1-2. (a) Ino nceebonshi bantu bamwi cilabayumina kushoma baabo bakapekwa nkusu shakutanjilila? (b) Ino nshiinshi nsheshi twiiye mumutwi uyu?

 MUNSHIKU shino bantu baanji cilabayumina kushoma muntu uli woonse wakapekwa nkusu shakutanjilila. Balabona kwaamba ayi liinji mfulumende alimwi amilawo shilashitilisha babile alimwi abalemekwa, sombi tashicafwi bunene bakandu. Nceceeco Baibo ncoyakaambila cakuteenda mweela ayi: “Muntu uleendelesha muntunyina munshila imuletela mapenshi.” (Shiku. 8:9) Kwiilikaawo, bamatanjilili babupailishi bamwi balacita shintu shibiibi. Aboobo ici capa kwaamba ayi bantu bamwi batanooshoma muli Lesa. Aboobo na muntu wasumina kutalika kwiiya Baibo andiswe, tulyeelete kumucafwa kwiiya kushoma muli Yehova alimwi abaabo mbwaakasala kutanjilila mulibunga lyakwe.

² Ncakutatoonsha kwaamba ayi, teshibo baabo batokwiiya Baibo bayandika kwiiya kushoma muli Yehova alimwi amulibunga lyakwe. Nabi twasebensela Yehova kwamyaaka iinji, tulyeelete kutolelela kushoma kwaamba ayi Yehova lyoonse alacita shintu shiluleme. Cimwi ciindi, inga twalicana mubukaalo bweenga bwapa kwaamba ayi lushomo lwesu muli Yehova lweeleshekwe. Mumutwi uyu, tutobandika pa bukaalo botatwe ndyeenga lushomo lwesu lweeleshekwa: (1) ndyetutobelenga makani amwi amu Baibo, (2) ndyetwatambula butanjilishi kuswa kulibunga lyakwe Yehova, alimwi (3) ndyeshi tukanokwiinda mumapensho kunembo.

3. Ino makani amwi amu Baibo inga eelesha buyani lushomo lwesu muli Yehova?

 ³ Ndyetutobelenga Maswi akwe Lesa, inga twatalika kuliipusha Yehova ncaakasalilawo kucita shintu shimwi kubantu alimwi anshaakasala kucita pamakani amwi. Kucakubonenaako, mulibuku  lya Shakubelenga tulabelenga ayi Yehova wakasala ayi mwine Isilaeli wakatepa nkuni pabushiku bwa Sabata acaikwe. Ndipakeenda myaaka iinji, libuku lya 2 Samwelo lilatulwiita ayi Yehova wakalekelela Mwaami Defedi ndyaakacita bulale alimwi akucaisha muntu. (Shakube. 15:32, 35; 2 Samwe. 12:9, 13) Aboobo inga twaliipusha ayi, ‘Ino nceebonshi Yehova wakalekelela Defedi ndyaakacita bulale akucaisha muntu, sombi wakasalawo ayi mwine Isilaeli acaikwe ndyaakacita cilubo cakalinga kuboneka anga nciniini?’ Kwaamba ayi tucane cikumbulo kumwiipusho uyu, atubandike shintu shotatwe nshotweelete kunokwiibaluka ndyetutobelenga Baibo.

4. Ino maswi ngotucana palilembo lya Matalikilo 18:20, 21 a Dutolonomi 10:17, alatucafwa buyani kuyumya lushomo lwesu mushintu Yehova nshaasala kucita?

⁴ Teshi lyoonse Baibo ndyeyaamba makani oonse aamba pashakacitika. Kucakubonenaako, tulishi kwaamba ayi Defedi wakaana cancinencine pashilubo nshaakacita. (Kulu. 51:2-4) Ano ino musankwa wakapwaya mulawo wa Sabata wakacita buyani? Sa wakalinyumfwa cibiibi pasheesho nshaakacita? Sa wakaalilwawo kale kukonkela milawo yakwe Yehova? Sa wakasuulawo kale na kukaka kukonkela kucenjeshekwa? Baibo tayaambiwo. Nacibi boobo, inga twashoma cakutatoonsha ayi Yehova “nguLesa utabishi.” (Duto. 32:4) Yehova alasalaawo shakucita kweelana amakani oonse mbwaabete kuteshi bamwi nshobaamba, kasalulushi, na shili shoonse shipa kwaamba ayi liinji bantu batanoobona shintu munshila ili kabotu. (Amubelenge Matalikilo 18:20, 21; Dutolonomi 10:17.) Kwiiya bunene pali Yehova alimwi anjiisho shakwe, kulaakutucafwa kushoma bunene mushintu nshaasalawo kucita. Nabi kwaamba ayi ndyetutobelenga Baibo inga twaba amiipusho njeenga twabula kucana shikumbulo pacecino ciindi, tulishi makani aanji pali Lesa wesu eenga atupa kushoma ayi “uliluleme munshila shakwe shoonse.”​—Kulu. 145:17.

