1. Ino nciinshi cakacitika kumusankwa umwi pesule lyakunyumfwa likani pakubungana kunene kwamu 1935?

MUSANKWA umwi wakalinga kucite myaaka 18 ndyaakabombekwa mu 1926. Bashali bakwe bakalinga Bashikwiiya Baibo, liina Bakamboni Bakwe Yehova ndyebakalinga kwiitwa paciindi cilya. Bakalinga kucite baana basankwa botatwe abanakashi bobilo, abo mbobakacikonsha kwiisha kusebensela Yehova Lesa akukonkela cakubonenaako cakwe Yesu Klistu. Bweenka mbuli Bashikwiiya Baibo boonse mbobakalinga kucita paciindi cilya, musankwa uyu lyoonse wakalinga kulyako shinkwa alimwi akunwako waini mwaaka amwaaka pa Mulalilo wa Mwaami. Nacibi boobo, kulangila kwakwe kwakaaluka pesule lyakunyumfwa likani liyandika abuumbi lyakalinga kucite mutwi wakalinga kwaamba ayi “Likoto Linene.” Wakaamba likani ili wakalinga mukwesu J. F. Rutherford pakubungana kunene kwamu 1935 ku Washington, D.C., ku America. Ino nshiinshi Bashikwiiya Baibo nshobakeeya pakubungana uku?

2. Ino ncancine cili Mukwesu Rutherford ncaakasansulula mulikani lyakwe?

² Mukwesu Rutherford ndyaakalinga kwaamba likani, wakasansulula kabotu bakalinga “mulikoto linene” lyaambwa pa Ciyubululo 7:9. Mwaaka wa 1935 kootana kushika, Bashikwiiya Baibo bakalinga kuyeeya ayi likoto linene balaakuya kwiculu, sombi mbantu batashomeki abuumbi mbuli bananikitwe. Mukwesu Rutherford wakasebensesha Malembo kusansulula ayi, likoto linene teshi bakaye kwiculu, sombi ni mbelele shimwi shakwe  Klistu * abo beshi bakapuluke “mapensho anene,” akukala buumi butamaani pacishi capanshi. (Ciyu. 7:14) Yesu wakashomesha ayi: “Nkoshili ashimwi mbelele, shiteshi sha mucimpati ici; ndyeelete kushileta ashalo, ncakwiila ashalo shilaakunyumfwa liswi lyangu, alimwi shilaakuba litanga lyomwi amweembeshi womwi.” (Joni 10:16) Mbelele shimwi ishi shileemikaninaako Bakamboni Bakwe Yehova bashomeka batolangila kuba abuumi butamaani mu Paladaiso pacishi capanshi. (Mate. 25:31-33, 46) Amuleke tubone busansulushi ubu bupya bwa cancine camu Baibo mbobwakaalula buumi bwa bantu bakwe Yehova baanji, kwiilikaawo amukwesu ulya wakabombekwa ndyaakalinga kucite myaaka 18.​—Kulu. 97:11; Tus. 4:18.

3-4. Ino baanji bakacanikaako kukubungana kunene kwamu 1935 bakesa mukushiba nshi pamakani akulangila kwabo?

³ Pakubungana kunene kulya, cakabota abuumbi paciindi mwaambi ndyaakalwiita likoto ayi: “Sa abo boonse batolangila kuba abuumi butamaani pacishi capanshi inga mweemikana?” Mukwesu umwi wakalingaako pakubungana kulya wakaamba ayi, pabantu mpashi bashika 20,000 bakalinga kukubungana kulya, bali 10, 000 bakeemikana. Lyalo Mukwesu Rutherford wakoolobesha ayi: “Amubone! Likoto linene!” Lyalo likoto lyoonse lyakasangalala. Abo boonse bakalinga banyamuka bakesa mukushiba kwaamba ayi, Yehova taakwe kubasala kuya kwiculu. Bakeshiba ayi tabakwe kunanikwa amushimu wakwe Lesa. Bushiku bwakaboolawo bwakubungana kulya, bantu 840 bakabombekwa, alimwi buunji bwa mbabo bakalinga ba mbelele shimwi.

