1. Ino ninshila nshi mbweenga twalulikwa, alimwi ino kululikwa inga kwatucafwa buyani?

 SOONSEBO tulayandika kululikwa ciindi aciindi. Cimwi ciindi mpashi inga twasenga muntu ngotushoma kwaamba ayi atupandeko maano. Lyalo cimwi ciindi, mukwesu inga watulwiita ayi tulisuni ‘kuswa panshila,’ nkokwaamba ayi kucita cintu ceenga catunjisha mumapensho. (Gala. 6:1) Na mpashi umwi inga watululika, pesule lyakucita cilubo cinene. Tacicite mulandu ambweenga twalulikwa, tulyeelete kukonkela kululikwa. Kucita boobo nkubotu alimwi inga kwapulusha buumi bwesu!​—Tus. 6:23.

2. Kweelana a Tushimpi 12:15, ino nceebonshi tulyeelete kukonkela kululikwa?

² Lilembo paswa mutwi uyu lilatuyuminisha ‘kukutika maswi abasongo.’ (Tus. 22:17) Taakuwo muntu ucishi shintu shoonse. Lyoonse kulaba umwi ucishi shiinji kutwiindaawo. (Amubelenge Tushimpi 12:15.) Aboobo na twakonkela kululikwa, cilatondesha ayi tulaliceesha alimwi tulicishi ayi tulayandika lucafwo kwaamba ayi tukumanishe nshetwakasala kucita. Mwaami Solomoni uyo wakalinga musongo wakatanjililwa amushimu kulemba ayi: ‘Miyeeyo ilaswitilila na kwafula beshikukupandako maano.’​—Tus. 15:22.

3. Ino ni nshila nshi mbweenga twalulikwa?

³ Nshila yomwi mbotutambula kululikwa, nkwiinda mukubelenga Baibo na mabuku esu aamba shamu Baibo. Ndyetutoocita boobo, inga twacana makani eenga atupa kuyeeya panshetutoocita, lyalo akwaalula mbotuyeeya alimwi anshetucita. (Ebu. 4:12) Sombi kuli nshila aimwi mbotululikwa. Kucakubonenaako, munene nabi Mwineklistu umwi ushimpite lwakumushimu, inga watulwiita cintu cimwi ncetutoyandika kusebenselawo. Na muntu utusuni watululika kwiinda mukusebensesha Baibo, tulyeelete kutondesha kulumba kwiinda mukukonkela kululika uko.

4. Kweelana a Shikushimikila 7:9, ino nciinshi ncotweelete kuleya kucita na twalulikwa?

 ⁴ Cancine ncakwaamba ayi mpashi inga catuyumina kusumina kululikwa bunene bunene kuswa kuumwi. Alimwi mpashi inga twakalashikwa. Ino nceebonshi? Nabi kwaamba ayi tulasumina ayi tatumaninite, mpashi inga catuyumina kusumina kululikwa na umwi watulwiita pacintu cimwi ncetutaciti kabotu. (Amubelenge Shikushimikila 7:9.) Mpashi inga twatalika kulangoola mwakuleyela. Inga twatalika kuliipusha capa kwaamba ayi muntu uyo atululike na kukalala ceebo ca mbwatululika. Alimwi mpashi inga twatalika kuyeeya pashilubo sha wooyo atotululika akuliipusha ayi: ‘Ino ninkusu nshi nshaacite shakundulika? Alakwe alabisha!’ Alimwi na tatuna kukondwa akululika nkotwatambula, inga twasuula kululikwa uko na kusenga umwi kwaamba ayi atululike ceebo cakuyeeya ayi atootulwiita makani ngeenga twasuna kunyumfwa.

5. Ino nshiinshi nsheshi twiiye mumutwi uyu?

⁵ Mumutwi uyu, tutobandika pashakubonenaako shamu Baibo shabaabo bakakaka kululikwa abaabo bakasumina kululikwa. Alimwi tutobandika asheenga shatucafwa kusumina kululikwa ambweenga kwatucafwa.

