alimwi Baibo ilaamba ayi Yehova ‘ngumucafwi.’ (Kulu. 27:9; Ebu. 13:6) Mwaami Defedi wakaamba ayi cakapa kwaamba ayi acikoonshe kusebensa ncito shinene, nkuliceesha kwakwe Yehova alucafwo ndwaakamupa.​—2 Samwe. 22:36.

10. Ino Yesu wakatondesha buyani kuliceesha?

¹⁰ Amuyeeye cakubonenaako cakwe Yesu. Nabi kwaamba ayi wakalinga Mwaami wabashikwiiya bakwe, wakabasansha kushimpanta. Ino nceebonshi comwi Yehova ncaakapa kwaamba ayi makani aya alembwe mu Baibo? Ncakutatoonsha kwaamba ayi wakalinga kusuni kutondesha cakubonenaako nceenga mitwi ya mikwashi alimwi abamwi bakonkela. Yesu mwiine wakaamba ayi: “Ono ndacita citondesho kwaamba ayi amwebo mulyeelete kunoocitila bamwi bweenka mbondamucitila.” (Joni 13:12-17) Nabi kwaamba ayi Yesu wakalinga kucite nkusu sha butanjilishi, taakalinga kulangila bamwi kumusebensela. Sombi lakwe ngowakalinga kusebensela bamwi.​—Mate. 20:28.

11. Ino mutwi wa mukwashi inga wacita buyani kwaamba ayi akonkele cakubonenaako cakuliceesha cakwe Yehova a Yesu?

¹¹ Nsheenga tweeya. Mutwi wa mukwashi inga watondesha ayi alaliceesha munshila shiinji. Kucakubonenaako, taalangili bakaakwe abana bakwe kucita shintu anga mbantu bamaninite. Alakutika kumuyeeyo weenga waamba mukaakwe abaana, nabi wapusanaako anshatoyeeya. Ba Marley baku America bakaamba ayi: “Cimwi ciindi nebo abeebangu tulaba amiyeeyo ipusene. Sombi ndashiba ayi ndayandika kubeebaangu mukwiinga balanjipusha nshentooyeeya kabatana kusala shakucita.” Kwiilikaawo, musankwa uliceesha alacafwilisha muncito sha palubaansa, nabi kwaamba ayi bantu bakumusena nkwakala balabona ayi mwanakashi ngoweelete kusebensa ncito sha palubaansa. Kwalo ici teshi cuubu. Ino nceebonshi? Nankashi waliina lya Rachel wakaamba ayi: “Nebo kumisheesu na musankwa kaacafwa mukaakwe incito mbuli kusansha mbale na kubotesha muŋanda, beshikamukowa abantu bamwi balatalika kumubona ayi ‘teshi musankwa.’ Balayeeya ayi na musankwa utoocita boobo nkokwaamba ayi mwanakashi wakamubwesa.”  Na bantu baanji kumusena nkomukala mbobayeeya, amwiibaluke kwaamba ayi Yesu wakasansha bashikwiiya bakwe kushimpanta nabi kwaamba ayi bantu bakalinga kucishi ayi uyu wakalinga mukuli wa musha. Mutwi wa mukwashi utanjilila kabotu taasuni bantu kunoomubona ayi alicite nkusu abuumbi na ulayandika abuumbi, sombi alisuni kwaamba ayi mukaakwe alimwi abaana banooba basangalete. Kwiilika pakuliceesha, ino njimibo nshi imwi ibotu njeenga mutwi wa mukwashi watondesha?

12. Ino lusuno lulapa Yehova a Yesu kucita nshi?

¹² Lusuno. Lusuno ndolupa kwaamba ayi Yehova anoocita shoonse nshaacita. (1 Joni 4:7, 8) Alatulama kabotu lwakumushimu kwiinda mukutupa Maswi akwe alimwi alibunga lyakwe. Alatucafwa kulinyumfwa kushitilishikwa kwiinda mukutulwiita ayi alitusuni. Ano ino mbuyani nshetuyandika lwakumubili? Yehova ‘alatupa shintu shoonse shitusangalasha.’ (1 Timo. 6:17) Na twabisha, alatululika, alimwi taacileeki kutondesha ayi alitusuni. Mukwiinga alitusuni, Yehova wakabika bubaambo bwacilubula kwaamba ayi atucaafwe. Yesu alakwe alitusuni abuumbi cakwaamba ayi wakaaba buumi bwakwe ceebo ca ndiswe. (Joni 3:16; 15:13) Taakuwo ceenga capa kwaamba ayi Yehova a Yesu bacileeke kutondesha lusuno kubaabo bashomeka kuli mbabo.​—Joni 13:1; Loma. 8:35, 38, 39.

