1. Ino lusuno lwakwe Lesa lulamupa kulinyumfwa buyani?

Mutumwi Joni wakalemba ayi “Lesa ndusuno.” (1 Joni 4:8) Maswi aya alatucafwa kwiibaluka cancine ciyandika abuumbi cakwaamba ayi, Lesa ngo Kantupu kabuumi a lusuno. Yehova alitusuni! Lusuno lwakwe lulatupa kulinyumfwa kushitilishikwa, kusangalala, alimwi akukwana.

2. Kweelana a Mateyo 22:37-40, ino njimilawo ili yobilo inene, alimwi ino nceebonshi nceenga cabeta ciyumu kukonkela mulawo wabili?

² Beneklistu inga tabasaliiwo na balisuni kutondesha lusuno nabi sobwe. Kutondesha lusuno ngu mulawo. (Amubelenge Mateyo 22:37-40.) Inga caba cuubu kukonkela mulawo utaanshi na twamushiba kabotu Yehova. Mukwiinga Yehova ulimaninite, alatubikila maano alimwi alatutondesha nkumbu. Nacibi boobo, mpashi inga caba ciyumu kukonkela mulawo wabili. Ino nceebonshi? Nceebo cakwaamba ayi bamakwesu abenankashi, abo bali pakati kabaabo Baibo mboyaamba ayi babyesu, tabamaninite. Cimwi ciindi inga baamba na kucita shintu sheenga shatondesha anga tabatubikiliko maano. Yehova wakalinga kucishi ayi tulaakuba alipenshi ili, nceceeco ncaakatanjilila beshikulemba Baibo bamwi kulemba makani akutwiibalusha ncotweelete kutondeshela lusuno alimwi ambweenga twatondeshanya lusuno. Womwi pa balembi abo wakalinga ngu Joni.​—1 Joni 3:11, 12.

3. Ino nciteente nshi Joni ncaakayuminisha?

³ Mumakani Joni ngakalemba, wakayuminisha citeente cakwaamba ayi Beneklistu balyeelete kusunana. Mulibuku lyamu Baibo Joni ndyaakalemba pabuumi bwakwe Yesu, wakasebensesha liswi lyakwaamba ayi “lusuno” mankanda aanji kwiinda mumabuku a Makani Abotu amwi otatwe akalemba bamwi. Joni  alyeelete wakalinga kucite myaaka 100 ciindi ndyaakalemba libuku lyakwe lya Makani Abotu alimwi amakalata otatwe. Mabuku amu Baibo akalemba Joni alatwiisha ayi Mwineklistu alyeelete kutondesha lusuno mushintu shoonse nshaacita. (1 Joni 4:10, 11) Nacibi boobo, cakatola ciindi kwaamba ayi Joni ashibe kabotu makani aya.

4. Sa lyoonse Joni wakalinga kutondesha lusuno kubamwi?

⁴ Joni ndyaakalinga mwanike, teshi lyoonse ndyaakalinga kucita shitondesha lusuno. Kucakubonenaako, paciindi cimwi Yesu abashikwiiya bakwe bakeenda mu Samaliya ndyebakalinga kuya ku Jelusalemu. Ndyebakalinga palweendo ulu, bantu bamumushi umwi wamu Samaliya tabakwe kubatambula. Aboobo ino Joni wakacita buyani? Wakeepusha Yesu ayi beete mulilo kuswa kwiculu kwaamba ayi use unyonyoole bantu boonse bamumushi uyo! (Luka 9:52-56) Alimwi paciindi cimwi, Joni taakwe kutondesha lusuno kubatumwinyina. Citooboneka ayi lakwe a Jemusi mukwabo bakalwiita banyina ayi basenge Yesu ayi akabape mikuli inene mu Bwaami bwakwe. Batumwi bamwi ndyebakanyumfwa shakacita Jemusi a Joni, bakakalala abuumbi! (Mate. 20:20, 21, 24) Nabi kwaamba ayi cimwi ciindi Joni taakalinga kucita kabotu, Yesu wakalinga kumusuni.​—Joni 21:7.