6. Ino Mwaami Leoboamu nshaakacita pesule lya kululikwa shilatwiisha nshi?

⁶ Atubandike pacakubonenaako cakwe Leoboamu. Ndyaakaba mwaami wa bene Isilaeli, bantu bakwe bakaya mukumusenga kwaamba ayi abacitileeko cintu cimwi. Bakamusenga ayi aboobishileeko mikuli iyo Solomoni njaakabapa. Leoboamu wakacita cintu cibotu kwiinda mukusenga basankwa bacinenenene bamu Isilaeli kwaamba ayi bamulwiiteko mbweenga wakumbula bantu. Bacinenenene abo bakalwiita mwaami ayi na acite sheesho bantu nshobakamusenga balaakutolelela kumusebensela. (1 Baam. 12:3-7) Citoboneka ayi Leoboamu taakwe kusangalala anshobakamulwiita, aboobo wakaya mukwiipusha basankwa mbwaakakula abo. Basankwa abo balyeelete bakalinga kucite myaaka yamuma 40 alimwi mpashi bakalinga kucishiko shiinji. (2 Maka. 12:13) Nacibi boobo, paciindi ici bakalwiita Leoboamu makani atabete kabotu. Bakamulwiita ayi eendilishewo pamikuli bantu njobakapekwa. (1 Baam. 12:8-11) Leoboamu bakamulwiita kucita shintu shobilo shipusene. Aboobo ncaakalinga kweelete kucita nkupaila kuli Yehova kwaamba ayi amucaafwe kushiba ncaeelete kusalawo. Muciindi cakucita boobo, wakasalawo kukonkela nshebakamulwiita basankwa bacanike mukwiinga ngomakani akamusangalasha. Nshaakasalawo kucita shakamunjisha mumapensho alimwi akuletela mapensho bene Isilaeli boonse. Aswebo na twalulikwa mpashi teshi lyoonse ndyeenga twalwiitikwa makani ngeenga twasuna kunyumfwa. Nacibi boobo, na kululika uko kutooswa Mumaswi akwe Lesa tulyeelete kukutambula.

7. Ino cakubonenaako ca Mwaami Usiya cilatwiisha nshi?

⁷ Mwaami Usiya wakakaka kululikwa. Wakenjila mumusena wa tempele yakwe Yehova umo mwakalinga kunjilabo bapailishi, lyalo akweelesha kutenta tununkila kabotu. Bapailishi bakwe Yehova bakamulwiita ayi: ‘Mwebo ba Usiya, tamucite nkusu shakutenta tununkila kabotu kuli Yehova! Sombibo bapailishi mbobakasalwa kucita mulimo uyo.’ Ino Usiya wakacita buyani? Naakwiinga wakaliceesha akusumina kululikwa lyalo akuswa mutempele peenkapo, naakwiinga Yehova wakamulekelela. Muciindi cakucita boobo, “Usiya . . . wakakalala abuumbi.” Ino nceebonshi wakakaka kululikwa? Alyeelete wakalinga kulinyumfwa ayi mukwiinga wakalinga mwaami, wakalinga kucite nkusu shakucita cili coonse ncaasuni. Sombi Yehova teshi mbwaakalinga kubona Usiya ubo. Aboobo ceebo cakucita cintu ncataakwe kusuminishikwa, “Usiya wakaciswa manata kushikila bushiku ndyaakafwa.” (2 Maka. 26:16-21) Cakubonenaako cakwe Usiya  cilatwiisha ayi, tacicite mulandu amikuli njeenga katucite, na twakaka kululika kwamu Baibo tulaakunyonyoola bushicibusa bwesu a Yehova.

