1. Ino nshiinshi nshomuyeeya na mwayeeya Yehova mbwaabete?

 SA MWAKEELESHAAWO kale kuyeeya Yehova mbwaabete? Ino nshiinshi nshomuyeeya ndyemutopaila kuli nguwe? Nabi kwaamba ayi Yehova inga tatumuboniiwo, Baibo ilamusansulula munshila shipusenepusene. Ilaamba ayi ali “anga ndisuba alimwi anga ndiyawo” alimwi ayi “ngumulilo unyonyoola.” (Kulu. 84:11; Ebu. 12:29) Mucili anga nciloto Esekelo ncaakabona, wakaamba ayi Yehova ali anga ndibwe lya safaya, anga nceela casalala kukulungula mumulilo alimwi anga ngumumuni wa nkongolo. (Esek. 1:​26-28) Mpashi busansulushi ubu bumwi bwaamba Yehova mbwaabete inga bwatukankamika na kutuloondesha.

2. Ino nciinshi ceenga capa kwaamba ayi citubete ciyumu kuba abushicibusa buyumu a Yehova?

² Ceebo cakwaamba ayi Yehova inga tatumuboniiwo, inga catuyumina kushoma ayi alitusuni. Bamwi balayeeya ayi Yehova inga tabatondeshiiwo lusuno ceebo ca shintu shakabacitikila mubuumi. Mpashi baishiwabo tabakalinga kubatondesha lusuno. Yehova alanyumfwishisha mbotulinyumfwa alimwi alicishi ceenga capa kwaamba ayi citubete ciyumu kuba abushicibusa anguwe. Kwaamba ayi atucaafwe kushoma ayi alitusuni, wakatupa Maswi akwe ayo atucafwa kushiba mibo ibotu njaacite.

3. Ino kwiiya bunene palusuno lwakwe Yehova inga kwatucafwa buyani?

³ Lusuno ngo mubo unene Yehova ngwaacite. (1 Joni 4:8) Alacita shintu shoonse ceebo calusuno. Lesa alitusuni abuumbi alimwi alatondesha lusuno kubantu boonse kwiilikaawo akubaabo batamusuni. (Mate. 5:​44, 45) Mumutwi uyu, tutobandika bunene pali Yehova alusuno lwakwe. Kumushiba kabotu Lesa wesu kulaakutucafwa kumusuna abuumbi.

 YEHOVA ALITUSUNI ABUUMBI

4. Ino lusuno lwakwe Yehova lulamupa kulinyumfwa buyani? (Amubone acikope.)

⁴ ‘Yehova ngushinkumbu abuumbi alimwi aluse.’ (Jemu. 5:11) Mu Baibo, alalikoshanisha kumushali mwanakashi utondesha lusuno kubana bakwe. (Isa. 66:​12, 13) Amuyeeyebo mushali mwanakashi ucite mwaana kateta, mbwaamubikilako maano. Alamulela munshila yalusuno akunomwamboosha muliswi liboombu alimwi liyuminisha. Na walila nabi na kuli citoocisa, alashinisha kwaamba ayi wamupa nshatoyandika. Na twalinyumfwa cibiibi, inga twashoma cakutatoonsha kwaamba ayi Yehova atootutondesha lusuno. Shikulumbaisha wakalemba ayi: ‘Kulisukama ndikwakalinga kuncata, mwebo mwakanjumya.’—Kulu. 94:19.

5. Ino nshiinshi Yehova nsheshi anoomucitila ceebo calusuno lwakwe lutamaani?

⁵ Yehova alatondesha lusuno lutamaani kubantu bakwe. (Kulu. 103:8) Teshi akacilekeewo kututondesha lusuno nabi twaciita cilubo. Bene Isilaeli bakakalasha Yehova mankanda aanji; sombi na baana kushibiibi nshobakalinga kucita, Yehova wakalinga kubatondesha lusuno lutamaani. Kucakubonenaako, wakabalwiita ayi: ‘Mwebo kuli ndime muli cintu ca makwebo. Kwiilikaawo, ndimusuni abuumbi alimwi ndamulemeka.’ (Isa. 43:​4, 5) Amunshiku shino Yehova alatutondesha lusuno. Inga twashoma cakutatoonsha ayi nabi twaciita shilubo shinene, Yehova teshi akatukakeewo. Na twaana akuboolela kuli nguwe, tulaakubona ayi acitusuni. Wakatushomesha ayi ‘alalekelela camoyo woonse.’ (Isa. 55:7) Na Yehova watulekelela tulaakulinyumfwabo anga watupa “nkusu shipya.”—Milimo 3:19.

