Sa Mulicishi?
Ino nceebonshi Yehova wakasuminisha bene Isilaeli kunoobenga baciiba alimwi ankulimba mbuli milambu?
MUMULAWO wakwe Mose, Yehova wakasuminisha bene Isilaeli kunoobenga baciiba alimwi ankulimba mbuli milambu. Lyoonse tuyuni utu tulaambwa pomwi mumilawo yaamba pamilambu alimwi muntu wakalinga kubenga kayuni kali koonse nkaacite patuyuni utu tobilo. (Lefi. 1:14; 12:8; 14:30) Ino nceebonshi ici cakalinga cintu cibotu? Ceebo comwi ncakwaamba ayi teshi shiindi shoonse baciiba ndyebakalinga kucanika. Ino nceebonshi?
Ciiba
Baciiba * ntuyuni tulonga alimwi tulacanika mucishi coonse ca Isilaeli, mumyeenshi ndyekukasaala. Sombi mwaaka amwaaka mu October, balalongela kumalenge mushishi shikasaala, lyalo balaboolela kucishi ca Isilaeli ciindi ca cilimo. (Lwiimbo lwa. 2:11, 12; Jele. 8:7) Aboobo muciindi cabene Isilaeli, cakalinga ciyumu kubenga baciiba mbuli milambu ciindi ca maiinsa.
Nkulimba
Ano nkulimba ntuyuni tutaloongi. Aboobo twakalinga kucanika mucishi ca Isilaeli mwaaka woonse. Alimwi liinji twakalinga kufubwa. (Amweelanye a Joni 2:14, 16.) Libuku liitwa ayi Bible Plants and Animals lilaamba ayi, “Bantu boonse bakalinga kukala mumishi amumandabala ku Palestine, bakalinga kufuba nkulimba. Paŋanda yomwi ayomwi pakalinga lupako mulubumbu, umo mwakalinga kukala nkulimba.”—Amweelanye a Isaya 60:8.
Nkulimba mulupako
Aboobo Yehova wakatondesha ayi alicite lusuno alimwi wakalinga kuyeeyelako bene Isilaeli, ndyaakabasuminisha kunoobenga tuyuni ntobakalinga kucite mbuli milambu.
[Maswi amweela]
^ par. 4 Liswi lyakasansululwa ayi mpolobe mu Baibo ya Cilenje, inga lyasansululwa ayi baciiba.