8. Ino Jobo wakacita buyani ndyaakalulikwa?

⁸ Mubupusano ashakubonenaako shakutucenjesha nshotwaswa mukubandikaawo, mu Baibo muli ashakubonenaako shibotu shabaabo bakatambula shoolwe ceebo cakusumina kululikwa. Atubandike pacakubonenaako cakwe Jobo. Nabi kwaamba ayi wakalinga musankwa uloonda Lesa, taakalinga kumaniniteewo. Ndyaakalinga kwiinda mumapensho anene wakaamba makani amwi atabete kabotu. Aboobo wakalulikwa kuswa kuli Eliyu alimwi akuli Yehova. Ino Jobo wakacita buyani? Wakaliceesha akusumina kululikwa. Wakaamba ayi: ‘Ndakalinga kwaambabo shintu nshendatalinga kunyumfwisha . . . ndicite nsoni abuumbi pamakani ngondakaamba alimwi ndaalabangana mulusuko amumilota.’ Yehova wakapa shoolwe Jobo ceebo cakuliceesha.​—Jobo 42:3-6, 12-17.

9. Ino nshiinshi Mose nshaakacita pesule lya kululikwa, alimwi ino nceebonshi ncakubonenaako cibotu?

⁹ Mose ncakubonenaako cibotu ca muntu wakasumina kululikwa pesule lyakucita cilubo cinene. Paciindi cimwi wakakalala alimwi taakwe kulemeka Yehova. Aboobo Mose wakasowa coolwe cakunjila Mucishi Cakashomeshekwa. (Shakube. 20:1-13) Mose ndyaakaamba mbwaakalinga kulinyumfwa pamakani aya, Yehova wakamulwiita ayi: “Utakandwiitiwo lyobilo pamakani aya.” (Duto. 3:23-27, NWT) Mose taakwe kukalala. Muciindi cakucita boobo, wakakonkela Yehova nshaakasala pamakani aya alimwi Yehova wakatolelela kumusebensesha kutanjilila bene Isilaeli. (Duto. 4:1) Jobo a Mose bakasumina kululikwa alimwi nshakubonenaako shibotu nshotweelete kukonkela. Jobo wakaalula mbwakalinga kubona shintu alimwi taakwe kulangoola mwakuleyela. Mose alakwe wakatondesha ayi wakasumina kululikwa kwakwe Yehova ndyaakatolelela kushomeka nabi pesule lyakunyaikwa coolwe ncaakalinga kusuni abuumbi.

10. (a) Kweelana a Tushimpi 4:10-13, ino kusumina kululikwa kulatucafwa buyani? (b) Ino bamwi bakatondesha buyani cakubonenaako cibotu pesule lyakululikwa?

¹⁰ Kukonkela shakubonenaako sha basankwa bashomeka mbuli Jobo a Mose, kulatucafwa abuumbi. (Amubelenge Tushimpi 4:10-13.) Bamakwesu abenankashi baanji bakakonkela cakubonenaako cabo akusumina kululikwa. Amunyumfwe nshakaamba mukwesu waliina lya Emmanuel ukala ku Congo, pesule lyakucenjeshekwa. Wakaamba ayi: “Bamakwesu bashimpite lwakumushimu mulibungano linemisheesu ndyebakabona ayi nshendakalinga kucita shakalinga kusa mukunyonyoola bushicibusa bwangu a Yehova, bakancafwa. Ndakakonkela nshobakandwiita alimwi ici cakancafwa kutalinjisha mumapensho aanji.” * Kwaamba pamakani akululikwa, nankashi waliina lya Megan, painiya ukala ku Canada wakaamba ayi: “Lyoonse teshi makani ngonsuna kunyumfwa, sombi ngamakani ngonjandika kunyumfwa.” Alimwi mukwesu waliina lya Marko ukala ku Croatia wakaamba ayi: “Ndakanyaikwa mukuli, nacibi boobo, na ndayeeya shakacitika paciindi cilya ndabona ayi kululikwa kwakancafwa kuyumya bushicibusa bwangu a Yehova alimwi.”

