1-2. Ino cishomesho cakwe Yehova ncetucana palilembo lya Isaya 65:16, 17 cilatucafwa buyani kutolelela kuliyumya?

“MUTABOOLI PESULE!” ngowakalinga mutwi usangalasha wakubungana kunene kwamu 2017. Pakubungana kulya twakeeya nsheenga twaciita kwaamba ayi tutolelele kuliyumya ndyetutokwiinda mumapensho. Peenda myaaka yone ano kuswa ciindi cilya, abobulya tuciliyumya mu bweende bwashintu ubu.

² Ino ngamapensho nshi ngomwakeedaamo coonono na ngomutokwiindaamo pacecino ciindi? Sa nkufwitwa shikamukowa na shicibusa ngomusuni? Sa nkuciswa bulwashi bunene? Sa buumi mbuyumu ceebo ca kucembela, kupolelwa mapensho anene alicitikila, kulwanwa, na kupenshekwa? Na mpashi mutokwiinda mumapensho esa ceebo ca bulwashi bunene mbuli COVID-19? Tutolangila bushiku mapensho oonse aya ndyeshi akamaane, ciindi ndyeshi tukabule kwiibalukaawo alimwi ayi kwakalingaawo mapensho!​—Amubelenge Isaya 65:16, 17.

3. Ino nshiinshi nshotweelete kucita, alimwi ino nceebonshi?

³ Buumi pacecino ciindi mbuyumu, alimwi mpashi kunembo tulaakwiinda mumapensho eenditeewo. (Mate. 24:21) Aboobo tulyeelete kwiiya nsheenga twaciita kwaamba ayi tutolelele kuliyumya. Ino nceebonshi? Tulyeelete kucita boobo mukwiinga Yesu wakaamba ayi: “Uyo eshi akayuminine kushikila kumamanino ulaakupulushikwa.” (Mate 24:13) Inga twacikonsha kutolelela kuliyumya na katuyeeya bamwi mbobatooliyumya ndyebatokwiinda mumapensho ali mbuli ngotutokwiindaamo.

4. Ino nciinshi nceenga twaambila ayi Yehova ncakubonenaako ciinditeewo pamakani akuliyumya?

⁴ Ino ngani ucite cakubonenaako ciinditeewo cakuliyumya? Yehova Lesa. Sa cikumbulo ici camukankamika? Mpashi camukankamika. Ano na mwayeeyawo, inga mwanyumfwisha. Satana ngotokweendelesha cishi, aboobo ciliswitebo mapensho. Yehova alicite nkusu shakumana mapensho oonse ali mucishi paciindi cili coonse,  nacibi boobo, atoolindila bushiku mbwaakabika kunembo. (Loma. 9:22) Pacecino ciindi, Lesa wesu watolelela kuliyumya kushikila bushiku mbwaakabika bukashiike. Amuleke tubandike pashintu shili 9 Yehova nshaatoliyumya.

5. Ino liina lyakwe Lesa lyakasebanishikwa buyani, alimwi ino mulalinyumfwa buyani pamakani aya?

⁵ Kusebaanishikwa kwa liina lyakwe. Yehova alilisuni liina lyakwe, alimwi alisuni kwaamba ayi muntu uli woonse anoolilemeka. Baibo ilaamba ayi: “Nebo ndime [“Yehova,” NWT], ili ndyeliina lyangu; alimwi nshipi bulemu bwangu kuumwi, kulumbaisha kweelete ndime, nshikulekeli shibumbwabumbwa.” (Isa. 42:8) Nacibi boobo, liina lyakwe lyasebaanishikwa kwa myaaka 6,000 yaiinda. (Kulu. 74:10, 18, 23) Ishi shakatalikila mumuunda wa Edeni Diabolosi (liina lisansulula ayi “Mubeshi”) ndyaakabekesha Lesa ayi taakalinga kusuni Adamu a Efa kuba ashintu shibotu nshobakalinga kuyandika kwaamba ayi babe basangalete. (Mata. 3:1-5) Kuswabo paciindi cilya, Yehova alabekeshekwa ayi taasuniiwo bantu kuba ashintu nshebayandika. Yesu wakalisukama ceebo ca kusebaanishikwa kwa liina lya baIshi. Ncoceeco cakapa kwaamba ayi aiishe bashikwiiya bakwe kunoopaila ayi: ‘NoBeeshiwesu nomuli kwiculu, alisalashikwe liina lyanu.’​—Mate. 6:9.

