1. Ino nciinshi Yesu ncaakalwiita bashikwiiya bakwe pamakani amamanino acishi cino, alimwi ino wakabacenjesha nshi?

 NDYEKWAKACAALABO nshiku shiniini kwaamba ayi Yesu afwe, bashikwiiya bakwe bali 4 bakamwiipusha ayi: “Ino nciinshi ceshi cikabe citondesho . . . ca mamanino acishi?” (Mate. 24:3, NWT) Cilyeelete kwaamba ayi bashikwiiya bakwe Yesu aba, bakalinga kusuni kushiba ciindi ndabala ya Jelusalemu alimwi a tempele, ndyeshakalinga kusa mukunyonyoolwa. Yesu ndyaakalinga kukumbula bashikwiiya bakwe, taakwe kwaambabo pakunyonyoolwa kwa ndabala ya Jelusalemu alimwi a tempele, sombi wakaamba apaciindi camamanino acishi cino. Kwaamba paciindi camamanino acishi cino, Yesu wakaamba ayi: “Sombi pamakani abushiku bwakwisa nabi ciindi, taaku nabi womwi ushi. Baanjelo boonse bakwiculu tabeshi, nabi Mwanaamuntu teeshiiwo. Sombibo Bata beenka.” Lyalo wakacenjesha bashikwiiya bakwe boonse ayi “amucenjele akuba balibambite lyoonse.”​—Maako 13:32-37.

2. Ino nceebonshi Beneklistu bamu ciindi ca batumwi bakalinga kweelete kutolelela kunoolibambite?

² Beneklistu baJuda bamu ciindi ca batumwi bakalinga kweelete kutolelela kunoolibambite kwaamba ayi bapuluke. Yesu wakalwiita bashikwiiya bakwe shakalinga kweelete kubacafwa kushiba ayi kunyonyoolwa kwa ndabala ya Jelusalemu alimwi a tempele, kuli pafwiifwi. Wakabalwiita ayi: “Mwaakubona ayi ndabala ya Jelusalemu yashingulukwa abashilumamba, mukeshibe ayi kunyonyoolwa kwa njiyo kuli pafwiifwi.” Ishi ndyeshakacitika, bakalinga kweelete kukonkela kucenjesha kwakwe Yesu akutalika “kucicila kutulundu.” (Luka 21:20, 21) Abo bakakonkela kucenjesha uku bakapuluka bene Loma ndyebakanyonyoola ndabala ya Jelusalemu.

3. Ino tutokwiiya nshi mumutwi uyu?

³ Tutookala muciindi camamanino acishi cino cibiibi. Aboobo aswebo tulyeelete kuba bacenjete akunoolibambite lyoonse.  Mumutwi uyu, tutokwiiya mbweenga twatolelela kubona shintu munshila yeelete ndyetutoobona shitoocitika mucishi, mbweenga twabikila maano kushintu nshotucita, ambweenga twasebensesha kabotu ciindi cacaalaako.

4. Ino nceebonshi tulyeelete kubikila maano kushintu shitoocitika mucishi mboshitookumanisha bushinshimi bwamu Baibo?

⁴ Kuli sheebo shibotu shipa kwaamba ayi tunosuna kubona shitoocitika mucishi mboshitookumanisha bushinshimi bwamu Baibo. Kucakubonenaako, Yesu wakaamba pashintu shitoocitika, kwaamba ayi atucaafwe kushiba ayi mamanino acishi cakwe Satana ali pafwiifwi. (Mate. 24:3-14) Mutumwi Pita wakatuyuminisha kubikila maano ku kukumanishikwa kwa bushinshimi kwaamba ayi tutolelele kuba alushomo luyumu. (2 Pit. 1:19-21) Libuku lyakweelaako lyamu Baibo lilatalika amaswi akwaamba ayi: “Libuku ili lilaamba pashintu Lesa nshaakayubulwita Yesu Klistu. Lesa wakamuyubulwita shintu ishi kwaamba ayi akaboneshe basebenshi bakwe sheelete kucitika cakufwambaana.” (Ciyu. 1:1) Aboobo tulabikila maano kushintu shitoocitika mucishi, akusuna kushiba mbweenga shakumanisha bushinshimi bwamu Baibo. Alimwi mpashi inga katusunishishi kunobandika abamwi pashitoocitika mucishi.

