MUCIINDI camu Baibo, na musankwa alisuni kweeba, lakwe na mukwashi wakwe wakalinga kulipila kumukwashi wa mwanakashi ngwaasuni kweeba, pesule lyakwaamba ayi mikwashi yoonse yobilo yasuminishanya. Wakalinga kulipila shintu mbuli maali, shifubwa na shintu shimwi shiyandika. Cimwi ciindi musankwa wakalinga kusebensela mukwashi wamwanakashi, bweenka mbocakalinga kuli Jakobo, uyo wakasumina kusebensela baishi Lakelo kwamyaaka 7 kwaamba ayi eebe Lakelo. (Mata. 29:17, 18, 20) Ino nceebonshi musankwa wakalinga kulipila na alisuni kweeba?

Muntu wakeeya shamu Baibo waliina lya Carol Meyers wakaamba ayi: “Kulipila uku kwakalinga kuyandika ceebo ca ncito mwanakashi njaakalinga kusebensa paŋanda pa bashali bakwe, bunene bunene mumikwashi yakalinga kulima.” Alimwi mpashi kulipila uku kwakalinga kucafwa kwaamba ayi pabe lucatano pakati ka mukwashi wamusankwa amukwashi wamwanakashi. Ici cakalinga kupa kwaamba ayi mikwashi inoocafwana na kwacitika mapensho. Kwiilikaawo, kulipila uku kwakalinga kutondesha ayi mwanakashi wakobekelwa akwaamba ayi baishi teshi batolelele kumulama akumushitilisha, sombi ibaye ngweshi anomulama.

Kulipila uku takwakalinga kusansulula ayi mwanakashi inga waba anga ncintu ceenga coolwa na kuulishikwa. Libuku liitwa ayi Ancient Israel—Its Life and Institutions lilaamba ayi: “Mukuli wakulipila maali na shimwi kumukwashi wamwanakashi, wakalinga kupa kwaamba ayi ciboneke anga musankwa woola mwanakashi. Sombi citoboneka ayi maali aya akalinga kulipilwa ceebo ca ncito mwanakashi njaakalinga kusebensa mumukwashi wakwe, kuteshi kumuula.”

Munshiku shino, bantu mushishi shimwi batolelela kukonkela mulawo uyu wakulipila na musankwa alisuni kweeba. Bashali Beneklistu ndyebasuni kulipilwa maali acikwati, tabeelete kulipilisha maali aanji abuumbi sombi balyeelete kutondesha ayi balayeeyelako bamwi. (Filip. 4:5; 1 Koli. 10:32, 33) Na bacita boobo balatondesha ayi ‘tabasunishishi bunene maali.’ (2 Timo. 3:2) Kwiilikaawo, na bashali Beneklistu babula kulipilisha maali aanji abuumbi, cilaakupa kwaamba ayi musankwa ataceelwi kulipila maali ngobakamulipilisha kwaamba ayi eebe mwanaabo. Alimwi mpashi musankwa teshi akayandike kucileka bupainiya akunosebensa kwaciindi cilaamfu kwaamba ayi acane maali ngatoyandika kulipila kucikwati.

Mushishi shimwi, mfulumeende njoibika mweelo wa maali muntu ngaeelete kulipila na alisuni kweeba. Na kacili boobo, bashali Beneklistu balakonkela milawo iyo. Ino nceebonshi? Nceebo cakwaamba ayi Maswi akwe Lesa alayuminisha Beneklistu “kunyumfwila beendeleshi” alimwi akukonkela milawo yeendelana amilawo yakwe Lesa.—Loma. 13:1; Milimo 5:29.