1. Bweenka mbuli Mwaami Defedi, ino ngumwiipusho nshi ngweenga tweepusha?

SOONSE tulisuni kukala buumi bwakutalisukama. Taakuwo muntu unyumfwa kabotu kulisukama. Nacibi boobo, cimwi ciindi inga twalisukama abuumbi. Alimwi mpashi basebenshi bakwe Yehova bamwi inga beepusha mwiipusho Mwaami Defedi ngwakeepusha Yehova ayi: “Ndaakucileka lili kupenshekwa mumoyo wangu? Anu buumba buli mumoyo wangu lyoonse bulaakumana lili?”​—Kulu. 13:2.

2. Ino nshiinshi nsheshi tubandike mumutwi uyu?

² Nabi kwaamba ayi cimwi ciindi soonse tulalisukama, kuli shiinji nsheenga twaciita kwaamba ayi tutanoolisukama abuumbi. Mumutwi uyu, tutotaanguna kubandika pashintu shimwi sheenga shatupa kulisukama. Lyalo tutoobandika pashintu 6 nsheenga twaciita kwaamba ayi tutanoolisukama abuumbi na twaba mumapensho.

3. Ino ngamapensho nshi eenga atupa kulisukama, alimwi sa kuli nsheenga twaciita kwaamba ayi mapensho ayo atacitiki?

³ Kuli shintu shiinji sheenga shatupa kulisukama, alimwi shimwi pasheesho taakuwo nsheenga twaciita kwaamba ayi shitacitiki. Kucakubonenaako, taakuwo nsheenga twaciita kwaamba ayi muulo washakulya, shakufwala, amaanda alenti utanooya peculu mwaaka amwaaka; alimwi inga tatuceyeshiko mankanda ngeenga abo mbotusebensaabo na beshicikolonyineesu batuyunga  ayi tutashomeki na kucita bulale. Alimwi inga tatucikoonshi kukasha shintu shibiibi shicitika kumusena nkotukala. Tuleenda mumapensho oonse aya mukwiinga tuli mucishi bantu baanji mobatakonkeli njiisho shamu Baibo. Satana uyo utokweendelesha cishi cino, alishi kwaamba ayi bantu bamwi inga bacileka kusebensela Yehova ceebo “cakulisukama ashintu sha mucishi capanshi.” (Mate. 13:22; 1 Joni 5:19) Nceceeco mucishi ncomubetele mapensho aanji alengesha bantu kulisukama abuumbi!

4. Ino nshiinshi mpashi sheenga shacitika na twacana mapensho?

⁴ Cimwi ciindi mapensho inga atusukamika abuumbi. Kucakubonenaako, mpashi inga twalisukama abuumbi ceebo cakwaamba ayi tatucishiwo nkweshi tukacane maali akuula shiyandika. Nabi mpashi kulisukama abuumbi ayi tulaakuciswa cakwaalilwa kuya kuncito, alimwi mpashi akuyeeya ayi balaakutukusha ncito. Alimwi mpashi inga twalisukama ayi tulaakwalilwa kushomeka na tukeeleshekwe kupwaya mulawo wakwe Lesa. Conoonobo Satana alaakupa kwaamba ayi abo mbaeendelesha balwane bantu bakwe Lesa, aboobo inga twalisukama kuyeeya nsheshi tukacite. Mpashi inga twatalika kuliipusha ayi, ‘Sa ncibiibi kulisukama pashintu shoonse nshetwaambawo?’

5. Ino Yesu wakalinga kusansulula nshi ndyaakaamba ayi: “Mutalisukami”?

⁵ Tulishi kwaamba ayi Yesu wakalwiita bashikwiiya bakwe ayi: “Mutalisukami.” (Mate. 6:25) Ano sa maswi aya alasansulula ayi tatweelete kulisukama nabibo paniini? Sobwe napaceyi! Mukwiinga nabibo basebenshi bakwe Yehova bashomeka bakale kale, abalo bakalisukamaawo, nacibi boobo, Yehova taakwe kubasuula. * (1 Baam. 19:4; Kulu. 6:3) Aboobo Yesu wakalinga kutuyuminisha. Taakalinga kusuni ayi tulisukame abuumbi pamakani akuyandoola shiyandika cakwaamba ayi twacileka akubikila maano kukusebensela Yehova. Ano ino nshiinshi nshotweelete kucita kwaamba ayi tutanoolisukama abuumbi?​—Amubone kabokosi kacite mutwi utokwaamba ayi “ Nsheenga Mwaciita.”

