1. Ino nciinshi ceenga cacitika na bamwi kabayuminisha mushimu wakulibona ayi balinditeewo bamwi?

MUNSHIKU shino, bantu baanji mucishi balayungwa amushimu wakulibona ayi baleendaawo bamwi. Kucakubonenaako, abo bacita bisinesi inga basuna kuya panembo mubisinesi kwiinda bamwi, aboobo inga bacita shintu sheenga shaleta mapensho kubamwi. Muntu utoocica mulubilo lwakupingana inga wacisa mubye mukashanga uli kulubasu kumwi kwaamba ayi atawiini. Beshicikolo inga basebensesha likeji kwaamba ayi beelele kucana musena pacikolo cinene. Mbuli Beneklistu tulishi kwaamba ayi mibo ya mushobo uyo taibete kabotu; ndubasu lwa “micito ya buntu.” (Gala. 5:19-21) Nacibi boobo, sa inga cacitika kwaamba ayi bamakwesu abenankashi bamwi cakuteshiba inga kabayuminisha mushimu wakulibona ayi balinditeewo bamwi? Uyu ngumwiipusho ubotu kuyeeyawo, mukwiinga na mulibungano mwaba mushimu uyu tamubiiwo lucatano.

2. Ino nshiinshi nsheshi twiiye mumutwi uyu?

² Mumutwi uyu, tutobandika pamibo itabete kabotu yeenga yatulengesha kuyuminisha mushimu wakupingana mulibungano. Tutokwiiya ashakubonenaako sha basankwa abanakashi bashomeka baambwa mu Baibo abo bakacikonsha kuleya mushimu wakupingana. Cakutaanguna, amuleke tubandike citupa kucita shintu munshila imwi.

3. Ino njimiipusho nshi njotweelete kuliipusha?

³ Cilabota ciindi aciindi kukala panshi akulanga langa cituyuminisha kucita shintu. Mpashi inga twaliipusha ayi: ‘Sa kulibona ayi  ndayandika kwiinda bamwi nkokumpa kulinyumfwa kabotu? Sa ndasebensa cankusu mulibungano ceebo cakusuna kwiinda bamwi? Na sa ndasebensa cankusu ceebo cakwaamba ayi ndisuni kusangalasha Yehova?’ Ino nceebonshi tulyeelete kuliipusha miipusho iyi?

4. Ino nceebonshi tatweelete kulyeelanisha kubamwi, kweelana ashaamba lilembo lya Bene Galatiya 6:3, 4?

⁴ Baibo ilatulwiita ayi tatweelete kulyeelanisha kubamwi. (Amubelenge Bene Galatiya 6:3, 4.) Ino nceebonshi? Ceebo comwi ncakwaamba ayi, na katuyeeya ayi tutoocita kabotu kwiinda bamwi inga twatalika kulisumpula. Alimwi na katuyeeya ayi bamakwesu batoocita kabotu kwiinda ndiswe, inga twaboolela mwisule. Aboobo kuyeeya koonse kobilo takubete kabotu. (Loma. 12:3) Nankashi waliina lya Katerina, * ukala kucishi ca Greece, wakaamba ayi: “Ndakalinga kulyeelanisha kubamwi mbondakalinga kubona ayi balaboneka kabotu kwiinda ndime, balasebensa kabotu muncito yakushimikila, alimwi abaabo mbocibeta cuubu kuba abeshicibusa. Ici cakampa kulinyumfwa kuba utacite mpindu.” Tulyeelete kwiibaluka kwaamba ayi Yehova ngootusenya kuli nguwe, kuteshi ceebo cakwaamba ayi tulaboneka kabotu, tulicishi kwaamba, na mpashi tulishibikitwe sobwe, sombi ceebo cakwaamba ayi tulimusuni alimwi tulanyumfwila Mwanaakwe.​—Joni 6:44; 1 Koli. 1:26-31.

5. Ino nciinshi ncomweeya pasheesho shakacita mukwesu waliina lya Hyun?

⁵ Mwiipusho umwi ngotweelete kuliipusha ngooyu, ‘Sa ndishibikitwe mbuli muntu uyuminisha luumuno, na lyoonse ndisuni kupikishanya abamwi?’ Amunyumfwe shakacita mukwesu waliina lya Hyun, ukala kucishi ca South Korea. Wakalinga kuyeeya ayi abo bacite mikuli mulibungano bakalinga kulibona anga balamwiindaawo. Wakaamba ayi, “Ndakalinga kwaamba shitabete kabotu pabamakwesu aba, alimwi liinji ndakalinga kupikisha nshobakalinga kwaamba.” Ano ino nshiinshi shakaswaamo? Wakaamba ayi: “Nshendakalinga kucita shakapa kwaamba ayi mulibungano mube kutacatana.” Beshicibusa bakamucafwa mukwesu Hyun kushiba ayi wakalinga kucite lipenshi. Mukwesu Hyun wakaalula mbwaakalinga kubona shintu, aboobo pacecino ciindi ngu munene mulibungano usebensa kabotu. Na twabona kwaamba ayi tulicite mushimu utayuminishi luumuno, tulyeelete kwaaluka peenkapo.

