1-2. (a) Ino nceebonshi tatukankamani kwaamba ayi tutokwiinda mumapensho? (b) Ino tutokwiiya nshi mumutwi uyu?

 MBULI bantu bakwe Yehova, tatukankamani na katwiinda mumapensho. Tulishi kwaamba ayi kweelana a Baibo mboyakaamba ayi, ‘tulyeelete kwiinda mumapensho aanji kwaamba ayi tukenjile mu Bwaami bwakwe Lesa.’ (Milimo 14:22) Alimwi tulishi kwaamba ayi mapensho amwi alaakumanabo mucishi cipya umo mweshi mukabule kubaawo lufu, buumba, kulila nabi kunyumfwa kucisa.​—Ciyu. 21:4.

² Yehova taatushitilishi kumapensho. Nacibi boobo, alatucafwa kuliyumya mumapensho. Amunyumfwe mutumwi Paulo nshaakaamba ku Beneklistu bakalinga kukala ku Loma. Wakaamba mulongo wamapensho lakwe abashominyina ngobakalinga kwiindaamo. Lyalo wakalemba ayi: ‘Tulakoma kwiinda muli wooyo wakatusuna.’ (Loma. 8:35-37) Ici cilaamba ayi Yehova inga wamucafwa kuliyumya ndyemutokwiinda mumapensho. Amuleke tubandike Yehova mbwaakacafwa Josefu kuswitilila alimwi a mbweenga amwebo Wamucafwa.

3. Ino shintu mubuumi bwakwe Josefu shakaaluka buyani paciindi ciniinibo?

³ Jakobo wakatondesha patuba kwaamba ayi wakalinga kumusuni abuumbi Josefu mwanaakwe. (Mata. 37:3, 4) Aboobo, ici cakapa kwaamba ayi bana bakwe basankwa bamanene batalike kumunyumfwila munyono mwanike wabo. Ndyebakaba acoolwe, bakamuulisha Josefu kulikoto lya beshimakwebo bene Midyani. Beshimakwebo aba bakatola Josefu kucishi cakulaale abuumbi ku Ijipiti, uko abalo nkobakaya mukumuulisha kuli Potifa, wacinenenene wa beshikulindilila bakwe Falawo. Shintu mubuumi bwakwe Josefu shakaaluka paciindi ciniinibo, kuswa mukuba mwaana baishi ngobakalinga kusuni abuumbi kukuba musha mucishi ca Ijipiti!​—Mata. 39:1.

4. Ino nciinshi ceenga catucitikila ceenga catupa kwiinda mu lipenshi mbuli lyakeendamo Josefu?

 ⁴ Baibo ilaamba ayi “shintu shibiibi shilacitikila muntu uli woonse.” (Shiku. 9:11, Holy Bible—Easy-to-Read Version) Cimwi ciindi tuleenda mumapensho “ashikila bantu bamwi boonse.” (1 Koli. 10:13) Na mpashi cimwi ciindi inga tweenda mumapensho ceebo cakwaamba ayi tuli bashikwiiya bakwe Yesu. Kucakubonenaako, bamwi inga batuseka, kutupikisha, na kutupensha ceebo ca lushomo lwesu. (2 Timo. 3:12) Yehova inga wamucafwa kuswitilila nabi mwiinde mumapensho ali buyani. Ino Yehova wakamucafwa buyani Josefu?

5. Ino Potifa wakabona ayi nciinshi cakapa Josefu kuswitilila? (Matalikilo 39:2-6)

⁵ Amubelenge Matalikilo 39:2-6. Potifa wakabona kwaamba ayi Josefu wakalinga musankwa wacanike ucite maano alimwi usebensa cankusu. Alimwi wakalinga kucishi Josefu ncaakalinga kubetele boobo. Potifa wakabona kwaamba ayi ‘Yehova ngowakalengesha ayi [Josefu] aswitilile mushintu shoonse nshaakalinga kucita.’ b Aboobo mukuya kwaciindi Potifa wakasala Josefu kuba musebenshi wakwe. Alimwi wakamupa mukuli wakulama shintu shoonse sha muŋanda yakwe. Ici cakapa kwaamba ayi Potifa aswitilile.

6. Ino cilyeelete Josefu wakalinyumfwa buyani pabukaalo mbwakalingaamo?

⁶ Amuyeeyebo Josefu mbwaakalinyumfwa. Ino nciinshi ncaakalinga kusuni abuumbi kwiinda cintu cimwi cili coonse? Sa nkushibikwa akupekwa cilambu kuli Potifa? Cilyeelete mpashi Josefu wakalinga kusuni kuswa mubusha kwaamba ayi aboolele kuli baishi. Mukwiinga nabi kwaamba ayi wakapekwa shoolwe muŋanda yakwe Potifa, Josefu wakatolelela kuba musha wa mwaami watakalinga kulambila Yehova. Yehova taakwe kupa kwaamba ayi Potifa angulule Josefu mubusha. Alimwi shintu mubuumi bwakwe Josefu shakalinga kusa mukwiindaawo kubica.