6. Ino nceebonshi Yehova Lesa walekela bantu kulyeendelesha beene kwaciindi cilaamfu?

⁶ Bantu baanji balapikisha Lesa abweendeleshi bwakwe. Yehova eenkabo ngoocite nkusu shakweendelesha kwiculu alimwi apacishi capanshi, alimwi taakuwo buleelo bweenga bweelana abuleelo bwakwe. (Ciyu. 4:11) Nacibi boobo, Satana aleelesha kuyunga baanjelo alimwi abantu kwaamba ayi banooyeeya ayi Lesa taeendeleshi kabotu. Cakalinga kweelete kutola ciindi kwaamba ayi cancine cakwaamba ayi Yehova ngoweelela kweendelesha cibonekele patuba. Aboobo mubusongo, Lesa walekela bantu kulyeendelesha beene kwaciindi cilaamfu kwaamba ayi babone ayi inga tabaswitilili kwakubula kunyumfwila Mulengi. (Jele. 10:23) Ceebo cakukalika moyo kwakwe Lesa, taakuwo eshi akatoonshe ayi Lesa ngoocite nkusu shakweendelesha kwiculu alimwi apacishi capanshi. Bantu boonse balaakushiba kwaamba ayi Yehova eenkabo ngoocishi kweendelesha alimwi Bwaami bwakwe mbweshi bukalete luumuno lwancinencine akuliiba pacishi capanshi.

7. Ino mbaani bakapondokela Yehova, alimwi ino alaakubacita buyani?

⁷ Kupondoka kwa bana bakwe bamwi. Yehova wakalenga baanjelo alimwi abantu bamaninite. Ano munjelo wakatalika kwiitwa ayi Satana (liina lisansulula ayi “Shikupikisha”) wakapondokela Yehova akuyunga bantu bamaninite, Adamu a Efa, kwaamba ayi abalo bapondokele Yehova. Baanjelo alimwi abantu bamwi abalo bakapondoka. (Judi 6) Mukuya kwaciindi, bene Isilaeli, bantu Lesa mbwaakalinga wasala abalo bakamupondokela akutalika kulambila shibumbwabumbwa. (Isa. 63:8, 10) Yehova wakakalashikwa. Nacibi boobo, wakaliyumya alimwi alaakutolelela kucita boobo kushikila bushiku ndyeshi akanyonyoole baabo boonse bamupondokela. Lyalo Yehova alimwi abaabo boonse bashomeka kuli nguwe balaakusangalala kwaamba ayi kuliyumya ceebo ca shibiibi shamu bweende ubu kwamana!

8-9. Ino mbubeshi nshi bwaambwa pali Yehova, alimwi ino nshiinshi nsheenga twaciita pabubeshi ubu?

⁸ Bubeshi bwakwe Satana Diabolosi. Satana wakabekesha Jobo alimwi abasebenshi bakwe Yehova boonse bashomeka ayi balasebensela Lesa ceebo ca shintu nshaabapa. (Jobo 1:8-11; 2:3-5) Diabolosi watolelela kubekesha bantu kushikila apacecino ciindi. (Ciyu. 12:10) Inga twatondesha kwaamba ayi Satana nshaamba nshakubeca, na twatolelela kuliyumya akushomeka kuli Yehova ndyetutokwiinda mumapensho ceebo cakwaamba ayi tulimusuni. Bweenka mbuli Jobo, Yehova alaakutupa shoolwe ceebo cakuliyumya kwesu.​—Jemu. 5:11.