5. Ino nshiinshi nshotweelete kuleya, alimwi ino nshiinshi nshotweelete kucita? (Amubone ashikope.)

⁵ Nacibi boobo, ndyetutobandika bushinshimi bwamu Baibo abamwi, tulyeelete kuleya kwaamba nshetutooyeeya ayi inga shacitika. Ino nceebonshi? Nceebo cakwaamba ayi tatusuniiwo kwaamba makani eenga apa kwaamba ayi mulibungano mutabi lucatano. Kucakubonenaako, mpashi inga twanyumfwa beendeleshi kababandika mbweenga bamana nkoondo kwaamba ayi balete luumuno akuliiba. Muciindi cakuyeeyelabo ayi nshobaamba shitookumanisha bushinshimi mbotucana pa 1 Bene Tesalonika 5:3, tulyeelete kutaanguna kushiba makani aconoono aamba pabushinshimi ubu. Na katwaamba makani ali mumabuku akabambwa alibunga lyakwe Yehova, tulaakupa kwaamba ayi bamulibungano batolelele kuba bacatene “amuyeeyo womwi.”​—1 Koli. 1:10; 4:6.

6. Ino nshiinshi nsheenga tweeya palilembo lya 2 Pita 3:11-13?

⁶ Amubelenge 2 Pita 3:11-13. Mutumwi Pita wakatuyuminisha kushiba ncotuyandikila kwiiya bushinshimi bwamu Baibo. Wakatuyuminisha kunooyeeya pa ‘kusa kwa bushiku bwakwe Yehova.’ Ino nceebonshi? Kuteshi kwaamba ayi tushibe bushiku aciindi Yehova ndyeshi akalete inkondo ya Amagedoni, sombi kwaamba ayi tusebenseshe ciindi cacaalaako kwaamba ayi tube amibo ‘isalalite akusebensela Lesa cakulyaaba.’ (Mate. 24:36; Luka 12:40) Tulisuni kutolelela kucita shintu shiluleme akushinisha kwaamba ayi shoonse nshotutoocita muncito yakwe Yehova, nceebo cakwaamba ayi tulimusuni abuumbi. Kwaamba ayi tutolelele kucita boobo, tulyeelete kubikila maano kushintu nshotucita.

7. Ino tulatondesha buyani ayi tulabikila maano kushintu nshotucita? (Luka 21:34)

⁷ Yesu wakalwiita bashikwiiya bakwe kutabikilabo maano kushintu shitoocitika mucishi, sombi akubikila maano kushintu nshobacita. Aya ngomakani akucenjesha ngotucana palilembo lya Luka 21:34. (Amubelenge.) Palilembo ili Yesu wakatulwiita ayi tulyeelete kubikila maano kushintu nshotucita ambotubona shintu. Aboobo tulyeelete kucenjela kushintu sheenga shanyonyoola bushicibusa bwesu a Yehova, akucitawo comwi kwaamba ayi tushileeye. Na twacita boobo, tulatolelela kuba mulusuno lwakwe Lesa.​—Tus. 22:3; Judi 20, 21.

8. Ino mutumwi Paulo wakayuminisha Beneklistu kucita nshi?

 ⁸ Mutumwi Paulo wakayuminisha Beneklistu kubikila maano kushintu nshobacita. Kucakubonenaako, wakalwiita Beneklistu baku Efeso ayi: “Amucenjele abuumbi. Mutekaali anga mbantu batacite lushibo, sombi anga mbantu basongo.” (Efe. 5:15, 16) Lyoonse Satana aleelesha kunyonyoola bushicibusa bwesu a Yehova, aboobo kululika kwamu Baibo kwa kwaamba ayi ‘amweeleshe kushiba sheesho Yehova nshaasuni ayi mucite,’ inga kwatucafwa kushitilisha bushicibusa bwesu a Yehova.​—Efe. 5:17.

