1. Ino nceebonshi tulayandika kutanjililwa a Lesa? Amwaambe cakubonenaako.

 AMUYEEYE ayi mwasoweka muluundu. Muluundu umo mulaloondesha mukwiinga muli shinyama shikali, insoka, shilindi shilaamfu alimwi ashilongolo. Inga mwalumba abuumbi kuba amuntu wakumutanjilila ucishi kabotu luundu ulo mbolubete, mukwiinga inga wamucafwa kuleya kulicana mulipenshi! Cishi cino cili anga nduundu ulo. Muli shiinji shitabete kabotu sheenga shanyonyoola bushicibusa bwesu a Yehova. Sombi tulicite Yehova—Mutanjilili wesu wiinditewo. Alatutanjilila kabotu kwaamba ayi tuleye kulicana mulipenshi akwaamba ayi tukashiike nkotutooya—nkokwaamba ayi kuba abuumi butamaani mucishi cipya.

2. Ino Yehova alatutanjilila buyani?

² Ino Yehova alatutanjilila buyani? Alacita boobo bunene bunene kwiinda mukusebensesha Baibo. Nacibi boobo, alasebensesha abantu kututanjilila. Kucakubonenaako, alasebensesha ‘musebenshi ushomeka alimwi ucite maano’ kutupa shakulya shakumushimu isho shitucafwa kusala kabotu shakucita. (Mate. 24:45) Alimwi Yehova alatutanjilila kusebensesha basankwa abamwi beelela. Kucakubonenaako, bamatanjilili balubasu alimwi abamanene mulibungano balatuyuminisha akutupa butanjilishi bweenga bwatucafwa kuliyumya ndyetuli munshiku shino shiyumu. Tulalumba abuumbi kwaamba ayi Yehova alatutanjilila kabotu abuumbi munshiku shino shakweelaako shintu ndyeshibete shiyumu! Ici cilatucafwa kutolelela kuba abushicibusa a Yehova akutolelela kuba panshila itola kubuumi.

3. Ino tutokwiiya nshi mumutwi uyu?

³ Nacibi boobo, cimwi ciindi inga catuyumina kukonkela butanjilishi bwakwe Yehova, bunene bunene na butanjilishi bwaswa kubamakwesu batamaninite. Ino nceebonshi? Mpashi inga batulwiita kucita shintu nshotutasuni. Na mpashi inga twalinyumfwa ayi butanjilishi mbotwatambula tabubete kabotu, aboobo tabuna kuswa  kuli Yehova. Na twalinyumfwa boobo, ndyetuyandika bunene kushoma ayi Yehova ngwatotanjilila bantu bakwe alimwi ayi kukonkela butanjilishi bwakwe kulapa kwaamba ayi tucane shoolwe. Kwaamba ayi tunooshoma cakutatoonsha ayi Yehova ngwaatotanjilila bantu bakwe, mumutwi uyu tutobandika (1) Yehova mbwaakalinga kutanjilila bantu bakwe muciindi camu Baibo, (2) mbwaatotutanjilila munshiku shino, alimwi (3) shoolwe nshotucana na twatolelela kukonkela butanjilishi bwakwe.

YEHOVA MBWAAKALINGA KUTANJILILA BENE ISILAELI

4-5. Ino Yehova wakatondesha buyani ayi wakalinga kusebensesha Mose kutanjilila bene Isilaeli? (Amubone cikope cili papeeji yakutaanguna.)

⁴ Yehova wakasala Mose kutanjilila bene Isilaeli kuswa mu Ijipiti. Alimwi wakapa bene Isilaeli bumboni bwakatondesha ayi ngwaakalinga kubatanjilila kwiinda muli Mose. Kucakubonenaako, malumwi wakalinga kubatanjilila kwiinda mulicincilo lya likumbi lyalo mashiku kwiinda mulicincilo lya mulilo. (Kulo. 13:21) Mose abene Isilaeli bakakonkela licincilo ilyo lyakabatanjilila kuya ku Lweenge Lusalala. Sombi bene Ijipiti bakatandaanya bene Isilaeli. Aboobo bene Isilaeli bakaloonda abuumbi mukwiinga bakalinga kuyeeya ayi bene Ijipiti batoobacaya. Bakayeeya ayi Mose wakabisha kubatanjilila kuya ku Lweenge Lusalala. Sombi taakwe kubisha. Yehova mwiine ngwaakatanjilila bantu bakwe kuya kumusena uyu kwiinda muli Mose. (Kulo. 14:2) Lyalo Lesa wakabapulusha munshila ikankamika abuumbi.—Kulo. 14:​26-28

