1-2. Ino nshiinshi mukwesu umwi nshakeeya pamakani akululika bamwi?

 MYAAKA iinji yaiinda, bamanene bobilo bakafwakashila nankashi umwi wakalinga kulofwa kumabungano. Munene womwi wakatondesha nankashi malembo aamba pakuyandika kwakucanika kumabungano. Munene uyu wakayeeya ayi kufwakasha uku kwakayuminisha nankashi. Nacibi boobo, lakwe amunene ngwaakalingaakwe ndyebakalinga kusuni kutalikaako, nankashi wakaamba ayi, “Nobamakwesu, tamucishiwo mapensho ngontokwiindaamo.” Bamakwesu bakalulika nankashi kwakubula kutaanguna kumwiipusha mapensho ngaakalinga kwiindaamo. Aboobo taana kulinyumfwa ayi kululikwa kwakamucafwa.

² Munene wakatondesha nankashi malembo na wayeeya pashakacitika alaamba ayi: “Pakutaanguna ndakayeeya ayi nankashi taana kututondesha bulemu. Nacibi boobo, ndakesa mukushiba ayi nshindakalinga kweelete kutaanguna kumubelengela malembo, sombi kushiba mapensho ngaakalinga kwiindaamo kwiinda mukumwiipusha miipusho mbuli, ‘Ino shintu shitokweenda buyani mubuumi bwanu?’ ‘Ino inga ndamucafwa buyani?’” Munene uyu wakeeya ciiyo ciyandika kuswa kusheeshi shakacitika. Pacecino ciindi ngumweembeshi ucafwa alimwi uyeeyelako bamwi.

3. Ino mbaani beenga balulika bamwi mulibungano?

 ³ Mbuli beembeshi, bamanene balicite mukuli wakululika bamwi na kaciyandika. Nacibi boobo, kulaba shiindi shimwi bamwi mulibungano ndyeenga bayandika kululika bamwi. Kucakubonenaako, mukwesu nabi nankashi inga wasebensesha maswi amu Baibo kululika shicibusa. (Kulu. 141:5; Tus. 25:12) Na mpashi nankashi wacinene inga walulika “banakashi bacanike” mbuli pamakani ngotucana palilembo lya Taitasi 2:3-5. Alimwi  liinji bashali abalo balayandika kululika bana babo. Aboobo nabi kwaamba ayi mutwi uyu utoocafwa bunene bamanene, soonse inga twafubilaamo kushiba mbweenga twalulika bamwi munshila iyuminisha akubasangalasha.​—Tus. 27:9.

4. Ino nshiinshi nsheshi tubandike mumutwi uyu?

⁴ Mumutwi uyu, tutobandika pamiipusho yone pamakani akululika bamwi: (1) Ino nciinshi ceelete kutupa kululika bamwi? (2) Sa ncakwiila muntu atoyandika kululikwa? (3) Ino mbaani beelete kululika bamwi? (4) Ino nshiinshi nsheenga mwaciita kwaamba ayi mululike bamwi munshila iyuminisha?

5. Ino nceebonshi cilaakuba cuubu bantu kusumina kululikwa na munene wabalulika ceebo cakwaamba ayi alibasuni? (1 Bene Kolinto 13:4, 7)

⁵ Bamanene balibasuni bamakwesu abenankashi. Cimwi ciindi balatondesha lusuno ulo kwiinda mukululika muntu usuni kucita cilubo. (Gala. 6:1) Nacibi boobo, munene kaatana kululika umwi, alyeelete kuyeeya pashintu Paulo nshakaamba palusuno. Paulo wakalemba ayi: “Lusuno lulakalika moyo akulengesha nkumbu. . . . Lulalekelela mushintu shoonse, lulashoma shintu shoonse, lulalangila shintu shoonse, lulaliyumya mushintu shoonse.” (Amubelenge 1 Bene Kolinto 13:4, 7.) Na munene wakutumana kuyeeya pamavesi aya, inga camucafwa kushinisha kwaamba ayi walulika bamwi ceebo cakwaamba ayi alibasuni. Na uyo utolulikwa washiba ayi munene alamubikilaako maano, cilaakumubeta cuubu kusumina kululikwa.​—Loma. 12:10.