 ⁹ Kwiinda mu bamatanjilili babupailishi bwakubeca, Satana alabeca bantu ayi Yehova ngushilunkutwe alimwi ngoolengesha bantu kupenga. Beshibupailishi bamwi balaamba ayi na mwaana wafwa Lesa alamutola kwiculu kwaamba ayi akabe munjelo. Mucobwe unene abuumbi kuli Yehova! Sombi cancine ncotushi ncakwaamba ayi Yehova ngu Lesa shilusuno. Aboobo na twaciswa bulwashi bunene na kufwitwa muntu ngotusuni, tatupi mulandu Lesa. Muciindi cakucita boobo, tulashoma kwaamba ayi bushiku bumwi Yehova alaakukushawo malwashi alimwi akubusha baabo bakafwa. Inga twalwiitako uli woonse weenga wasuna kukutika kwaamba ayi Yehova ngu Lesa shilusuno. Kucita boobo kulapa kwaamba ayi Yehova akumbule baabo bamutongoola.​—Tus. 27:11.

10. Ino Kulumbaisha 22:23, 24 ilatulwiita nshi pali Yehova?

¹⁰ Kupenga kwa basebenshi bakwe mbwaasuni. Yehova ngu Lesa shinkumbu. Cilamucisa abuumbi kutubona katupenga, mpashi inga caba ayi tutopenga ceebo cakupenshekwa, kuciswa, na shilubo shesu. (Amubelenge Kulumbaisha 22:23, 24.) Yehova alishi mbotulinyumfwa; taasuni kwaamba ayi mapensho ayo atolelele, aboobo alaakwamana. (Amweelanye a Kulonga 3:7, 8; Isaya 63:9.) Bushiku bulaakushika ndyeshi ‘akakunkumune minsonshi [yesu] yoonse, lufu teshi lukabeeko alimwi, teshi kukabe buumba, kulila nabi kunyumfwa kucisa, mukwiinga shintu shikulukulu shoonse shashimingana.’​—Ciyu. 21:4.

11. Ino Yehova alalinyumfwa buyani pabasebenshi bakwe bashomeka bakafwa?

¹¹ Beshicibusa bakwe bakafwa. Ino Yehova alalinyumfwa buyani pabasebenshi bakwe bashomeka bakafwa? Atolangila kubabona alimwi! (Jobo 14:15) Amuyeeyebo Yehova mbwaatolangila kubona Abulaamu shicibusa wakwe! (Jemu. 2:23) Na Mose, uyo ngwaakalinga kubandikaakwe “meenso ameenso”! (Kulo. 33:11) Alimwi atolangila kubona akunyumfwa Defedi abeshikulumbaisha bamwi kabeemba nyimbo shabo shibotu shakumulumbaisha! (Kulu. 104:33) Nabi  kwaamba ayi beshicibusa bakwe aba bakafwa, Yehova taakwe kubalubaako. (Isa. 49:15) Aleebaluka mbobakalinga. Baibo ilaamba ayi, “kuli nguwe boonse mboomi.” (Luka 20:38) Bushiku bumwi alaakubabusha, alimwi alaakunookutika kumipailo yabo yakuswa panshi lya moyo akutambula kulambila kwabo bweenka mbuli mbwaakalinga kucita kale kale. Na mwakafwitwa muntu ngomusuni, cancine ici inga camuyuminisha.

