Mu Baibo, liswi lyamu ciGiliki lyakasansululwa ayi cikoci inga lyasansulula shikoci shipusenepusene. (Milimo 8:​28, 29, 38) Nacibi boobo, citoboneka kwaamba ayi musankwa mwine Isopya wakalinga kutantite mucikoci cinene kwiinda shikoci nshobakalinga kusebensesha munkondo na mulubilo lwa kupingana. Amuleke tubandike pamakani aniini eenga atupa kwaamba boobo.

Musankwa mwine Isopya wakalinga mweendeleshi uyo wakeenda mushinso ulaamfu. Musankwa uyo “wakalinga kulama buboni bwakwe Kandasi mwaami mwanakashi waku Isopya.” (Milimo 8:27) Kale kale, cishi ca Sudan alubasu lwakumalenge lwa cishi ca Egypt shakalinga ndubasu lwa cishi ca Isopya. Nabi kwaamba ayi musankwa uyu taana kutanta mucikoci comwi kwaamba ayi ashike nkwakalinga kuya, cilyeelete kwaamba ayi wakanyamuna shintu shiinji shakalinga kuyandika palweendo ulu lulaamfu. Shikoci shimwi nshobakalinga kutanta na kuli nkobatooya muciindi ca Beneklistu bakutaanguna, shakalinga kuba amawilo ali 4 a ciluli. Libuku limwi lyaamba pamakani acanika mulibuku lya Milimo lyakaamba ayi, “Shikoci shamushobo uyu shakalinga kucite musena unene bantu mpeenga babika shoola ashintu shimwi akupa kwaamba ayi beende kabotu. Alimwi mpashi shakalinga kupa kwaamba ayi bacikonshe kweenda mushinso ulaamfu.”

Musankwa mwine Isopya wakalinga kubelenga Filipo ndyakaya kuli nguwe. Baibo ilaamba ayi, ‘Filipo ndyakacicilaako wakanyumfwa [musankwa uyu] kabelenga mulibuku lya kaalemba mushinshimi mukulukulu Isaya.’ (Milimo 8:30) Shikoci bantu nshobakalinga kutanta na kuli nkobatooya tashakalinga kupangwa munshila yakwaamba ayi kabeenda cakufwaambana. Ceebo cakwaamba ayi shikoci ishi shakalinga kweenda paniini paniini, musankwa mwine Isopya wakacikonsha kunooya cibelenga alimwi Filipo wakacikonsha kucicana cikoci nabi kwaamba ayi wakalinga panshi.

Musankwa mwine Isopya “wakasenga Filipo ayi atante mucikoci beendele pantu pomwi.” (Milimo 8:31) Shikoci nshobakalinga kusebensesha mulubilo lwakupingana, beshikushensha bakalinga kwiimikana. Nacibi boobo, mushikoci bantu nshobakalinga kutanta na kuli nkobatooya, cilyeelete mwakalinga kuba musena mpeenga bakala. Aboobo mpashi Filipo amusankwa mwine Isopya bakalinga kushiite mucikoci ncobakatanta.

Kweelana amakani akatanjililwa amushimu usalashi ngotucana mu Milimo capita 8, alimwi abumboni bumwi bwakale kale buliiko, pacecino ciindi mumabuku esu balatondesha musankwa mwine Isopya kaatantite mucikoci cinene kwiinda cikoci ncobakalinga kusebensesha munkoondo nabi mulubilo lwa kupingana.