6. Kweelana a Bene Filipi 4:6, 7, ino nciinshi ceenga catupa kutalisukama?

⁶ (1) Munoopaila lyoonse. Na kuli lipenshi litomusukamika inga mwapaila kuli Yehova kwaamba ayi amucaafwe. (1 Pit. 5:7) Yehova inga wakumbula mipailo yanu kwiinda mukumupa “luumuno lwakwe Lesa ulo lwiinda pabusongo bwa bantu boonse.” (Amubelenge Bene Filipi 4:6, 7.) Yehova alaakumupa luumuno kwiinda munkusu shakwe sha mushimu usalashi.​—Gala. 5:22.

7. Ino nshiinshi nshotweelete kwiibaluka ndyetutopaila?

⁷ Ndyemutopaila kuli Yehova, amumulwiite shoonse shili kumoyo. Amumulwiite lipenshi liine litoomupa kulisukama akumusansulwita mbomutoolinyumfwa. Na kuli nshila njeenga mwamaninamo lipenshi ilyo, amumusenge kwaamba ayi amucaafwe kushiba nsheenga mwaciita, akumupa nkusu shakucikonsha kumana lipenshi ilyo. Na taakuwo nsheenga mwaciita kwaamba ayi mumanishe lipenshi ndyemutookwiindaamo, amumusenge Yehova kwaamba ayi amucaafwe kutalisukama abuumbi palipenshi ilyo. Kucita boobo kulaakupa kwaamba ayi cibe cuubu kubona Yehova mbwaakumbula mipailo yesu. Mutacileeki kupaila na Yehova taakwe kukumbula mipailo yanu paciindi ncemutolangila. Yehova alisuni ayi muteelibo pakwaamba mapenshi anu ndyemutopaila, sombi alisuni ayi mutolelele kupaila.​—Luka 11:8-10.

8. Ino nshiinshi nshotuteelete kuluba ndyetutopaila?

 ⁸ Ndyemutopaila akutola kulisukama kwanu kuli Yehova, mutaluubi kumulumba. Cili kabotu kutaluba shintu shibotu Yehova nshaatucitila, nabi ndyetutokwiinda mumapensho aanji. Ano ino inga mwacita buyani na mutokwaalilwa kusansulwita Yehova mbomutoolinyumfwa? Mutaluubi kwaamba ayi Yehova inga wakumbula mupailo wanu nabi na mwaambabo ayi ‘Ndaseenga amuncaafwe!’​—2 Maka. 18:31; Loma. 8:26.

9. Ino nciinshi ncotweelete kucita na twaloonda?

⁹ (2) Amushome mubusongo bwakwe Yehova, kuteshi mubusongo bwanu. Muciindi ca mushinshimi Isaya, ba Juda bakalinga kuloonda kulwanwa kubene Asilya. Aboobo ceebo cakuloonda kukomwa kubene Asilya, bakaya mukusenga bene Ijipiti batakalinga kupaila Yehova ayi babacaafwe. (Isa. 30:1, 2) Yehova wakabacenjesha ayi kushoma mu bene Ijipiti kulaakubaletelela. (Isa. 30:7, 12, 13) Yehova wakasebensesha Isaya kubalwiita nshobakalinga kweelete kucita kwaamba ayi bashitilishikwe. Wakaamba ayi: “Nkusu shanu shilaakuba mukukalikana akutondesha lushomo” muli Yehova.​—Isa. 30:15b.

10. Ino mbukaalo nshi mbweenga twayandika kutondesha ayi tulashoma muli Yehova?

¹⁰ Ino inga twatondesha buyani ayi tulashoma muli Yehova? Amuyeeye pashakubonenaako shitokonkelaawo. Amuyeeye kwaamba ayi mwacana ncito yakufola maali aanji, ano ilaakunoomutolelela ciindi abuumbi. Mulaakunookwaalilwa kusebensela kabotu Yehova mbuli mbomutoocita pacecino ciindi. Na uyo ngomusebensaakwe uteshi Kamboni watalika kutondesha lusuno lwa cikwati kulindimwe. Na mpashi muntu ngomusuni mumukwashi wanu wamulwiita ayi: “Salaawo pali ndime na Lesa wako.” Teshi cuubu kusala kabotu shakucita na mwacana meelesho mbuli aya. Nacibi boobo, Yehova alaakumucafwa kushiba shakucita mubweelesho buli boonse. (Mate. 6:33; 10:37; 1 Koli. 7:39) Ano sa mulaakushoma muli Yehova, akunyumfwila nshamulwiita kucita?

