1. Ino nceebonshi Yehova tatweelanyi kubamwi?

YEHOVA alisuni bantu alimwi ashintu shipusenepusene. Tulishi cancine ici mukwiinga wakalenga shishango, shinyama, alimwi abantu bapusenepusene. Sobantu soonse tulipusene. Aboobo Yehova tamweelanyiiwo kubamwi. Alabona shili mumoyo wanu. (1 Samwe. 16:7) Alicishi kabotu nsheenga mwacikonsha kucita, nsheenga mwaalilwa alimwi ambomwakakomena. Alimwi taamulangili kucita nsheenga tamucikoonshi. Tulyeelete kulibona bweenka Yehova mbwaatubona. Lyalo ndyeenga ‘katuyeeya kabotu,’ nkokwaamba ayi kutalisumpula alimwi akutayeeya ayi taakuwo mbotubete.​—Loma. 12:3.

2. Ino nceebonshi tacibete kabotu kulyeelanisha kubamwi?

² Ncakwiila kwaamba ayi kubona bamakwesu abenankashi bacite cakubonenaako cakusebensa kabotu muncito yakushimikila inga kwatucafwa. (Ebu. 13:7) Inga tweeya nsheenga twaciita kwaamba ayi aswebo tunosebensa kabotu muncito yakushimikila. (Filip. 3:17) Nacibi boobo, kukonkela cakubonenaako cibotu ca bamwi akulyeelanisha kubamwi mbobatosebensa shilipusene. Kulyeelanisha kubamwi inga kwatupa kuba amunyono, kuboolela mwisule, na kulinyumfwa kubula mpindu. Alimwi na katucita shintu kwaamba ayi twiinde bamakwesu abenankashi, inga twanyonyoola bushicibusa bwesu a Yehova, bweenka mbuli mbotwakeeya mumutwi wamana. Aboobo mulusuno Yehova alatuyuminisha ayi: “Muntu woonse ulyeelete kubona milimo yakwe mbuli mbweebete. Na ili kabotu, inga walisumpula ceebo ca njiyo, cakuteelanya aya umwi muntu.”​—Gala. 6:4.

3. Ino nkuya panembo kwa buyani nkomwacikonsha uko kumupa kuba basangalete?

³ Yehova alisuni ayi munoosangalala akuya panembo kwanu lwakumushimu. Kucakubonenaako, na mwakabombekwa, mulyeelete  kukondwa kwaamba ayi mwakacikonsha kukumanisha cintu ciyandika! Mwakalisalila nobeene kucita boobo, ceebo calusuno lwanu pali Yehova. Amuyeeye mbomwaya panembo kuswa ciindi ndyemwakabombekwa. Kucakubonenaako, sa mwaya panembo mukusuna kubelenga Baibo alimwi akwiiya? Sa mulapaila camoyo woonse ano? (Kulu. 141:2) Sa mweeya bwa kutalika kabotu mibandi alimwi akusebensesha kabotu shisebensesho nshetusebensesha ndyetutooshimikila? Alimwi na mulicite mukwashi, sa Yehova wamucafwa kuba musankwa, mwanakashi, na mushali uli kabotu? Inga mwakondwa ceebo ca kucikonsha kuya panembo mumbasu mbuli sheeshi.

4. Ino nshiinshi nsheshi twiiye mumutwi uyu?

⁴ Inga twacafwa bamwi kuba basangalete ceebo cakuya panembo kwabo lwakumushimu. Alimwi inga twabacafwa akuleya kulyeelanisha kubamwi. Mumutwi uyu, tutokwiiya mbweenga bashali bacafwa bana babo, beebene mbweenga bacafwana, alimwi ambweenga bamanene abamwi bacafwa bashominyinaabo. Mukweelaako, tutokwiiya njiisho shamu Baibo sheenga shatucafwa kuyeeya nsheenga twaciita kweelana ankusu alimwi abukaalo bwesu.

5. Kweelana a Bene Efeso 6:4, ino bashali balyeelete kuleya nshi?

⁵ Bashali balyeelete kuleya kweelanya mwaana womwi kuumwi na kulangila mwaana kucita nsheenga taacikoonshi. Mukwiinga kucita boobo inga kwapa kwaamba ayi mwaana aboolele mwisule. (Amubelenge Bene Efeso 6:4.) Nankashi waliina lya Sachiko * wakaamba ayi: “Bamatica kucikolo bakalinga kulangila ayi noocita kabotu kwiinda bamwi. Kwiilikaawo, bama abalo bakalinga kusuni ayi noocita kabotu kucikolo kwaamba ayi nkacikoonshe kushimikila bamatica alimwi abata batakalinga Bakamboni. Alimwi bakalinga kusuni kwaamba ayi noocita kabotu mu shoonse kwakubula kufeela, sombi ici cakalinga cintu citakonsheki. Nabi kwaamba ayi peenda myaaka kuswa ciindi ndyendakamanisha cikolo, cimwi ciindi ndayeeya ayi mpashi Yehova taakondetweewo nabi ntosebensa kushika peela nkusu shangu.”