⁵ Mumyaaka 40 yakakonkelaawo, Mose wakatolelela kushoma ayi Yehova atotanjilila bantu bakwe kwiinda mulicincilo lya likumbi ndyebakalinga muluyanga. a Paciindi cimwi, Yehova wakabika licincilo peculu lya tente yakwe Mose kwaamba ayi bene Isilaeli boonse baliboone. (Kulo. 33:​7, 9, 10) Yehova wakabandika a Mose kuswa mulicincilo ilyo, alakwe wakalwiita bene Isilaeli Yehova nshaakamulwiita. (Kulu. 99:7) Bene Isilaeli bakabona bumboni bukwene bwakalinga kutondesha ayi Yehova wakalinga kubatanjilila kwiinda muli Mose.

6. Ino nshiinshi bene Isilaeli nshebakacita Yehova ndyaakalinga kubatanjilila kwiinda muli Mose? (Shakubelenga 14:​2, 10, 11)

⁶ Cakabicaako ncakwaamba ayi bene Isilaeli baanji bakakaka bumboni bwakalinga kutondesha patuba ayi Yehova wakalinga kubatanjilila kwiinda muli Mose. (Amubelenge Shakubelenga 14:​2, 10, 11.) Mukwiinga bakakaka bumboni ubo, Yehova taakwe kubasuminisha kunjila mu Cishi Cakashomeshekwa.—Shakube. 14:30.

7. Amwaambe shakubonenaako sha baabo bakalinga kukonkela butanjilishi bwakwe Yehova. (Shakubelenga 14:24) (Amubone acikope.)

⁷ Nacibi boobo, bene Isilaeli bamwi bakakonkela butanjilishi bwakwe Yehova. Kucakubonenaako, Yehova wakaamba ayi: “Kalebu . . . watolelela kunyumfwila ca moyo woonse.” (Amubelenge Shakubelenga 14:24.) Lesa wakapa shoolwe Kalebu, akumupa coolwe cakusala musena nkwaakalinga kusuni kukala mu Kenani. (Joshu. 14:​12-14) Lishalane lya bene Isilaeli lyakakonkelaawo alyalo lyakatondesha cakubonenaako cibotu cakukonkela butanjilishi bwakwe Yehova. Joshuwa ndyaakapyana Mose kuba mutanjilili wa bene Isilaeli, ‘bakatalika kumupa bulemu abuumbi mubuumi bwakwe boonse.’ (Joshu. 4:14) Aboobo Yehova wakabapa shoolwe kwiinda mukubanjisha mucishi ncaakabashomesha.—Joshu. 21:​43, 44.

8. Amwaambe Yehova mbwaakalinga kutanjilila bantu bakwe muciindi ca bamaami. (Amubone acikope.)

⁸ Ndipakeenda myaaka, Yehova wakatalika kutanjilila bantu bakwe kwiinda mukusebensesha boomboloshi. Lyalo muciindi ca bamaami, Yehova wakasala bashinshimi kutanjilila bantu bakwe. Bamaami bashomeka bakalinga  kukonkela butanjilishi kuswa ku bashinshimi. Kucakubonenaako, Mwaami Defedi wakaliceesha akusumina kululikwa kuswa ku mushinshimi Natani. (2 Samwe. 12:​7, 13; 1 Maka. 17:​3, 4) Mwaami Jeoshafati wakalinga kukonkela butanjilishi kuswa ku mushinshimi Jaasiyelo alimwi wakayuminisha baJuda ‘kushoma bashinshimi bakwe Lesa.’ (2 Maka. 20:​14, 15, 20) Mwaami Esekiya ndyaakalisukama, wakasenga lucafwo ku mushinshimi Isaya. (Isa. 37:​1-6) Lyoonse na bamaami bakonkela butanjilishi, Lesa wakalinga kubapa shoolwe akushitilisha bantu bakwe. (2 Maka. 20:​29, 30; 32:22) Uli woonse wakalinga kweelete kubona ayi ncakwiila Yehova wakalinga kutanjilila bantu bakwe kwiinda mubashinshimi. Nacibi boobo, bamaami baanji alimwi abene Isilaeli tabakwe kunyumfwila bashinshimi bakwe Yehova.—Jele. 35:​12-15.

