1-2. Ino nceebonshi tulacanika ku Ciibalusho mwaaka uli woonse?

 PEENDA myaaka pafwiifwi a 2,000, kuswa ciindi Yesu ndyakaaba buumi bwakwe ceebo ca ndiswe, ici cakapa kwaamba ayi tube a coolwe cakutambula buumi butamaani. Mashiku Yesu kaatana kufwa, wakalwiita bashikwiiya bakwe kwiibaluka lusuno ndwakatondesha kwiinda mukubungana pomwi akucita ciibalusho kusebensesha shinkwa awaini.​—1 Koli. 11:23-26.

² Tulanyumfwila mulawo wakwe Yesu mukwiinga tulimusuni abuumbi. (Joni 14:15) Mwaaka uli woonse nsondo bushiku bwa Ciibalusho kabutana kushika alimwi nsondo pesule lya Ciibalusho, tulatondesha kulumba pacintu Yesu ncaakatucitila kwiinda mukucana ciindi cakupaila akukutumana kuyeeya pa shoolwe shakesa ku bantu ceebo ca lufu lwakwe. Alimwi tulakondwa kucita shiinji muncito yakushimikila, kwaamba ayi tuyuminishe bantu baanji kucanikaako ku cakucitika ici cilibetele. Alimwi tulishinishite kutasuminisha cintu cili coonse kutulengesha kwaamba ayi twaalilwe kucanikaako ku Ciibalusho.

3. Ino nshiinshi nsheshi tubandike mumutwi uyu?

³ Mumutwi uyu, tutobandika nshila shotatwe bantu bakwe Yehova mbobelesha cankusu kwaamba ayi bacikoonshe kucita Ciibalusho ca lufu lwakwe Yesu: (1) kwiinda mukucita Ciibalusho kweelana a Yesu mbwaakabatondesha, (2) kwiinda mukwiitako bamwi ku Ciibalusho, alimwi a (3) kwiinda mukucita Ciibalusho nabi ndyebali mubukaalo buyumu.

4. Ino nshiinshi nshetwiiya ku likani lyaambwa pa Ciibalusho mwaaka amwaaka, alimwi ino nceebonshi tulyeelete kuyeeyawo cakubikila maano? (Luka 22:19, 20)

⁴ Mwaaka amwaaka pa Ciibalusho, tulakutika likani lya Baibo lyaamba shikumbulo shuubu kunyumfwisha ku miipusho iinji. Tuleeya  cakapa kwaamba ayi bantu bayandike cilubula alimwi alufu lwa muntu womwi mbolukonsha kulubula bantu baanji kuswa ku shibiibi. Tuleebalushikwa pali shinkwa awaini ncoshiimikaninaako abeelete kulya shinkwa akunwako waini. (Amubelenge Luka 22:19, 20.) Alimwi tulakutumana akuyeeya pabuumi bubotu mbweshi bakacane kunembo abo batolangila kukala pacishi capanshi. (Isa. 35:5, 6; 65:17, 21-23) Aya ngamakani ngotweelete kuyeeyawo cakubikila maano. Bantu baanji taakuwo ncebeshi pamakani aya, alimwi tabacishiwo abubotu bwa mulambu wakwe Yesu. Alimwi tabaciti Ciibalusho ca lufu lwakwe kweelana a mbwaakaiisha bashikwiiya bakwe. Ino nceebonshi?