5. Ino nshiinshi nsheshi twiiye mumutwi uyu?

⁵ Mumutwi uyu, tutokwiiya pacakubonenaako cakwe Joni alimwi anshaakalemba pamakani alusuno. Kucita boobo kutootucafwa kwiiya mbweenga twatondesha ayi tulisuni bamakwesu abenankashi. Alimwi tutokwiiya anshila iyandika mbweenga mutwi wa mukwashi watondesha ayi alisuni mukwashi wakwe.

6. Ino Yehova wakatondesha buyani ayi alitusuni?

⁶ Cimwi ciindi inga katubona ayi kuyeeyabo shibotu pabantu na kwaambabo maswi abotu kuli mbabo nkokutondesha ayi tulibasuni. Sombi lusuno lwancinencine luleelikaawo akucita shibotu kubamwi. (Amweelanye a Jemusi 2:17, 26.) Kucakubonenaako, Yehova alitusuni. (1 Joni 4:19) Alimwi alatulwiita ayi alitusuni kwiinda mu maswi abotu ngotucana mu Baibo. (Kulu. 25:10; Loma. 8:38, 39) Nacibi boobo, teshibo maswi ngaamba atupa kushoma kwaamba ayi ncakwiila alitusuni, sombi ashintu nshaacita. Joni wakalemba ayi: “Lesa wakatondesha ayi alitusuni kwiinda mukututumina Mwanaakwe wakashalwabo eenka mucishi capanshi ayi muli nguwe tukabe abuumi.” (1 Joni 4:9) Yehova wakasuminisha kwaamba ayi Mwanaakwe ngwaasuni abuumbi apenshekwe akufwa ceebo ca ndiswe. (Joni 3:16) Aboobo inga tatutoonshi kwaamba ayi Yehova alitusuni.

7. Ino Yesu wakatondesha buyani ayi alitusuni?

 ⁷ Yesu wakalwiita bashikwiiya bakwe ayi alibasuni. (Joni 13:1; 15:15) Wakatondesha mbwaakalinga kubasuni ambwaatusuni kwiinda mushintu nshaakalinga kwaamba akucita. Yesu wakaamba ayi: “Taaku lusuno lunene muntu ndweenga wabaalo kwiinda loolu lwa kwaamba ayi aabe buumi bwakwe ceebo ca babye.” (Joni 15:13) Ino kuyeeya shakatucitila Yehova a Yesu kulyeelete kutupa kucita nshi?

8. Ino 1 Joni 3:18 ilaamba ayi tulyeelete kucita nshi?

⁸ Tulatondesha ayi tulisuni Yehova a Yesu kwiinda mukubanyumfwila. (Joni 14:15; 1 Joni 5:3) Alimwi Yesu wakatupa mulawo wakwaamba ayi tulyeelete kusunana. (Joni 13:34, 35) Tatweelete kweelabo pakwaamba ayi tulisuni bamakwesu abenankashi, sombi tulyeelete kucita shitondesha ayi ncakwiila tulibasuni. (Amubelenge 1 Joni 3:18.) Ino nshiinshi nsheenga twaciita kwaamba ayi tutondeshe ayi tulibasuni?