5. Ino kutamaninina kulakuma buyani mbotubona shintu? (Amubone akabokosi kacite mutwi utokwaamba ayi “ Kutamaninina Kulapa Kwaamba ayi Tunoobona Shintu Munshila Itabete Kabotu.”)

⁵ Mukwiinga tatumaninite, teshi lyoonse ndyeenga katubona makani munshila yeelete. Lesa wakatulenga mucikoshanyo cakwe, aboobo tulasuna kwaamba ayi bantu kabacitilwa shintu shiluleme. (Mata. 1:26) Nacibi boobo, mukwiinga tatumaninite, inga twabona makani munshila itabete kabotu, nabi ndyetutoyeeya ayi  tulicishi makani oonse. Kucakubonenaako, amuyeeye Jona mbwaakalinyumfwa cibiibi Yehova ndyaakasala kutondesha nkumbu kubene Ninife. (Jona 3:10–4:1) Ano amuyeeye shakaswaamo ceebo cakwaamba ayi Yehova wakabatondesha nkumbu. Bene Ninife beendilila 120,000 bakapulushikwa ceebo cakwaamba ayi bakaana! Mukweelaako, cakaboneka ayi Jona ngowakalinga kubona bantu munshila itabete kabotu kuteshi Yehova.

6. Ino nceebonshi Yehova tayandiki kutusansulwiita ncaasalilawo kucita shintu shimwi?

⁶ Yehova tayandiki kusansulwita bantu ncaasalilawo kucita shintu shimwi. Ncakwiila, kale kale Yehova wakasuminisha basebenshi bakwe kwaamba mbobakalinga kulinyumfwa pashintu nshaakasalawo kucita na nshaakalinga kusuni kucita. (Mata. 18:25; Jona 4:2, 3) Alimwi pashiindi shimwi, wakasansulula ncaakasalilawo kucita shintu shimwi. (Jona 4:10, 11) Nacibi boobo, Yehova tayandiki kutusansulwiita sheebo shipa kwaamba ayi asale kucita shintu shimwi. Mukwiinga Ngomulengi wesu, tayandiki kwaamba ayi tumusuminishe na kumukasha kusalawo kucita shintu shimwi.​—Isa. 40:13, 14; 55:9.

7. Ino nciinshi ceenga catuyumina, alimwi ino nceebonshi?

⁷ Tulashoma cakutatonsha kwaamba ayi Yehova lyoonse alacita shiluleme. Nacibi boobo, mpashi inga catuyuminaako kushoma mubaabo Lesa mbwaakasala ayi banotanjilila. Mpashi inga katutoonsha na abo bakapekwa nkusu shakutanjilila mulibunga lyakwe Yehova balacita boobo kweelana abutanjilishi bwakwe na kweelana ambobatoyeeya beene. Mpashi bamwi bakalingaako muciindi camu Baibo abalo mbobakalinga kuyeeya. Amuyeeye pashakubonenaako nshetwabandikawo  mupalagilafu 3. Mpashi shikamukowa wa musankwa wakapwaya Mulawo wa Sabata wakatoonsha na Mose wakeepusha Yehova kaatana kwaamba ayi musankwa uyu acaikwe. Alimwi shicibusa wakwe Uliya mwine Iti, alyeelete wakayeeya ayi Defedi wakasebensesha nkusu shakwe mbuli mwaami kwaamba ayi atacaikwi ndyaakacita bulale amuka Uliya. Yehova alashoma baabo mbaakasala kwaamba ayi banotanjilila mulibunga lyakwe lya pacishi, aboobo na tatushomi bamakwesu aba inga tatwaambi ayi tulashoma muli Yehova.

