Bakabona Bamu Libungano Mbobakabatondesha Lusuno
BA YOMARA alimwi a bamanike babo basankwa bobilo—ba Marcelo aba Hiver—balekala mumushi uniini ku Guatemala. Ba Yomara bakatalika kwiiya Baibo a Bakamboni Bakwe Yehova. Lyalo mukuya kwaciindi bamanike babo abalo bakatalika kwiiya. Ano cakabicaako ncakwaamba ayi boonse botatwe mboofu alimwi tabakalinga kucikonsha kubelenga mabuku aboofu. Aboobo bakalinga kubaiisha Baibo bakalinga kubabelengela makani ngobakalinga kwiiya alimwi amalembo ali muciiyo.
Kwiilikaawo, cakalinga ciyumu kwaamba ayi inga kabacanika kumabungano. Palwaabo beene, tabakalinga kucikonsha kweenda mushinso wa mamineti ali 40 kuya ku Ŋanda ya Bwaami yakalinga pafwiifwi. Sombi bamakwesu mulibungano bakabika bubaambo bwakunooya mukubeendula kwaamba ayi banoocanikaako kumabungano lyoonse. Alimwi bashikwiiya Baibo aba ndyebakatalika kwaabanamo lubasu mumbasu shabashikwiiya kumabungano amukati ka nsondo, bamakwesu bakalinga kubacafwa kulabilila mbasu nshobakapekwa.
Mu May 2019, mabungano akatalika kubeta mumushi mobakalinga kukala. Paciindi ici, kwakalinga beebene bakalinga kusebensa mbuli bapainiya baciindi coonse abo bakalongela mumushi uyo. Nabi kwaamba ayi beebene aba tabakalinga kucishiiwo kubelenga akulemba mushobo wa boofu, bakacita nsheenga bacikonsha kwaamba ayi baiishe ba Yomara, ba Marcelo aba Hiver kwiiya kubelenga akulemba mushobo wa boofu. Aboobo bakaya mukusenga mabuku akabacafwa kushiba mbweenga baiisha boofu kwiiya kubelenga akulemba mushobo wa boofu.
Ndipakeenda myeenshi iniini, boonse botatwe bakatalika kubelenga mushobo wa boofu alimwi ici cakapa kwaamba ayi baye panembo lwakumushimu. Pacecino ciindi, ba Yomara, ba Marcelo alimwi aba Hiver balasebensa mbuli bapainiya baciindi coonse. Alimwi ba Marcelo batosebensa mbuli musebenshi ucafwilisha. Nsondo ansondo balacita shiinji muncito yakwe Yehova. Kusebensa cankusu kwabo kulayuminisha bamwi.
Ba Yomara, ba Marcelo alimwi aba Hiver balalumba abuumbi palucafwo ndobatambula kuswa kulibungano. Ba Yomara bakaamba ayi: “Bakamboni Bakwe Yehova balatutondesha lusuno lwancinencine lwa Bwineklistu, kuswabo ciindi cakutaanguna ndyetwakatalika kubandika ambabo.” Ba Marcelo bakeelikaawo akwaamba ayi: “Tulicite beshicibusa bali kabotu mulibungano motubete alimwi tuli lubasu lwa bamakwesu abenankashi nsengwe yoonse, abo batondeshanya lusuno.” Ba Yomara abamanike babo basankwa bobilo, batolangila kuciindi Yehova ndyeshi akaalule cishi capanshi kuba paladaiso.—Kulu. 37:10, 11; Isa. 35:5.