9. Ino lusuno lwakalengesha Joni kucita nshi?

⁹ Joni naakalinga kusuni naakwiinga wakatolelela kusebensa ncito yakucata nswi akupanga maali pomwi abaishi. Muciindi cakucita boobo, wakasalawo kusebensesha buumi bwakwe kucafwa bantu kushiba cancine pali Yehova a Yesu. Buumi Joni mbwaakasala bwakalinga buyumu. Wakapenshekwa akutolwa kumusena wakulaale paciindi ndyaakalinga mucembele. (Mili. 3:1; 4:1-3; 5:18; Ciyu. 1:9) Nabi kwaamba ayi wakalinga waangwa ceebo cakushimikila pali Yesu, Joni wakatondesha ayi wakalinga kucite lusuno pabamwi. Kucakubonenaako, ndyaakalinga pansumbu ya Patimosi, wakalemba libuku lya Ciyubululo akulituma kumabungano kwaamba ayi bashibe ‘shakalinga kusa mukucitika cakufwambaana.’ (Ciyu. 1:1) Lyalo, mpashi pesule lyakuswa pansumbu ya Patimosi, Joni wakalemba libuku lya Makani Abotu lyaamba pabuumi bwakwe Yesu anciito yakwe yakushimikila. Wakalemba amakalata otatwe kwaamba ayi ayuminishe bashominyina. Ino cakubonenaako cakwe Joni cakulyaaba inga mwacikonkela buyani?

10. Ino inga mwatondesha buyani ayi mulisuni bantu?

¹⁰ Nsheenga mwasala kucita mubuumi nsheenga shatondesha na mulisuni bantu. Bantu bamucishi cakwe Satana inga basuna kwaamba ayi munoosebensesha ciindi ankusu shanu shoonse kukucita shakulikondelesha, kupanga maali na kupuka. Ano beshikwaambilisha sha Bwaami nsengwe yoonse balalyaaba kusebensesha ciindi cabo kushimikila makani abotu akucafwa bantu kwaamba ayi babe beshicibusa bakwe Yehova. Bamwi bali amuncito yaciindi coonse yakushimikila akwiisha bantu cancine.

11. Ino beshikushimikila baanji bashomeka balatondesha buyani ayi balisuni Yehova alimwi abamakwesu abenankashi?

¹¹ Beneklistu baanji bashomeka balasebensa kwaamba ayi bacikoonshe kulicafwilisha akucafwa mikwashi yabo. Nacibi boobo, beshikushimikila bashomeka aba balacafwa libunga lyakwe Lesa munshila ili yoonse njeenga bacikonsha. Kucakubonenaako, bamwi balacikonsha kwaabanamo lubasu mukupa lucafwo ndyekwacitika mapensho anene, bamwi balalyaaba kusebensa muncito sha kuyaka, alimwi uli woonsebo alicite coolwe cakupa maali akucafwilisha ncito yesu icitwa nsengwe yoonse. Balacita sheeshi mukwiinga balisuni Lesa alimwi abashominyinaabo. Nsondo ansondo tulatondesha ayi tulisuni bamakwesu abenankashi kwiinda mukucanika kumabungano akwaabanamo lubasu. Nabi kwaamba ayi inga katulemete, tulacikonsha kucanika kumabungano. Nabi kwaamba ayi tulaba aboowa, tulacikonsha kukumbulawo. Alimwi nabi kwaamba ayi soonse tulicite mapensho, tulacikonsha kuyuminisha bamwi mabungano kaatana kutalika alimwi apesule lyakubungana. (Ebu. 10:24, 25) Tulalumba  abuumbi pancito bamakwesu abenankashi njobasebensa!

12. Ino nciinshi cimwi Joni ncaakacita kwaamba ayi atondeshe ayi alisuni bashominyina?

¹² Joni wakatondesha ayi wakalinga kusuni bamakwabo kuteshi kwiindabo mukubalumba sombi kwiinda amukubalulika. Kucakubonenaako, mumakalata ngaakalemba, wakalumba bamakwabo ceebo calushomo lwabo alimwi ashintu shibotu nshobakalinga kucita, sombi wakabalulika cakubalulama pamakani akubisha. (1 Joni 1:8–2:1, 13, 14) Aswebo tulyeelete kulumba bamakwesu abenankashi pashintu shibotu nshobacita. Ano na umwi watalika kutondesha miyeeyo na cilabo citabete kabotu, inga twamutondesha lusuno kwiinda mukumululika mukabotu. Kululika shicibusa kulayandika kutaloonda, nceceeco Baibo ncoyaambila ayi shicibusa wancine alanona, na kululika shicibusa wakwe.​—Tus. 27:17.