11. Ino nshiinshi Mukwesu Karl Klein nshakaamba pamakani akusumina kululikwa?

¹¹ Cakubonenaako cimwi ca muntu wakacafwikwa ceebo cakusumina kululikwa, nca Mukwesu Karl Klein, uyo wakalinga wamu Likoto Litanjilila. Mumakani aamba pabuumi bwa Mukwesu Klein, mukwesu uyu wakaamba paciindi ndyaakalulikwa cankusu kuswa ku Mukwesu Joseph F. Rutherford, uyo ngobakalinga kunyumfwanaakwe abuumbi. Mukwesu Klein wakasumina ayi pakutaanguna wakakalala ndyaakalulikwa. Wakaamba ayi: “Lweendo  lwakakonkelawo [Mukwesu Rutherford] ndyaakambona, wakamweeta mweeta akwaamba ayi, ‘Mbuyani ba Karl!’ Sombi mukwiinga ndakalinga kukalalite, ndakakumbwitabo muunshi. Mukwesu Rutherford wakatolelela akwaamba ayi, ‘Mukwesu Karl, ucenjele! Satana alisuni kukucata!’ Ndakanyumfwa nsoni akukumbula ayi, ‘Ndibo kabotu Mukwesu Rutherford.’ Mukwiinga Mukwesu Rutherford wakalinga kucishi ayi ndikalalite, wakabooshawo alimwi ayi, ‘Palibo kabotu. Sombi ucenjele. Satana alisuni kukucata.’ Wakaamba cancine! Na twatolelela kubikila mfundilishi mukwesu ceebo cakutulwiita makani ngaacite nkusu shakutulwiita . . . , cilaba cuubu Satana kutucatisha mutoose twakwe.” * (Efe. 4:25-27) Mukwesu Klein wakasumina kululikwa kuswa ku Mukwesu Rutherford alimwi bakatolelela kuba abushicibusa buyumu.

12. Ino kuliceesha inga kwatucafwa buyani kusumina kululikwa? (Kulumbaisha 141:5)

¹² Ino nshiinshi sheenga shatucafwa kusumina kululikwa? Tulayandika kuliceesha kwiinda mukunokwiibaluka ayi tatumaninite alimwi cimwi ciindi inga twaciita cintu kwakubula kuyeeya kabotu. Bweenka mbotwabandikaawo, Jobo wakalinga kubona shintu munshila itabete kabotu. Sombi mukuya kwaciindi wakaalula mbwakalinga kuyeeya alimwi Yehova wakamupa shoolwe ceebo cakucita boobo. Ino nceebonshi? Nceebo cakwaamba ayi Jobo wakalinga muntu uliceesha. Wakatondesha ayi alaliceesha kwiinda mukusumina kululikwa kuswa kuli Eliyu, nabi kwaamba ayi Eliyu wakalinga mwanike abuumbi pali nguwe. (Jobo 32:6, 7) Aswebo kuliceesha kulaakutucafwa kukonkela kululikwa nabi ndyetwalinyumfwa ayi tatutoyandika kululikwa na mpashi uyo watululika ngu mwanike pali ndiswe. Munene umwi ku Canada wakaamba ayi, “Mukwiinga mbotulibona teshi mbobatubona bamwi, inga catuyumina abuumbi kuya panembo na taakuwo utotululika.” Soonse tulayandika kutolelela kwiiya kuba amibo ya Bwineklistu alimwi akusebensa kabotu muncito yakushimikila akwiisha.​—Amubelenge Kulumbaisha 141:5.

13. Ino kululikwa tulyeelete kunookubona buyani?

¹³ Munoobona kululikwa mbuli citondesho cakwaamba ayi Lesa alimusuni. Yehova alisuni ayi shintu shinootwendela kabotu. (Tus. 4:20-22) Alatondesha ayi alitusuni kwiinda mukutululika kusebensesha Maswi akwe, mabuku aamba shamu Baibo, na kwiinda mumushominyineesu ushimpite lwakumushimu. Bene Ebulu 12:9, 10 ilaamba ayi: ‘Alacita boobo kwaamba ayi tucafwikwe.’

