MUTWI WAKWIIYA 3
LWIIMBO 124 Katushomeka Lyoonse
Yehova Alaakumucafwa Ndyemuli Mubukaalo Buyumu
‘[Yehova] ngoomucafwa kutatenkaana.’—ISA. 33:6.
CITEENTE CINENE
Nsheenga twaciita kwaamba ayi tufubileemo mulucafwo lwakwe Yehova, ndyetuli mubukaalo buyumu.
1-2. Ino ngamapensho nshi mpashi basebenshi bakwe Yehova bashomeka ngeenga beendaamo?
NA CINTU cibiibi catucitikila, shintu inga shaaluka mubuumi bwesu cakutengashila. Kucakubonenaako, mukwesu ushomeka waliina lya Luis a bakamucana abulwashi bwa kansa. Badokota bakamulwiita ayi alaakukalabo kwamyeenshi iniini. Ba Monika a beebabo, bakalinga kucita shiinji muncito yakwe Yehova. Lyalo bushiku bumwi, ba Monika bakesa mukushiba ayi beebabo abo bakalinga kusebensa mbuli munene mulibungano, tabakalinga kushomeka kuli mbabo kwamyaaka iinji. Nankashi uteebetwe waliina lya Olivia, wakacicaawo paŋanda ceebo cakwaamba ayi kwakalinga kusa mukuloka imfula inene yacipuupu. Ndyaakaboola, wakacana ayi imfula iyo yanyonyoola ŋanda yakwe. Muciindi ciniinibo, shintu shakaaluka abuumbi mubuumi bwa ba Luis, ba Monika aba Olivia. Sa amwebo mwakacitikilwawo kale cintu cibiibi, cakapa kwaamba ayi shintu shaaluke mubuumi bwanu cakutengashila?
2 Sobasebenshi bakwe Yehova bashomeka, tuleenda mubukaalo buyumu akuciswa bweenka mbuli bantu boonse. Alimwi mpashi inga twayandika kuliyumya kupikishikwa na kupenshekwa kubaabo bapatite bantu bakwe Lesa. Nabi kwaamba ayi Yehova taatushitilishi kumapensho aya, wakatushomesha ayi ananootucafwa. (Isa. 41:10) Kwiinda mulucafwo lwakwe, inga twatolelela kuba alusangalalo, kusala kabotu shakucita, akutolelela kushomeka kuli nguwe nabi ndyetutokwiinda mubukaalo buyumu abuumbi. Mumutwi uyu, tutobandika panshila shili 4 Yehova mbwaatucafwa ndyetuli mubukaalo buyumu. Alimwi tutobandika ansheenga twaciita kwaamba ayi tunoofubilaamo mulucafwo Yehova ndwaatupa.
YEHOVA ALAAKUMUSHITILISHA
3. Ino nciinshi ceenga catuyumina kucita na cintu cibiibi catucitikila?
3 Nciyumu kuyeeya kabotu akusalawo shakucita ndyetutokwiinda mubukaalo buyumu abuumbi. Ino nceebonshi? Mukwiinga inga katulinyumfwa cibiibi abuumbi, akulisukama. Inga katulinyumfwabo anga tutooya ceenda munshila ndyekuli shikuunku abuumbi, cakwaamba ayi tatutoobonawo a nkotutooya. Amunyumfwe benankashi bobilo mbotwaambawo mbobakalinyumfwa, ndyebakalinga kwiinda mubukaalo buyumu. Ba Olivia bakaamba ayi: “Ŋanda yangu ndyeyakanyonyooka kumfula yacipuupu, ndakalinyumfwa kusoweka akulisukama abuumbi.” Ba Monika bakaamba pa kupondoka kwa beebabo ayi: “Ndakalefuka abuumbi. Ndakalinyumfwabo anga muntu wanjasa naifi kumoyo. Cakalinga kunjumina kucita shintu shuubu, nshooncita bushiku abushiku. Nshindakalinga kuyeeyawo ayi camushobo uyu inga cancitikila.” Ino Yehova wakatushomesha ayi ananootucafwa buyani na twalisukama abuumbi?