8. Ino makani aambwa pa Milimo 16:4, 5 alikoshenye buyani ashicitika mumabungano aBwineklistu munshiku shino?

⁸ Munshiku shino Yehova alatanjilila libunga lyakwe lya pacishi capanshi kwiinda mukusebensesha “musebenshi ushomeka alimwi ucite maano.” (Mate. 24:45) Bweenka mbuli likoto litanjilila lya muciindi ca Beneklistu bakutaanguna, musebenshi ushomeka ngotanjilila bantu bakwe Lesa nsengwe yoonse alimwi akupa butanjilishi kubamanene mumabungano. (Amubelenge Milimo 16:4, 5.) Lyalo bamanene abalo balashinisha kwaamba ayi bakonkela butanjilishi ubo mumabungano. Tulatondesha ayi tulashoma ayi Yehova alacita shintu shiluleme na katukonkela butanjilishi mbotutambula kuswa kulibunga alimwi akubamanene.

9. Ino ndilili ndyeenga catubeta ciyumu kukonkela butanjilishi bwa bamanene, alimwi ino nceebonshi?

⁹ Cimwi ciindi, mpashi inga catuyumina kukonkela butanjilishi bwa bamanene. Kucakubonenaako, mumyaaka ya conoono, mabungano amwi akapaankana, ico cakapa kwaamba ayi mabungano amwi atolwe mulubasu lumwi. Cimwi ciindi bamanene inga balwiita beshikushimikila bamwi kulongela kulibungano limwi kwaamba ayi Ŋanda ya Bwaami inosebenseshekwa kabotu. Na batulwiita ayi tulongele kulibungano limwi, mpashi inga catuyumina kushiya beshicibusa alimwi abeshikamukowa. Sa bamanene balatambula butanjilishi kuswa kuli Lesa bubacafwa kushiba libungano shikushimikila womwi awomwi nkwaeelete kuya? Sobwe. Alimwi kushiba cancine ici, inga capa kwaamba ayi cibe ciyumu kukonkela  butanjilishi mbotwapekwa. Yehova alashoma bamanene nshobasala pamakani aya, aboobo aswebo tulayandika kubashoma. *

10. Kweelana a Bene Ebulu 13:17, ino nceebonshi tulyeelete kunoonyumfwila bamanene?

¹⁰ Ino nceebonshi tulyeelete kukonkela bamanene nshobasalawo kucita nabi kwaamba ayi teshi nsheenga katusuni? Nceebo cakwaamba ayi kucita boobo kulayuminisha lucatano pakati ka bantu bakwe Lesa. (Efe. 4:2, 3) Mabungano alaya panembo na boonse kabanyumfwila likoto lya bamanene nsholyasalawo kucita. (Amubelenge Bene Ebulu 13:17.) Alimwi ciyandika abuumbi, tulatondesha ayi tulashoma muli Yehova kwiinda mukunyumfwila baabo mbwaakapa mukuli wakutulama.​—Milimo 20:28.

11. Ino nciinshi ceenga catucafwa kuyumya lushomo lwesu mubutanjilishi mbotutambula kuswa kubamanene?

¹¹ Tulayumya lushomo lwesu mu butanjilishi mbotutambula kuswa ku bamanene na katwiibaluka ayi balapaila akusenga mushimu usalashi kwaamba ayi ubacaafwe ndyebatobandika makani akumite libungano. Alimwi balabikila maano kuyeeya panjiisho shamu Baibo sheenga shabacafwa alimwi akukonkela butanjilishi kuswa kulibunga lyakwe Yehova. Ncobasunishishi bunene nkusangalasha Yehova alimwi akulama bantu bakwe munshila ibotu abuumbi. Basankwa aba bashomeka balicishi kwaamba ayi Lesa alabikila maano abuumbi ku mbobalama bantu bakwe. (1 Pit. 5:2, 3) Amuyeeye paceeci: Nabi kwaamba ayi bantu mucishi tabacatenewo ceebo ca kupusana kwa shikanda, bupailishi, alimwi akuba mushamapolitiki, bantu bakwe Yehova balicatene mukulambila Lesa womwibo wancine. Ici cilakonshekabo ceebo cakwaamba ayi Yehova alacafwa libunga lyakwe!