⁴ Pesule lya likani lilya, musankwa ulya ngotwaambawo pakutaanguna alimwi abamwi baanji bakalinga kulyako shinkwa akunwako waini pa Mulalilo wa Mwaami bakacileka. Baanji bakalinyumfwa bweenka mbuli mukwesu umwi wakaamba ayi: “Ciibalusho camu 1935 ncocakalinga ciindi cakweelaako kulyako shinkwa akunwako waini pa Ciibalusho. Ndakesa mukushiba kwaamba ayi Yehova taakwe kunsala kwiinda mumushimu wakwe kwaamba ayi nkaye kwiculu, sombi ntolangila kukala pacishi capanshi akusa mukusebensaako ncito ya kupanga cishi capanshi kuba paladaiso.” (Loma. 8:16, 17; 2 Koli. 1:21, 22) Kuswabo ciindi cilya bamulikoto linene batooya cifulilaakobo alimwi batosebensela pomwi abananikitwe bacaliteewo.

5. Ino Yehova alababona buyani abo bakacileka kulyako shinkwa akunwako waini pa Ciibalusho?

⁵ Ino Yehova ulababona buyani abo bakacileka kulyako shinkwa akunwako waini pa Ciibalusho pesule lya mwaaka wa 1935? Alimwi munshiku shino, ino Yehova alamubona buyani Mwineklistu wakalinga kuyeeya ayi alyeelete kulyako shinkwa akunwako waini pabushiku bwa Mulalilo wa Mwaami, ano mukuya kwaciindi wesa mukubona ayi taakwe kunanikwa amushimu usalashi? (1 Koli. 11:28) Bamwi balalyako shinkwa akunwako waini pa Ciibalusho ceebo cakuteshiba kabotu kulangila kwabo. Ano na basumina kwaamba ayi ncobakalinga kucita ncilubo akucileka, lyalo akutolelela kusebensela Yehova cakushomeka, ncakutatoonsha kwaamba ayi alaakubasuminisha kuba kulubasu lwa mbelele shimwi. Nabi kwaamba ayi ba mbelele shimwi tabalyiko shinkwa nabi kunwako waini pa Ciibalusho, balacanikaako lyoonse ceebo cakulumba abuumbi pasheesho shakabacitila Yehova a Yesu.

6. Ino nciinshi Yesu ncaakalwiita baanjelo kucita?

⁶ Mapensho anene ndyaali pafwiifwi abuumbi, kwiiya makani amwi aamba pa Beneklistu bananikitwe alimwi aba mbelele shimwi ngotucana mucapita 7 ya libuku lya Ciyubululo inga kwatuyuminisha. Yesu wakapa baanjelo mulawo wakwaamba ayi batolelele kukasha myuuwo yone ya bunyonyooshi. Tabeelete kuleka myuuwo iyo kupuupila pacishi kushikila Beneklistu bananikitwe boonse bakabikwe twishibilo, nkokwaamba ayi kusalwa a Yehova. (Ciyu. 7:1-4) Mbuli cilambu nceshi bakapekwe ceebo cakushomeka kwabo, bamakwabo Klistu bananikitwe balaakuba baami alimwi bapailishi pomwi anguwe kwiculu. (Ciyu. 20:6) Yehova, Yesu, alimwi abaanjelo balaakusangalala abuumbi kubona bananikitwe bali 144,000 ndyeshi bakatambule cilambu cabo.

7. Kweelana a Ciyubululo 7:9, 10, ino mbaani Joni mbaakabona mucili anga nciloto, alimwi ino batoocita nshi? (Amubone cikope cili pa peeji yakutaanguna.)

⁷ Pesule lyakwaamba pali ba 144,000 beshi bakabe baami alimwi bapailishi, Joni wakabona “likoto linene” lya baabo bakapuluka nkondo ya Amagedoni. Mubupusano alikoto litaanshi, likoto lyabili ili ndinene abuumbi litabelengeki. (Amubelenge Ciyubululo 7:9, 10.) Likoto ili ‘balifwete shisani shituba,’ kusansulula ayi ‘tabacite kampenda’ kuswa kucishi cakwe Satana alimwi bakatolelela kushomeka kuli Lesa a Klistu. (Jemu. 1:27) Batokoolobesha ayi bakapulushikwa ceebo ca shakacita Yehova alimwi a Yesu, Mwanaambelele wakwe Lesa. Alimwi balicite amalala mumaansa, kutondesha kwaamba ayi balikondetwe ceebo cakusumina Yesu mbuli Mwaami wakasalwa a Yehova.​—Amweelanye a Joni 12:12, 13.