6. Ino Sekaliya 2:8 ilatwiisha nshi pali Yehova?

⁶ Amubelenge Sekaliya 2:8. Yehova alabikila maano kumbotulinyumfwa alimwi alisuni kutushitilisha, ceebo cakwaamba ayi alitusuni. Alakwe alalinyumfwa cibiibi na twalinyumfwa cibiibi. Aboobo inga twashooma ayi alaakutukumbula na twapaila ayi: ‘Amundame kabotu bweenka bulamwa liinso lyanu.’ (Kulu. 17:8) Linso ncipansha ca mubili ciyandika abuumbi alimwi ceelete kulamwa kabotu. Aboobo na Yehova watukoshanisha ku linso lyakwe, cilibo anga atootulwiita ayi, ‘Uyo woonse weenga wacisa ndimwe nobantu bangu, nkokwaamba ayi wacisa cintu ciyandika abuumbi kuli ndime.’

7. Ino nceebonshi tulayandika kunooshoma cakutatoonsha ayi Yehova alitusuni?

⁷ Yehova alisuni kwaamba ayi tunoshoma cakutatoonsha ayi alitusuni. Sombi ceebo ca shakatucitikila mubuumi, inga twatalika kutoonsha  na alitusuni. Na mpashi tutokwiinda mubukaalo pacecino ciindi butootupa kutoonsha na Yehova alitusuni. Ino nciinshi ceenga catucafwa kunooshoma cakutatoonsha ayi alitusuni? Nkwiinda mukwiiya Yehova mbwaakatondesha lusuno kuli Yesu, ambwaatondesha lusuno kubananikitwe akuli ndiswe soonse.

YEHOVA MBWAATONDESHA LUSUNO

8. Ino nceebonshi Yesu wakalinga kushomete cakutatoonsha ayi Baishi balimusuni?

⁸ Kwamyaaka iinji, Yehova a Mwanaakwe bakaba abushicibusa buyumu alimwi balisunene abuumbi. Yehova a Mwanaakwe mbobekala pomwi kwaciindi cilaamfu, kwiinda bantu bali boonse. Pa Mateyo 17:5 Yehova wakaamba cakuteenda mweela mbwaasuni Yesu. Yehova naakwiinga wakaambabo ayi, ‘Uyu ngoompa kukondwa.’ Nacibi boobo, wakalinga kusuni kwaamba ayi tushibe mbwaasuni Yesu. Aboobo wakaamba ayi “uyu ngo Mwanaangu ngoonsuni abuumbi.” Yehova wakalinga kukondetwe pali Yesu bunene bunene ceebo cakwaamba ayi wakalinga kulibambite kwaaba buumi bwakwe. (Efe. 1:7) Alimwi Yesu wakalinga kushomete cakutatoonsha ayi Baishi balimusuni. Mankanda aanji wakaamba cakushinisha ayi Baishi balimusuni.—Joni 3:35; 10:17; 17:24.

9. Ino lilembo lya Bene Loma 5:5 lilatondesha buyani Yehova mbwaabasuni bananikitwe? Amusansulule.

⁹ Yehova alatondesha lusuno aku Beneklistu bananikitwe. (Amubelenge Bene Loma 5:5.) Maswi amu ciGiliki akasebenseshekwa palilembo ili, alatondesha ayi Yehova alibasuni abuumbi bananikitwe cakwaamba ayi lusuno ulo lulakoshanishikwa ku kalonga ka maanshi. Maswi aya alasansulula kabotu Yehova mbwaabasuni bananikitwe! Bananikitwe balicishi ayi ‘Lesa alibasuni.’ (Judi 1) Mutumwi Joni wakaamba mbobalinyumfwa ndyaakalemba ayi: ‘Amubone lusuno lwakwe Ishiwesu mbolubete kukomena pali ndiswe! Cakutubanda ayi tuli bana bakwe Lesa!’ (1 Joni 3:1) Ano sa Yehova alatondesha lusuno ku bananikitwe beenkabo? Sobwe. Alatondesha lusuno kuli ndiswe soonse.