12. Ino nshiinshi bamanene nshobeelete kuyeeyawo cakubikila maano ndyebasuni kushiba na muntu waana?

¹² Yehova wakapa bamanene mukuli uyandika abuumbi wakulama libungano kwaamba ayi litolelele kuba lisalalite. Na Mwineklistu wacita cilubo cinene, Yehova alalangila bamanene kusalawo na muntu uyo inga watolelela kuba mulibungano. Cintu comwi pasheesho nshobalangaawo, nkushiba na muntu uyo waana cancinencine paceeco ncaakacita. Mpashi inga kaaboneka ayi waana, ano sa ncakwiila alipatite ceeco ncaakacita? Sa alishinishite kutabooshawo kucita cilubo ncaakacita? Na kusekana abantu batabete kabotu nkokwakapa kwaamba ayi acite cilubo, sa alilibambite kucileka kusekana abantu abo? Bamanene balapaila kuli Yehova, kubona bumboni alimwi a Baibo nshoyaamba, lyalo akubona wooyo wacita cilubo mbwaatoolinyumfwa paceeco ncaakacita. Lyalo balasalawo na uyo wakacita cilubo inga watolelela kuba mulibungano. Cimwi ciindi alyeelete kukushikwa mulibungano.​—1 Koli. 5:11-13.

13. Ino nshiinshi nsheenga twayeeya na shicibusa ngotunyumfwanaakwe abuumbi na shikamukowa wakushikwa mulibungano?

¹³ Ino lushomo lwesu mubamanene inga lweeleshekwa buyani? Na muntu uyo wakushikwa mulibungano teshi shicibusa ngotunyumfwanaakwe abuumbi na shikamukowa inga caba cuubu kukonkela bamanene nshobasala. Ano ino mbuyani na muntu wakushikwa mulibungano ngushicibusa ngotunyumfwanaakwe abuumbi? Mpashi inga twatalika kuyeeya ayi bamanene tabakwe kulanga langa bumboni boonse na mpashi kuyeeya ayi tabakwe kusala kweelana a Yehova mbweenga wasala pamakani ayo. Ino nciinshi ceenga catucafwa kutolelela kubona ayi bamanene nshobasala shili kabotu?

14. Ino nshiinshi sheenga shatucafwa na bamanene basalawo ayi shicibusa ngotunyumfwanaakwe abuumbi na shikamukowa akushikwe mulibungano?

¹⁴ Tulyeelete kwiibaluka kwaamba ayi Yehova ngowakabika bubaambo bwakukusha muntu  mulibungano alimwi bubaambo ubu bulacafwa libungano awooyo wakabisha. Na muntu utasuni kwaana bamusuminisha kutolelela kuba mulibungano, inga wapa kwaamba ayi bamwi batalike kucita shibiibi. (Gala. 5:9) Kwiilikaawo, inga kaabona anga taana kucita cilubo cinene alimwi anga tayandiki kwaalula mbwayeeya alimwi anshaacita kwaamba ayi abe abushicibusa buyumu a Yehova alimwi. (Shiku. 8:11) Inga twashoma ayi bamanene balabona ayi kusalawo kukusha muntu mulibungano ngu mukuli unene abuumbi. Baleebaluka ayi bweenka mbuli boomboloshi bamuciindi cabene Isilaeli, ‘taboombolosheli muntu sombi baloomboloshela Yehova.’​—2 Maka. 19:6, 7.

15. Ino nceebonshi cino nceciindi ndyetweelete kushoma bunene mubutanjilishi bwakwe Yehova?

¹⁵ Cino nceciindi ndyetweelete kushoma bunene ayi Yehova lyoonse alacita shintu shiluleme, mamanino abweende bwashintu ubu ndyaatoya cisena pafwiifwi. Ino nceebonshi? Muciindi ca mapensho anene, mpashi tulaakutambula butanjilishi bweshi bukaboneke anga mbuyumu kunyumfwishisha na kukonkela. Ncakwiila Yehova teshi akabandike andiswe. Alyeelete alaakutupa butanjilishi kwiinda mubaabo mbwaakasala kututanjilila. Ico teshi cikabe ciindi cakutoonsha butanjilishi mbweshi tukapekwe na kutalika kuyeeya ayi, ‘Sa ncakwiila butanjilishi ubu bwaswa kuli Yehova na mpashi nkuyeeyabo kwa bamakwesu batotanjilila?’ Sa paciindi ico mulaakushoma muli Yehova alimwi alibunga lyakwe? Nshotuyeeya pa butanjilishi mbotutambula pacecino ciindi kuswa kubaabo Lesa mbwaakasala kututanjilila inga shatucafwa kucana cikumbulo kumwiipusho uyu. Na mulashoma mubutanjilishi mbotutambula pacecino ciindi akufwambaana kubukonkela, cilaakumubeta cuubu kucita boobo muciindi camapensho anene.​—Luka 16:10.