14. Ino nshiinshi nshotweelete kubikilaako maano ndyebatootululika?

¹⁴ Amubikile maano kumakani ngobatomulwiita, kuteshi mbobatomululika. Cimwi ciindi, mpashi inga twalinyumfwa ayi tabana kutululika munshila ili kabotu. Ncakwiila muntu utolulika  bamwi alyeelete kweelesha kululika munshila yakwaamba ayi cibe cuubu kuwooyo utolulikwa kusumina kululikwa. * (Gala. 6:1) Sombi na batotululika, tulyeelete kubikila maano kumakani ngobatotulwiita, nabi twalinyumfwa ayi tabana kutululika munshila ili kabotu. Mpashi inga twaliipusha ayi: ‘Sa kuli nsheenga ndeeya pamakani ngobandwiita nabi kwaamba ayi tabana kundulika munshila ili kabotu? Sa inga ndashilubakobo shilubo shawooyo utondulika akubikila maano kukulika uko mbweenga kwancafwa?’ Inga twatondesha busongo na katucana nshila mbweenga twakonkela kululikwa kuli koonse nkweenga twapeekwa.​—Tus. 15:31.

15. Ino nceebonshi tulyeelete kusenga kululikwa?

¹⁵ Baibo ilatuyuminisha kusenga kululikwa. Lilembo lya Tushimpi 13:10 lilaamba ayi: ‘Busongo bulacanwa mubaabo basenga kubapandaako maano.’ Maswi aya ngancine! Liinji abo basenga kululikwa balaya panembo lwakumushimu, kwiinda baabo batasengi kubapandaako maano. Aboobo amucitewo comwi kwiinda mukusenga kululikwa.

16. Ino ndilili ndyeenga twasenga kululikwa?

¹⁶ Ino ndilili mpashi ndyeenga twasenga kululikwa kuswa kubashominyineesu? Amuyeeye pabukaalo ubu butokonkelaawo. (1) Nankashi wasenga shikushimikila ucishi kabotu kwiisha kwaamba ayi ayaakwe kuciiyo, lyalo pesule wasenga kumucafwa kushiba mbweenga waya panembo mukwiisha. (2) Nankashi utabete mucikwati alisuni kuula shakufwala, aboobo wasenga nankashi ushimpite lwakumushimu kumucafwa kushiba na shakufwala nshaasuni kuula shilibo kabotu. (3) Mukwesu ndyaapekwa lubasu lwakwaamba likani lya Baibo kwaciindi cakutaanguna, wasenga mukwesu ucishi kabotu kwaamba makani kwaamba ayi amukutike cakubikila maano, lyalo pesule amulwiiteko mbasu nshaeelete kusebenselawo kwaamba ayi aye panembo. Nabibo mukwesu waamba makani kwamyaaka iinji, inga wacita kabotu na wasenga bamakwesu bacishi kabotu kwaamba makani kwaamba ayi bamulwiiteko nshaeelete kusebenselawo lyalo akweelesha kukonkela nshobamulwiita.

17. Ino kululikwa inga kwatucafwa buyani?

¹⁷ Munshiku shitoosa kunembo, soonsebo tulaakululikwa kuswa mu Maswi akwe Lesa, mabuku aamba shamu Baibo na kuswa kuumwi. Na mukalulikwe, amukeebaluke nshotweeya mumutwi uyu. Amukatolelele kuliceesha, kubikila maano kumakani ngeshi bakamulwiite kuteshi nshila mbweshi bakamululike alimwi akukonkela kululikwa. Taakuwo ushalwa kaali musongo. Sombi Maswi akwe Lesa alatushomesha ayi ‘tulaakuba basongo’ na katusumina kululikwa.​—Tus. 19:20.