Ba Harvey mbobakalinga banene pabaana basankwa bone mumukwashi wabo. Mukwashi wabo bakeeya cancine ndyebakalinga kukala kumusena wiitwa ayi Midland Junction, Kumbo kwa cishi ca Australia. Paciindi ici, mucishi ici mwakalinga mapensho amaali mumyaaka yamuma 1930. Ba Harvey ndyebakalinga kukula bakalinga kumusuni abuumbi Yehova aboobo ndyebakalinga kucite myaaka 14 bakabombekwa. Tapana kwiinda aciindi cilaamfu bakeeya kucita shili shoonse Yehova nshabalwiita. Ndyebakalinga bacanike, paciindi cimwi bakakaka ndyebakapekwa lubasu lwakubelenga mapalagilafu paciiyo ca Njashi Yamulindilishi kumabungano, ceebo cakuyeeya ayi inga tabacikoonshi. Ano mukwesu wakalinga kubandikaabo wakabacafwa kubona shintu munshila ipuseneeko kwiinda mukubalwiita ayi, “Na muntu umwi mulibunga lyakwe Yehova wakulwiita ayi ucite ncito imwi, nkokwaamba ayi alicishi ayi inga wacikonsha.”—2 Koli. 3:5.

Ndakeeya cancine ku England, bweenka mbuli bama alimwi amunene wangu. Mukuya kwaciindi bata abalo bakeeya cancine, nacibi boobo, pakutaanguna tabakalinga kubasuniiwo Bakamboni Bakwe Yehova. Alimwi nabi kwaamba ayi bata tabakalinga kusuniiwo ayi mbe Kamboni, ndakabombekwa kaancite myaaka 9. Ndakalinga kusunishishi kuba painiya  alimwi akuba mishonali. Nacibi boobo, bata bakankasha kutalika bupainiya akundwiita ayi ndakutalika na nkakwanishe myaaka 21. Nshindakalinga kusuniiwo kulindila kwaciindi cilaamfu. Aboobo ndyendakaba a myaaka 16, bata bakansuminisha kuya mukukala amunene wangu mwanakashi, uyo wakalinga walongela ku Australia. Lyalo ndyendakaba a myaaka 18, ndakatalika bupainiya.

Ku Australia, nkondakakumanya ba Harvey. Soonse twakalinga kusunishishi kusebensela Yehova mbuli bamishonali. Twakeebana mu 1951. Pesule lyakusebensa bupainiya pomwi kwa myaaka yobilo, bakatupa ncito yakufwakashila mabungano. Twakapekwa lubasu lunene Kumbo kwacishi ca Australia, aboobo twakalinga kweenda amotoka munshila sha lusuko abuumbi kuya mumisena yakulaale.

Mu 1954, bakatwiita kucanika kucikolo ca Gilyadi ca namba 25. Twakakondwa kwaamba ayi nshetwakalinga kusuni shitoocitika! Twakashika mu New York abwaato bunene, lyalo twakatalika cikolo cakwiiya Baibo abuumbi. Ndyetwakalinga kucikolo ca Gilyadi, twakapekwa alubasu lwakwiiya mushobo waci Spanish. Ba Harvey cakabayumina abuumbi kwiiya mulaka uyu, mukwiinga bakalinga kwaalilwa kwaamba libala lya r mumulaka waci Spanish.

Ndyetwakalinga kucikolo ca Gilyadi, bakalinga kutwiisha bakatulwita ayi abo basuni kuya mukusebenselako kucishi ca Japan inga balembesha meenaabo akutalika kwiiya mulaka waci Japanese. Twakasala ayi inga cabota na libunga lyakwe Yehova liine lyatusalila kwa kuya mukusebensela. Tapana kwiinda aciindi cilaamfu, mukwesu Albert Schroeder, womwi pabaabo bakalinga kutwiisha mucikolo ca Gilyadi, wakabona ayi tatuna kulembesha meena esu. Aboobo wakatulwiita ayi: “Amuyeeyewo abuumbi.” Alimwi ndyaakabona ayi tatucina kulembesha meena esu, Mukwesu Schroeder wakaamba ayi: “Nebo abeshikwiisha bamwi twamulemba meena anu. Aboobo amweeleshe na inga mwacikonsha kwiiya mulaka waci Japanese.” Ba Harvey bakacikonsha kwiiya mulaka uyu.