7. Ino bukaalo bwakwe Josefu bwakatolelela buyani kuya bubicilaako? (Matalikilo 39:14, 15)

⁷ Kweelana ashaambwa mu capita 39 mulibuku lya Matalikilo, muka Potifa wakatalika kukumbwa Josefu alimwi wakeelesha mankanda aanji kumunyengelela kwaamba ayi  oonaakwe. Sombi lyoonse Josefu wakalinga kukaka. Mukweelaako, muka Potifa wakakalala abuumbi akubekesha Josefu ayi wakalinga kusuni koonaakwe cakumukakatisha. (Amubelenge Matalikilo 39:14, 15.) Potifa ndyaakanyumfwa makani aya, wakatola Josefu mujeele, umo mwaakeekala kwa myaaka iinji. (Mata. 39:19, 20) Ino buumi mujeele bwakalinga buyani? Liswi lyamu ciEbulu Josefu ndyaakasebensesha kusansulula liswi lyakwaamba ayi “jeele” inga lyasansulula “mukalo,” na “cilindi,” kutondesha kwaamba ayi mwakalinga mushiya alimwi wakalinyumfwa ayi bukaalo bwakwe teshi bukaalukeewo. (Mata. 40:15) Alimwi Baibo ilaamba ayi Josefu, bakamwaanga ceeni kumyeendo anshimbi munshingo. (Kulu. 105:17, 18) Bukaalo bwakwe Josefu bwakalinga kuya bubicilaakobo. Wakaswa pakuba musebenshi ngobakalinga kushoma akuba kaili mujeele.

8. Ino nciinshi nceenga twashooma nabi bukaalo bwatolelela kubicilaako?

⁸ Sa mwakabawo kale mubukaalo buyumu abuumbi bwakatolelela kubicilaako nabi ndyemwakalinga kupaila abuumbi? Shintu sha mushobo uyo inga shacitika. Yehova taatushitilishi ku mapensho ali mucishi ici ceendeleshekwa a Satana. (1 Joni 5:19) Nacibi boobo, nceenga mwashooma nceeci: Yehova alishi kabotu shoonse nshemutokwiindaamo, alimwi alamubikilako maano. (Mate. 10:29-31; 1 Pit. 5:6, 7) Kwiilikaawo, washomesha ayi: “Teshi nkamushiyeewo nabi kumulekelesha sobwe.” (Ebu. 13:5) Yehova inga wamucafwa kuliyumya ndyemuli mubukaalo bweenga bwaboneka anga teshi bukamaane. Amubone ici mbocakalinga kuli Josefu.

9. Ino nciinshi citondesha ayi Yehova wakalinga a Josefu ndyaakalinga mujeele? (Matalikilo 39:21-23)

⁹ Amubelenge Matalikilo 39:21-23. Yehova wakacafwa Josefu kuswitilila nabi paciindi ici ndyaakalinga mujeele. Munshila nshi? Mukuya kwaciindi, shikulama jeele wakatalika kushoma Josefu akumulemeka, bweenka mbuli mbocakalinga kuli Potifa. Lyalo mukuya kwaciindi munene uyu wakapa Josefu mukuli wakulama bakailinyina. Alimwi Baibo ilaamba ayi ‘Shikulama jeele uyo taakalinga kubikaako amaano kushintu isho shakalinga kweendeleshekwa a Josefu.’ Paciindi ici Josefu wakaba ashakucita nshaakalinga kweelete kubikilako maano. Uku nkwaaluka Josefu nkwaatakalinga kulangilaawo! Ino kaili ngobakabekesha ayi wakalinga kusuni kucata mwanakashi wakalinga kweebetwe ku wacinenenene inga wapekwa buyani mukuli unene bobulya? Kulibo ceebo comwi. Kweelana a Matalikilo 39:23, ‘Yehova wakalinga a Josefu alimwi wakamulengesha ayi aswitilile mushintu shoonse nshaakalinga kucita.’