5. Ino bantu bakatalika kucita buyani Ciibalusho cakwe Yesu pesule lyakwaamba ayi batumwi baanji bafwa?

⁵ Batumwi bakwe Yesu baanji ndyebakafwa, Beneklistu bakubeca bakenjila mulibungano lya Bwineklistu. (Mate. 13:24-27, 37-39) Bakalinga kwaamba ‘shakubeca kwaamba ayi bakushe bantu kulushinisho bakakonkele mbabo.’ (Milimo 20:29, 30) Bubeshi bomwi Beneklistu bakubeca mbobakatalika kwiisha bantu mukuya kwaciindi, mbwakwaamba ayi Yesu taakwe kwaaba mubili wakwe “linkanda lyomwibo ndondoli kwaamba ayi shibiibi sha bantu baanji shilekelelwe,” kweelana a Baibo mboyaamba, sombi ayi alyeelete kwaaba buumi mankanda aanji kuteshi linkanda lyomwi. (Ebu. 9:27, 28) Munshiku shino bantu baanji batacishi cancine balashoma ayi njiisho iyi njancine. Lyoonse balabungana mumaceeci, bamwi balacita boobo bushiku abushiku, kwaamba ayi bacite kubungana nkobeeta ayi “Maasi Yakulyaaba.” b Maceeci amwi balacita ciibalusho ca lufu lwakwe Yesu mankanda aniini, sombi bantu bapaila kumaceeci ayo taakuwo ncebeshi pamakani amulambu wakwe Yesu ncewakakumanisha. Bamwi balaliipusha ayi, ‘Sa lufu lwakwe Yesu ncakwiila lwakapa kwaamba ayi shibiibi shangu shilekelelwe?’ Ino nceebonshi baleepusha mwiipusho uyu? Bamwi nceebo cakuyungwa abaabo batashomi ayi mulambu wakwe Yesu ulapa kwaamba ayi shibiibi shesu shilekelelwe. Ino bashikwiiya bakwe Yesu bancine balacita buyani kwaamba ayi bacafwe bantu kunyumfwishisha mulambu wakwe Yesu ncoosansulula akushiba nshila mbotweelete kucita Ciibalusho ca lufu lwakwe Yesu?

6. Ino nciinshi bamu kakoto ka beshikwiiya Baibo ncobakesa mukunyumfwishisha mu 1872?

⁶ Mu 1870, bamu kakoto ka beshikwiiya Baibo abo bakalinga kutanjililwa aba Charles Taze Russell bakatalika kwiiya Malembo cakubikila maano abuumbi. Bakalinga kusuni kushiba mulambu wakwe Yesu ncoosansulula alufu lwakwe mbolweelete kwiibalukwa. Kushika mu 1872, bakesa mukunyumfwishisha kwaamba ayi ncakwiila Yesu wakaaba buumi bwakwe mbuli cilubula ku bantu boonse. Nshebakacana kuswa mukwiiya Malembo tabana kushisungabo. Sombi bakatalika kulwiitako bamwi kwiinda mumabuku, manyusipepa, alimwi amagazini. Kuswawaawo, bakatalika kucita Ciibalusho linkanda lyomwi pa mwaaka mukukonkela cakubonenaako ca Beneklistu bamuciindi ca batumwi.

7. Ino kulangoola makani kwakacita beshikwiiya Baibo kulatucafwa buyani?

⁷ Makani ngobakalangoola Beneklistu bashomeka balya myaaka yakwisule atotucafwa apacecino ciindi. Munshila nshi? Yehova watucafwa kunyumfwishisha mulambu wakwe Yesu ncoosansulula ashoolwe nsheshi tukacane kwiinda mu mulambu uyu. (1 Joni 2:1, 2) Alimwi twakeeya ayi Baibo ilaamba ayi bantu bacita shisangalasha Lesa bali mumakoto obilo. Likoto lyomwi balaakuba abuumi butafwi kwiculu, lyalo likoto limwi lya bantu baanji balaakukala pacishi capanshi. Kuyeeya pa lusuno Yehova ndwaacite pali ndiswe ashoolwe nshetucana ceebo ca mulambu wakwe Yesu, kulatupa kuba abushicibusa  buyumu anguwe. (1 Pit. 3:18; 1 Joni 4:9) Bweenka mbuli bamakwesu bakale kale bashomeka, tuleetako bamwi ku Ciibalusho ncotucita kweelana a Yesu mbwaakalwiita bashikwiiya bakwe.

8. Ino bantu bakwe Yehova balacita buyani kwaamba ayi beeteko bamwi ku Ciibalusho? (Amubone cikope.)

⁸ Kwa myaaka iinji bantu bakwe Yehova baleetako bamwi ku Ciibalusho. Mu 1881 bamakwesu abenankashi ku America bakeetwa kwaamba ayi babungane muŋanda ya mukwesu umwi mutauni ya Allegheny, ku Pennsylvania pacakucitika cilibetele ici. Mukuya kwaciindi libungano lyomwi alyomwi lyakatalika kulicitila Ciibalusho. Mu March 1940, beshikushimikila bakalwiitikwa ayi inga beetako uli woonse ukala kumusena nkobashimikila uyo watondesha ayi alisuni kucanikaako. Mu 1960, kwaciindi cakutaanguna baku Bethel bakatuma tupepa twakwiita bantu ku Ciibalusho ku mabungano. Kuswabo ciindi cilya tupepa twakwiita bantu ku Ciibalusho tulapulintwa. Ino nceebonshi tulasebensa cankusu kwiitako bamwi?