12. Ino nshiinshi bunene bunene shikalasha Yehova abuumbi?

¹² Bamucita shibiibi abo bapensha bamwi. Adamu a Efa ndyebakapondoka mumuunda wa Edeni, Yehova wakalinga kucishi kwaamba ayi shintu shilakutaanguna kubica kashitana kuba kabotu. Yehova alipatite shibiibi, kutalulama, alimwi ankoondo shili pacishi capanshi. Alimwi alabikila maano abuumbi kubaabo batacite nkusu awakubashitilisha mbuli bana banshiwa alimwi abamukalubinje. (Seka. 7:9, 10) Yehova cilamucisa abuumbi bunene bunene na wabona basebenshi bakwe bashomeka kabapenshekwa akubikwa mujeele. Aboobo mwebo noonse nomwatolelela kuliyumya pomwi anguwe, Yehova alimusuni abuumbi.

13. Ino nshibiibi nshi Lesa nshaabona bantu kabacita, alimwi ino alaakucita buyani?

¹³ Bantu batolelela kucita shintu shibiibi abuumbi. Bantu bakalengwa ankusu shakukonkela mibo yakwe Lesa, sombi Satana alisuni ayi banoocita shintu shibiibi. Yehova Lesa “ndyaakabona ayi bubi bwa bantu bwafulisha pacishi” muciindi cakwe Nowa, ‘wakanyumfwa cibiibi kwaamba ayi wakapanga bantu akubabika pacishi capanshi, alimwi cakamucisa abuumbi kumoyo.’ (Mata. 6:5, 6, 11) Sa shintu shaalukaawo kuswabo ciindi cakwe Nowa? Sobwe napaceyi! Satana alanyumfwa kabotu abuumbi na wabona bulale bwa mishobo ili yoonse mbobwafula abuumbi pacishi capanshi, mbuli koonana kutabete kabotu kwa basankwa abanakashi alimwi akoonana kwa banakashi na basankwa beenka beenka! (Efe. 4:18, 19) Satana alakondwa abuumbi bunene bunene na musebenshi wakwe Yehova wacita cilubo cinene. Na kukalika moyo kwakwe Yehova kukamaane, alaakucita shitondesha kwaamba ayi alipatite mibo ibiibi kwiinda mukunyonyoola baabo boonse batolelela kucita shibiibi.

14. Ino bantu batoocita buyani kucishi capanshi alimwi akushinyama?

¹⁴ Bantu batoonyonyoola cishi Lesa ncaakapanga. Muntu taakwe kweelabo ‘pakweendelesha muntunyina munshila imuletela mapensho’ sombi weelikaawo akutalama kabotu cishi capanshi alimwi ashinyama isho Yehova nshaakamupa ayi alame. (Shiku. 8:9; Mata. 1:28) Beshisayansi bamwi balaamba ayi mumyaaka itoosa kunembo mishobo ya shinyama shiinji alimwi ashishango shili 1 miliyoni ilaakumanina limwi ceebo ca shintu bantu nshebacita. Ncobaambila ayi shilengwa shitomanaawo! Nacibi boobo, cabotaako ncakwaamba ayi Yehova washomesha ayi ‘alaakunyonyoola baabo boonse banyonyoola cishi capanshi’ lyalo akwaalula cishi capanshi kuba paladaiso.​—Ciyu. 11:18; Isa. 35:1.

15-16. Ino nciinshi ceelete kutupa kuliyumya bweenka mbuli Yehova? Amwaambe cikoshanyo.

¹⁵ Amuyeeye pamapensho ayumu Ishiwesu wakwiculu ngwaaliyumya kwamyaaka iinji abuumbi. (Amubone kabokosi kacite mutwi utokwaamba ayi “ Mapensho Yehova Ngatoliyumya.”) Yehova inga wamana bweende bwashintu ubu bubiibi paciindi cili coonse. Nacibi boobo, kukalika moyo kwakwe kwatucafwa abuumbi! Amuyeeye cikoshanyo ici. Amuyeeye ayi beebene batolangila kuba amwaana balwiitikwa ayi mwaana ngobatoolangila alicite bulwashi bunene alimwi na akashalwe alaakupenga abuumbi, lyalo alaakufwa kaacili muniini. Nacibi boobo, pesule lyakwaamba ayi mwaana washalwa, bashali balikondetwe nabi kwaamba ayi cilaakuba ciyumu kumulama. Mukwiinga balimusuni mwanaabo, balaakucita  shoonse nsheenga bacikonsha kwaamba ayi bamulame kabotu.

