1. Ino nshiinshi shitondesha kwaamba ayi bantu munshiku shino tabacite lusuno?

BAIBO yakaambila limwi ayi munshiku shakweelaako bantu balaakuba “batacite lusuno.” (2 Timo. 3:1, 3) Bushinshimi ubu butookumanishikwa munshiku shino. Kucakubonenaako, bashali baanji balalekana alimwi ici cilapa kwaamba ayi bapatane abuumbi. Aboobo baana balalinyumfwa anga taakuwo ubasuni. Cimwi ciindi nabi mikwashi bekala muŋanda yomwi inga kabekala anga teshi mukwashi. Kucakubonenaako, shikucafwa mikwashi umwi wakaamba ayi: “Mushali mwanakashi amusankwa alimwi abaana tababandiki abuumbi, balatola ciindi cilaamfu kabali pamakompyuta, matabuleti, apa mafooni. Nabi kwaamba ayi balekala muŋanda yomwi, tabashibene kabotu.”

2-3. (a) Kweelana a Bene Loma 12:10, ino mbaani mbotweelete kusuna abuumbi? (b) Ino nshiinshi nsheshi tubandike?

² Tatusuniiwo kuba anga mbantu bakucishi batacite lusuno. (Loma. 12:2) Sombi tulisuni kusunana abuumbi mumukwashi wesu alimwi akusuna bamakwesu abenankashi mulibungano. (Amubelenge Bene Loma 12:10.) Ino kusunana abuumbi cilaamba nshi? Maswi aya alasansulula lusuno abushicibusa buli pakati kabantu bali mumukwashi womwi. Ulu ndolusuno ndotweelete kutondesha amumukwashi wesu wakumushimu. Kusuna bamakwesu abenankashi abuumbi bweenka mbuli mukwashi wesu kulaakupa kwaamba ayi tube bacatene, mubo uyandika abuumbi mukulambila kwancine.​—Mika 2:12.

³ Kwaamba ayi tucikoonshe kuba a lusuno lwa mushobo uyu, amuleke tubandike nsheenga tweeya kuswa kushakubonenaako shamu Baibo.

4. Ino Kulumbaisha 86:5 ilaamba nshi palusuno lwakwe Yehova?

⁴ Baibo ilatulwiita pamibo ibotu abuumbi yakwe Yehova. Kucakubonenaako, ilaamba ayi “Lesa ndusuno.” (1 Joni 4:8) Kwiiya pali Yehova kulatupa kusuna kuba abushicibusa anguwe. Alimwi Baibo ilaamba ayi lusuno lwakwe Yehova ndunene. (Amubelenge Kulumbaisha 86:5; Jemusi 5:11) Maswi aya alasansulula kabotu Yehova mbwaatusuni!

5. Ino Yehova alatutondesha buyani inkumbu, alimwi ino cakubonenaako cakwe inga twacikonkela buyani?

⁵ Baibo pa lilembo lyakwe Jemusi 5:11 ilaamba pamibo imwi yakwe Yehova mbuli inkumbu, iyo itupa kusuna kuba pafwiifwi anguwe. (Kulo. 34:6) Yehova alatunyumfwila nkumbu mukwiinga alitusuni. Nshila yomwi mbwaatondesha kwaamba ayi alicite nkumbu nkwiinda mukutulekelela na twabisha. (Kulu. 51:1) Mu Baibo, inkumbu teshi liswi lisansululabo kulekelela umwi wacita cilubo. Liswi ili lileelikaawo amuntu mbwaalinyumfwa na wabona muntu mubye kaapenga alimwi akusuna kumucafwa. Yehova wakatulwiita mu Baibo ayi mbwaalinyumfwa alimwi ambwaasunishi kutucafwa bulindite apa mushali mwanakashi mbwaalinyumfwa pa mwanaakwe. (Isa. 49:15) Na tuli mumapensho, Yehova alatucafwa ceebo ca nkumbu shakwe. (Kulu. 37:39; 1 Koli. 10:13) Aswebo inga twatondesha nkumbu kubamakwesu abenankashi kwiinda mukutababikila mfundilishi na batukalasha, sombi kubalekelela. (Efe. 4:32) Nshila imwi mbweenga twatondesha ayi tulicite nkumbu kubamakwesu abenankashi nkwiinda mukubapa lucafwo muciindi camapensho. Na lusuno lwapa kwaamba ayi tutondeshe nkumbu kubamwi, nkokwaamba ayi twakonkela cakubonenaako ciinditeewo cakwe Yehova utusuni abuumbi.​—Efe. 5:1.