9-10. Ino mbaani bafubilaamo na twasebensa cankusu kwiita bamwi ku Ciibalusho? (Joni 3:16)

⁹ Ceebo comwi ncetwiitila bamwi kusa mukubungana andiswe ku Ciibalusho, ncakwaamba ayi tulisuni ayi abo besako kwaciindi cakutaanguna beeye cakatucitila Yehova a Yesu. (Amubelenge Joni 3:16.) Tulalangila ayi nshebabona akunyumfwa ku Ciibalusho shibape kwiiya shiinji akuba basebenshi bakwe Yehova. Sombi kuli abamwi beshikufubilaamo.

¹⁰ Tuletaako abaabo bakacileka kusebensela Yehova. Tulacita boobo kwaamba ayi tubacaafwe kwiibaluka ayi Lesa acibasuni. Baanji balesa na twabeeta, alimwi tulakondwa abuumbi na twababona. Kucanika ku Ciibalusho kulabacafwa kwiibaluka lusangalalo ndobakalinga kucita ndyebakalinga kusebensela Yehova kale kale.  Amuyeeye shakacitikila ba Monica. c Bakayuminishikwa kutalika alimwi kusebensa cankusu mbuli shikushimikila paciindi ca bulwashi bwa COVID-19. Pesule lya kucanikaako ku Ciibalusho camu 2021, bakaamba ayi: “Ciibalusho ici cakalinga cilibetele abuumbi kuli ndime. Nceciindi cakutaanguna pesule lya myaaka 20 kushimikilako bantu akubeeta ku Ciibalusho. Ndakacita shoonse nshendakalinga kucikonsha mukwiinga ndalumba Yehova a Yesu pasheesho nshebakancitila.” (Kulu. 103:1-4) Inga caba ayi bantu basumina ndyetwabeeta ku Ciibalusho nabi sobwe, tulaakutolelela kucita nsheenga twacikonsha kwiita bamwi ceebo cakushiba ayi Yehova alalumba pakwelesha kwesu.

11. Ino Yehova wakatucafwa buyani kwiita bantu ku Ciibalusho? (Agayi 2:7)

¹¹ Yehova watucafwa abuumbi kwiita bantu ku Ciibalusho. Mu 2021, nabi kwaamba ayi kwakalinga shakukasha ceebo ca bulwashi bwa COVID-19, bantu bakacanikaako ku Ciibalusho nsengwe yoonse bakashika 21,367,603. Nkokwaamba ayi namba yaba Bakamboni Bakwe Yehova nsengwe yoonse mankanda obilo a haafu! Nacibi boobo, Yehova taabikilibo maano kukufula kwa baabo bacanikaako, sombi alabikila maano kumuntu womwi awomwi. (Luka 15:7; 1 Timo. 2:3, 4) Inga twashoma cakutatoonsha kwaamba ayi na twaabila muntu kapepa ka kumwiita, Yehova atotucafwa kucana baabo bacite moyo wakusuna kwiiya.​—Amubelenge Agayi 2:7.

12. Ino ngamapensho nshi eenga apa kwaamba ayi cibe ciyumu kucita Ciibalusho? (Amubone cikope.)

¹² Yesu wakaambila limwi ayi munshiku shakweelaako, kulaakuba mapensho apusenepusene mbuli kupikishikwa mumukwashi, kupenshekwa, nkoondo, malwashi, amapensho amwi aanji. (Mate. 10:36; Maako 13:9; Luka 21:10, 11) Cimwi ciindi mapensho aya alapa kwaamba ayi cibe ciyumu kucita Ciibalusho ca lufu lwakwe Yesu. Ino bamakwesu abenankashi bamwi balacita buyani kwaamba ayi bacikoonshe kukoma mapensho mbuli aya, alimwi ino Yehova wabacafwa buyani?