YEHOVA MBWAAKALINGA KUTANJILILA BENEKLISTU BAKUTAANGUNA

9. Ino mbaani Yehova mbaakalinga kusebensesha kutanjilila Beneklistu bakutaanguna? (Amubone acikope.)

⁹ Pa Pentekositi yamu 33 C.E., Yehova wakatalika libungano lya Bwineklistu. Ino wakalinga kubatanjilila buyani Beneklistu bakutaanguna aba? Wakasala Yesu kuba mutwi walibungano. (Efe. 5:23) Sombi Yesu taakalinga kubandika ashikwiiya womwi awomwi kumulwiita shakucita. Yesu wakalinga kutanjilila Beneklistu aba kwiinda mubatumwi alimwi abamanene ku Jelusalemu. (Milimo 15:​1, 2) Alimwi bamanene bakasalwa kunootanjilila mumabungano.—1 Tesa. 5:12; Taita. 1:5.

10. (a) Ino Beneklistu bakutaanguna baanji bakacita buyani ndyebakatambula butanjilishi? (Milimo 15:​30, 31) (b) Ino nceebonshi bamwi muciindi camu Baibo bakalinga kukaka kukonkela butanjilishi kuswa ku bantu Yehova mbaakalinga kusebensesha? (Amubone kabokosi kacite mutwi utokwaamba ayi “ Bamwi Ncobakakila Kukonkela Butanjilishi.”)

¹⁰ Sa Beneklistu aba bakalinga kukonkela butanjilishi mbobakalinga kupekwa? Baanji bakalinga kusangalala kukonkela butanjilishi mbobakalinga kupekwa. Alimwi ‘bakasangalala pakunyumfwa makani akubayuminisha’ ngobakatambula. (Amubelenge Milimo 15:​30, 31.) Ano ino Yehova alabatanjilila buyani bantu bakwe munshiku shino?

YEHOVA MBWAATUTANJILILA MUNSHIKU SHINO

11. Amwaambe cakubonenaako citondesha Yehova mbwakalinga kutanjilila bashikwiiya Baibo kutalikila mu 1870.

¹¹ Munshiku shino, Yehova watolelela kutanjilila bantu bakwe. Atoocita boobo kwiinda mukusebensesha  Maswi akwe alimwi a Mwanaakwe uyo uli ngomutwi walibungano. Sa kuli bumboni mbotutoobona butotondesha ayi Yehova watolelela kututanjilila kusebensesha abantu? Ee. Kucakubonenaako, amuyeeye pa shimwi shakacitika pesule lya mwaaka wa 1870. Charles Taze Russell abaabo mbaakalingaabo bakanyumfwisha ayi mwaaka wa 1914 ulaakuba mwaaka uyandika mukukumanisha bushinshimi bwamu Baibo bwaamba pakutalika kweendelesha kwa Bwaami bwakwe Lesa. (Danye. 4:​25, 26) Bakashiba ayi ubo mbweshi cikabe ceebo cakwiiya bushinshimi bwamu Baibo. Sa Yehova wakalinga kubatanjilila ndyebakalinga kwiiya shiinji pamakani amu Baibo? Ncakutatoonsha. Shakacitika mucishi mu 1914 shakatondesha ayi Bwaami bwakwe Lesa bwatalika kweendelesha. Inkondo Yapacishi Coonse Yakutaanguna yakatalika, alimwi kwakaba malwashi anene, shitentaanshi ansala. (Luka 21:​10, 11) Ncakutatoonsha kwaamba ayi Yehova wakalinga kusebensesha bashikwiiya Baibo aba kucafwa bantu bakwe.

12-13. Ino nshiinshi bamakwesu bakalinga kutanjilila nshobakacita paciindi ca Nkondo Yapacishi Coonse Yabili kwaamba ayi incito yakushimikila iye panembo?