6. Ino nshiinshi bashali nsheenga beeya palilembo lya Kulumbaisha 131:1, 2?

⁶ Citeente ciyandika nceenga bashali beeya nceeci ncetucana palilembo lya Kulumbaisha 131:1, 2. (Amubelenge.) Mwaami Defedi wakaamba ayi taakalinga kubikila maano kushintu shimwiinda ciimo. Mukwiinga wakalinga muntu uliceesha wakekala muluumuno akukwana. Ino bashali inga beeya nshi kumaswi akaamba Defedi? Kwaamba ayi bashali bacikoonshe kuliceesha,  tabeelete kulangila kucita nsheenga balo abana babo tabacikoonshi. Bashali inga bacafwa mwaana kulinyumfwa kuyandika kwiinda mukushiba nsheenga wacikonsha kucita alimwi ansheenga taacikoonshi, lyalo inga bayeeya nsheenga wacita kunembo kweelana ankusu shakwe mposheela. Nankashi waliina lya Marina wakaamba ayi: “Bama tabakalinga kunjeelanisha kumunene wangu na banike bangu bobilo nabi kubaana bamwi. Bakalinga kunjiisha ayi bantu boonse balicite shipo shipusene alimwi muntu uli woonse alayandika kuli Yehova. Aboobo nshilyeelanyiiwo kubamwi.”

7-8. Ino musankwa weebete inga watondesha buyani ayi alalemeka mukaakwe?

⁷ Mwineklistu weebete alyeelete kulemeka mukaakwe. (1 Pit. 3:7) Kucakubonenaako, inga wacita boobo kwiinda mukubikila maano kumukaakwe akumulemeka. Taeelete kumulangila kucita shintu nsheenga taacikoonshi. Alimwi taeelete kumweelanisha kubanakashi bamwi. Ino mwanakashi inga wanyumfwa buyani na beebaye kabamweelanisha kubanakashi bamwi? Beebaye nankashi waliina lya Rosa bateshi Bakamboni liinji balamweelanisha kubanakashi bamwi. Maswi atabete kabotu ngobamwaambila alamupa kulinyumfwa cibiibi abuumbi akumupa kutoonsha na ncakwiila balimusuni. Wakaamba ayi, “Ndayandika kuyuminishikwa lyoonse kwaamba ayi Yehova alambona ayi ndayandika.” Ano mubupusano, Mwineklistu weebete alalemeka mukaakwe. Mukwiinga alicishi ayi kucita boobo kulakuma bushicibusa bwakwe amukaakwe alimwi a Yehova. *

⁸ Musankwa ulemeka mukaakwe alamulumbaisha, alaamba shibotu pa mukaakwe kubamwi, alamulwiita ayi alimusuni alimwi ayi alayandika. (Tus. 31:28) Ishi nsheshicita beebaye nankashi Katerina, ngotwakaambawo mumutwi wamana, kwaamba ayi bacikoonshe kumucafwa kulinyumfwa kuba muntu uyandika. Nankashi Katerina ndyaakalinga mwanike, banyina bakalinga kwaamba shitabete kabotu pali nguwe alimwi akumweelanisha kubanike bamwi, kwiilikaawo ababye. Aboobo ici cakapa kwaamba ayi alakwe atalike kulyeelanisha kubamwi​—wakatolelela kucita boobo nabi pesule lyakwiiya cancine! Nacibi boobo, beebaye bakamucafwa kucileka kucita boobo akutalika kulibona munshila yeelete. Wakaamba ayi: “Beebangu balinsuni, balalumba pashintu shibotu nsheencita, alimwi balampaililaako. Alimwi balancafwa akwiibaluka mibo yakwe Yehova ibotu abuumbi. Ici cilancafwa kwaalula mbonjeeya.”

9-10. Ino bamanene bakamucafwa buyani nankashi umwi kucileka kulyeelanisha kubamwi?

⁹ Ino bamanene inga bacita buyani kwaamba ayi bacafwe baabo basuni kulyeelanisha kubamwi? Amuyeeye shakacitikila nankashi waliina lya Hanuni, uyo watakalinga kulumbwa bunene kubwanike. Wakaamba ayi: “Ndakalinga kucite nsoni alimwi ndakalinga kubona ayi bamwi balacita kabotu kwiinda ndime. Ndakatalika kulyeelanisha kubamwi kuswabo ciindi ndyendakalinga muniini abuumbi.” Nankashi Hanuni wakatolelela kulibona munshila iyi nabi pesule lyakwiiya cancine. Aboobo ici cakamupa kulibona anga taacitewo mpindu mulibungano. Nacibi boobo, pacecino ciindi ngu painiya usangalete. Ino nciinshi cakamucafwa kwaalula mbwakalinga kubona shintu?