6. Ino Jonasani a Defedi bakatondesha buyani ayi bakalinga kusunene abuumbi?

⁶ Baibo ilatulwiita makani abantu batamaninite bakalinga kusunene abuumbi. Kucakubonenaako, Jonasani a Defedi bakalinga  beshicibusa bakalinga kusunene abuumbi. Baibo ilaamba ayi: “Jonasani a Defedi bakanyumfwana abuumbi, alimwi Jonasani wakatalika kusuna Defedi bweenka mbwaakalinga kulisuni mwiine.” (1 Samwe. 18:1) Yehova wakasala Defedi kwaamba ayi akapyane Saulo pa bwaami. Kuswabo ciindi ico, Saulo wakabikila Defedi mfundilishi cakwaamba ayi wakalinga kusuni kumucaya. Nacibi boobo, Jonasani mwanaakwe Saulo taakwe kuba kulubasu lwa baishi abo bakalinga kusuni kucaya Defedi. Jonasani a Defedi bakashomeshanya kwaamba ayi balaakutolelela kuba beshicibusa alimwi akunoocafwana lyoonse.​—1 Samwe. 20:42.

7. Ino nciinshi cakalinga kweelete kupa kwaamba ayi Jonasani a Defedi batabi beshicibusa?

⁷ Mpashi inga twakankamana na twayeeya Jonasani a Defedi mbobakalinga kunyumfwana abuumbi, mukwiinga kuli shakalinga kweelete kupa kwaamba ayi batabi beshicibusa. Kucakubonenaako, Jonasani wakalinga munene pali Defedi mpashi amyaaka 30. Naakwiinga wakalinga kusuni, Jonasani naakwiinga wakayeeya ayi inga taabi shicibusa a Defedi mukwiinga wakalinga mwanike abuumbi kuli nguwe alimwi utacishi shiinji. Nacibi boobo, ubu teshi mbwaakalinga kuyeeya. Wakalinga kumulemeka abuumbi Defedi.

8. Ino nciinshi nceenga twaambila ayi Jonasani wakalinga shicibusa uli kabotu wakwe Defedi?

⁸ Jonasani naakwiinga wakanyumfwila munyono Defedi. Mbuli mwaana wa Mwaami Saulo, naakwiinga wakayumabo ayi ngoweelete kupyana baishi pacuuna ca bwaami. (1 Samwe. 20:31) Sombi Jonasani wakalinga muntu uliceesha, alimwi ushomeka kuli Yehova. Aboobo wakaba kulubasu lwakwe Defedi uyo Yehova ngwakasala kuba mwaami kunembo. Wakalinga kushomeka kuli Defedi nabi kwaamba ayi ici cakakalasha baishi ba Saulo.​—1 Samwe. 20:32-34.

9. Ino tulishi buyani ayi Jonasani taakalinga kunyumfwila Defedi munyono?

⁹ Jonasani wakalinga kumusuni abuumbi Defedi, aboobo taakalinga kumubona anga ngumulwani wakwe. Jonasani wakalinga shilumamba utaloondi alimwi ucishi kabotu kusebensesha buta. Lakwe abaishi ba Saulo, bakalinga kushibikitwe ayi mbasankwa “bacabeene anga ngumumbankwashi” alimwi ‘bacite nkusu kwiinda nkalamu.’ (2 Samwe. 1:22, 23) Aboobo ishi naakwiinga shakapa Jonasani kulisumpula. Nacibi boobo, Jonasani taakwe kutondesha anga wakalinga kwiindite pali Defedi, nabi kumunyumfwila munyono pashibotu nshaakacita. Muciindi cakucita boobo, Jonasani wakalinga kukumbwa Defedi mbwaakalinga muntu utaloondi alimwi ucinka manungo muli Yehova. Kucakubonenaako, pesule lyakwaamba ayi Defedi wacaya Golyati, Jonasani wakatalika kumusuna abuumbi Defedi. Ino inga twatondesha buyani ayi aswebo tulibasuni abuumbi bamakwesu abenankashi?