Twakashika mu Japan mu 1955 paciindi ndyekwakalingabo beshikushimikila 500 mucishi coonse ca Japan. Ba Harvey bakalinga kucite myaaka 26, nebo ndakalinga kucite myaaka 24. Twakatumwa kuya mukusebensela mutauni ya Kobe, uko nkotwakasebensa kwa myaaka 4. Lyalo twakakondwa ndyebakatuboosha muncito yalubasu alimwi. Twakatalika kusebensela kumusena uli pafwiifwi atauni iitwa ayi Nagoya. Twakalinga kubasuni abuumbi bamakwesu, shakulya, alimwi amusena nkotwakalinga kushimikila. Nacibi boobo, kapatana kwiinda aciindi cilaamfu, twakapekwa coolwe cimwi cakucita cili coonse Yehova ncaatulwiita.

Pesule lyakusebensa myaaka yotatwe muncito yalubasu, baku ofesi yamusampi ku Japan bakatusenga  kwaamba ayi tuye tukasebensele kucishi ca Taiwan kumusena kuli bantu baamba mushobo waci Amis. Kumusena uko kwakalinga bamwi bakapondoka kuswa mucancine bakalinga kwiisha njiisho shakubeca, aboobo bamakwesu ku Taiwan bakalinga kulangoola mukwesu ucishi kabotu kwaamba ci Japanese kwaamba ayi aye acafwilishe kumana lipenshi ili. * Twakalinga kunyumfwa kabotu abuumbi kusebensela ku Japan, aboobo tacakalinga cuubu kusumina kuya mukusebensela ku Taiwan. Nacibi boobo, ba Harvey bakeeya ayi tabeelete kukaka ncito ili yoonse njobapekwa, aboobo twakaya.

Twakashika ku Taiwan mu November 1962. Paciindi cilya kwakalingabo beshikushimikila 2,271, alimwi buunji bwa mbabo bakalinga kwaamba mushobo waci Amis. Cakutaanguna, twakalinga kuyandika kwiiya ci Chinese. Twakalinga kucitebo libuku lyomwi lyamu ci Chinese alimwi a shikutwiisha utacishi Cisungu, nacibi boobo, twakacikonsha kwiiya.

Ndyetwakashikabo ku Taiwan, ba Harvey bakapekwa mukuli wakusebensa mbuli musebenshi wa musampi. Ofesi yamusampi yakalinga iniini, aboobo ba Harvey bakalinga kucikonsha kulama mukuli wabo wapa musampi akuya mukusebensa abamakwesu baamba mushobo waci Amis nsondo shotatwe mu mweenshi. Alimwi ciindi aciindi bakalinga kupekwa mbasu shakwaamba makani pakubungana kwalubasu. Ba Harvey naakwiinga bakalinga kusuni naakwiinga bakalinga kwaamba makani abo muci Japanese, mukwiinga bamakwesu bakalinga kwaamba mushobo waci Amis bakalinga kunyumfwa. Nacibi boobo, mfulumeende yakalinga kusuminishabo kwaamba ci Chinese pakubungana kuli koonse kwabupailishi. Aboobo nabi kwaamba ayi ba Harvey tabakalinga kucishi kabotu kwaamba ci Chinese, bakalinga kwaamba makani lyalo mukwesu wakalinga kusansulula muci Amis.

Paciindi cilya masoja bakalinga kucite nkusu abuumbi mucishi ca Taiwan, aboobo bamakwesu bakalinga kweelete kubwesa cipepa cakusuminishikwa kubungana. Nacibi boobo, tacakalinga cuubu, alimwi cimwi ciindi cakalinga kutola ciindi cilaamfu kwaamba ayi bamupe. Na bakapokola tabana kutupa cipepa cakusuminishikwa kubungana kushika munsondo kubungana ndyekweelete kutalika, ba Harvey bakalinga kuya mukulindilila mu ofesi yabakapokola kushikila babapa. Nshila iyi yakasebensa mukwiinga bakapokola bakalinga kufwa nsoni kubona muntu wakucishi cimwi kaalindilila mu ofesi yabo kwaamba ayi bamucaafwe.

Nsondo nshetwakalinga kukala abamakwesu, twakalinga kweenda woola lyomwi akwiindaawo kutanta tulundu alimwi akusubuka milonga. Ntokwiibaluka ciindi cakutaanguna kutanta kalundu. Pesule lya kulyabo paniini macuunsa, twakaya mukutanta basi kuma 5:30 kuya kumushi umwi wakulaale. Twakeenda mucinyika alimwi akutanta kalundu kalaamfu. Kakalinga kalaamfu abuumbi cakwaamba ayi na ndalangilisha bamakwesu bakalinga kunembo lyangu, shimpanta shabo shakalinga kubonekela pafwiifwi abuumbi ameenso angu.