13. Ino Yehova wakamucafwa buyani mukwesu Artem kwaamba ayi acikoonshe kucita Ciibalusho ndyaakalinga mujeele?

¹³ Kwaangwa. Bamakwesu bali mujeele balacita nsheenga bacikonsha kwaamba ayi bacikoonshe kucita Ciibalusho ca lufu lwakwe Yesu. Kucakubonenaako, mu 2020 nsondo Ciibalusho kacitana kutalika ansondo pesule lya Ciibalusho, mukwesu waliina lya Artem wakalinga mujeele. Bakamubika mukaseelo kaniini abuumbi umo mwakalinga bakaili bali 5 paciindi ico. Nabi kwaamba ayi wakalinga mujeele, wakacikonsha kubwesa shakusebensesha mbuli shinkwa awaini. Alimwi wakalibambila kwaamba likani lya Ciibalusho mwiine. Nacibi boobo, bakaili mbaakalingaabo museelo liinji bakalinga kufweba akwaamba maswi abiibi. Ino wakacita buyani? Wakabasenga na inga bacileka kufweba akwaamba maswi abiibi kwa liwoola lyomwibo. Mukwesu Artem wakakankamana kwaamba ayi bakailinyina bakasumina kucita boobo paciindi ca Ciibalusho. Mukwesu Artem wakaamba ayi, “Ndakabalwiita ayi ntoobalwitaako pamakani a Ciibalusho.” Nabi bakaamba ayi tabakalinga kusuni kunyumfwa sha Ciibalusho, pesule lya kubona akunyumfwa mukwesu Artem kaacita Ciibalusho, bakamwiipusha pamakani a Ciibalusho.

14. Ino bantu bakwe Yehova bakacita buyani kwaamba ayi bacikoonshe kucita Ciibalusho nabi ndyekwakalinga bulwashi bwa COVID-19?

¹⁴ Bulwashi bwa COVID-19. Bulwashi bwa COVID-19 ndyebwakatalika, bantu bakwe Lesa tabakalinga kucikonsha kubungana pomwi pa Ciibalusho. Nacibi boobo, ici tacina kupa kwaamba ayi baalilwe kucita Ciibalusho. d Mabungano akalinga kucite intaneti ili kabotu akacita Ciibalusho kwiinda mukubungana kusebensesha  intaneti. Ano ino bamwi baanji batakalinga kucikonsha kubungana kusebensesha intaneti bakacita buyani? Mushishi shimwi kwakabikwa bubaambo bwa kukutika likani pa ledyo na kweebela pa TV. Kwiilikaawo, bamakwesu mumisampi bakalekoda likani mumishobo iindilila 500 kwaamba ayi abo bekala mulaale abuumbi abalo bacikoonshe kucita Ciibalusho. Alimwi bamakwesu bakasebensa cankusu kutola makani akalekodwa kubamakwesu mumisena iyo yakulaale.

15. Ino nshiinshi nshomweeya ku cakubonenaako ca shikwiiya Baibo waliina lya Sue?

¹⁵ Kupikishikwa kumukwashi. Bamwi cakapa kwaamba ayi cibe ciyumu kucita Ciibalusho, nkupikishikwa kumukwashi. Amuyeeye cakubonenaako ca shikwiiya Baibo waliina lya Sue. Mu 2021, bushiku bwa Ciibalusho kabutana kushika, Sue wakalwiita bakalinga kumwiisha Baibo ayi teshi akacikoonshe kucanikaako ku Ciibalusho ceebo ca kupikishikwa abamumukwashi. Bakalinga kumwiisha Baibo bakabelenga Luka 22:44. Lyalo akumusansulwiita ayi na katwiinda mumapensho tulyeelete kukonkela cakubonenaako cakwe Yesu kwiinda mukupaila kuli Yehova akumushoma cakumaninina. Bushiku bwakaboolaawo Sue wakalibambila kwiinda mukubwesa shinkwa awaini akweebela pulogilamu ilibetele ya Kulambila kwa Macuunsa pa jw.org.  Macolesha alya kaali eenka mucipinda, wakakutika ku pulogilamu ya Ciibalusho pafooni. Pesule lya kubungana, Sue wakalembela bakalinga kumwiisha Baibo ayi: “Mwakanjuminisha abuumbi ciilo. Ndakacita shoonse nshendakalinga kucikonsha kwaamba ayi ncanikeeko ku Ciibalusho, alimwi Yehova wakancafwa. Ndalumba alimwi ndikondetwe abuumbi!” Sa mutoobona ayi amwebo Yehova inga wamucafwa na mwalicana mubukaalo mbuli boobu?

16. Ino nceebonshi inga twashoma ayi Yehova alaakutucafwa kucanikaako ku Ciibalusho? (Bene Loma 8:31, 32)

¹⁶ Yehova alasangalala abuumbi mbotweelesha cankusu kwaamba ayi tucikoonshe kwiibaluka lufu lwakwe Yesu. Inga twashooma ayi alaakutupa shoolwe na katutondesha kulumba pasheesho nshaakatucitila. (Amubelenge Bene Loma 8:31, 32.) Aboobo atube bashinishite kucanikaako ku Ciibalusho mwaaka uno, akucita nsheenga twacikonsha kwaamba ayi tucite shiinji muncito yakwe Yehova nsondo bushiku bwa Ciibalusho kabutana kushika ansondo pesule lya Ciibalusho.