Ndakashalwa mu 1941 ku Paris, mucishi ca France. Mukwashi wesu tawakalinga kuciteewo maali aanji. Ndakalinga kunyumfwa kabotu kwiiya. Sombi ndyendakalinga kucite myaaka 10 ndakaciswa TB akucileka kuya kucikolo. Bamadokota bakaamba ayi ndakalinga kweelete kunokoonabo ceebo cakwaamba ayi mapwapwa angu taakalinga kusebensa kabotu. Aboobo kwa myeenshi iinji ndakalinga kunoobelengabo dikishonali akukutika ku pulogilamu yapa ledyo yakwiiya, yakalinga kubambwa abaku University of Paris. Ndakasangalala abuumbi dokota ndyakaamba ayi ndoola alimwi inga ndatalika kuya kucikolo. Ndakalyamboosha ayi, ‘Incito bamadokota njobasebensa njibotu abuumbi!’ Kuswabo ciindi ico, ndakalinga kusuni kusebensa ncito yakushilika bantu. Lyoonse na bata banjipusha nshondakalinga kusuni kucita mubuumi ndakalinga kubalwiita ayi, “Ndisuni kuba dokota.” Aboobo kuba dokota cakaba cintu ciyandika abuumbi mubuumi bwangu.

Mumukwashi wesu twakalinga Bakatolika. Nshindakalinga kucishi shiinji pali Lesa alimwi ndakalinga kucite miipusho iinji njondakalinga kusuni kucana shikumbulo. Ndakesa mukushoma ayi shintu shicite buumi shakalengwa, ndyendakatalika kwiiya sha budokota ku yunivesti.

Ntokwiibaluka ciindi cakutaanguna ndyendakalangilisha seelo yashishango kwiinda mukusebensesha mashini iitwa ayi microscope. Ndakakankamana abuumbi kubona maseelo mbwaalishitilisha kucikasaashi akukutontola. Alimwi ndakabona acipansha cimwi cicanika museelo ciitwa ayi cytoplasm mbociceya na mwacibika mumaanshi acite sauti alimwi ambocikomena na mwacibika mumaanshibo. Ceebo cakucikonsha kucita sheeshi alimwi ashimwi, tuntu tuniini niini tucite buumi tulaaluka kweelana abukaalo. Ndyendakabona seelo  yomwi ayomwi mboyakapangwa munshila ikankamika, ndakashoma ayi shintu shicite buumi tashina kubakobo shiine.

Ndyendakalinga mumwaaka wabili wakwiiya sha budokota, ndakabona bumboni abumwi butondesha ayi Lesa nkwaali. Ndyetwakalinga kwiiya pamubili wamuntu mbowakapangwa, twakeeya mukono mboopa kwaamba ayi tunoocikonsha kufuunga tukumo alimwi akutufungulula. Cilakankamika abuumbi kubona mishisa mboicatene ashifuwa alimwi ashimwi shoonse mboshisebensela pomwi. Kucakubonenaako, kali anga nkataambo kalanunganya mushisa womwi wakumukono kucifuwa cimwi cakukakumo. Lyalo kali anga nkataambo aka kalapansaana, ico cipa kwaamba ayi kamwi keendilile kuya kumanina kakumo. Tuli anga ntutaambo utu, tulicatite abuumbi kushifuwa shakutukumo. Naakwiinga tukumo twesu tatuna kupangwa munshila iyi, naakwiinga nciyumu kutufuunga alimwi akutufungulula. Ndakabona ayi uyo wakapanga mubili wamuntu, ngumusongo abuumbi.

Alimwi ndyendakeeya mwaana mbwaatalika kuyooya na washalwabo, lushomo lwangu lwakwaamba ayi kuli Mulengi lwakayuminaako. Ndakeeya ayi mwaana kaatana kushalwa, alatambula muuya wa oxygen kuswa kuli banyina kwiinda mulukowa. Aboobo paciindi ici, mutuntu tuniini niini muba muuwo uto tucanika mumapwapwa, mulaba kamutaamuwo muuwo. Sombi na kwacaala nsondo shiniini kwaamba ayi mwaana ashalwe, mutuntu tuniini niini utu muba muuwo, mulaba maanshi alibetele. Lyalo na mwaana washalwa akuyooya kwaciindi cakutaanguna, kuli shintu shikankamika shicitika. Bulyango buba mumoyo wa mwaana bulacalika, aboobo ici cilapa kwaamba ayi bulowa butalike kuya mumapwapwa. Paciindi ici, maanshi alibetele alacafwa kwaamba ayi tuntu tuniini niini utu muba muuwo tutacatani ndyemutonjila muuwo. Lyalo peenkaapo mwaana alacikonsha kutalika kuyooya mwiine.