¹² Amuyeeye shakacitika paciindi ca Nkoondo Yapacishi Coonse Yabili. Pesule lyakwiiya makani acanika pa Ciyubululo 17:​8, bamakwesu bakalinga kutanjilila ku maofesi anene bakashiba ayi inkondo yakalingaako teshi ikape kwaamba ayi Amagedoni italike, sombi ilaakupa kwaamba ayi mucishi mube luumuno kwakaciindi akupa bantu bakwe Lesa coolwe cakushimikila bantu baanji. Aboobo bamakwesu bakalinga kutanjilila bakabika bubaambo bwa Cikolo ca Gilyadi kwaamba baiishe bamishonali kuya mukushimikila mushishi shipusenepusene nsengwe yoonse, nabi kwaamba ayi cakalinga kuboneka ayi inga tacikonsheki. Bamishonali bakalinga kutumwa nabi paciindi ndyekwakalinga nkoondo. Kwiilikaawo, musebenshi ushomeka wakabika bubaambo bwa cikolo cilibetele cakucafwa beshikushimikila boonse mumabungano kucishiba kabotu bwakushimikila akwiisha. Shikolo ishi shakacafwa bantu bakwe Lesa kulibambila kusebensa ncito yakushimikila.

¹³ Pacecino ciindi tulabona ayi ncakwiila Yehova wakalinga kutanjilila bantu bakwe paciindi cilya ciyumu. Kuswabo ciindi Inkondo Yapacishi Coonse Yabili ndyeyakamana, bantu bakwe Yehova mushishi shiinji balicite luumuno alwaanguluko lwakushimikila. Bantu baanji bamushiba Yehova alimwi basebenshi bakwe batoshimikila nsengwe yoonse.

14. Ino nceebonshi inga twashoma butanjilishi mbotutambula kuswa ku libunga lyakwe Yehova akubamanene bakasalwa? (Ciyubululo 2:1) (Amubone acikope.)

 ¹⁴ Munshiku shino, bamu Likoto Litanjilila batolelela kukonkela butanjilishi bwakwe Klistu. Balisuni kwaamba ayi bamakwesu banoobona ayi butanjilishi mbobabapa bulaswa kuli Yehova a Yesu. Alimwi balasebensesha bamatanjilili balubasu abamanene kupa butanjilishi kumabungano. b Bamanene bananikitwe kwiilikaawo abamanene boonse mumabungano, bali “mulyaansa lyalulyo” lyakwe Klistu. (Amubelenge Ciyubululo 2:1.) Kwalo, bamanene boonse tabamaninite alimwi balabisha. Paciindi cimwi Mose a Joshuwa bakabisha alimwi batumwi abalo bakalinga kubisha. (Shakube. 20:12; Joshu. 9:​14, 15; Loma. 3:23) Sombi tutoobona ayi ncakwiila Klistu atotanjilila cakubikila maano musebenshi ushomeka abamanene bakasalwa mumabungano, alimwi alaakutolelela kucita boobo “kushikila kumamanino a cishi.” (Mate. 28:20) Aboobo kuli sheebo shibotu sheelete kutupa kushoma butanjilishi mbwaatupa kwiinda mubaabo mbaakasala kututanjilila.

TULACANA SHOOLWE NA TWATOLELELA KUKONKELA BUTANJILISHI BWAKWE YEHOVA

15-16. Ino nshiinshi nshomweeya kuswa kushakubonenaako sha baabo bakakonkela butanjilishi bwakwe Yehova?