6. Kweelana a Bene Galatiya 5:26, ino njimibo nshi ibiibi yeenga yapa muntu kuyuminisha mushimu wakupingana?

⁶ Amubelenge Bene Galatiya 5:26. Ino njimibo nshi itabete kabotu yeenga yaleta mushimu wakupingana? Mubo womwi nkulisumpula. Muntu ulisumpula ulalibona ayi ulindiite bamwi alimwi ulayeeyabo palwaakwe mwiine. Mubo umwi utabete kabotu ngu munyono. Muntu ucite munyono teelibo pa kukumbwa sheesho shicite bamwi sombi taasuniiwo kwaamba ayi bamwi babe asheesho nshebacite. Aboobo muntu ucite munyono alipatite bamwi. Ncakutatoonsha kwaamba ayi taakuwo weenga wakondwa kuba amibo ibiibi mbuli yeeyi!

7. Ino ncikoshanyo nshi ceenga catucafwa kushiba mubo wakulisumpula amunyono ncotabetele kabotu?

⁷ Kulisumpula amunyono inga twakukoshanisha kumuswa weenga wanyonyoola masondo akuŋanda. Nabi ciluli ciboneke kabotu buyani na masondo akalikwa kumuswa, cilaakuwa mukuya kwaciindi. Ubu bweenka mbocibete akumuntu weenga kaasebensela Yehova uku kaacite munyono akulisumpula. Inga wacikonsha kwakaciindi, sombi mukuya kwaciindi inga waalilwa kutolelela. (Tus. 16:18) Inga wacileka kusebensela Yehova alimwi ici inga camuletela mapensho alimwi akucisa bamwi. Ino inga twacita buyani kwaamba ayi tuleye munyono akulisumpula?

8. Ino inga twacita buyani kwaamba ayi tuleye kulisumpula?

 ⁸ Inga twaleya kulisumpula na twakonkela kululika Paulo nkwakalwiita bene Filipi ayi: “Mutaciti cintu nabi comwi cakulisuna nabi kulisumpula, sombi muliceeshe lyoonse kunoobona babyaanu anga balamwiindaawo.” (Filip. 2:3) Na katubona ayi bamwi balatwiindaawo, teshi tukatalike kunopikishanya abaabo mbotubona ayi balicite shipo shiindite pasheesho nshetucite. Muciindi cakucita boobo, tulaakunoosangalala ambabo. Alimwi ubu mboceelete kuba bunene bunene na shipo isho balashisebensesha muncito yakwe Yehova. Alimwi na abalo bamakwesu abenankashi bacite shipo shilibetele bakonkela Paulo nshaakaamba, balaakunoobikila maano kumibo ibotu njetucite. Lyalo kucita boobo kulaakuyuminisha luumuno alucatano mulibungano.

9. Ino inga twacita buyani kwaamba ayi tuleye munyono?

⁹ Inga twaleya kunyumfwila bamwi munyono na tweebaluka cancine cakwaamba ayi kuli shimwi nsheenga tatucikoonshi kucita kabotu. Ici cilaakutucafwa kuleya kulitondesha ayi tuliindite bamwi. Muciindi cakucita boobo, tulaakwelesha kwiiya kubaabo bacishi kabotu kwiinda ndiswe. Kucakubonenaako, atwaambe ayi mukwesu umwi mulibungano alaamba kabotu makani. Inga twamusenga ayi atwiisheko mbwalibambila na alicite likani. Na nankashi umwi alicishi kabotu kuteleka, inga twamusenga kwaamba ayi atwiisheko bwakuteleka kabotu. Alimwi na mukwesu nabi nankashi wacanike tacishi shakucita kwaamba ayi abe abeshicibusa, inga weepusha umwi ucishi kabotu bwakucita boobo. Kucita boobo kulaakutucafwa kuleya munyono akupa kwaamba ayi twiiye shiinji.