4. Kweelana a Bene Filipi 4:6, 7, ino Yehova wakatushomesha kutucitila nshi?
4 Yehova mbwaatucafwa. Wakatushomesha ayi alaakutupa “luumuno lwakwe Lesa.” (Amubelenge Bene Filipi 4:6, 7.) Luumuno ulu nkukalikana mumiyeeyo amumoyo nkotulinyumfwa, ceebo cakuba abushicibusa buyumu anguwe. Luumuno ulu ‘luleenda pabusongo bwa bantu boonse’; alimwi ndubotu abuumbi kwiinda ambweenga twaluyeeyela. Kucakubonenaako, sa mwakapailawo kale abuumbi kuli Yehova, lyalo pesule lyakupaila cakutengashila mwalinyumfwa kuba aluumuno abuumbi? Mwakalinyumfwa boobo mukwiinga Yehova wakamupa “luumuno lwakwe Lesa.”
5. Ino luumuno lwakwe Lesa lulalama buyani miyeeyo amyoyo yesu?
5 Lilembo lyeenka ili lilaamba ayi luumuno lwakwe Lesa “lulaakulama,” na kushitilisha “myoyo yanu amiyeeyo yanu.” Liswi lyamu ciGiliki lyakasansululwa ayi “kulama” lyakalinga kwaamba pabashilumamba abo bakalinga kulama, na kushitilisha ndabala kubalwani. Bantu bakalinga kukala mundabala yamushobo uyo bakalinga koona muluumuno, mukwiinga bakalinga kucishi ayi balishitilishitwe kubashilumamba. Aswebo na luumuno lwakwe Lesa lwalama myoyo amiyeeyo yesu, tulalinyumfwa kukalikana ceebo cakushiba kwaamba ayi tulishitilishitwe. (Kulu. 4:8) Bweenka mbuli Aana, nabi kwaamba ayi inga twatolelela kwiinda mubukaalo buyumu inga twalinyumfwa kuba aluumuno. (1 Samwe. 1:16-18) Alimwi na twalinyumfwa kukalikana, liinji cilatubeta cuubu kuyeeya kabotu akusalawo shakucita shili kabotu.
Amupaile kushikila mwalinyumfwa ayi luumuno lwakwe Lesa lwatalika kulama moyo amiyeeyo yanu (Amubone mapalagilafu 4-6)
6. Ino nshiinshi nshotweelete kucita kwaamba ayi tube aluumuno lwakwe Lesa? (Amubone acikope.)
6 Nshotuyandika kucita kwaamba ayi Yehova atucaafwe. Bweenka bantu bamu ndabala mbobakalinga kwiita mulindilishi kwaamba ayi abashitilishe, amwebo mulyeelete kwiita Yehova kwaamba ayi amushitilishe. Munshila nshi? Mulyeelete kupaila kushikila mwalinyumfwa kuba aluumuno lwakwe Lesa. (Luka 11:9; 1 Tesa. 5:17) Ba Luis mbotwalinga twaambaawo, bakaamba nshobakacita pomwi aba Ana bakaabo kwaamba ayi bacikoonshe kuliyumya, ndyebakashiba ayi balaakukalabo kwamyeenshi iniini. Bakaamba ayi: “Ndyemuli mubukaalo bwamushobo uyu, nciyumu abuumbi kusalawo shakucita pamakani akushilikwa alimwi amakani amwi. Sombi kupaila kwakatucafwa kuba aluumuno, ndyetwakalinga mubukaalo ubu buyumu.” Ba Luis abakaabo bakaamba ayi bakalinga kupaila kuli Yehova kuswa panshi lyamoyo alimwi mankanda aanji, kumusenga kwaamba ayi abacaafwe kuba aluumuno lwamumiyeeyo, kukalikana mumoyo abusongo bwakusala kabotu shakucita. Alimwi bakalinyumfwa ayi wakabacafwa. Na mutokwiinda mubukaalo buyumu amutolelele kupaila lyalo mulaakuba aluumuno lwakwe Yehova ulo lweshi lukashitilishe moyo amiyeeyo yanu.—Loma. 12:12.