13. Ino nceebonshi mutwi wa mukwashi alyeelete kutondesha ayi alisuni mukwashi wakwe? (Amubone kabokosi kacite mutwi utokwaamba ayi “ Ino Musankwa Wakeeba Conoono Inga Wacita Buyani Kwaamba ayi Mukaakwe Anomulemeka?”)

¹³ Nsheenga tweeya. Lusuno ndolweelete kupa mutwi wamukwashi kucita shili shoonse. Ino nceebonshi ncociyandikila? Mutumwi Joni wakakumbula ayi: “Uyo utasuni mubye [na mukwashi] ngwaabona, takoonshi kusuna Lesa, ngwaatana kubonaawo.” (1 Joni 4:11, 20, NWT) Aboobo musankwa usuni mukwashi wakwe alimwi usuni kukonkela cakubonenaako cakwe Yehova a Yesu, alacafwa mukwashi wakwe lwakumushimu alimwi akubacafwa kulinyumfwa kushitilishikwa akulamwa kabotu. (1 Timo. 5:8) Alayiisha alimwi akululika bana bakwe. Alimwi alatolelela kwiiya mbweenga wasala sheenga shacafwa mukwashi wakwe akulemeka Yehova. Amuleke ano tubandike mbweenga mutwi wa mukwashi wakonkela  nshetwaambawo alimwi acakubonenaako cakwe Yehova a Yesu.

14. Ino mutwi wa mukwashi inga wacita buyani kwaamba ayi acafwe mukwashi wakwe lwakumushimu?

¹⁴ Kulama mukwashi wakwe lwakumushimu. Yesu wakatondesha kwaamba ayi wakalinga kukonkela cakubonenaako ca baIshi, mukwiinga wakalinga kusuni kucafwa bashikwiiya bakwe kutolelela kuba alushomo luyumu. (Mate. 5:3, 6; Maako 6:34) Ubu mboceelete kuba aku mutwi wa mukwashi, cintu ciyandika abuumbi ncaeelete kucita nkucafwa mukwashi wakwe lwakumushimu. (Duto. 6:6-9) Alacita boobo kwiinda mukushinisha kwaamba ayi kababelenga akwiiya Maswi akwe Lesa lyoonse, kucanika kumabungano, kushimikila makani abotu, akutolelela kuba abushicibusa buyumu a Yehova.

15. Ino mutwi wa mukwashi inga wacita buyani kwaamba ayi atondeshe ayi alabikila maano kumukwashi wakwe?

¹⁵ Kuyuminisha mukwashi wakwe. Yehova wakalwiita Yesu ayi alimusuni, pameenso abantu bamwi. (Mate. 3:17) Yesu alakwe wakatondesha patuba kwaamba ayi wakalinga kubasuni bashikwiiya bakwe kwiinda mushintu nshaakalinga kwaamba akucita. Abalo bashikwiiya bakwe bakalinga kumulwiita ayi balimusuni. (Joni 15:9, 12, 13; 21:16) Mutwi wa mukwashi inga watondesha ayi alisuni mukaakwe abaana kwiinda mushintu nshaacita, mbuli kwiiyaabo Baibo. Alyeelete kubalwiita ayi alibasuni, alababona ayi balayandika, alimwi na kaceelela, alyeelete kubalumba pameenso abamwi.​—Tus. 31:28, 29.

16. Ino nshiinshi shimwi nsheenga mutwi wa mukwashi wacita, alimwi ino nshiinshi shaeelete kuleya?

¹⁶ Kulangweeta mukwashi shiyandika lwakumubili. Yehova wakalinga kupa bene Isilaeli nshobakalinga kuyandika nabi kwaamba ayi wakalinga kubaanisha na baalilwa kunyumfwila. (Duto. 2:7; 29:5) Amunshiku shino alatupa nshetuyandika. (Mate. 6:31-33; 7:11) Yesu alakwe wakalinga kulangweta bashikwiiya bakwe nshobakalinga kuyandika. (Mate. 14:17-20) Wakeelikawo akoolesha baabo bakalinga balwashi. (Mate. 4:24) Kwaamba ayi asangalashe Yehova, mutwi wa mukwashi alyeelete kuyandweta mukwashi wakwe nshebayandika lwakumubili. Nacibi boobo, kuli cimwi ncaeelete kuleya. Taeelete kunoobikilabo maano kuncito yakumubili cakwaamba ayi waalilwa akulama mukwashi wakwe lwakumushimu akubayuminisha.