10. Ino ndipenshi nshi Gidyoni ndyaakacana?

¹⁰ Amuyeeye shakacitika pakati kakwe Gidyoni, wakalinga wa mumukowa wakwe Manase, alimwi abasankwa bamumukowa wakwe Efuleemu. Yehova wakacafwa Gidyoni abasankwa bali 300 kukoma munkondo, cintu cakalinga kweelete kubapa kulisumpula abuumbi. Basankwa bamumukowa wakwe Efuleemu bakaya mukukumanya Gidyoni, kuteshi kwaamba ayi bamuluumbe, sombi kwaamba ayi batalike kwaambana. Citooboneka anga bakakalala ceebo cakwaamba ayi Gidyoni taakwe kubeetako  pakutaanguna kunkondo yakulwana balwani bakwe Lesa. Bakalinga kubikila maano abuumbi kukulemekwa abamwi. Sombi bakaluba kwaamba ayi cakalinga kuyandika abuumbi nkulemeka liina lyakwe Yehova akushitilisha bantu Bakwe.​—Boombo. 8:1

11. Ino Gidyoni wakaamba nshi kubene Efuleemu?

¹¹ Gidyoni mukuliceesha wakalwiita bene Efuleemu ayi: “Ino nebo ndakacita nshi kwiinda ndimwe?” Lyalo wakabebalusha Yehova mbwakabacafwa kucita shintu shikankamika. Aboobo ndyebakanyumfwa nshaakaamba, basankwa abo “bakoomuna.” (Boombo. 8:2, 3) Gidyoni wakaliceesha kwaamba ayi luumuno lutolelele pakati kabantu bakwe Lesa.

12. Ino nshiinshi nsheenga tweeya kucakubonenaako ca bene Efuleemu acakwe Gidyoni?

¹² Ino nshiinshi nsheenga tweeya pamakani aya? Cakubonenaako ca bene Efuleemu citotwiisha kwaamba ayi tulyeelete kubikila maano abuumbi kukulemeka Yehova kuteshi kusuna kulemekwa. Mbuli mitwi ya mikwashi alimwi abamanene, kuli shiinji nsheenga tweeya kucakubonenaako cakwe Gidyoni. Na muntu umwi wakalala ceebo ca cintu cimwi ncetwakacita, tulyeelete kutaanguna kunyumfwishisha cakalengesha kwaamba ayi akalashikwe. Alimwi inga twamulumba pashintu nshaacita kabotu. Kucita boobo kulayandika kuliceesha bunene bunene na cilibweneketebo patuba kwaamba ayi lakwe ngwalubisha. Nacibi boobo, cintu ciyandika abuumbi nkunyumfwana abamakwesu kuteshi makani akutondesha walubisha.

13. Ino ndipenshi nshi Aana ndyaakeendaamo, alimwi ino wakalikoma buyani?

¹³ Amuyeeye cakubonenaako cakwe Aana. Wakalinga kweebetwe ku mwine Lefi waliina lya Elikana, uyo wakalinga kumusuni abuumbi. Nacibi boobo, Elikana wakalinga kucite mwanakashi umwi, waliina lya Penina. Elikana wakalinga kusuni Aana kwiinda Penina; nacibi boobo, “Penina wakashala baana, sombi Aana taakalinga kuciteewo nabi womwi.” Paceebo ceeci, Penina wakalinga kuseka Aana ‘lyoonse kwaamba ayi amukalashe.’ Ino Aana wakalinyumfwa buyani? Wakakalala abuumbi cakwaamba ayi “wakalinga kunoolilabo akukaka kulya cili coonse.” (1 Samwe. 1:2, 6, 7) Nacibi boobo, Baibo tayaambiwo ayi Aana wakeelesha kubooshesha cibiibi Penina munshila ili yoonse. Muciindi cakucita boobo, wakapaila kuli Yehova akumulwiita mbwaakalinga kulinyumfwa akushoma ayi alaakumucafwa. Ano sa Penina wakacileka kupensha Aana? Baibo tayaambiwo. Nacibi boobo, ncotushi ncakwaamba ayi Aana wakacikonsha kukalika moyo. “Lyalo abuumba bwakamana.”​—1 Samwe. 1:10, 18.

14. Ino nshiinshi nsheenga tweeya kucakubonenaako cakwe Aana?

¹⁴ Ino nshiinshi nsheenga tweeya kucakubonenaako cakwe Aana? Na muntu umwi atokweelesha kulitondesha ayi ulamwiindawo, tamweelete kupikishanya akwe kwaamba ayi amwebo mumutondeshe ayi mulamwiindaawo. Muciindi cakubooshesha cibiibi pacibiibi, amucite ceenga cayuminisha kuba muluumuno amuntu uyo.  (Loma. 12:17-21) Na wakaka kwaaluka, mwebo mulaakutolelela kulinyumfwa kabotu mumoyo.

15. Ino nshaakacita Apolosi shakalinga kukoshenye buyani anshaakacita Paulo?

¹⁵ Mukweelaako, amuyeeye nsheenga tweeya kucakubonenaako cakwe shikwiiya Apolosi alimwi a mutumwi Paulo. Boonse bakalinga kwaashi kabotu abuumbi Malembo. Bakalinga kushibikitwe alimwi bakalinga kucishi kabotu abuumbi kwiisha. Alimwi boonse bakacafwa bantu baanji kuba bashikwiiya. Nacibi boobo, tabakalinga kunyumfwilana munyono.