YEHOVA ALAAKUMUCAFWA KUTATENKAANA
7. Ino inga twalinyumfwa buyani na tutokwiinda mubukaalo buyumu?
7 Ndyetutokwiinda mubukaalo buyumu, inga catuyumina kulinyumfwa, kuyeeya, akucita shintu bweenka mbotucita lyoonse. Bweenka bwaato mbobutolanishikwa kumaaba na palweenge pesa cipuupu cinene, aswebo inga twatalika kulinyumfwa munshila shipusenepusene. Ba Ana mbotwalinga twaambaawo, bakaamba ayi bakalinyumfwa munshila shipusenepusene pesule lyakwaamba ayi ba Luis bafwa. Bakaamba ayi: “Na ndalinyumfwa kusowekelwa, ndakalinga kulinyumfwa cibiibi abuumbi. Alimwi ndakalinga kukalala ceebo cakwaamba ayi bakafwa.” Pashiindi shimwi, ba Ana bakalinga kulinyumfwa kuba beenka alimwi akukalala na batosalawo shakucita pashintu shimwi isho ba Luis nshobakalinga kusebenselawo kabotu. Lyalo pashiindi shimwi, bakalinga kulinyumfwa anga bali palweenge pali cipuupu abuumbi. Ino Yehova alatucafwa buyani na twatalika kulinyumfwa munshila shipusenepusene ndyetuli mubukaalo buyumu?
8. Kweelana a Isaya 33:6, ino Yehova wakatushomesha nshi?
8 Yehova mbwaatucafwa. Wakatushomesha ayi alaakutucafwa kutatenkaana. (Amubelenge Isaya 33:6.) Na palweenge pesa cipuupu cinene, bwaato inga bwatalika kutenkaanishikwa abuumbi kumaaba. Kwaamba ayi bwaato butanootolanishikwa kumaaba, maato amwi alaba asheela mweela kumbasu shoonse shobilo. Sheela isho shilacafwa bwaato kutatenkaana bunene, alimwi batantitemo inga bendabo kabotu. Nacibi boobo, sheela shiinji isho shilasebensa kabotu na bwaato butokweenda. Aswebo Yehova inga watucafwa kutatenkaana na twatolelela kumusebensela cakushomeka, nabi ndyetuli mubukaalo buyumu.
Amusebenseshe shisebensesho shitucafwa kulangoola makani kwaamba ayi shimucaafwe kutatenkaana (Amubone palagilafu 8-9)
9. Ino shisebensesho nshotusebensesha kulangoola makani inga shatucafwa buyani kutatenkaanishikwa ndyetuli mubukaalo buyumu? (Amubone acikope.)
9 Nshotuyandika kucita kwaamba ayi Yehova atucaafwe. Na mwalefuka ceebo cakulinyumfwa cibiibi abuumbi, amucite nsheenga mwacikonsha kwaamba ayi mutolelele kupaila, kucanika kumabungano akushimikila. Kwalo inga tamucikoonshi kucita shiinji mbuli mbomwakalinga kucita kamutana kwiinda mumapensho, sombi munokwiibaluka ayi Yehova taamulangili kucita nsheenga tamucikoonshi. (Amweelanye a Luka 21:1-4.) Kwiilika pakucita shintu ishi nshotwabandikawo, munoocana ciindi cakucita ciiyo capalwaanu akukutumana kuyeeyawo. Ino nceebonshi? Kwiinda mulibunga lyakwe, Yehova wakatubambila makani aanji aamba shamu Baibo eenga atucafwa kutatenkaanishikwa ndyetuli mubukaalo buyumu. Kwaamba ayi mucane makani ngomutoyandika, inga mwasebensesha shisebensesho nshetusebensesha kulangoola makani mbuli, JW Library® appu, Watch Tower Publications Index, alimwi alibuku lyamu Chitonga lyaamba ayi, Bbuku Ligwasya Kuvwuntauzya lya Bakamboni ba Jehova. Ba Monika mbotwalinga twaambaawo bakaamba ayi, bakasebensesha shisebensesho ishi ndyebakatalika kulinyumfwa cibiibi abuumbi. Kucakubonenaako, bakalangoola makani aamba pa “kukalala.” Lyalo pashiindi shimwi, bakalangoola makani aamba pa “kupondoka” na “kushomeka.” Lyalo bakalinga kutalika kubelenga kushikila balinyumfwako kabotu. Bakaamba ayi: “Na ndyendatalikabo kulangoola makani ndakalinga kulisukama abuumbi. Sombi na ndatolelela kubelenga, ndakalinga kulinyumfwa anga Yehova wamfukata. Ndyendakalinga kubelenga, ndakesa mukushiba ayi Yehova wakalinga kunyumfwishisha mbondakalinga kulinyumfwa munshila shipusenepusene alimwi wakalinga kuncafwa.” Alimwi lucafwo lwakwe Yehova inga lwamucafwa kutanoolinyumfwa cibiibi lyalo akuba aluumuno abuumbi.—Kulu. 119:143, 144.