16. Ino lushomo lwesu lulaakweeleshekwa buyani mushintu Yehova nsheshi akasalewo kucita kunembo?

¹⁶ Kwiilikaawo, tulyeelete kuyeeya cakubikila maano pa nsheshi tukacite na tukabone Yehova nsheshi akasalewo kucita kumamanino acishi cino cibiibi. Pacecino ciindi, tulalangila ayi baanji batatoosebensela Yehova kwiilikaawo abeshikamukowa besu bateshi Bakamboni, balaakusala kumusebensela mamanino kaatana kushika. Sombi pa Amagedoni, Yehova kwiinda muli Yesu alaakusala sheshi shikabacitikile. (Mate. 25:31-33; 2 Tesa. 1:7-9) Teshi ndiswe sweshi tukasale baabo Yehova mbweshi akatondeshe nkumbu na sobwe. (Mate. 25:34, 41, 46) Sa tulaakushoma Yehova nsheshi akasale kucita na tulaakucileka kumusebensela paceebo ca nsheshi akasaale? Ncakutatoonsha cino nceciindi ndyetweelete kuyumya lushomo lwesu muli Yehova kwaamba ayi tukacikoonshe kumushoma cakumaninina kunembo.

17. Ino nshibotu nshi sheshi shikasweemo ceebo cakushoma musheesho Yehova nsheshi akasalewo kucita kumamanino abweende bwa shintu ubu?

 ¹⁷ Amuyeeyebo mbweshi tukalinyumfwe mucishi cipya, na tukabone sheshi shikasweemo ceebo ca sheesho Yehova nsheshi akasalewo kucita. Teshi mukabewo bupailishi bwakubeca, beshi makwebo balisuni, na mfulumeende shilyatilila bantu akupa kwaamba ayi banoopenga. Teshi kukabeewo kuciswa, kucembela, na kufwitwa shicibusa nabi shikamukowa. Satana ashibanda shakwe balaakwangwa kwa myaaka 1,000. Shintu shoonse shibiibi shicitika ceebo cakupondoka kwabo shilaakumana. (Ciyu. 20:2, 3) Tulaakusangalala abuumbi ceebo cakushoma ayi Yehova lyoonse alacita shintu shiluleme!

18. Kweelana a Shakubelenga 11:4-6 alimwi a 21:5, ino nshiinshi nsheenga tweeya kuswa kucakubonenaako cabene Isilaeli?

¹⁸ Sa buumi mbweshi bukabe mucishi cipya bulaakweelesha lushomo lwesu mushintu Yehova nsheshi akasalewo kucita? Kucakubonenaako, amuyeeye cakacitika ndipakeendabo ciindi ciniini kuswa ciindi bene Isilaeli ndyebakaswa mubusha mu Ijipiti. Ceebo cakuyeeya shakulya nshobakalinga kulya mu Ijipiti, bamwi bakatalika kutongooka pa mana, cakulya Yehova ncaakalinga kubapa. (Amubelenge Shakubelenga 11:4-6; 21:5.) Sa aswebo inga twaba amiyeeyo yamushobo uyo pesule lya mapensho anene? Tatucishiwo kukomena kwa ncito njeshi tukayandike kusebensa kwaamba ayi tuboteshe cishi akunooya cicaalula kwaamba ayi cibe paladaiso. Citoboneka ayi kulaakuba ncito shiinji nsheshi tukayandike kusebensa alimwi mpashi shintu teshi shikabe shuubu kumatalikilo. Sa tulakutalika kutongooka pashintu Yehova nsheshi akatupe paciindi ico? Tulyeelete kunookwiibaluka citeente ici: Na katulumba pashintu Yehova nshaatupa pacecino ciindi, tulaakunoolumba abuumbi pashintu nsheshi akatupe paciindi ico.

19. Ino nshiinshi nshomweeya mumutwi uyu?

¹⁹ Tulyeelete kushoma ayi Yehova lyoonse alacita shintu shiluleme. Alimwi tulyeelete kushoma baabo Yehova mbwaakapa nkusu shakututanjilila. Lyoonse tunokwiibaluka maswi Yehova ngakaamba kwiinda mu mushinshimi Isaya ayi: “Nkusu shanu shilaakuba mukukalikana akutondesha lushomo.”​—Isa. 30:15, NWT.