¹⁶ Ubu mbocibete kubaana boonse bakashalwa kuswa kuli Adamu a Efa, tabamaninite. Nacibi boobo, Yehova alibasuni alimwi alababikila maano. (1 Joni 4:19) Alimwi mubupusano abashali mbotwaambawo mucikoshanyo, Yehova alicite nkusu shakumana mapensho atokwiindaamo bana bakwe. Wakasala ciindi ndyeshi akamane mapensho oonse bantu ngobatokwiindaamo. (Mate. 24:36) Lusuno lwakwe Yehova lulyeelete kutupa kucita nsheenga twacikonsha kwaamba ayi tutolelele kuliyumya!

17. Ino nceebonshi makani aamba pali Yesu ngotucana pa Bene Ebulu 12:2, 3 alatupa kutolelela kuliyumya?

¹⁷ Yehova ncakubonenaako cibotu kwiindaawo pamakani akuliyumya. Yesu wakakonkela cakubonenaako ca baIshi cakuliyumya. Ndyaakalinga pacishi capanshi, wakacobolwa, kusebaana, alimwi akucaikwa pacisamu cakupenshesha ceebo ca ndiswe. (Amubelenge Bene Ebulu 12:2, 3.) Ncakutatoonsha kwaamba ayi cakubonenaako cakwe Yehova cakamupa nkusu shakuliyumya. Aswebo inga catucafwa.

18. Ino 2 Pita 3:9 ilatucafwa buyani kunyumfwishisha Yehova nshatokumanisha ceebo cakukalika moyo kwakwe?

¹⁸ Amubelenge 2 Pita 3:9. Yehova alishi ciindi ceelete ndyeshi akanyonyoole cishi cibiibi ici. Mukwiinga alakalika moyo, bantu baanji baba acoolwe cakwiiya pali nguwe, aboobo pacecino ciindi likoto linene batopaila Yehova batoshika kumamiliyoni. Boonse balalumba kwaamba ayi Yehova watolelela kuliyumya kushikila ciindi ndyebakashalwa, ico cabapa coolwe cakwiiya kumusuna alimwi akulyaaba kuli nguwe. Na pacishi capanshi pakabe bantu mamiliyoni beshibakaliyumye kushikila kumamanino, cilaakubonekela patuba kwaamba ayi ncakwiila Yehova wakacita kabotu kukalika moyo!

19. Ino nciinshi ncotweelete kuba bashinishite kucita, alimwi ino ncilambu nshi nceshi tukacane?

¹⁹ Cakubonenaako cakwe Yehova cilatucafwa kushiba mbweenga twaliyumya calusangalalo. Yehova watolelela kuba “Lesa usangalete” nabi kwaamba ayi Satana waleta mapensho aanji alimwi abuumba. (1 Timo. 1:11) Aswebo inga twatolelela kuliyumya calusangalalo ndyetutolindila cakukalika moyo kwaamba ayi Yehova akasalashe liina lyakwe, kulengesha bantu kushiba ayi ngoweelela kweendelesha, kukushawo shibiibi shoonse, alimwi akumana mapensho oonse ngotwiindaamo pacecino ciindi. Atube bashinishite kuliyumya akuyuminishikwa acakubonenaako cakuliyumya cakwe Ishiwesu wakwiculu. Na tukacite boobo, maswi aamba ayi: “Ulisangalete muntu uyo utolelela kuliyumya mumeelesho, mukwiinga na Lesa akasangalale anguwe alaakutambula mushini wabuumi, uyo Yehova ngwaakashomesha baabo batolelela kumusuna” alaakuba ancine kuli ndiswe.​—Jemu. 1:12.