Bushiku bulya, ba Harvey bakasebensa abamakwesu bakumusena nkotwakalinga kushimikila, lyalo nebo ndakaya neenka ku kamushi kamwi mwakalinga kukala bantu baamba ci Japanese. Kusa mukushika kuma 1 koloko malumwi, ndakatalika kulinyumfwa kumaninwa nkusu mukwiinga nshikwe kulyaawo kali koonse kwaciindi cilaamfu. Ndyetwakakumana aba Harvey, abalo bakalingabo beenka. Bakalinga kucite amayi otatwe ayo ngobakacinjinya abaabo bakabwesa magazini. Bakantondesha bwakulya liyi libishi. Bakandwiita ayi nkutulula kalyango kaniini akutalika kunwa. Nabi kwaamba ayi talyakalinga kunyumfwika  kabotu, ndakeeleshako lyomwi. Ano ino ngaani eshi alye lyatatu, mukwiinga twakalinga sobilo mayi otatwe? Ndakalilya, mukwiinga naakwiinga ndakawisuka, ba Harvey naakwiinga tabakwe kucikonsha kumbeleka ansala.

Ndyetwakalinga kukubungana kwalubasu, ndakacana lipenshi ndyentana kucanawo kale. Twakalinga kukala muŋanda ya mukwesu yakalinga pafwiifwi a Ŋanda ya Bwaami. Mukwiinga bantu baamba mushobo waci Amis balabona ayi kusamba kulayandika abuumbi, muka mutanjilili walubasu wakatubambila maanshi akusamba. Mukwiinga ba Harvey bakalinga kucite shakucita shiinji, bakandwiita ayi ntaangune. Ndakacana batubambila mingomo yamaanshi yobilo, mwakalinga maanshi atontola alimwi amwakalinga alungula, lyalo bakabikawo akadishi kakusambilaamo. Ano ndakakankamana, mukwiinga muka mutanjilili walubasu wakaya mukubika maanshi akusamba pansengwe patubabo pakwaamba ayi bamakwesu bakalinga kucafwilisha muncito yakulibambila kubungana kwalubasu pa Ŋanda ya Bwaami, inga bakubona. Ndakamusenga ayi ampeko cili coonse ca kushitilishaako. Wakaleta cipulasitiki cibonesha mukati! Ndakayeeya kuya mukusambila kwisule lya ŋanda, ano kwakalinga shiyuni nshondakalinga kuloonda ayi inga shaakunsonsola. Aboobo ndakayeeya ayi: ‘Bamakwesu batoobikila maano kunshobatoocita, taakuwo eshi amboone ayi ntoosamba. Alimwi na mbule kusamba, batokalashikwa. Ansambebo!’ Aboobo mbondakasamba.

Ba Harvey bakabona ayi bamakwesu baanji baamba ci Amis tabakalinga kuya panembo lwakumushimu ceebo cakutashiba kubelenga akubula mabuku mucinemishaabo. Mukwiinga mushobo waci Amis ndyewakatalikabo kulembwa kusebensesha malembo amu alufabeti, twakabona ayi tulyeelete kwiisha bamakwesu kunobelenga mucinemishaabo. Iyi yakalinga ncito inene abuumbi, nacibi boobo, mukuya kwaciindi bamakwesu bakatalika kwiiya pali Yehova mumushobo winemishaabo. Kumamanino amyaaka yamuma 1960, twakatalika kuba amabuku muci Amis. Alimwi mu 1968, twakatalika akuba a Njashi Yamulindilishi muci Amis.

Nacibi boobo, mfulumeende tayakalinga kusuni ayi tunookwaabila mabuku ateshi amuci Chinese. Aboobo Njashi Yamulindilishi yamuci Amis yakatalika kupulintwa munshila shipusenepusene. Kucakubonenaako, Njashi Yamulindilishi yamuci Amis yakalinga kuba amishobo yobilo mukati, ci Chinese aci Amis. Aboobo abo bakalinga kucite miipusho, bakalinga kubona anga tutokwiisha bantu ci Chinese kusebensesha Njashi Yamulindilishi. Kuswabo ciindi cilya, libunga lyakwe Yehova lilapulinta mabuku aanji muci Amis  kwaamba ayi tucafwe baabo basuni kwiiya cancine camu Baibo.​—Mili. 10:34, 35.