11. Ino ngamakani ali amu Baibo eenga atucafwa kukalika moyo ndyetutopikishikwa?

¹¹ (3) Amwiiye kubaabo bakashoma muli Yehova abaabo bakaalilwa. Mu Baibo muli makani aanji atondesha kuyandika kwa kutolelela kukalika moyo akushoma muli Yehova. Ndyemutobelenga makani aya, amubone cakacafwa basebenshi bakwe Lesa kutolelela kukalika moyo nabi ndyebakalinga kupikishikwa abuumbi. Kucakubonenaako, kooti inene yaba Juda ndyeyakakasha batumwi kushimikila makani abotu, batumwi tabakwe kuloonda. Sombi bakaambilisha cakutaloonda ayi: “Tulyeelete kunyumfwila Lesa, kuteshi bantu sobwe.” (Mili. 5:29) Nabi ndyebakakwiipwa, batumwi bakatolelela kutaloonda. Ino nceebonshi? Bakalinga kucishi kwaamba ayi Yehova atoobacafwa. Wakalinga kukondetwe anshobakasala kucita. Aboobo bakatolelela kushimikila makani abotu. (Mili. 5:40-42) Alimwi ubu bweenka mbocakalinga akuli shikwiiya Sitifini. Taakwe kulisukama abuumbi ndyebakalinga pafwiifwi akumucaya cakwaamba ayi ‘ciwa cakwe cakaboneka anga nca munjelo.’ (Mili. 6:12-15) Ino nceebonshi? Nceebo cakwaamba ayi wakalinga kucishi ayi Yehova wakalinga kukondetwe pali nguwe.

12. Kweelana a 1 Pita 3:14 a 4:14, ino nciinshi ceenga catupa kuba alusangalalo nabi ndyetutopenshekwa?

¹² Batumwi bakalinga kucite bumboni bwakalinga kutondesha patuba kwaamba ayi Yehova ali ambabo. Wakalinga wabapa nkusu shakucita shaankamiko. (Mili. 5:12-16; 6:8) Ano pacecino ciindi ubu teshi mbocibete kulindiswe. Nacibi boobo, kwiinda mu Maswi akwe, Yehova mulusuno alatushomesha ayi na tutopenshekwa ceebo cabululami, alakondwa alimwi alatupa  mushimu wakwe. (Amubelenge 1 Pita 3:14; 4:14.) Aboobo muciindi cakulisukama ansheshi tukacite na tukanopenshekwa kunembo, tulyeelete kubikila maano kushintu sheenga shatucafwa kushoma ayi Yehova alaakutucafwa alimwi akutupulusha. Bweenka mbuli bashikwiiya bakutaanguna mbobakacita, tulyeelete kushoma Yesu nshaakashomesha ayi: “Ndaakumupa maswi a busongo bwakwaamba ayi taaku mulwani wanu eshi akacikoonshe kwaakaka nabi kupikisha.” Alimwi wakashomesha ayi: “Kwiinda mukuliyumya kwanu, mulaakupulusha buumi bwanu.” (Luka 21:12-19, NWT) Alimwi mutaluubi kwaamba ayi Yehova aleebaluka shintu shoonse pabasebenshi bakwe batolelela kushomeka kuli nguwe kushikila kulufu, aboobo alaakubabusha.

13. Ino kwiiya pashakubonenaako sha baabo bakaalilwa kucinka manungo muli Yehova inga kwatucafwa buyani?

¹³ Kuli nsheenga tweeya kushakubonenaako sha baabo bakaalilwa kukalika moyo akushoma muli Yehova. Kwiiya shakabacitikila inga kwatucafwa kuleya shilubo nshebakacita. Kucakubonenaako, Mwaami waba Juda Asa ndyaakatalikabo kweendelesha, wakacinka manungo muli Yehova likoto linene lyabashilumamba ndyelyakesa mukubalwana, alimwi Yehova wakabacafwa kukoma balwani babo. (2 Maka. 14:9-12) Ano mukuya kwaciindi, likoto liniini lyabashilumamba ba Mwaami wa bene Isilaeli Baasha ndyelyakesa mukubalwana, Asa wakalipila bene Silya kwaamba ayi bamucaafwe muciindi ca kucinka manungo muli Yehova mbuli mbwaakacita pakutaanguna. (2 Maka. 16:1-3) Alimwi paciindi Asa ndyaakaciswa abuumbi taakwe kucinka manungo muli Yehova kwaamba ayi amucaafwe.​—2 Maka. 16:12.