10. Ino ninshila nshi iinditeewo Yehova mbwaakamutondesha lusuno?

¹⁰ Ino ninshila iinditeewo abuumbi Yehova mbwaakatutondesha lusuno? Nkwiinda mukutupa cilubula. Yehova ndyaakatupa cilubula, wakatutondesha lusuno muntu uli woonse ndwaatana kututondeshaawo kale! (Joni 3:16; Loma. 5:8) Yehova wakatupa Mwanaakwe ngwaasuni abuumbi, akumusuminisha kwaamba ayi afwite bantu boonse kwaamba ayi tunolekelelwa shibiibi shesu akuba abushicibusa anguwe. (1 Joni 4:10) Na katukutumana kuyeeya bunene pashintu Yehova a Yesu nshobakacita kwaamba ayi batupe cilubula, inga twanyumfwishisha kabotu mbobatusuni soonse. (Gala. 2:20) Yehova taakwe kutupa cilubula kuteshibo ceebo cakwaamba ayi alacita shintu mubululami. Sombi wakatupa cipo ici ceebo cakwaamba ayi alitusuni. Yehova wakatondesha ayi alitusuni kwiinda mukwaaba Yesu muntu ngwaasuni abuumbi. Wakasuminisha Mwanaakwe kupenga akufwa ceebo ca shibiibi shesu.

11. Ino Jelemiya 31:3 ilatwiisha nshi?

¹¹ Kweelana ambotweeya, Yehova talinyumfwibo ayi alitusuni, sombi alatulwiita ambwaatusuni. Pa Jelemiya 31:3 palaamba ayi: ‘Yehova wakabonekela kuli ndime kaali kulaamfu akwaamba ayi, ‘Ndikusuni alusuno lutamaani. Paceebo ceeco, ndakusenya kuli ndime alusuno lutamaani.’ Yehova wakatusenya kuli nguwe ceebo cakwaamba ayi alitusuni. (Amweelanye a Dutolonomi 7:​7, 8.) Taakuwo muntu na cintu cili coonse ceenga catupansaanya kulusuno lwakwe. (Loma. 8:​38, 39) Ino lusuno lwakwe Lesa lulamupa kulinyumfwa buyani? Amubelenge Kulumbaisha 23, akubona Defedi mbwaakalinyumfwa palusuno lwakwe Yehova ambweenga amwebo mwalinyumfwa.

INO LUSUNO LWAKWE YEHOVA LULAMUPA KULINYUMFWA BUYANI?

12. Amwaambe shiteente shinene nshotucana mu Kulumbaisha 23.

¹² Amubelenge Kulumbaisha 23:​1-6. Mu Kulumbaisha 23, Defedi wakaamba cakutatoonsha ayi Yehova alimusuni alimwi alamutondesha nkuumbu.  Wakasansulula bushicibusa buyumu mbwaakalinga kucite a Yehova uyo ngwaakaamba ayi Mweembeshi wangu. Defedi wakalinga kulinyumfwa kushitilishikwa kutanjililwa a Yehova, alimwi wakalinga kucinka manungo cakumaninina muli nguwe. Defedi wakalinga kucishi ayi Yehova alaakunoomutondesha lusuno mubuumi bwakwe boonse. Ino nciinshi cakamucafwa kushoma cakutatoonsha ayi Yehova alimusuni?

13. Ino nceebonshi Defedi wakalinga kushomete ayi Yehova ananomubikilako maano?

¹³ “Teshi nkapengeewo.” Defedi wakalinyumfwa ayi Yehova wakalinga kumulama kabotu mukwiinga wakalinga kumupa shintu shoonse nshaakalinga kuyandika. Kwiilikaawo, Defedi wakalinga kucishi ayi Yehova ngu shicibusa wakwe alimwi ayi wakalinga kukondetwe pali nguwe. Aboobo wakalinga kucishi ayi tacicite mulandu ashintu sheenga shamucitikila, Yehova alaakutolelela kunoomupa nshayandika. Mukwiinga Defedi wakalinga kushomete ayi Yehova alimusuni alimwi ananomubikilako maano, wakatolelela kuba alusangalalo akukwana anshaakalinga kucite, muciindi cakulisukama.—Kulu. 16:11.