17. Ino Yehova a Yesu balatwiisha akutululika buyani?

¹⁷ Kululika. Yehova alatululika mukwiinga alisuni kutucafwa. (Ebu. 12:7-9) Bweenka mbuli baIshi, alakwe Yesu alapa kululika kuyandika munshila yalusuno. (Joni 15:14, 15) Nabi teendi mweela ndyatoolulika, alicite nkumbu. (Mate. 20:24-28) Alicishi kwaamba ayi tatumaninite aboobo liinji tulabisha.​—Mate. 26:41.

18. Ino mutwi wa mukwashi ukonkela cakubonenaako cakwe Yehova a Yesu aleebaluka nshi?

¹⁸ Mutwi wa mukwashi ukonkela cakubonenaako cakwe Yehova a Yesu taalubi kwaamba ayi mukaakwe abana bakwe tabamaninite. Taacite ‘lunkutwe’ kubakaakwe na kubana bakwe. (Kolo. 3:19) Sombi alakonkela njiisho njotucana palilembo lya Bene Galatiya 6:1 alimwi aleelesha kubalulika “cakulibombya,” ceebo cakwiibaluka kwaamba ayi alakwe taamaninite. Bweenka mbuli Yesu, alakwe  alicishi ayi kutondesha cakubonenaako cibotu nkokwiisha kubotu.​—1 Pit. 2:21.

19-20. Ino mutwi wa mukwashi inga watondesha buyani ayi alakonkela cakubonenaako cakwe Yehova a Yesu ndyatosala sheenga shakuma mukwashi?

¹⁹ Kusala sheenga shacafwa mukwashi wakwe. Yehova alasala sheenga shabotela bamwi. Kucakubonenaako, wakalenga shintu shicite buumi ceebo cakwaamba ayi alisuni ayi tunoosangalala mubuumi, kuteshi kulisangalasha mwiine. Taakuwo wakamukakatisha kwaamba ayi atume Mwanaakwe kusa mukufwa ceebo ca shibiibi shesu. Wakacita boobo ceebo cakwaamba ayi wakalinga kusuni kutucafwa. Yesu alakwe wakasala kucita shintu shicafwa bamwi. (Loma. 15:3) Kucakubonenaako, muciindi cakookesha ndyaakalinga kulemete, wakasalawo kwiisha bantu baanji.​—Maako 6:31-34.

²⁰ Mutwi wa mukwashi uli kabotu alicishi kwaamba ayi cintu comwi ciyumu ncaeelete kucita, nkusala kabotu pamakani akuma mukwashi wakwe, alimwi alicishi ayi uyu ngumukuli uyandika abuumbi. Aleelesha kuleya kusalawo kucita shintu kwakubula kutaanguna kuyeeyawo cakubikila maano. Aboobo alasuminisha Yehova kumwiisha bwakusala kabotu shakucita. * (Tus. 2:6, 7) Kucita boobo kulapa kwaamba ayi acite shintu sheenga shabotela bamwi kuteshibo sheenga shamubotela.​—Filip. 2:4.

21. Ino tulaakwiiya nshi mumutwi utokonkelaawo?

²¹ Yehova wakapa mitwi yamikwashi mukuli uyumu, alimwi alabalangila kuukumanisha kabotu. Nacibi boobo, na musankwa weebete weelesha cankusu kukonkela cakubonenaako cakwe Yehova a Yesu, alaakukumanisha kabotu mukuli wakwe. Alimwi na mukaakwe alakwe kaacita kabotu lubasu lwakwe, balaakuba alusangalalo mucikwati cabo. Ino mwanakashi weebetwe alyeelete kububona buyani bubaambo bwa mutwi wa mukwashi, alimwi ino ngamapensho nshi ngeenga wacana? Tulaakwiiya shikumbulo kumiipusho iyi mu mutwi utokonkelaawo.