10. Ino “kusunana abuumbi camoyo woonse” cilaamba nshi?

¹⁰ Baibo ilatulwiita ayi ‘amusunane abuumbi camoyo woonse.’ (1 Pit. 1:22) Yehova wakatutondesha cakubonenaako. Alitusuni abuumbi cakwaamba ayi na twatolelela kushomeka kuli nguwe, taakuwo ceenga capa kwaamba ayi acileeke kutusuna. (Loma. 8:38, 39) Liswi lyamuci Giliki lisansululwa ayi “kusunana abuumbi,” lilasansulula muntu utokweelesha cankusu kwaamba ayi atondeshe lusuno. Cimwi ciindi teshi cuubu kutondesha lusuno kubamakwesu abenankashi. Na bamwi batukalasha, tulyeelete kutolelela ‘kulekelelana calusuno, akweelesha camoyo woonse kutolelela kulama bwanabwankashi buswa kumushimu usalashi muluumuno ulo lutucatanya pantu pomwi.’  (Efe. 4:1-3) Na katweelesha cankusu kwaamba ayi tutolelele kuba muluumuno abamakwesu abenankashi, teshi tukanoobikila maano kushilubo shabo. Tulaakunokweelesha cankusu kunoobabona bweenka mbuli Yehova mbwaababona.​—1 Samwe. 16:7; Kulu. 130:3.

11. Ino nciinshi cimwi ciindi ceenga capa kwaamba ayi cibe ciyumu kusuna bamakwesu abenankashi abuumbi?

¹¹ Cimwi ciindi cilaba ciyumu kutondesha lusuno kubamakwesu abenankashi, bunene bunene na tulishi shilubo shabo. Alimwi citooboneka anga ili ndyolyakalinga lipenshi aku Beneklistu bamuciindi ca batumwi. Kucakubonenaako, cilyeelete kwaamba ayi Yuwodia a Sintiki bakalinga kusebensabo kabotu a mutumwi Paulo muncito yakushimikila makani abotu. Nacibi boobo, kuli shimwi shakapa kwaamba ayi bacileeke kunyumfwana. Aboobo Paulo wakabayuminisha ayi “banoonyumfwana mukwiinga mbamukowa mu Mwaami.”​—Fili. 4:2, 3.

12. Ino inga twacita buyani kwaamba ayi tutondeshe ayi tulibasuni abuumbi bamakwesu abenankashi boonse?

¹² Ino inga twatondesha buyani ayi tulibasuni abuumbi bamakwesu abenankashi munshiku shino? Na twabashiba kabotu bamakwesu abenankashi, cilaakuba cuubu kubanyumfwishisha alimwi akubatondesha ayi tulibasuni abuumbi. Inga twaba bushicibusa ambabo nabi kwaamba ayi mpashi mbanene na mbanike pali ndiswe nabi na balicite nkulilo ipuseneeko a yesu. Mutaluubi kwaamba ayi, Jonasani alyeelete wakalinga munene pali Defedi amyaaka 30, sombi bakalinga beshicibusa basunene abuumbi. Sa kuli umwi mulibungano munene na mwanike pali ndimwe ngweenga mwasuna kuba bushicibusa anguwe? Na mwacita boobo mulaakutondesha ayi mulibasuni bamakwesu abenankashi boonse.​—1 Pit. 2:17.

13. Ino nceebonshi inga tacikonsheki kunonyumfwana abuumbi aboonse mulibungano?

¹³ Ano sa kusuna bamakwesu abuumbi cilaamba ayi tulyeelete kunonyumfwana abuumbi aboonse mulibungano? Sobwe, ico inga tacikonsheki. Teshi cibiibi kunonyumfwana abuumbi abamwi ceebo cakwaamba ayi abalo balisuni shintu nshetusuni. Yesu wakalinga kwiita batumwi bakwe boonse ayi “babyaanji,”  sombi wakalinga kunyumfwana abuumbi a Joni. (Joni 13:23; 15:15; 20:2) Nacibi boobo, Yesu taakalinga kucitila Joni eenkabo shintu shibotu. Kucakubonenaako, Joni a Jemusi mukwabo ndyebakasenga ayi akabape mikuli inene mu Bwaami bwakwe Lesa, Yesu wakaamba ayi: “Nebo nshicite nkusu shakusala wooyo eshi akekale kululyo lwangu nabi kucipiko.” (Maako 10:35-40) Bweenka mbuli Yesu, tatweelete kunoocitabo shibotu kubeshicibusa abo mbotunyumfwanaabo abuumbi. (Jemu. 2:3, 4) Kucita boobo inga kwanyonyoola lucatano mulibungano.​—Judi 17-19.