13. Ino nciinshi ncotweelete kuleya?

¹³ Cimwi ciindi tulatondesha ayi tulisuni bamakwesu abenankashi kwiinda mukutacita shintu shimwi. Kucakubonenaako, tatufwambaani kukalala ceebo ca shimwi nshobaamba. Amuyeeye shakacitika Yesu ndyaakalinga pafwiifwi akucaikwa. Wakalwiita bashikwiiya bakwe ayi, kwaamba ayi babe abuumi bakalinga kweelete kulya mubili wakwe akunwa bulowa bwakwe. (Joni 6:53-57) Maswi aya akabakankamika abuumbi cakwaamba ayi bashikwiiya bakwe baanji bakacileka kumukonkela​—sombi kuteshi beshicibusa bakwe bancinencine, kwiilikaawo a Joni. Bakatolelela kukonkela Yesu. Tabakwe kushiba Yesu nshaakalinga kusansulula, alimwi cilyeelete abalo cakabakankamika. Nacibi boobo, tabakwe kuyeeya ayi nshakaamba shakalinga shibiibi cakwaamba ayi shakabakalasha akubakalasha. Sombi bakamushoma ceebo cakwaamba ayi bakalinga kucishi ayi wakalinga kwaamba lushinisho. (Joni 6:60, 66-69) Aboobo cilayandika abuumbi kwaamba ayi aswebo tutanoofwambaana kukalashikwa ashaamba beshicibusa besu! Muciindi cakucita boobo, tulyeelete kubapa ciindi kwaamba ayi batusansulwite nshobaamba.​—Tus. 18:13; Shiku. 7:9.

14. Ino nceebonshi tatweelete kupata bamakwesu abenankashi?

¹⁴ Joni wakatuyuminisha ayi tatweelete kupata bamakwesu na benankashi. Na twaalilwa kukonkela kululika uku, nkokwaamba ayi twamupa coolwe Satana ayi atuyunge. (1 Joni 2:11; 3:15) Ishi nsheshakacitika ku Beneklistu bamwi bamuciindi ca batumwi. Satana wakalinga kweelesha cankusu kupatanya akupansaanya  bantu bakwe Lesa. Ciindi Joni ndyaakalemba makalata akwe, basankwa bakalinga kukonkela kuyanda kwakwe Satana kabali benjila kale mulibungano. Kucakubonenaako, Diyotilefesi wakalinga kucita shintu shakalinga kupansaanya libungano. (3 Joni 9, 10) Taakalinga kucite bulemu kubaabo bakalinga kutumwa alikoto litanjilila kufwakashila mabungano. Wakalinga kusuni akunookusha mulibungano abo bakalinga kutondesha mushimu wakutambula beensu kubaabo mbaakalinga kupatite. Nshaakalinga kucita shakalinga shibiibi abuumbi! Apacecino ciindi Satana alisuni kwaamba ayi bantu bakwe Lesa batanoonyumfwana. Aboobo atube bashinishite kutapata bamakwesu akucileka kubacafwa.

15. Ino nciinshi mutwi wa mukwashi ncaeelete kwiibaluka?

¹⁵ Nshila yomwi iyandika mbweenga mutwi wa mukwashi watondesha ayi alisuni mukwashi wakwe, nkwiinda mukubalangweta nshebayandika lwakumubili. (1 Timo. 5:8) Nacibi boobo, alyeelete kwiibaluka kwaamba ayi shintu shakumushimu shilayandika abuumbi kwiinda shakumubili. (Mate. 5:3) Amubone nsheenga mitwi yamikwashi beeya kucakubonenaako cakwe Yesu. Kweelana a Makani Abotu ngotucana mulibuku lyakwe Joni, Yesu ndyaakalinga kufwa pacisamu cakupenshesha, wakalinga kuyeeya pamukwashi wakwe. Joni wakalinga kwiimfwi pafwiifwi abanyina Yesu ba Maliya, kumusena nkobakacaila Yesu. Nabi kwaamba ayi paciindi ici Yesu wakalinga kunyumfwa kucisa abuumbi, wakalwiita Joni ayi anolama banyina ba Maliya. (Joni 19:26, 27) Yesu wakalinga kucite bamakwabo bakalinga kweelete kulangweta Maliya shiyandika lwakumubili, nacibi boobo, citooboneka ayi paciindi ici taakuwo wakalinga shikwiiya wakwe. Aboobo Yesu wakalinga kusuni kushinisha ayi Maliya alicite wakumulama lwakumubili alimwi alwakumushimu.