Mumyaaka yamuma 1960 kuya mukushika mu 1970, bamakwesu baanji baci Amis tabakalinga kukonkela njiisho shakwe Lesa. Mukwiinga tabakalinga kunyumfwishisha njiisho shamu Baibo, bamwi bakalinga kucita bulale, kukolwa, kufweba fwaka, alimwi akutafuna shiitwa ayi ma betel nut. Ba Harvey bakafwakashila mabungano aanji kwaamba ayi bacafwe bamakwesu kunyumfwishisha Yehova mbwaabona shintu. Shilya nshendalinga ndaamba kumatalikilo shakacitika ndyetwakalinga palweendo lumwi lwa kufwakashila mabungano.

Bamakwesu baliceesha bakalinga kulibambite kwaalula buumi bwabo, ano cakabicako ncakwaamba ayi baanji tabakwe kwaaluka. Mumyaaka 20, namba ya beshikushimikila ku Taiwan yakaboolela panshi kuswa pa 2,450 akwiindaawo, akushika kuma 900. Ici cakatupa kulinyumfwa kulefuka abuumbi. Nacibi boobo, twakalinga kucishi kwaamba ayi Yehova inga taapiiwo shoolwe libunga muli bantu batasalalite. (2 Koli. 7:1) Mukuya kwaciindi, mabungano akatalika kusebensela Yehova munshila yeelete, alimwi kwiinda mulucafwo lwakwe Yehova, pacecino ciindi ku Taiwan kuli beshikushimikila beendilila 11,000.

Kuswa mumyaaka yamuma 1980 akuya panembo, twakabona bamakwesu abenankashi mumabungano amuci Amis mbobakatalika kuya panembo, aboobo ba Harvey bakalinga kucikonsha kucafwa bakalinga mumabungano amuci Chinese. Bakakondwa abuumbi kucafwa basankwa bakalinga kweebete benankashi kuba Bakamboni Bakwe Yehova. Ntokwiibaluka ndyebakandwiita ayi bakakondwa abuumbi musankwa womwi pabaabo mbobakacafwa ndyaakapaila kuli Yehova kwaciindi cakutaanguna. Anebo ndasangalala na ndayeeya bantu bakalinga kucite myoyo ibotu yakusuna kwiiya mbondakacafwa kuba beshicibusa bakwe Yehova. Alimwi ndakakondwa abuumbi kusebensela pa musampi waku Taiwan pomwi amwaana musankwa alimwi amwanakashi wa bomwi pabaabo mbondakalinga kwiisha Baibo.

Pacecino ciindi ndibo neenka. Pesule lyakukala mucikwati aba Harvey kwa myaaka pafwiifwi a 59, bakafwa kubulwashi bwa kansa pa 1 January 2010. Ba Harvey bakasebensa muncito yaciindi coonse kwa myaaka pafwiiwi a 60! Ndabayeeya abuumbi. Nacibi boobo, ndikondetwe abuumbi kwaamba ayi ndakacikonsha kusebensaabo pomwi mushishi shobilo! Alimwi twakacikonsha akwiiya kwaamba mishobo yobilo iyumu yaku Asia, ba Harvey balo bakalinga beeya abwakulemba.

Ndipakeendabo myaaka iniini, bamu Likoto Litanjilila bakandwiita ayi mukwiinga ndacembela ano, inga cabota kuboolela ku Australia. Pakutaanguna ndakayeeya ayi ‘Nshisuniiwo kuswa ku Taiwan.’ Ano ba Harvey bakanjiisha kucita cili coonse nceenga libunga lyakwe Yehova lyandwiita. Aboobo ndakaboolela ku Australia. Alimwi mukuya kwaciindi ndakesa mukubona ayi cakalinga kabotu kuboolela ku Australia, mukwiinga ubu mbondakula ndakalinga kuyandika lucafwo abuumbi.

Pacecino ciindi ndasebensela kumusampi waku Australasia munshiku sha mukati kansondo, lyalo Pacibelu a Pasondo ndasebensela pomwi alibungano muncito yakushimikila. Ndikondetwe abuumbi mukwiinga ndasebensesha mushobo waci Japanese alimwi aci Chinese ndyentofwakashisha bantu pa Bethel. Ndalangila kubuka kwa bafu Yehova nkwaakashomesha. Ndicishi kwaamba ayi alaakubabusha ba Harvey, bakeeya kucita shili shoonse Yehova nshabalwiita.​—Joni 5:28, 29.