8. Ino lilembo lya Ciyubululo 7:11, 12 lilaamba nshi pamukwashi wakwe Yehova wakwiculu?

⁸ Amubelenge Ciyubululo 7:11, 12. Ino bakwiculu bakacita buyani ndyebakabona likoto linene? Joni wakabona mukwashi wakwe Yehova woonse wakwiculu kausangalete akulumbaisha Lesa. Mukwashi wakwe Yehova wakwiculu ulaakusangalala abuumbi kubona kukumanishikwa kwa cili anga nciloto ici, nkokwaamba ayi paciindi likoto linene ndyeshi likapuluke mapensho anene.

9. Kweelana a Ciyubululo 7:13-15, ino bamulikoto linene batoocita nshi pacecino ciindi?

⁹ Amubelenge Ciyubululo 7:13-15. Joni wakaamba ayi bamulikoto linene “bakacapa mingaanjo yabo akwiitubya mubulowa bwa Mwanaambelele.” Nkokwaamba ayi balicite njeelacaamba isalalite alimwi Yehova alikondetwe anshobacita. (Isa. 1:18) Mbeneklistu bakalyaaba akubombekwa, bacite lushomo luyumu mumulambu wakwe Yesu alimwi mbeshicibusa bakwe Yehova. (Joni 3:36; 1 Pit. 3:21) Aboobo baleelela kwiimikana kunembo lya cuuna ca Bwaami cakwe Lesa alimwi “balamusebensela malumwi amashiku” pacishi capanshi. Alimwi apacecino ciindi balasebensa cankusu muncito yakushimikila sha Bwaami akwiisha bantu kuba bashikwiiya. Alimwi Bwaami bwakwe Lesa ncecintu ncobabika panembo mubuumi bwabo.​—Mate. 6:33; 24:14; 28:19, 20.

10. Ino ngamakani nshi bamulikoto linene ngobatatoonshi, alimwi ino ncishomesho nshi ncobatolangila kukumanishikwa?

¹⁰ Bamulikoto linene beshi bakapuluke mapensho anene tabatoonshi kwaamba ayi Lesa alaakutolelela kubalama, mukwiinga “uyo ushiite pacuuna ca bwaami alaakufungulula tente yakwe pali mbabo.” Cishomesho cakwaamba ayi: “[Lesa] ulaakubakunkumuna minsonshi yoonse, lufu teshi lukabeeko alimwi, teshi kukabe buumba, kulila nabi kunyumfwa kucisa” ico ba mbelele shimwi ncobatolangila bunene, cilaakukumanishikwa.​—Ciyu. 21:3, 4.

11-12. (a) Kweelana a Ciyubululo 7:16, 17, ino nshoolwe nshi bamulikoto linene nsheshi bakacane kunembo? (b) Ino nshiinshi nsheenga ba mbelele shimwi bacita pa Ciibalusho, alimwi ino nceebonshi?

 ¹¹ Amubelenge Ciyubululo 7:16, 17. Pacecino ciindi, basebenshi bakwe Yehova bamwi balapenga kunsala ceebo cakwaamba ayi tabaciteewo maali akuula shakulya shiyandika, na ceebo mapensho esa ceebo ca nkondo. Bamwi bali mujeele ceebo ca lushomo lwabo. Nacibi boobo, bamulikoto linene balisangalete, mukwiinga balicishi kwaamba ayi na bakapuluke mapensho anene balaakunooba ashakulya shiinji alimwi Yehova alaakunoobaiisha lyoonse. Yehova ndyeshi akanyonyoole cishi cakwe Satana, alakushinisha kwaamba ayi washitilisha bamulikoto linene kubukali bwakwe ubo buli anga “ncikasaashi.” Pesule lya mapensho anene, Yesu alaakutanjilila baabo boonse beshibakapuluke “kutuntupu twa maanshi apa buumi.” Amuyeeye paceeci: Bamulikoto linene balicite kulangila kulibetele. Pabantu baanji abuumbi bakekalako pacishi capanshi, bamulikoto linene mpashi teshi bakafweewo!​—Joni 11:26.