YEHOVA ALAAKUMUCAFWA
10. Ino inga twalinyumfwa buyani na twacitikilwa cintu cibiibi abuumbi?
10 Na cintu cibiibi abuumbi catucitikila, inshiku shimwi inga katulinyumfwa kumaninwa nkusu akulinyumfwa cibiibi. Inga twalinyumfwa anga ngushikucica lubilo wakalinga kucica abuumbi uyo watalika kusunkuta pakweenda. Mpashi inga kacitubeta ciyumu kucita shintu shakalinga kutuubila kucita, na kutasunishisha kucita shintu shakalinga kutusangalasha. Bweenka mbuli Elija, inga katulinyumfwa ayi nciyumu kubuka alimwi inga katusuni kunooletebo. (1 Baam. 19:5-7) Ino Yehova wakatushomesha kutucitila nshi na twalinyumfwa kumaninwa nkusu?
11. Ino ninshila nshi aimwi Yehova mbwaatucafwa? (Kulumbaisha 94:18)
11 Yehova mbwaatucafwa. Wakashomesha ayi alaakunootucafwa. (Amubelenge Kulumbaisha 94:18.) Bweenka shikucica lubilo wakalicisa mbwayandika lucafwo pakweenda, aswebo tulayandika lucafwo kwaamba ayi tutolelele kusebensela Yehova. Ndyetuli mubukaalo buyumu, Yehova alatushomesha ayi: ‘Nebo ne Yehova ndikucatite kulyaansa lyako lyalulyo, ndime wooyo utokwaambila ayi, ‘Utaloondi, ndaakukucafwa.’’ (Isa. 41:13) Mwaami Defedi wakacafwikwaawo kale munshila yamushobo uyu. Ndyaakalinga kwiinda mumapensho alimwi balwani bakwe kabasuni kumucaya, wakapaila kuli Yehova ayi: “Lyaansa lyanu lyalulyo lilancafwa.” (Kulu. 18:35, NWT) Sombi ino Yehova alatucafwa buyani?
Amusumine lucafwo kuswa ku bamumukwashi, beshicibusa, abamanene (Amubone mapalagilafu 11-13)
12. Ino mbaani mpashi Yehova mbweenga wasebensesha kwaamba ayi atucaafwe ndyetwamaninwa nkusu?
12 Liinji Yehova alatucafwa kwiinda mukupa kwaamba ayi bamwi batucaafwe. Kucakubonenaako, paciindi cimwi Defedi ndyaakalinyumfwa kumaninwa nkusu, Jonasani shicibusa wakwe wakamufwakashila kwaamba ayi amuyuminishe. (1 Samwe. 23:16, 17) Alimwi Yehova wakasebensesha Elisha kwaamba ayi acafwe Elija. (1 Baam. 19:16, 21; 2 Baam. 2:2) Munshiku shino, mpashi Yehova inga watucafwa kwiinda mukusebensesha bamumukwashi, beshicibusa, na bamanene. Nacibi boobo, na tutolinyumfwa cibiibi abuumbi mpashi inga katutasuni kuba pomwi abamwi. Cilibo kabotu kulinyumfwa boobo. Ino inga twacita buyani kwaamba ayi Yehova atucaafwe?
13. Ino nshiinshi nshotuyandika kucita kwaamba ayi Yehova atucaafwe? (Amubone acikope.)
13 Nshotuyandika kucita kwaamba ayi Yehova atucaafwe. Amuleye kulitalamusha kubamwi. Na katutasuni kuba pomwi abamwi, inga twatalika kunooyeeyabo pashintu nshotusuni sobene, a pamapensho ngotutokwiindaamo. Kucita boobo inga kwapa kwaamba ayi twaalilwe kusala kabotu shakucita. (Tus. 18:1, NWT) Kwalo, cimwi ciindi soonse tulayandika kuba sweenka bunene bunene na twacitikilwa shintu shibiibi abuumbi. Nacibi boobo, na katulitalamusha kubamwi kwaciindi cilaamfu, mpashi inga twakaka lucafwo lwa bantu Yehova mbwaatosebensesha kwaamba ayi atucaafwe. Aboobo nabi kwaamba ayi inga camubeta ciyumu kusumina lucafwo kuswa kubamwi ndyemuli mubukaalo buyumu, amusumine lucafwo kuswa ku bamumukwashi, beshicibusa, abamanene. Munoobona ayi Yehova mbwaatosebensesha kwaamba ayi amucaafwe.—Tus. 17:17; Isa. 32:1, 2.