6. Ino ncakubonenaako nshi cibotu mutumwi Paulo ncaakatondesha?

⁶ Mutumwi Paulo wakalinga ngumunene wakatondesha cakubonenaako cibotu. Kucakubonenaako, bashominyina baku Tesalonika ndyebakalinga kuyandika kululikwa, Paulo taakwe kuwayawaya kubalulika. Nacibi boobo, mumakalata ngaakabalembela, Paulo wakataanguna kubalumba pancito njobakalinga kusebensa ceebo calushomo lwabo, kusebensa cankusu ceebo calusuno lwabo, alimwi ambobakalinga kuliyumya. Alimwi wakashiba mapensho ngobakalinga kwiindaamo ambobakatolelela kushomeka cakuliyumya ndyebakalinga kupikishikwa. (1 Tesa. 1:3; 2 Tesa. 1:4) Alimwi wakabalwiita ayi bakalinga cakubonenaako ku Beneklistu bamwi. (1 Tesa. 1:8, 9) Balyeelete bakasangalala abuumbi Paulo ndyaakabalumba kuswa panshi lyamoyo! Ncakutatoonsha kwaamba ayi Paulo wakalinga kubasuni abuumbi bashominyina. Nceceeco mumakalata obilo ngaakalembela Bene Tesalonika, wakabalulika munshila iyuminisha.​—1 Tesa. 4:1, 3-5, 11; 2 Tesa. 3:11, 12.

7. Ino nciinshi ceenga capa kwaamba ayi bamwi bakalale na balulikwa?

⁷ Ino nshiinshi sheenga shacitika na twaalilwa kululika bamwi munshila iyuminisha? Mukwesu umwi wasebensa mbuli munene kwamyaaka iinji, wakaamba ayi, “Bamwi balakalala na babalulika, kuteshi ceebo ca nshobabalwiita sombi ceebo cakwaamba ayi tabana kubalulika munshila yalusuno.” Ino nshiinshi nsheenga tweeya kuswa ku munene uyu nshakaamba? Cilaba cuubu kusumina kululikwa na twalulikwa ceebo calusuno, kuteshi ceebo cakukalala.

8. Ino njimiipusho nshi munene njaeelete kuliipusha, kwaamba ayi ashibe na muntu umwi atoyandika kululikwa?

⁸ Bamanene tabeelete kwiingana kululika bamwi. Munene kaatana kululika umwi, alyeelete kuliipusha ayi: ‘Sa ncakwiila ntoyandika kubandikaakwe? Sa ndishinishite kwaamba ayi nshaatoocita nshibiibi? Sa kuli mulawo wamu Baibo ngwaapwaya? Nabi sa mpashi tulipusenebo mbotubona shintu?’ Bamanene balatondesha  busongo na baleya ‘kwiingana kwaamba.’ (Tus. 29:20) Na munene taashinishite na muntu umwi atoyandika kululikwa, inga weepusha munene umwi kwaamba ayi amulwiite na alakwe atoobona ayi mukwesu atoocita cintu cipusene a Baibo nshoyaamba alimwi atoyandika kululikwa.​—2 Timo. 3:16, 17.

9. Ino nshiinshi nshetutokwiiya kuswa kuli Paulo, ndyetusuni kululika bamwi pamakani abwakufwala abwakulibotesha? (1 Timoti 2:9, 10)

⁹ Amuyeeye pacakubonenaako ici. Mpashi munene inga walisukama ceebo ca mukwesu nabi nankashi mbwafwaala ambwalibotesha. Munene inga waliipusha ayi, ‘Sa ndyeelete kubandikaakwe ceebo cakwaamba ayi kuli mulawo wamu Malembo ngwaapwaya?’ Ceebo cakwaamba ayi munene taasuni kuyuminisha miyeeyo yakwe, mpashi inga wasenga munene umwi na shikushimikila ushimpite lwakumushimu kwaamba ayi amulwiiteko mbwaatoyeeya. Lyalo inga bakonkela kululika Paulo nkwakaamba pamakani abwakufwala akulibotesha. (Amubelenge 1 Timoti 2:9, 10.) Paulo wakaamba ayi Mwineklistu alyeelete kufwala shakufwala shili kabotu alimwi cabulemu. Sombi Paulo taakwe kulemba mulongo washakufwala nshotweelete kufwala anshotuteelete kufwala. Wakalinga kucishi ayi Mwineklistu inga wafwala cakufwala cili coonse ncaasuni, kulilabo na citokweendelana a Baibo nshoyaamba. Aboobo bamanene ndyebatoyeeya shakululika muntu, balyeelete kubona na muntu uyo taafwali shakufwala shabulemu alimwi shiteeleli Mwineklistu.