10. Amwaambe cakalinga kweelete kulengesha Josefu kulinyumfwa anga taakalinga kuswitilila mushintu shoonse.

¹⁰ Amweeleshe alimwi kuyeeya Josefu mbwaakalinyumfwa. Sa mutoyeeya ayi wakalinyumfwa kuswitilila mushintu shoonse pesule lya kubekeshekwa akubikwa mujeele? Ino nciinshi Josefu ncaakalinga kusuni abuumbi kwiinda cintu cimwi cili coonse? Sa nkuba ampuwo ibotu kuli shikulama jeele? Cilyeelete Josefu wakalinga kusuni bunene kwaangululwa. Wakasenga kaili umwi wakalinga pafwiifwi kwaangululwa ayi akamwaambilileeko kuli Falawo kwaamba ayi alakwe bakamukushe mujeele. (Mata. 40:14) Sombi musankwa uyo wakaalilwa kucita boobo ndyaakaswabo. Aboobo Josefu wakatolelela kuba mujeele kwa myaaka aimwi yobilo. (Mata. 40:23; 41:1, 14) Nacibi boobo, Yehova wakatolelela kucafwa Josefu kuswitilila. Munshila nshi?

11. Ino Yehova wakapa Josefu nkusu shilibetele shakucita nshi, alimwi ino ici cakamucafwa buyani kukumanisha luyaando lwakwe Yehova?

¹¹ Josefu ndyaakalinga mujeele, Yehova wakalengesha mwaami waku Ijipiti kulota shiloto  shiyumu kunyumfwisha. Falawo wakalinga kusunishishi kushiba busansulushi bwa shiloto nshaakalota. Ndyaakashiba kwaamba ayi Josefu inga wacikonsha kusansulula shiloto, wakatuma bantu ayi bamwiite. Kwiinda mulucafwo lwakwe Yehova, Josefu wakacikonsha kusansulula shiloto akupa kwaamba ayi Falawo akondwe abuumbi amuyeeyo ucafwa Josefu ngwakaamba. Falawo wakabona kwaamba ayi Yehova wakalinga kucafwa Josefu, aboobo wakamusala kuba mweendeleshi mucishi ca Ijipiti. (Mata. 41:38, 41-44) Lyalo mukuya kwaciindi kwakaba nsala itaambiki mu Ijipiti alimwi amucishi ca Kenani umo mwakalinga kukala bashali bakwe abamakwabo. Paciindi ici Josefu wakalinga kucikonsha kupulusha mukwashi wakwe alimwi ici cakalinga kusansulula akushitilisha lunyungu Mesiya mwaakalinga kusa mukushalilwa.

12. Ino Yehova wakamulengesha buyani Josefu kuswitilila?

¹² Amuyeeye pashintu shilibetele shakacitika mubuumi bwakwe Josefu. Ino ngani wakalengesha Potifa kwaamba ayi abikile maano kuli Josefu, uyo wakalinga musha? Ino ngani wakalengesha shikulama jeele kupa Josefu shoolwe, uyo wakalingabo kaili? Ino ngani wakalengesha Falawo kulota shiloto nshaakaalilwa kunyumfwishisha alimwi ino ngani wakapa Josefu lushibo lwa kusansulula shiloto isho? Ino ngani wakapa kwaamba ayi Falawo asale Josefu kuba mweendeleshi mucishi ca Ijipiti? (Mata. 45:5) Ncakutatoonsha kwaamba ayi Yehova ngowakalengesha Josefu kuswitilila mushintu shoonse. Nabi kwaamba ayi bamakwabo Josefu bakalinga kusuni kumucaya, Yehova wakaalula bukaalo bwakwe Josefu kwaamba ayi akumanishe kuyanda Kwakwe.

13. Sa Yehova aleendelesha bukaalo buli boonse mubuumi bwesu? Amusansulule.

¹³ Ino nshiinshi nsheenga tweeya kushakacitikila Josefu? Sa Yehova aleendelesha bukaalo buli boonse mubuumi bwesu? Sa aleendelesha shintu shoonse shicitika mubuumi bwesu, kwaamba ayi shibiibi shoonse shicitike ceebo ca luyaando lubotu? Sobwe, Baibo teshi nsheyaamba. (Shiku. 8:9; 9:11) Nacibi boobo, ncotushi nceeci: Yehova alashiba ndyetutokwiinda mumapensho alimwi alanyumfwa akulila kwesu ndyetutosenga lucafwo. (Kulu. 34:15; 55:22; Isa. 59:1) Alimwi ciinditeewo, Yehova inga  watucafwa kuliyumya ndyetutokwiinda mumapensho. Munshila nshi?