16. Ino Joni wakalinga kucite mikuli nshi?

¹⁶ Joni wakalinga kucite mikuli iinji abuumbi. Mbuli mutumwi, wakalinga kucite ncito yakutanjilila muncito yakushimikila. Alimwi mpashi wakalinga kweebete, aboobo nkokwaamba ayi wakalinga kweelete kweelanya kabotu shintu kwaamba ayi acikoonshe kulangweta mukwashi shiyandika lwakumubili alimwi alwakumushimu. (1 Koli. 9:5) Ino nciinshi nceenga mitwi ya mikwashi beeyawo?

17. Ino nceebonshi mutwi wa mukwashi alyeelete kubikila maano kushiyandika mukwashi lwakumushimu?

¹⁷ Na mukwesu ngu mutwi wa mukwashi,  mpashi inga waba amikuli iinji iyandika. Kucakubonenaako, alyeelete kusebensa cankusu kuncito kwaamba ayi atondeshe cakubonenaako cibotu mbuli musebenshi wakwe Yehova. (Efe. 6:5, 6; Taita. 2:9, 10) Alimwi mpashi inga kaacite amikuli imwi mulibungano mbuli bweembeshi alimwi akutanjilila muncito yakushimikila. Alimwi cilayandika kwaamba ayi lyoonse kaacita ciiyo ca Baibo amukwashi wakwe. Inga balumba abuumbi pashintu shoonse nshaacita kwaamba ayi abacaafwe kuba abuumi bubotu, kuba basangalete alimwi akubacafwa kutolelela kusebensela Yehova.​—Efe. 5:28, 29; 6:4.

18. Ino nciinshi Joni ncaakalinga kushomete?

¹⁸ Joni wakekala myaaka iinji alimwi wakabona shintu shiinji shibotu. Wakeenda mumapensho apusenepusene akalinga kweelete kumupa kuboolela mwisule. Sombi wakacita nshaakalinga kucikonsha kwaamba ayi lyoonse anookonkela milawo yakwe Yesu, kwiilikaawo amulawo wakusuna bamakwesu abenankashi. Aboobo wakalinga kushomete kwaamba ayi Yehova a Yesu bakalinga kumusuni alimwi balaakumupa nkusu shakucikonsha kukoma mapensho. (Joni 14:15-17; 15:10; 1 Joni 4:16) Satana acishi cakwe tabakwe kucikonsha kulengesha Joni kucileka kutondesha lusuno kubashominyina kwiinda mushintu nshaakalinga kwaamba akucita.

19. Ino lilembo lya 1 Joni 4:7 lilatuyuminisha kucita nshi, alimwi ino nceebonshi?

¹⁹ Bweenka mbuli Joni, tuli mucishi citokweendeleshekwa a Satana, utasuniiwo muntu uli woonse. (1 Joni 3:1, 10) Nabi kwaamba ayi alisuni ayi tucileeke kusuna bamakwesu abenankashi, inga wacikonshabo kucita boobo na twamusuminisha. Aboobo atube bashinishite kusuna bamakwesu abenankashi akutondesha lusuno lwesu kwiinda mushintu nshetwaamba alimwi anshetucita. Kucita boobo kulaakutupa kuba alusangalalo lwakuba lubasu lwa mukwashi wakwe Yehova, alimwi akusangalala mubuumi.​—Amubelenge 1 Joni 4:7.