10. Ino nciinshi ncotweelete kunookwiibaluka pashintu bamwi nshobasalawo kucita?

¹⁰ Cilayandika abuumbi kunookwiibaluka ayi Beneklistu bobilo bashimpite lwakumushimu inga basalawo kucita shintu shipusene sombi shilibo kabotu. Aboobo tatweelete kukakatisha bamwi kucita shintu nshotubona ayi shililuleme.​—Loma. 14:10.

11-12. Ino njimiipusho nshi munene njaeelete kuliipusha na muntu umwi atoyandika kululikwa, alimwi ino nceebonshi?

¹¹ Na ncakwiila muntu atoyandika kululikwa inga cabota kuliipusha ayi, Ino mbaani beelete kumululika? Na munene alisuni kululika nankashi weebetwe na mwaana, mpashi inga wataanguna kubandika a mutwi wa mukwashi. Lyalo mutwi wamukwashi mpashi inga wasuna kucafwa mukaakwe na mwanaakwe. * Na mpashi mutwi wamukwashi inga wasuna kwaamba ayi abeewo munene ndyatoolulika. Alimwi bweenka mbotwabandikawo mu  palagilafu 3, cimwi ciindi mpashi inga cabota kwaamba ayi nankashi wacinene alulike nankashi wacanike.

¹² Kuli acimwi munene ncaeelete kuyeeyawo. Mpashi munene inga waliipusha ayi, ‘Sa ndime ntokweelela kululika muntu uyu, na mpashi  inga cabota kwaamba ayi alulikwe kuumwi?’ Kucakubonenaako, mpashi muntu ulinyumfwa ayi taaku mbwaabete inga wasumina kululikwa kuswa kumunene wakeendaawo mubukaalo ubu. Munene wakeendaawo mubukaalo ubu inga wanyumfwishisha bukaalo muntu uyo mbwatokwiindaamo lyalo akwaamba munshila yeenga yalengesha wooyo utolulikwa kusuna kukonkela nshaalwiitikwa. Nacibi boobo, bamanene boonse balicite mukuli wakuyuminisha bamakwesu abenankashi kwaalula shimwi mubuumi bwabo kweelana a Malembo mbwaamba. Aboobo na muntu atoyandika kululikwa, ciyandika abuumbi nkumululika nabi kwaamba ayi munene utomululika taana kwiindaawo mubukaalo ubo.

13-14. Ino nceebonshi cilayandika abuumbi kwaamba ayi munene wataanguna kukutika kaatana kululika umwi?

¹³ Amube balibambite kukutika. Munene ndyatolibambila kuya mukululika umwi alyeelete kuliipusha ayi: ‘Ino nshiinshi nshoonshi pabukaalo mukwesu nabi nankashi uyu mbwabeteemo? Ino nshiinshi nshaatokwiindaamo mubuumi? Sa atokwiinda mumapensho ngoonteshi? Ino nciinshi ncatoyandika bunene pacecino ciindi?’

¹⁴ Ncakutatoonsha kwaamba ayi njiisho njotucana palilembo lya Jemusi 1:19 ilaamba apa baabo balulika bamwi. Jemusi wakalemba ayi: ‘Muntu uli woonse alyeelete kufwambaana kukutika, kucelwa kwaamba akukalala.’ Mpashi munene inga wayeeya ayi alishi kabotu bukaalo mukwesu nabi nankashi mbwatokwiindaamo. Ano sa ncakwiila alicishi shoonse? Tushimpi 18:13 ilatulwiita ayi: “Uyo ukumbula kaatana kunyumfwisha makani, ngumuluya alimwi ulalilenshabo nsoni.” Ncintu cibotu abuumbi kusenga muntu kwaamba ayi asansulule bukaalo mbwatokwiindaamo. Aboobo munene alyeelete kukutika kaatana kwaamba. Amwiibaluke ncakeeya munene ngotwaambawo kumatalikilo a mutwi uyu. Wakeshiba kwaamba ayi muciindi cakutalika mubandi amakani ngaakalibambila, wakalinga kweelete kutaanguna kwiipusha nankashi miipusho mbuli: “Ino shintu shitokweenda buyani mubuumi bwanu?” “Ino inga ndamucafwa buyani?” Na bamanene beelesha kushiba makani oonse, cilaakuba cuubu kucafwa akuyuminisha bamakwesu abenankashi.