9. Ino inga twacita buyani kwaamba ayi tushibe sheesho Yehova nshaasuni ayi tucite?

⁹ Baibo tayaambi shintu shoonse sheenga shanyonyoola bushicibusa bwesu a Yehova. Liinji tulayandika kusalawo shakucita pamakani ataambwi cakululama mu Malembo. Kwaamba ayi tusale kabotu shakucita, tulyeelete kushiba ‘sheesho Yehova nshaasuni.’ Inga twacita boobo kwiinda mukwiiya Maswi akwe Lesa lyoonse alimwi akukutumana kuyeeyawo. Na twanyumfwishisha Yehova nshaasuni akuba a “miyeeyo yakwe Klistu,” tulaakunokala anga mbantu basongo nabi kwaamba ayi taakuwo mulongo wa milawo utokwaamba pa nshetusuni kucita. (1 Koli. 2:14-16) Cimwi ciindi cilaba cuubu kushiba shintu nshotweelete kuleya, sombi cimwi ciindi teshi cuubu.

10. Ino nshintu nshi shimwi nshotweelete kuleya?

¹⁰ Shintu shimwi nshotweelete kuleya shileelikaawo, kutondesha lusuno lwamucikwati kumuntu ngotuteebenaakwe, kunwa cakwiindilila, bulyaabi, kwaamba maswi atabete kabotu akalasha bamwi, kweebela shakulikondelesha shitondesha sha nkondo ashintu shileta miyeeyo yakoonana, ashimwi shili mbuli sheeshi. (Kulu. 101:3) Satana mulwani wesu munene, lyoonse aleelesha kulangoola nshila sha mbweenga wanyonyoola bushicibusa bwesu a Yehova. (1 Pit. 5:8) Na twabula kucenjela, Satana inga wapa kwaamba ayi tutalike kuba amibo mbuli munyono, kutashomeka, kulisuna, lupato, kulisumpula alimwi akubikila mfundilishi. (Gala. 5:19-21) Pakutaanguna, inga tatushibi kwaamba ayi twatalika kuba amibo iyi. Sombi na twabula kufwambaana kucitaawo comwi kwaamba ayi tutatoleleli kuba amibo iyi, inga yatolelela kukomena mumoyo wesu, akutuletela mapensho.​—Jemu. 1:14, 15.

11. Ino ncintu nshi cimwi ncotweelete kuleya alimwi ino nceebonshi?

¹¹ Cintu comwi ncotweelete kuleya, nkuba bushicibusa abantu batabete kabotu. Amuyeeye pabukaalo ubu. Mulasebensa ncito yakumubili pomwi amuntu uteshi womwi wa Bakamboni Bakwe Yehova. Mulisuni kwaamba ayi uyo ngomusebensaakwe anooyeeya shibotu pa Bakamboni Bakwe Yehova, aboobo mulamucitila shibotu akumucafwa. Alimwi mpashi cimwi ciindi inga kamulita pomwi cakulya ca malumwi amuntu uyo. Lyalo kapatana kwiinda aciindi cilaamfu, mwatalika kunolyaakwe lyoonse. Cimwi ciindi na mutobandika, muntu uyo alaamba pashintu shitabete kabotu. Pakutaanguna mpashi inga kamusulaakobo akutaambaawo cili coonse. Lyalo mukuya kwaciindi mwashibila kunyumfwa makani ayo. Aboobo mwacileka kulinyumfwa cibiibi. Bushiku bumwi pesule lyakukota ku ncito, wamusenga ayi muye munweko ka dilinki, amwebo mwasumina. Mukuya kwaciindi, mwatalika kubona shintu mbuli muntu uyo ngomusebensaakwe mbwaashibona. Na caba boobo, inga tapeendi aciindi cilaamfu, inga mwatalika kucita shintu muntu uyo nshaacita. Cilibo kabotu kucita shintu shibotu akutondesha bulemu kubantu boonse. Sombi tulyeelete kwiibaluka kwaamba ayi, bantu abo mbotucanikaabo lyoonse balakuma mbotuyeeya anshotucita. (1 Koli. 15:33) Na katubikila maano ku shintu nshotucita bweenka Yesu mbwaakatuyuminisha, tulaakuleya kuba bushicibusa abantu batakonkeli  njiisho shiluleme shakwe Yehova. (2 Koli. 6:15) Tulaakubona bukaalo bweenga bwatunjisha mumapensho, lyalo akubuleya.