¹² Ba mbelele shimwi balalumba Yehova a Yesu ceebo ca shintu shibotu nshebatolangila! Nabi kwaamba ayi tabakwe kusalwa kuya kwiculu, Yehova alibasuni bweenka mbwaasuni bananikitwe. Bananikitwe alimwi aba mbelele shimwi boonse inga balumbaisha Lesa a Klistu. Nshila yomwi mbobacita boobo nkwiinda mukucanika ku Mulalilo wa Mwaami.

13-14. Ino nceebonshi muntu uli woonse alyeelete kucanikaako ku Ciibalusho ca lufu lwakwe Klistu?

¹³ Mu myaaka yaconoono, pabantu 1,000 bacanika ku Ciibalusho palababo mpashi muntu womwi ulyako shinkwa akunwako waini. Nkokwaamba ayi mumabungano aanji tamubiiwo nabi womwi ulyako shinkwa akunwako waini pa Ciibalusho. Ici cilatondesha ayi baanji bacanika ku Ciibalusho balalangila kuba abuumi pacishi capanshi. Ano ino balacanikilako nshi ku Mulalilo wa Mwaami? Balacanikaako bweenka mbuli bantu mbobaya kubwiinga bwa shicibusa. Balacanikaako ceebo calusuno lwabo pabaabo batokweebana alimwi balisuni kubayuminisha. Ubu bweenka mbocibete aku ba mbelele shimwi, balacanika ku Ciibalusho ceebo cakwaamba ayi balisuni kutondesha Klistu abananikitwe kwaamba ayi balibasuni alimwi bali kulubasu lwabo. Alimwi cimwi cipa  kwaamba ayi ba mbelele shimwi bacanike ku Ciibalusho nceebo cakwaamba ayi balisuni kutondesha kulumba ceebo ca mulambu wakwe Yesu, uyo weshi ukape kwaamba ayi bakabe abuumi butamaani pacishi capanshi.

¹⁴ Ceebo cimwi ciyandika cipa kwaamba ayi ba mbelele shimwi banocanika ku Ciibalusho, nkukonkela mulawo Yesu ngwakabapa. Yesu ndyaakatalika Mulalilo wa Mwaami kaali abatumwi bakwe bashomeka, wakabalwiita ayi: “Kamucita ceeci mukunjibaluka.” (1 Koli. 11:23-26) Aboobo ba mbelele shimwi balaakutolelela kucanika ku Mulalilo wa Mwaami kushikila bananikitwe boonse bakaye kwiculu. Alimwi ba mbelele shimwi baleeta bantu boonse kwaamba ayi abalo bese bacanikeeko ku Ciibalusho.

15. Ino inga twacita buyani kwaamba ayi tulumbaishe Lesa a Klistu ndyetuli ku Ciibalusho?

¹⁵ Ndyetuli ku Ciibalusho, tulaba acoolwe cakulumbaisha Lesa a Klistu kwiinda mukwiimba akupaila pomwi. Mutwi walikani lya Ciibalusho ca mwaaka uno utokwaamba ayi “Amulumbe Lesa a Klistu Pasheesho Nshobakamucitila!” Likani ili lilaakutucafwa kutolelela kulumba Yehova a Klistu. Aboobo ndyeshi bakanookwiinshamo shinkwa awaini, soonse sweshi tukacanikeeko tulaakwiibalushikwa shinkwa awaini ncoshimikaninaako, nkokwaamba ayi mubili alimwi abulowa bwakwe Yesu. Cilaakutupa kuyeeya lusuno Yehova ndwakatutondesha kwiinda mukusuminisha kwaamba ayi Mwanaakwe afwe ceebo ca ndiswe. (Mate. 20:28) Muntu uli woonse usuni Ishiwesu wakwiculu a Mwanaakwe alaakucanikaako ku Ciibalusho.