15. Ino bamanene inga baikonkela buyani njiisho njotucana pa Tushimpi 27:23?

¹⁵ Amubashibe kabotu bamakwesu abenankashi. Bweenka mbotwaambawo kumatalikilo, kululika bamwi munshila iyuminisha teshi kubabelengelabo malembo na kubalwiita nsheenga bacita. Bamakwesu abenankashi balyeelete kushiba kwaamba ayi tulababikila maano, kubanyumfwishisha alimwi tulisuni kubacafwa. (Amubelenge Tushimpi 27:23.) Bamanene balyeelete kucita nsheenga bacikonsha kwaamba ayi babe abushicibusa buyumu abamakwesu abenankashi.

16. Ino nciinshi ceenga cacafwa bamanene kululika bamwi munshila iyuminisha?

¹⁶ Ncakutatoonsha kwaamba ayi bamanene inga tabasuni bamakwesu abenankashi  kulinyumfwa ayi balabandikaabobo ndyebasuni kubalulika. Muciindi cakucita boobo, bamanene balabandika abamakwesu abenankashi lyoonse alimwi akutondesha ayi balababikila maano ndyebatokwiinda mumapensho. Munene umwi wasebensa kwamyaaka iinji wakaamba ayi: “Na mwacita boobo, mulaakuba abushicibusa buyumu ambabo. Lyalo na kuli umwi ngomutoyandika kululika, cilaakuba cuubu kumululika.” Alimwi uyo utolulikwa cilaakumubeta cuubu kusumina kululikwa.

17. Ino ndilili bunene bunene, munene ndyaeelete kukalika moyo alimwi akutondesha nkumbu?

¹⁷ Amukalike moyo akutondesha nkumbu. Kukalika moyo akutondesha nkumbu kulayandika abuumbi bunene bunene na umwi pakutaanguna wakaka kululika kwamu Baibo. Munene taeelete kukalala na mukwesu nabi nankashi wakaka kululikwa. Baibo yakaamba pali Yesu ayi: “Teshi akatyole litete lisendeme kale, nabi kushimya lilampi litooyanda kushimika.” (Mate. 12:20) Aboobo munene ndyaatopaila palwaakwe, mpashi inga wasenga Yehova kwaamba ayi acafwe wooyo utoyandika kululikwa kunyumfwishisha ncaatolulikilwa alimwi akumucafwa kukonkela kululikwa. Mukwesu nabi nankashi utolulikwa mpashi inga wayandika ciindi cakuyeeya pamakani ngakalwiitikwa. Na munene kaakalika moyo akutondesha nkumbu, uyo ngwaatokweelesha kucafwa teshi akabikile maano mbwatomululika sombi alakubikila maano kumakani ngobatoomulwiita. Alimwi lyoonse kululika kulyeelete kuswa mu Maswi akwe Lesa.

18. (a) Ino nshiinshi nshotweelete kunokwiibaluka ndyetutoolulika bamwi? (b) Kweelana acikope alimwi amakani ali mu kabokosi, ino nshiinshi bashali nshobatobandikaawo?

¹⁸ Amwiiye kuswa kushilubo shanu. Mukwiinga tatumaninite, teshi tukacikoonshe kukonkela cakumaninina nshetwabandikaawo mumutwi uyu. (Jemu. 3:2) Tulaakunoocita shilubo, sombi na caba boobo, tulyeelete kweelesha kwiiya kuswa kushilubo shesu. Na bamakwesu abenankashi bashiba ayi tulibasuni, cilaakuba cuubu kutulekelela na twaamba na kucita shintu sheenga shabakalasha.​—Amubone akabokosi kacite mutwi utokwaamba ayi “ Makani Kubashali.”

19. Ino nshiinshi nsheenga twaciita kwaamba ayi tululike bamakwesu abenankashi munshila yeenga ya basangalasha?

¹⁹ Kweelana ambotweeya, teshi cuubu kululika bamwi munshila iyuminisha. Balulika bamwi abaabo balulikwa, boonse tabamaninite. Munookwiibaluka nshetwabandika mumutwi uyu. Munooshinisha ayi mutoolulika umwi ceebo ca lusuno. Alimwi munooshinisha ayi ncakwiila muntu atoyandika kululikwa alimwi ayi ndimwe mutokweelela kumululika. Kamutana kululika umwi, amumwiipushe miipusho akukutika cakubikila maano kwaamba ayi munyumfwishishe mapensho ngatokwiindaamo. Amweeleshe kubona shintu kweelana ambwaashibona. Munookalika moyo akuba abushicibusa buyumu abamakwesu abenankashi. Tunookwiibaluka ayi ndyetutoolulika bamwi, tulyeelete kubalulika munshila iyuminisha alimwi yeenga yabasangalasha.​—Tus. 27:9.