¹⁰ Nankashi Hanuni wakaamba ayi wakacafwikwa abamanene batondesha nkumbu. Bakamucafwa kushiba kwaamba ayi ngumuntu uyandika mulibungano alimwi akumulumba ceebo cakutondesha cakubonenaako cibotu. Wakalemba ayi: “Cimwi ciindi bamanene bakalinga kunsenga ayi njuminisheko benankashi bamwi bakalinga kuyandika lucafwo. Kupekwa mukuli uyu kwakampa  kulinyumfwa kuba muntu uyandika. Ntokwiibaluka bamanene batondesha lusuno mbobakandumba ndyendakayuminisha benankashi bacanike. Lyalo bakambelengela 1 Bene Tesalonika 1:2, 3. Ici cakampa kukondwa abuumbi! Ceebo ca bamanene balya bakantondesha lusuno, ndicishi ano kwaamba ayi anebo ndayandika mulibungano.”

11. Ino abo ‘balefukite alimwi batacite cakulangila’ baambwa pa Kulumbaisha 34:18 inga twabacafwa buyani?

¹¹ Amubelenge Kulumbaisha 34:18. Yehova alabikilako maano abuumbi kubaabo ‘balefukite alimwi batacite cakulangila.’ Soonse kuteshibo bamanene beenka inga twayuminisha bamakwesu abenankashi bayandika aba. Nshila yomwi mbweenga twabayuminisha nkwiinda mukucita shitondesha ayi tulababikilako maano. Yehova alisuni ayi tubacaafwe kushiba kwaamba ayi alibasuni abuumbi. (Tus. 19:17) Nshila imwi mbweenga twabacafwa nkwiinda mukutondesha mushimu wakuliceesha akutalinyumfwa pashipo nshetucite. Tulisuni kuleya kucita shintu sheenga shapa bamwi kutunyumfwila munyono. Muciindi cakucita boobo, tulisuni kwaamba akucita shintu sheenga shayuminisha bamwi.​—1 Pit. 4:10, 11.

12. Ino nceebonshi bantu bakalinga kubonwa ayi taakuwo mbobabete bakalinga kusuni kuba a Yesu? (Amubone cikope cili papeeji yakutaanguna.)

¹² Inga tweeya shiinji pamakani ambotweelete kubona bamwi na twayeeya Yesu mbwakalinga kucita bashikwiiya bakwe. Wakalinga muntu wiinditewo wakekalawo pacishi capanshi. Sombi wakalinga ‘moote alimwi mubombu moyo.’ (Mate. 11:28-30) Taakalinga kulibonesha ceebo ca busongo alimwi alushibo lwiinditeewo ndwakalinga kucite. Ndyaakalinga kwiisha bantu, wakalinga kwaamba maswi alimwi ashikoshanyo shuubu kunyumfwisha shakalinga kushika pamoyo bantu baliceesha. (Luka 10:21) Yesu wakalinga kupusene abamatanjilili beshibupailishi abo bakalinga kulisumpula. Lyoonse wakalinga kucita shintu shakalinga kupa bamwi kulinyumfwa kuba bayandika kuli Lesa. (Joni 6:37) Wakalinga kutondesha bulemu kubantu bakalinga kubonwa ayi taakuwo mbobabete.

13. Ino Yesu wakatondesha buyani nkumbu alusuno kubashikwiiya bakwe?

¹³ Yesu wakatondesha nkumbu alusuno kubashikwiiya bakwe kwiinda mushintu nshaakalinga kucita. Wakalinga kucishi kwaamba ayi tabeelene nkusu alimwi abukaalo. Aboobo tabakalinga kucikonsha kukumanisha ncito sheelene; alimwi tabakalinga kucita shintu shomwi na kukumanisha ncito sheelene muncito yakushimikila. Nacibi boobo, Yesu wakakondwa kwaamba ayi uli woonse wakasebensa kushika peela nkusu shakwe. Yesu wakatondesha mbwaalinyumfwa kwiinda mukwaamba cikoshanyo ca muntu wakaabila basebenshi bakwe maali. Mucikoshanyo cilya, mwaami wakapa musebenshi wakwe womwi awomwi maali “kweelana ankusu shakwe.” Pabasebenshi bobilo bakasebensa cankusu, womwi wakacana mpindu kwiinda umwi. Nacibi boobo, mwaami wakabalumba boonse amaswi antu womwi ayi: “Wakacita kabotu, omusebenshi mubotu ushomeka!”​—Mate. 25:14-23.