14. Ino nciinshi nceenga tweeya kushilubo Asa nshaakacita?

¹⁴ Asa ndyaakatalika kweendelesha, wakalinga kucinka manungo muli Yehova na wacana mapensho. Ano mukuya kwaciindi wakacileka kucita boobo akutalika kulishoma. Pakutaanguna, kusenga bene Silya kwaamba ayi bamucaafwe kulwana bene Isilaeli kwakaboneka anga kwakalingabo kabotu. Nacibi boobo, nshaakacita shakamucafwabo kwakaciindi kaniini. Yehova kwiinda mu mushinshimi wakamulwiita ayi: ‘Mukwiinga webo wakacinka manungo mumwaami wa bene Silya mumusena wakucinka manungo muli Yehova Lesa wako, bashilumamba ba mwaami wa Silya boonse bamana kukuloboka.’ (2 Maka. 16:7) Tulyeelete kubikila maano akushinisha kwaamba ayi tatutoocinka manungo mubusongo bwesu akwaalilwa kukonkela butanjilishi bwakwe Yehova mbwatupa kwiinda mu Maswi akwe. Nabi kwaamba ayi twacanika mubukaalo butoyandika kusalawo cakucita cakufwambaana, tulyeelete kukalika moyo akucinka manungo muli Yehova, alaakutucafwa kusala kabotu.

15. Ino nshiinshi nsheenga twaciita ndyetutobelenga Baibo?

¹⁵ (4) Amwiibaluke Malembo. Na ndyemutobelenga Baibo mwacana makani amwi atotondesha kuyandika kwa kukalika moyo akushoma muli Yehova, amweeleshe kwiibaluka makani ayo kumutwibo. Kwaamba ayi mucikoonshe kucita boobo mpashi inga mwabelenga makani ayo cakupoosha, na mpashi inga mwaalemba palubasu pamwi akunookwiindulukaamo ciindi aciindi. Yehova wakalwiita Joshuwa ayi lyoonse anoobelenga libuku lya Milawo akukutumana kuyeeyawo abuumbi kwaamba ayi abe musongo. Nshaakalinga kubelenga kuswa mulibuku lya Milawo shakalinga kweelete kumucafwa kutaba aboowa ndyaakalinga kutanjilila bantu bakwe Lesa. (Joshu. 1:8, 9) Maswi aanji ngotucana mu Baibo inga amucafwa kukalika moyo na mwacana mapensho asukamika abuumbi na ndyemwaloonda.​—Kulu. 27:1-3; Tus. 3:25, 26.

16. Ino Yehova alacita buyani kwaamba ayi atucaafwe kukalika moyo akushoma muli nguwe?

 ¹⁶ (5) Munooba pomwi abantu bakwe Lesa. Yehova alatucafwa kukalika moyo akushoma muli nguwe kwiinda mu bamakwesu abenankashi. Ndyetuli kumabungano tulafubilaamo mumakani, shikumbulo alimwi amibandi iyuminisha njetubaayo abamakwesu abenankashi. (Ebu. 10:24, 25) Cimwi ceenga catuyuminisha abuumbi nkulwiitako shicibusa ngotushoma mulibungano mapensho atootusukamika. “Maswi abotu” eenga aamba shicibusa, inga apa kwaamba ayi tucileeke kulisukama.​—Tus. 12:25.

17. Kweelana a Bene Ebulu 6:19, ino kulangila kwesu inga kwatucafwa buyani kukalika moyo ndyetuli mubukaalo buyumu?

¹⁷ (6) Amuyumye kulangila kwanu. Kulangila kwesu “kuli anga nceela cakwiimikisha bwaato mubuumi bwesu,” kulatucafwa kutolelela kuyuma nabi ndyetutokwiinda mumapensho asukamika. (Amubelenge Bene Ebulu 6:19.) Amukutumane akuyeeya pashintu shibotu Yehova nshakatushomesha kunembo. Paciindi ico teshi kukabeewo shitusukamika. (Isa. 65:17) Amuyeeye kwaamba ayi muli mucishi cipya mweshi mukabe luumuno alimwi mweshi mukabule kuba shibiibi. (Mika 4:4) Alimwi kulangila kwanu kulaakuyuminaako na kamulwiitako bamwi sha cishi cipya. Amucite nsheenga mwacikonsha muncito yakushimikila akucafwa bantu kuba bashikwiiya. Kucita boobo kulaakumucafwa kuba ‘alushomo luyumu mukulangila kushikila akumamanino.’​—Ebu. 6:11.

18. Ino nshiinshi nsheenga twalangila kunembo, alimwi ino nshiinshi nsheenga twaciita?

¹⁸ Ndyetuli kumamanino abweende bwashintu ubu, tulaakunookwiinda mumapensho aanji eenga atupa kulisukama. Lilembo lya mwaaka wa 2021 inga lyatucafwa kuliyumya cakukalika moyo, akushoma muli Yehova muciindi cakushoma mu nkusu shesu. Aboobo mumwaaka uno, amuleke tunoocita shintu shitondesha kwaamba ayi tulashoma mucishomesho cakwe Yehova cakwaamba ayi: “Nkusu shanu shilaakuba mukukalikana akutondesha lushomo.”​—Isa. 30:15, NWT.