14. Ino Yehova inga watulama buyani munshila yalusuno?

¹⁴ Yehova alatulama calusuno, bunene bunene na shintu shibiibi shatucitikila. Ba Claire, a abo bakasebensela pa Bethel kwamyaaka iindilila 20, tabakalinga kucishiiwo mbweenga bacafwa mukwashi wabo pesule lyakwaamba ayi bamumukwashi wabo bacitikilwa mapensho anene mukukonkana. Baishiwabo bakaciswa bulwashi bwa stroko, mwanike wabo mwanakashi wakakushikwa mulibungano, bamumukwashi bakacileka makwebo abo alimwi bakabataandaawo paŋanda ku baku banki. Ino Yehova wakabalama buyani munshila yalusuno? Ba Claire bakaamba ayi: “Yehova wakashinisha kwaamba ayi bamumukwashi  wangu baba anshobakalinga kuyandika bushiku abushiku. Mankanda aanji, Yehova wakatupa shiinji kwiinda anshetwakalinga kuyandika! Liinji ndayeeya Yehova mbwakatucafwa, alimwi teshi nkalubewo mbwaakatutondesha lusuno. Kuyeeya Yehova mbwakatucafwa, kulancafwa kutolelela kumusebensela calusangalalo nabi na ndapolelwa mapenshi amwi.”

15. Ino nceebonshi Defedi wakaba ankusu alimwi? (Amubone acikope.)

¹⁵ “Ulanengesha kuboolelwaamo nkusu.” Pashiindi shimwi, Defedi wakalinyumfwa kulefuka ceebo ca mapensho amwi apusenepusene ngaakalinga kwiindaamo. (Kulu. 18:​4-6) Nacibi boobo, mukwiinga Yehova wakalinga kumutondesha lusuno akumubikilako maano, wakaba ankusu. Yehova wakatanjilila shicibusa wakwe ulefukite ku “mafulo acite mweemfu” akumisena kwakookeshela kuli “maanshi abotu atafundeene.” Aboobo Defedi wakayuminishikwa alimwi wakacikonsha kutolelela kusebensela Yehova calusangalalo.—Kulu. 18:​28-32.

16. Ino lusuno lwakwe Yehova lwakamucafwa buyani kuba ankusu?

¹⁶ Amunshiku shino, lusuno lutamaani lwakwe Yehova lulatucafwa kuliyumya nabi twiinde mumapensho ali buyani. (Mali. 3:22; Kolo. 1:11) Amuyeeye pacakubonenaako caba Rachel. Bakamaninwa nkusu beebabo ndyebakabashiya akupondokela Yehova paciindi cabulwashi bwa COVID-19. Ino Yehova wakabacafwa buyani? Bakaamba ayi: “Yehova wakashinisha ayi ndalinyumfwa ayi ndisunikwi. Wakampa beshicibusa abo bakalinga kucana ciindi cakuba andime, kundetela shakulya, kuntumina mameseji mwakalinga maswi amalembo ayuminisha, kumweeta mweta andime, akutolelela kunjibalusha ayi Yehova atombikilako maano. Lyoonse ndalumba Yehova pakumpa mukwashi unene unsuni.”

17. Ino nceebonshi Defedi taakwe kuloonda cili coonse?

¹⁷ “Teshi nkaloondeewo mukwiinga mwebo muli anebo.” Liinji Defedi wakalinga kuba mubukaalo buloondesha alimwi wakalinga kucite balwani baanji bacite nkusu. Nacibi boobo, lusuno lwakwe Yehova lwakamupa kulinyumfwa kushitilishikwa. Defedi wakalinga kulinyumfwa ayi Yehova wakalinga anguwe mubukaalo buli boonse alimwi ayi wakalinga kumuyuminisha. Aboobo wakeemba ayi: “Boowa boonse mbondakalinga kucite [Yehova] wakabumana.” (Kulu. 34:4) Nabi kwaamba ayi shimwi shiindi Defedi wakalinga kuloonda abuumbi, wakacikonsha kucileka kuloonda ceebo cakushiba kwaamba ayi Yehova alimusuni.