16. Ino Apolosi wakalinga muntu uli buyani?

¹⁶ “Apolosi wakashalilwa mundabala inene ya Alekisandiliya,” iyo yakalinga kushibikitwe abuumbi paciindi ico. Wakalinga muntu ucishi kabotu kwaamba, alimwi “wakalinga kwaashi buumbi Malembo.” (Milimo 18:24) Apolosi ndyaakalinga ku Kolinto, bamwi mulibungano bakatondesha ayi bakalinga kumusuni abuumbi kwiinda mbobakalinga kusuni bamakwesu bamwi, mbuli Paulo. (1 Koli. 1:12, 13) Sa Apolosi wakayuminisha mushimu uyu wakutacatana? Inga tatushomi ayi nshaakacita. Alimwi paciindi Apolosi ndyaakaswa ku Kolinto, Paulo wakamuyuminisha ayi abooleleko. (1 Koli. 16:12) Naakwiinga Apolosi wakalinga kuyuminisha mushimu wakutacatana mulibungano, naakwiinga Paulo taakwe kumuyuminisha ayi abooleleko. Aboobo ncakutatoonsha kwaamba ayi Apolosi wakasebensesha kabotu cipo cakwe. Wakaambilisha makani abotu alimwi akuyuminisha bashominyina. Alimwi inga twashooma ayi Apolosi wakalinga musankwa uliceesha. Kucakubonenaako, Baibo tayaambiwo ayi wakakalashikwa Akwila aPulisila ‘ndyebakamusansulwita mbuli nshila yakwe Lesa mbweebete.’​—Milimo 18:24-28.

17. Ino Paulo wakacita buyani kwaamba ayi ayuminishe luumuno?

¹⁷ Mutumwi Paulo wakalinga kucishi Apolosi mbwaakasebensa kabotu. Nacibi boobo, taakwe  kulisukama ayi bantu bananoobona anga Apolosi alayandika kwiinda nguwe. Na twabelenga makani Paulo ngaakalembela bene Kolinto, inga twaboona kwaamba ayi wakalinga muntu uliceesha alimwi uyeeyelako bamwi. Taakwe kukondwa bantu ndyebakalinga kwaamba ayi “Tulakonkela Paulo.” Muciindi cakucita boobo, Paulo wakayuminisha bantu kubikila maano kuli Yehova alimwi a Yesu Klistu.​—1 Koli. 3:3-6.

18. Kweelana a 1 Bene Kolinto 4:6, 7, ino nshiinshi nsheenga tweeya kucakubonenaako cakwe Apolosi alimwi a Paulo?

¹⁸ Ino nshiinshi nsheenga tweeya kucakubonenaako cakwe Apolosi alimwi a Paulo? Inga twasebensa cankusu muncito yakwe Yehova akucafwa bantu baanji kuya panembo akubombekwa. Nacibi boobo, ncotushi ncakwaamba ayi Yehova ngootucafwa kwaamba ayi tucikoonshe kucita boobo. Cimwi nceenga tweeya kucakubonenaako cakwe Apolosi alimwi a Paulo ncakwaamba ayi na tulicite mikuli iinji mulibungano, tulyeelete kucita shiinji kwaamba ayi tuyuminishe luumuno. Tulalumba abuumbi na bamanene alimwi abasebenshi bacafwilisha kabayuminisha lucatano aluumuno mulibungano. Inga bacita boobo na kabasebensesha Baibo lyoonse ndyebatootululika. Muciindi cakulibonesha kuba bayandika kwiinda bamwi, balacafwa boonse mulibungano kunyumfwila akukonkela cakubonenaako cakwe Klistu Yesu!​—Amubelenge 1 Bene Kolinto 4:6, 7.

19. Ino nshiinshi nsheenga womwi awomwi wacita? (Amubone akabokosi kacite mutwi utokwaamba ayi “ Amuleye kuyuminisha Mushimu Wakupingana.”)

¹⁹ Soonse Lesa wakatupa shipo shipusenepusene. Inga twasebensesha shipo isho “mukucafwa bamwi.” (1 Pit. 4:10) Mpashi cimwi ciindi inga twalinyumfwa anga nshetucita tashiyandiki bunene. Nacibi boobo, cancine ncakwaamba ayi bweenka mbuli mbalo mboshiyandika ndyetutokwaangula ciluli, tuntu tuniini niini ntotucita inga twayuminisha luumuno mulibungano. Aboobo tulyeelete kusebensa cankusu kwaamba ayi tutayuminishi mushimu wakulibona kuba bayandika abuumbi kwiinda bamwi. Amuleke tube bashinishite kucita shoonse nsheenga twacikonsha kwaamba ayi tuyuminishe luumuno alucatano mulibungano.​—Efe. 4:3.