Ndakalinga kusuni kushiba wooyo wakalenga shintu ishi shikankamika, aboobo ndakatalika kubelenga Baibo cakubikila maano. Ndakakankamana ndyendakeeya pamilawo yaamba pabuuya Yehova njaakapa bene Isilaeli, myaaka iindilila 3,000 yaiinda. Lesa wakalwiita bene Isilaeli kunookaba kalindi akufukilaawo na bamanisha kulicafwa, kunoosamba lyoonse alimwi akupatula baabo beenga baciswa bulwashi buyambukila. (Lefi. 13:50; 15:11; Duto. 23:13) Baibo yakaambila limwi pashintu ishi, sombi beshisayansi bakashiba malwashi mbwayambukila, myaaka 150 yaiinda. Alimwi ndakashiba ayi milawo yaamba pakoonana icanika mulibuku lya Bene Lefi, yakalinga kucafwa bene Isilaeli kutolelela kuba abuumi buli kabotu. (Lefi. 12:1-6; 15:16-24) Ndakashiba ayi Mulengi wakapa milawo iyi kubene Isilaeli kwaamba ayi banooba abuumi bubotu alimwi wakapa shoolwe abo bakalinga kukonkela milawo yakwe. Ndakashoma cakutatoonsha ayi Baibo yakatanjililwa a Lesa, uyo ngondatakalinga kushi liina paciindi ici.

Ndyendakalinga ku yunivesti kanjiiya sha budokota, ndakakumanya mwanakashi waliina lya Lydie uyo ngondakabona ayi inga ndabaakwe mucikwati. Aboobo twakeebana mu 1965 kaanciiya ku yunivesti. Kusa mukushika mu 1971, nebo aba Lydie katucite baana botatwe. Lyalo mukuya kwaciindi twakaba abaana abamwi botatwe. Ba Lydie bakalinga kuncafwa abuumbi muncito yabu dokota alimwi balacafwa abuumbi mumukwashi.

Ndakasebensa mucipatela kwamyaaka yotatwe kaantana kuba a kiliniki yangu. Kapatana kwiinda  aciindi cilaamfu, beebene bobilo abo bakalinga balwashi mbondaambaawo pakutaanguna, bakesa kwaamba ayi bashilikwe. Ndyendakalinga kusuni kulembela beebabo musamu, bakaabo bakaamba ayi: “Twasenga ba dokota, mutatupi musamu ucite bulowa.” Ndakakankamana akubeepusha ayi: “Sa mulishinishite? Ino nceebonshi?” Bakaabo bakakumbula ayi: “Tuli Bakamboni Bakwe Yehova.” Nshikwe kunyumfwawo shili shoonse pa Bakamboni Bakwe Yehova nabi nshobaiisha pamakani abulowa. Bakaabo bakabwesa Baibo akuntondesha nshoyaamba pamakani abulowa. (Milimo 15:28, 29) Lyalo beebene aba bakantondesha Bwaami bwakwe Lesa nsheshi bukacite. Bakaamba ayi bulaakukushaawo mapensho, kuciswa alimwi alufu. (Ciyu. 21:3, 4) Ndakaamba cakukondwa ayi: “Isho nshomutondwiita nshonsuna kucita kuswabo kubwanike!” Ndakaba dokota kwaamba ayi noocafwa balwashi. Ndakalinga kukondetwe abuumbi cakwaamba ayi twakabandika kwa liwoola lyomwi amamineti 30. Beebene ndyebakaya, nshindakalinga kusuniiwo kutolelela kuba Katolika. Alimwi ndakasangalala kwiiya ayi Mulengi alicite liina lyakwaamba ayi Yehova!

Beebene aba Bakamboni bakesa pa kiliniki yangu mankanda otatwe alimwi lyoonse na besa twakalinga kubandika kwiindilila paliwoola lyomwi. Ndakabeeta kuŋanda kumisheesu kwaamba ayi tubandike shiinji pamakani amu Baibo. Nabi kwaamba ayi ba Lydie abalo bakasumina kwiiya Baibo, bakakaka kusumina ayi shimwi nshotwakeeya ku Katolika nshakubeca. Aboobo ndakeeta mupailishi kumisheesu. Alimwi twakapikishanya pamakani aku ceeci kwiinda mukusebenseshabo Baibo, kushikila kwashiya. Nshotwakabandikishanya shakapa ba Lydie kushoma kwaamba ayi Bakamboni Bakwe Yehova balaiisha cancine. Kuswawaawo, lusuno lwesu pali Yehova lwakatolelela kuyuminaako cakwaamba ayi twakabombekwa mumwaaka wa 1974.

Ndyendakashiba luyaando Lesa ndwaakalengela bantu, ndakaalula nshendakalinga kubona kuyandika mubuumi. Nebo aba Lydie twakabikila maano kukusebensela Yehova mubuumi bwesu. Twakalinga kushinishite kulela bana besu kweelana a njiisho shamu Baibo. Twakaiisha bana besu kusuna Lesa abantu. Ici cakatupa kuba bacatene mumukwashi.—Mate. 22:37-39.