12. Ino nshiinshi bashikwiiya bakwe Yesu nshobakalinga kweelete kunoocita ndyebakalinga kulindila kunyonyoolwa kwa ndabala ya Jelusalemu alimwi a tempele?

¹² Yesu wakalinga kusuni kwaamba ayi bashikwiiya bakwe babe ashakucita shiinji ndyebakalinga kulindila kunyonyoolwa kwa ndabala ya Jelusalemu alimwi a tempele. Wakabapa mulawo wakushimikila makani abotu “mu Jelusalemu, muJudeya moonse alimwi amu Samaliya kushikila amucishi coonse ca panshi.” (Milimo 1:6-8) Iyi yakalinga ncito inene abuumbi Yesu njaakapa bashikwiiya bakwe! Bakasebensesha kabotu ciindi ncobakalinga kucite, kwiinda mukucita nsheenga bacikonsha kwaamba ayi bashimikileko bamwi.

13. Ino nceebonshi tulyeelete kusebensesha kabotu ciindi ncotucite? (Bene Kolose 4:5)

¹³ Amubelenge Bene Kolose 4:5. Kwaamba ayi tubikile maano kushintu nshotucita, tulyeelete kusebensesha kabotu ciindi ncotucite. “Shintu shakuteengashila” inga shatucitikila paciindi cili coonse. (Shiku. 9:11) Inga twafwa paciindi cili coonse.

14-15. Ino inga twacita buyani kwaamba ayi tusebenseshe kabotu ciindi ncotucite? (Bene Ebulu 6:11, 12) (Amubone acikope.)

¹⁴ Inga twasebensesha kabotu ciindi ncotucite  kwiinda mukusebensela Yehova akuyumya bushicibusa bwesu anguwe. (Joni 14:21) Tulyeelete ‘kwiimikana mulushomo cakutatenkaana, akuba ashintu shiinji shakucita muncito ya Mwaami.’ (1 Koli. 15:58) Lyalo na caba ayi twafwa nabi na mamanino acishi cino ashika, tulaakushiba ayi twakasebensesha kabotu ciindi ncotwakalinga kucite.​—Mate. 24:13; Loma. 14:8.

¹⁵ Munshiku shino, Yesu watolelela kutanjilila bashikwiiya bakwe ndyebatoshimikila makani a Bwaami bwakwe Lesa nsengwe yoonse. Kwiinda mulibunga lyakwe Yehova, Yesu alatwiisha mbweenga twashimikilako bamwi makani abotu. Alimwi alatupa shoonse nshetuyandika kwaamba ayi tusebense ncito iyi. (Mate. 28:18-20) Tulacita lubasu lwesu kwiinda mukusebensa cankusu kushimikila akwiishako bamwi, akutolelela kuba balibambite lyoonse ndyetutolindila Yehova kwaamba ayi alete mamanino acishi cino cibiibi. Kwiinda mukukonkela kululika nkotucana pa Bene Ebulu 6:11, 12, tulaakucatisha kulangila nkotucite “kushikila akumamanino.”​—Amubelenge.

16. Ino nciinshi ncotushinishite kucita?

¹⁶ Yehova wakabika kale bushiku aciindi ndyeshi akanyonyoole cishi cino cakwe Satana. Na bushiku ubo bukashiike, Yehova alaakukumanisha bushinshimi boonse bulembetwe mu Maswi akwe. Sombi cimwi ciindi mpashi inga twayeeya ayi mamanino acishi cino acelwa kusa. Nacibi boobo, bushiku bwakwe Yehova ‘teshi bukaceelweewo!’ (Abaku. 2:3) Aboobo atube bashinishite kunoolangila lucafwo kuswa kuli Yehova ‘akunoolindila Lesa mupulushi wesu.’​—Mika 7:7.