18. Ino kushiba ayi Yehova alimusuni inga kwamucafwa buyani kuba ankusu na mwaloonda?

¹⁸ Ino kushiba ayi Yehova alitusuni kulatucafwa buyani kuba ankusu ndyetuli mubukaalo buloondesha?  Nankashi usebensa mbuli painiya waliina lya Susi wakaamba mbwaakalinyumfwa lakwe abeebaye, mwanaabo musankwa ndyaakalicaya. Wakaamba ayi: “Na wacitikilwa cintu cibiibi cakuteengashila, cilakukuma abuumbi alimwi ulatalika kuloonda ayi shintu ashimwi shibiibi inga shakucitikila. Sombi lusuno lwakwe Yehova ankuumbu shakwe shilatucafwa kulinyumfwa kushitilishikwa.” Ba Rachel mbotwalinga twaambaawo bakaamba ayi: “Bushiku bumwi mashiku ndyendakalinga kulinyumfwa cibiibi abuumbi, kulisukama, akuloonda abuumbi, ndakapaila kuli Yehova cakupoosha kandila. Lyalo peenkaapo ndakalinyumfwa ayi wancafwa kukalikana mumoyo, bweenka mushali mwanakashi mbwaacita kumwanaakwe kateta, lyalo ndakaya mutulo. Teshi nkabulubeewo bushiku bulya.” Munene waliina lya Tasos wakaangwa kwamyaaka 4 ceebo cakukaka kunjila busoja. Ino Yehova wakamutondesha buyani lusuno akumubikilako maano? Wakaamba ayi: “Yehova wakampa shiinji kwiinda anshendakalinga kuyandika. Ici cakancafwa kunooshoma cakutatoonsha ayi inga ndacinka manungo muli nguwe cakumaninina. Alimwi kwiinda mumushimu wakwe usalashi, Yehova wakampa kuba alusangalalo nabi kwaamba ayi ndakalinga mubukaalo bubiibi. Ishi shakancafwa kushiba ayi na kancinka manungo abuumbi muli nguwe, ndanoobona mbweshi anontondesha lusuno. Aboobo ndakasalawo kutalika kusebensa bupainiya bwaciindi coonse ndyendakalinga mujeele.”

AMUSENE PAFWIIFWI A LESA WANU SHINKUUMBU

19. (a) Ino tulaakunopaila buyani na katucishi ayi Lesa alitusuni? (b) Ino ndilembo nshi lyaamba palusuno lwakwe Yehova ndyemusuni abuumbi? (Amubone kabokosi kacite mutwi utokwaamba ayi  “Malembo Atucafwa Kushiba ayi Yehova Alitusuni Abuumbi.”)

¹⁹ Shakubonenaako shoonse nshetwabandikaawo shilatondesha ayi Yehova “Lesa shilusuno,” ali andiswe! (2 Koli. 13:11) Alabikila maano kumuntu womwi awomwi. Tulishomete cakutatoonsha ayi ‘tulaakunoofunwa ceebo ca lusuno lwakwe lutamaani.’ (Kulu. 32:10) Na liinji katukutumana kuyeeya Yehova mbwaatutondesha lusuno, tulabona mbwaatubikilako maano alimwi tulalinyumfwa kuba pafwiifwi anguwe. Inga twapaila kuli nguwe kuswa paanshi lyamoyo akumusenga ayi anootutondesha lusuno. Inga twamulwiita shoonse shitootupa kulisukama ceebo cakushiba kwaamba ayi alanyumfwishisha mbotulinyumfwa alimwi alisunishishi kutucafwa.—Kulu. 145:​18, 19.

20. Ino lusuno lwakwe Yehova lulatucafwa buyani?

²⁰ Bweenka mulilo mboupa kwaamba ayi tunyumfwe kabotu na kuli mpewo, lusuno lwakwe Yehova lulatuyuminisha ndyetutokwiinda mumapensho. Aboobo amusumine lusuno lwakwe Yehova ulo lweenga lwamuyuminisha akumupa kuba aluumuno. Alimwi soonse atusumine lusuno lwakwe kwiinda mukwaamba ayi: ‘Yehova ndimusuni’!—Kulu. 116:1.