Nebo aba Lydie tulalinyumfwa kabotu na twayeeya bana besu mbobakalinga kubona mbotwakalinga kucatene mushintu nshetwakalinga kusalawo kucita. Bakalinga kucishi ayi twakalinga kukonkela mulawo wakaamba Yesu wakwaamba ayi ‘kwaamba kwanu ayi ‘Ee’ akube ee, akwalo kwaamba ayi ‘Sobwe’ akube sobwe.’ (Mate. 5:37) Kucakubonenaako, mwaneesu mwanakashi umwi ndyaakalinga kucite myaaka 17, ba Lydie bakamukasha kuya mukusekana abacanike bamwi. Umwi pa bacanike abo  wakalwiita mwaneesu ayi, “Na banyoko bakukaashe, usenge baiso.” Sombi mwaneesu wakakumbula ayi: “Isho inga tashisebensiiwo, mukwiinga lyoonse balasuminishanya.” Ncakwiila bana besu bali 6 bakabona kwaamba ayi twakalinga kucatene mukukonkela njiisho shamu Baibo. Tulalumba Yehova ceebo cakwaamba ayi baanji mumukwashi wesu pacecino ciindi batomusebensela.

Nabi kwaamba ayi cancine cakaalula nshondakalinga kubona kuyandika mubuumi, ndakalinga kusuni kusebensesha nshondakeeya mbuli dokota kwaamba ayi ncafwe bantu bakwe Lesa. Aboobo ndakalyaaba kusebensa mbuli dokota ku Bethel yaku Paris, lyalo mukuya kwaciindi ndakatalika kusebensela ku Bethel ipya yakalinga mutauni ya Louviers. Kwamyaaka iindilila 50, ndaswa kuŋanda kuya mukusebensela ku Bethel. Paciindi ici, ndaba acoolwe cakuba abushicibusa abamumukwashi wapa Bethel alimwi bamwi pacecino ciindi balicite myaaka yamuma 90. Bushiku bumwi ndakakankamana ndyendakakumanya mupya wakesa mukusebensela pa Bethel. Ndakesa mukushiba ayi ndime ndakacafwa banyina kwaamba ayi ashalwe, myaaka 20 yaiinda!

Kwamyaaka iinji yaiinda, lusuno lwangu pali Yehova lwayuminaako ndyendabona mbwaatanjilila akushitilisha bantu bakwe kwiinda mulibunga lyakwe. Kumatalikilo a myaaka yamuma 1980, bamu Likoto Litanjilila bakabika bubaambo mucishi ca United States bwakucafwa bamadokota alimwi abaku shipatela kunyumfwishisha Bakamboni Bakwe Yehova ncobakakila kubikwa bulowa.

Lyalo mu 1988 bamu Likoto Litanjilila bakapanga dipatimenti ipya yakalinga kwiitwa ayi Dipatimenti ipa Makani Pashakucipatela. Pakutaanguna, dipatimenti iyi njoyakalinga kutanjilila Makomiti Alanga Pamakani Ashakucipatela ayo akabambwa mucishi ca United States kwaamba ayi anoocafwa Bakamboni kushilikwa kwakubula kubikwa bulowa. Makomiti Alanga Pamakani Ashakucipatela akabambwa mucishi ca France, bubaambo ubu ndyebwakasuminishikwa nsengwe yoonse. Cilankankamika kubona libunga lyakwe Yehova mbolibikila maano kubamakwesu abenankashi balwashi, paciindi ndyebatoyandika lucafwo!

Pakutaanguna ndakalinga kusunishishi kuba dokota. Nacibi boobo, ndyendakayeeya pashintu nshondakalinga kubona kuyandika mubuumi, ndakesa mukushiba ayi cintu ciyandika abuumbi nkucafwa bantu kushiba alimwi akusebensela Yehova Lesa, Kantupu kabuumi, kwiinda kubacafwa kuba kabotu. Ndyendakacileka kusebensa mbuli dokota, nebo aba Lydie tulasebensa mawoola aanji mweenshi amweenshi mbuli bapainiya baciindi coonse, muncito yakushimikila makani abotu a Bwaami bwakwe Lesa. Twatolelela kusebensa peela nkusu shesu muncito iyi ipulusha bantu.

Ndatolelela kucita nsheenga ndacikonsha kwaamba ayi noocafwa balwashi. Sombi ndakesa mukushiba kwaamba ayi nabi dokota ucishi buyani incito ya budokota, inga taacikonshi kushilika malwashi oonse na kupa kwaamba ayi bantu batanoofwa. Aboobo ntolangila kuciindi ndyeshi kukabule kuba kucisa, kuciswa alimwi alufu. Mucishi cipya cili pafwiifwi abuumbi, ndaakuba acoolwe cakwiiya shiinji pashilengwa shakwe Lesa kwamuyayaya, kwiilikaawo amibili yesu iyo njaakalenga munshila ikankamika. Ncakwiila, ncondakalinga kusuni kucita kuswabo kubwanike, cilaakukumanishikwa cakumaninina conoono. Ndishinishite kwaamba ayi kunembo kulaakuba shintu shibotu abuumbi!