¹⁵ Apacecino ciindi tulacana shoolwe na twatolelela kukonkela butanjilishi bwakwe Yehova. Kucakubonenaako, ba Andy aba Rose, c bakakonkela butanjilishi kuswa ku musebenshi ushomeka bwaamba pakukala buumi bwakutalila shiinji. (Ebu. 13:5) Aboobo bakalyaaba kwaabanamo lubasu muncito yakuyaka Maanda a Bwaami. Ba Rose bakaamba ayi: “Twakekalaawo mu twaanda tuniini abuumbi cakwaamba ayi liinji tamwakalingaawo acipinda mwakutelekela. Alimwi ndakoolisha makamela aanji ashintu nshondakalinga kusebensesha pa kukopa nabi kwaamba ayi kukopa ncintu nconsuni abuumbi. Ndyendakashuulisha ndakalila. Sombi bweenka mbuli Saala mukaakwe Abulaamu, ndakalinga kushinishite kubikila maano kushintu nsheenga ndacitila Yehova paciindi ici kuteshi kushintu nshendakoolisha.” (Ebu. 11:15) Ino nshoolwe nshi beebene aba nshobakacana pesule lyakucita boobo? Ba Rose bakaamba ayi: “Tulisangalete abuumbi mukwiinga tulicishi ayi tutoocita nsheenga twacikonsha muncito yakwe Yehova. Ndyetutosebensa ncito yakuyaka, tulabona buumi mbweshi bukabe mucishi cipya.” Ba Andy bakasuminisha  akwaamba ayi: “Tulisangalete mukwiinga tulasebensesha ciindi ankusu shesu shoonse muncito yakwe Yehova.”

¹⁶ Ino nshoolwe nshi ashimwi nshotucana na twatolelela kukonkela butanjilishi bwakwe Yehova? Pesule lyakwaamba ayi Marcia wamanisha cikolo caku sekondali, wakalinga kusunishishi kukonkela nshaakalwiitikwa pamakani akutalika bupainiya. (Mate. 6:33; Loma. 12:11) Wakaamba ayi: “Ndakapekwa coolwe cakuya ku yunivesiti kwamyaaka 4 kwakubula kulipila. Sombi ndakalinga kusuni kucita shiinji muncito yakwe Yehova. Aboobo muciindi cakusumina coolwe ncondakapekwa, ndakasalawo kwiiyako ncito imwi yeenga kaincafwa kucana maali ayandika kwaamba ayi nsebenseko bupainiya. Ici ncintu cibotu abuumbi ncondakasalawo kucita mubuumi. Pacecino ciindi ndisangalete kusebensa bupainiya bwaciindi coonse. Alimwi ceebo cakwaamba ayi ndalisalila bulaamfu bwaciindi nconjeelete kusebensa, ndacikonsha kunoocafwilishaako pa Bethel munshiku shimwi akusebensako mikuli imwi ilibetele.”

17. Ino nshoolwe nshi ashimwi nshotucana na twatolelela kukonkela butanjilishi bwakwe Yehova? (Isaya 48:​17, 18)

¹⁷ Pashiindi shimwi, tulatambula butanjilishi kuswa kulibunga ubo butushitilisha. Kucakubonenaako, tulacenjeshekwa pamakani akusunishisha maali apashintu sheenga shapa kwaamba ayi tupwaye milawo yakwe Lesa. Kukonkela butanjilishi bwakwe Yehova bwaamba pamakani aya kulatucafwa. Tulatolelela kuba anjeelacaamba isalalite akuleya kulinjisha mumapensho apusenepusene. (1 Timo. 6:​9, 10) Aboobo inga twasebensela Yehova camoyo woonse. Alimwi kucita boobo kulatupa kuba alusangalalo abuumbi, luumuno akulinyumfwa kukwana.—Amubelenge Isaya 48:​17, 18.

18. Ino nceebonshi mulishinishite kutolelela kukonkela butanjilishi bwakwe Yehova?

¹⁸ Ncakutatoonsha kwaamba ayi Yehova alaakutolelela kusebensesha bantu kututanjilila muciindi ca mapensho anene kushika amu Buleelo Bwa Myaaka 1,000. (Kulu. 45:16) Sa tulaakutolelela kukonkela butanjilishi mbweshi bakanootupa nabi katusuni kucita shintu munshila ipuseneeko? Cilaakutubeta cuubu kucita boobo na katukonkela butanjilishi Yehova mbwatotupa pacecino ciindi. Aboobo lyoonse tunokonkela butanjilishi Yehova mbwaatupa, kwiilikaawo abutanjilishi buswa kubamakwesu bakasalwa kutulama. (Isa. 32:​1, 2; Ebu. 13:17) Inga twakonkela Mutanjilili wesu Yehova katushomete cakutatoonsha ayi alaakututanjilila kabotu, mukwiinga alatucafwa kuleya cili coonse ceenga canyonyoola bushicibusa bwesu anguwe akututanjilila ku buumi butamaani mucishi cipya.