14. Kweelana a Bene Filipi 2:3, ino nciinshi ceshi cikatucaafwe kutanoobona anga tuleendawo bamwi?

¹⁴ Na katusunana abuumbi, tulaakuleya mushimu wakupingana mulibungano. Mutaluubi kwaamba ayi Jonasani taakwe kunyumfwila Defedi munyono, akunoomubona anga ngumulwani usuni kumunyaya cuuna ca bwaami. Soonse inga twacikonsha kukonkela cakubonenaako cakwe Jonasani. Aboobo mutanyumfwili bamwi munyono ceebo calushibo ndobacite, ‘sombi lyoonse munoobona babyaanu anga balamwiindaawo.’ (Amubelenge Bene Filipi 2:3.) Mutaluubi kwaamba ayi soonse kuli nsheenga twaciita sheenga shacafwa libungano. Na twatolelela kuba baliceesha, tulaakucikonsha kunoobona mibo ibotu mu bamakwesu abenankashi akwiiyaako shimwi kucakubonenaako cabo cakushomeka.​—1 Koli. 12:21-25.

15. Ino nshiinshi nsheenga mweeya kushakacitikila ba Tanya amukwashi wabo?

¹⁵ Na twapolelwa mapensho akutengashila, Yehova alatuyuminisha kwiinda mulusuno alucafwo kuswa kubamakwesu abenankashi. Amuleke tubandike shakacitikila mukwashi womwi ku America, ndyebakalinga kuswa kukubungana kunene kwashishi kwamu 2019 kwakalinga  kucite mutwi wakalinga kwaamba ayi “Lusuno Talumaani!” Ba Tanya bacite baana botatwe bakaamba ayi: “Ndyetwakalinga kuboolela ku hotela nkotwalinga koona, motoka imwi yakaswa kulubasu nkoyakalinga kweendela akusa mukuuma mumotoka yesu. Taakuwo wakalicisa, sombi twakankamana abuumbi. Soonse twakaswa mumotoka akwiimikana kulubasu kwatakalinga kwiinda myotoka. Muntu umwi wakatwiita ayi tuye kwakalinga motoka yakwe kwaamba ayi tutalicani mulipenshi alimwi. Wakalinga womwi wabamakwesu alakwe wakaswa kukubungana kunene. Alimwi teshi ngo eenkabo wakeemikana. Bamakwesu abenankashi bamwi bali 5 bakaswa kucishi ca Sweden, abalo bakeemikana. Benankashi bakatukumbata abana bangu banakashi, ici cakatupa kulinyumfwa kuyuminishikwa! Ndakalwiita bamakwesu abenankashi ayi inga baya palibo kabotu, sombi bakakaka kutushiya. Bakatulindilila kushikila ciindi bakupa lucafwo lwakucipatela ndyebakashika, alimwi bakashinisha kwaamba ayi tulicite shoonse nshetwakalinga kuyandika. Paciindi cilya, twakabona Yehova mbwaatusuni. Cakucitika cilya cakatucafwa kubasuna abuumbi bamakwesu abenankashi, alimwi cakatupa kulumba abuumbi akuyumya lusuno lwesu pali Yehova.” Sa amwebo kuli ciindi nceenga mweebaluka ndyemwakalinga kuyandika lucafwo, lyalo bamakwesu ndyebakamutondesha lusuno?

16. Ino nceebonshi tulyeelete kusunana abuumbi?

¹⁶ Amuyeeye shibotu shiswaamo na katusunene abuumbi. Tulayuminisha bamakwesu abenankashi paciindi ndyebali mumapensho. Tulacafwa bamakwesu abenankashi kusebensela Yehova calusangalalo. Tulatondesha patuba kwaamba ayi ncakwiila tuli bashikwiiya bakwe Yesu, alimwi ici cilapa kwaamba ayi abo bacite myoyo ibotu basune kusebensela Yehova. Alimwi cinene ciinditeewo, tulalemeka “Ishiwesu shinkumbu alimwi Lesa shikuyuminisha koonse,” Yehova. (2 Koli. 1:3) Soonse atube bashinishite kutolelela kutondesha lusuno abuumbi kubamakwesu abenankashi!