16. Ino bananikitwe aba mbelele shimwi balikoshenye buyani?

¹⁶ Beneklistu bananikitwe aba mbelele shimwi balikoshenye mushintu shiinji. Yehova alibasuni boonse. Makoto oonse obilo alayandika kuli nguwe. Tulishi boobo mukwiinga wakalipila muulo womwi, Mwanaakwe ngwaasuni abuumbi kwaamba ayi alubule bananikitwe aba mbelele shimwi. Cintu comwibo cipusene pa makoto obilo aya ncakwaamba ayi batolangila buumi bupusene. Bamumakoto oonse obilo balyeelete kutolelela kushomeka kuli Lesa a Klistu. (Kulu. 31:23) Alimwi mutaluubi kwaamba ayi mushimu wakwe Lesa inga wacafwa muntu uli woonse. Nkokwaamba ayi Yehova inga wapa muntu mushimu usalashi kweelana anshatoyandika, inga caba ayi ngwa mbelele shimwi na unanikitwe.

17. Ino bananikitwe bacaliteewo batolangila nshi?

¹⁷ Beneklistu bananikitwe tabakwe kushalwa kabananikitwe. Lesa ngwaabapa kulangila nkobacite. Balayeeya akupaililawo pakulangila nkobacite, alimwi balisunishishi kutambula cilambu cabo ca buumi bwakwiculu. Tabacishiwo mibili yabo mbweshi ikabe na bakaye kwiculu. (Fili. 3:20, 21; 1 Joni 3:2) Nacibi boobo, balisunishishi  kuya mukubona Yehova, Yesu, baanjelo, alimwi akuba pomwi a Beneklistu bamwi bananikitwe mu Bwaami bwakwiculu.

18. Ino nshiinshi ba mbelele shimwi nshobatolangila?

¹⁸ Ba mbelele shimwi balikondetwe abuumbi ceebo cakulangila kuba abuumi butamaani pacishi capanshi. Uku nkulangila bantu boonse nkobasuni. (Shiku. 3:11) Balalangila ciindi ndyeshi bakaabanemo lubasu mukwaalula cishi capanshi coonse kuba paladaiso. Batolangila kuciindi ndyeshi bakayake maandabo, kushanga myuunda, akuba abaana bacite buumi bumaninite. (Isa. 65:21-23) Alimwi batolangila kuciindi ndyeshi bakacikoonshe kufwakashila misena ipusenepusene pacishi capanshi, kweebela tulundu, luundu, lweenge, alimwi akwiiya shiinji pamakani ashintu Yehova nshaakalenga. Alimwi ciinditeewo ncakwaamba ayi, balicishi ayi bushicibusa bwabo a Yehova bulaakutolelela kuyuminaako.

19. Ino Ciibalusho cilatupa coolwe nshi, alimwi ino cilaakubako lili mwaaka uno?

¹⁹ Yehova wakashomesha buumi bubotu ku basebenshi bakwe boonse bakalyaaba kuli nguwe. (Jele. 29:11) Ciibalusho ca lufu lwakwe Klistu cilatupa coolwe cinene cakulumbaisha Lesa a Klistu pa nshobakatucitila kwaamba ayi tukasangalale abuumi butamaani kunembo. Ciibalusho nkubungana kuyandika abuumbi Beneklistu bancine nkobabaako mwaaka amwaaka. Mwaaka uno kulaakubako Pacibelu, 27 March 2021, lisuba ndyeshi likanooya cipila. Baanji balaakucanikaako mukwiinga balekala mucishi mobacite lwaanguluko lwa kucanika kukubungana kuyandika uku. Bamwi balaakucanikaako nabi ndyebatoopikishikwa. Bamwi balaakubungana nabi ndyebali mujeele. Yehova, Yesu, alimwi amukwashi woonse wakwiculu ndyeshi bakanoolangilisha, amuleke kwaamba ayi libungano lyomwi alyomwi, makoto, alimwi amuntu uli woonse, akabungane kabotu Ciibalusho!