14. Ino Yehova alatucafwa buyani ndyetuli mumapensho?

¹⁴ Nshila yomwi Yehova mbwaatucafwa nkwiinda mukutuyuminisha akutupa lucafwo, alimwi liinji ishi shilacitika paciindi ceelete. (2 Koli. 1:3, 4) Ishi nsheshakacitikila mukwesu waliina lya Eziz, ukala ku Turkmenistan uyo ngobakoombolosha ayi abikwe mujeele kwa myaaka yobilo ceebo ca lushomo lwakwe. Wakaamba ayi: “Macuunsa pabushiku ndyendakalinga kuya kukooti, mukwesu umwi wakantondesha Isaya 30:15, yaamba ayi: ‘Nkusu shanu shilaakuba mukukalikana akutondesha lushomo.’ Vesi iyi lyoonse ilancafwa kutolelela kukalika moyo akucinka manungo muli Yehova mushintu shoonse. Kukutumana kuyeeya pa vesi iyi kwakancafwa paciindi coonse ndyendakalinga mujeele.” Sa kuliiwo ciindi nceenga mweebaluka Yehova ndyaakamucafwa akumuyuminisha paciindi ndyemwakalinga kuyandika bunene lucafwo?

15-16. Ino inga mweeya nshi kushakacitikila nankashi Tori?

¹⁵ Liinji tulesa mukwiibaluka Yehova mbwakatucafwa na lipenshi lyamana. Nankashi umwi waliina lya Tori wakabona ayi ici cancine. Mwanaakwe musankwa waliina lya Masoni, wakaciswa bulwashi bwa kansa kwa myaaka 6 kushikila ndyaakafwa. Ici cakamucisa abuumbi nankashi Tori. Wakaamba ayi, “Mbuli mushali mwanakashi taakuwo cintu cakancisaawo mbuli lufu lwa mwanaangu.” Wakatolelela akwaamba ayi, “Ndashoma abashali bamwi abalo inga basumina kwaamba ayi taakuwo cintu ciyumu mbuli kubona mwanaako kaapenga.”

¹⁶ Nabi kwaamba ayi cakamucisa kubona mwanaakwe kaapenga, nankashi Tori mukuya kwaciindi wakayeeya Yehova mbwakamucafwa kuliyumya. Wakaamba ayi, “Na ndayeeya paciindi cilya, ndabona Yehova mbwakancafwa  paciindi mwanaangu ndyaakalinga kuciswa. Kucakubonenaako, nabi paciindi Masoni ndyaakalinga waciswa abuumbi cakwaamba ayi abo besa mukumufwakashila inga tabamubooni, bamakwesu abenankashi bakalinga kweenda mushinso utola mawoola obilo amotoka kusa ku cipatela. Lyoonse kwakalinga mukwesu na nankashi wakalinga kutulindilila kwaamba ayi atucaafwe munshila ili yoonse. Alimwi bamakwesu abenankashi bakalinga kutupa nshetwakalinga kuyandika lwakumubili. Lyoonse twakalinga kuba anshetuyandika nabi shintu shayuma buyani.” Yehova wakapa nankashi Tori nshaakalinga kuyandika kwaamba ayi acikoonshe kuliyumya, alimwi ubu mbocakalinga akuli Mason.​—Amubone kabokosi kacite mutwi utokwaamba ayi “ Yehova wakatupa Shintu Nshetwakalinga Kuyandika.”

17-18. Ino nciinshi ceshi cikatucafwe kubona akulumba Yehova mbwatootucafwa paciindi ndyetutokwiinda mumapensho? (Kulumbaisha 40:5)

¹⁷ Amubelenge Kulumbaisha 40:5. Luyaando lwa muntu utootanta kalundu nkushika peculu peene. Nacibi boobo, kuli misena iinji ibotu munshila njeenga wasuna ayi eemikaneeko akweebela. Aboobo lyoonse amucane ciindi cakukutumana kuyeeya Yehova mbwaatomulengesha kuswitilila ndyemutokwiinda mulipenshi. Lyoonse na bushiku bwamana amuliipushe ayi: ‘Ino Yehova wancafwa buyani pabushiku bwasunu? Nabi kwaamba ayi lipenshi lyatolelela, ino Yehova atooncafwa buyani kwaamba ayi ncikoonshe kuliyumya?’ Amweeleshe nabi kubonakobo cintu comwi Yehova ncaacita kwaamba ayi amucaafwe.

¹⁸ Ncakwiila inga kamupaila ayi lipenshi ndyemucite limane. Kucita boobo kulibo kabotu. (Filip. 4:6) Nacibi boobo, tatweelete kuluba shoolwe Yehova nshaatootupa. Alimwi Yehova washomesha ayi alaakutupa nkusu akutucafwa kuliyumya. Aboobo lyoonse amulumbe Yehova mbwatoomucafwa. Lyalo mulaakubona Yehova mbwatoomucafwa kwaamba ayi muswitilile, bweenka mbwakacafwa Josefu, nabi paciindi ndyaakalinga kwiinda mumapensho.​—Mata. 41:51, 52.