YEHOVA ALAAKUMUYUMINISHA
14. Ino nshiinshi shimwi sheenga shatupa kuloonda?
14 Cimwi ciindi inga twaloonda. Mu Baibo muli shakubonenaako sha basebenshi bakwe Yehova bashomeka, abo bakaamba mbobakalinyumfwa buumba akuloonda ceebo ca balwani babo na mapensho amwi. (Kulu. 18:4; 55:1, 5) Aswebo inga twapikishikwa ndyetuli kucikolo, kuncito, ku bamumukwashi na kuba mumfulumeende. Alimwi mpashi inga twalisukama ayi tutoofwa ceebo ca bulwashi mbotutoociswa. Ndyetuli mubukaalo ubu, inga twalinyumfwa ayi taakuwo nsheenga twaciita bweenka mbociba kumwaana muniini. Ino Yehova alatucafwa buyani ndyetuli mubukaalo bwamushobo uyu?
15. Kweelana a Kulumbaisha 94:19, ino nshiinshi Yehova nsheshi akatucitile?
15 Yehova mbwaatucafwa. Alatuyuminisha akutucafwa kukalikana mumoyo. (Amubelenge Kulumbaisha 94:19.) Lilembo ili inga lyatupa kuyeeya pa mwaana mwanakashi muniini, uyo waloonda akwalilwa koona ceebo ca mfula itokalooka. Lyalo baishi baya kuli nguwe bamubwesa akumufukata, kushikila woona. Nabi kwaamba ayi imfula yatolelela kukalooka walinyumfwa kushitilishikwa mukwiinga baishi balimufukeete. Na tweenda mubukaalo buloondesha abuumbi, inga twayandika Ishiwesu wakwiculu kutufukata munshila yacikoshanyo kushikila twakalikana mumoyo. Ino inga twacita buyani kwaamba ayi Yehova atuyuminishe?
Amubelenge Baibo kwaamba ayi Ishiwanu wakwiculu amuyuminishe (Amubone palagilafu 15-16)
16. Ino nshiinshi nsheenga twaciita kwaamba ayi Yehova atuyuminishe? (Amubone acikope.)
16 Nshotuyandika kucita kwaamba ayi Yehova atucaafwe. Lyoonse munoocana ciindi cakupaila kuli Yehova akubelenga Maswi akwe. (Kulu. 77:1, 12-14) Lyalo na mwalisukama, mpashi cintu cakutaanguna nceshi munooyeeya kucita nkupaila kuli Ishiwanu wakwiculu. Amulwiite Yehova nshemutooloonda anshemutolisukama. Lyalo amukutike kuli nguwe kwiinda mukubelenga Maswi akwe, kwaamba ayi amuyuminishe. (Kulu. 119:28) Mpashi inga mwacaana ayi kubelenga makani amwi amu Baibo inga kwamuyuminisha na mwaloonda. Kucakubonenaako, inga mwayuminishikwa na mwabelenga makani ngotucana mulibuku lya Jobo, Kulumbaisha, a Tushimpi kwiilikaawo amaswi amwi Yesu ngaakaamba ngotucana mu Mateyo capita 6. Mulaakuyuminishikwa na kamupaila kuli Yehova akubelenga Maswi akwe.
17. Ino nciinshi nceenga twashoma cakutatoonsha?
17 Inga twashoma cakutatoonsha ayi Yehova ananootucafwa ndyetuli mubukaalo buyumu abuumbi. Teshi akatulekeleshewo. (Kulu. 23:4; 94:14) Yehova wakatushomesha ayi alaakutulama, kutucafwa kutatenkaana, kutucafwa, akutuyuminisha. Isaya 26:3 ilaamba pali Yehova ayi: ‘Mulapa luumuno lutamaani kubaabo bashomeka lyoonse ceebo cakucinka manungo muli ndimwe.’ Aboobo amucinke manungo muli Yehova, akucita nsheenga mwacikonsha kwaamba ayi amucaafwe. Na mwacita boobo, mulaakuba ankusu nabi ndyemutokwiinda mubukaalo buyumu.
INO INGA MWAKUMBULA BUYANI?
-
Ino ndilili ndyeenga twayandika bunene lucafwo lwakwe Yehova?
-
Ino ninshila nshi shili 4 Yehova mbwaatucafwa ndyetutokwiinda mubukaalo buyumu?
-
Ino nshiinshi nsheenga twaciita kwaamba ayi Yehova atucaafwe?
LWIIMBO 12 Yehova, Lesa Wiinditewo
a Meena amwi akaalulwa.