14. Ino cakubonenaako cakwe Yesu inga twacikonkela buyani?

¹⁴ Yesu alatutondesha nkumbu alusuno lyoonse. Alishi kwaamba ayi soonse tatweelene bukaalo alimwi ankusu, alimwi alakondwa na katusebensa kushika peela nkusu shesu. Tulyeelete kukonkela cakubonenaako cakwe. Tatweelete kulengesha mukwesu na nankashi kulinyumfwa anga taacite mpindu ceebo cakwaamba ayi inga taacikoonshi kucita kweelana abamwi. Muciindi cakucita boobo, tulyeelete kweelesha kulumba bamakwesu abenankashi ceebo cakucita nsheenga bacikonsha muncito yakwe Yehova.

15-16. Ino kuba ashakucita nsheenga wakumanisha kwakamucafwa buyani nankashi umwi?

¹⁵ Na katucite nshetusuni kukumanisha muncito yakwe Yehova, tulacana mpindu mubuumi alimwi alusangalalo lwancinencine. Nacibi  boobo, tulyeelete kulibikila shakucita nsheenga twacikonsha kukumanisha kweelana abukaalo bwesu kuteshi kucita boobo ceebo cakukonkela bamwi. Mukwiinga na twacita boobo, inga twakalashikwa alimwi akuboolela mwisule. (Luka 14:28) Amuyeeye cakubonenaako cakwe nankashi painiya waliina lya Midori.

¹⁶ Midori ndyaakalinga wacanike, baishi bakalinga kumulwiita ayi banike bakwe alimwi abeshicikolonyina bakalinga kumwiindaawo. Wakaamba ayi “Ndakalinyumfwa kubula mpindu.” Nacibi boobo, ndyaakalinga kuya cikula, Midori wakatalika kulibona ayi alibo kabotu. Wakaamba ayi, “Ndakalinga kubelenga Baibo bushiku abushiku mukwiinga kucita boobo kwakancafwa kuba aluumuno mumoyo akulinyumfwa ayi Yehova alinsuni.” Kwiilikaawo, wakalibikila nshaasuni kucita kunembo nsheenga wacikonsha, alimwi wakapaila akusenga Lesa kwaamba ayi amucaafwe kushikumanisha. Kucita boobo kwapa kwaamba ayi, Midori abe usangalete ceebo cakuya panembo kwakwe lwakumushimu.

17. Ino nciinshi ceenga catucafwa kwaalula mbotuyeeya, alimwi ino nshiinshi sheenga shaswaamo?

¹⁷ Cilatola ciindi kwaamba ayi twaalule mbotulibona. Ncoceeco Yehova ncaambila ayi: “Mulyeelete kutolelela kwaalula miyeeyo imweendelesha lyoonse.” (Efe. 4:23, 24, NWT) Kwaamba ayi tucikoonshe kucita boobo, tulayandika kupaila, kwiiya Maswi akwe Lesa, alimwi akukutumana kuyeeyawo. Aboobo amutolelele kucita shintu ishi, akusenga Yehova kwaamba ayi amupe nkusu. Mushimu Wakwe ulaakumucafwa kuleya kulyeelanisha kubamwi. Alaakumucafwa kushiba na mulicite munyono na kulisumpula, alimwi alaakumucafwa kwaamba ayi mucikoonshe kwaaluka cakufwambaana.

18. Ino maswi ngotucana pa 2 Makani 6:29, 30 inga atuyuminisha buyani?

¹⁸ Amubelenge 2 Makani 6:29, 30. Yehova alishi shili mumoyo wesu. Alimwi alicishi kwaamba ayi tutokweelesha kuleya kuyungwa ashintu  shibiibi shamucishi alimwi amapensho esa ceebo cakutamaninina kwesu. Na Yehova wabona mbotutoosebensa cankusu kulwana shintu ishi, alatusuna abuumbi.

19. Ino Yehova alasansulula buyani mbwaalinyumfwa pali ndiswe?

¹⁹ Kwaamba ayi atucaafwe kunyumfwishisha mbwaalinyumfwa pali ndiswe, Yehova alasebensesha cakubonenaako calusuno luba pakati ka mushali mwanakashi amwanaakwe kateta. (Isa. 49:15) Amuyeeye cakubonenaako ca mushali mwanakashi waliina lya Rachel. Wakalemba ayi: “Mwanaangu mwanakashi Stephanie wakashalwa myeenshi kaitana kukwana. Ciindi cakutaanguna ndyendakamubona, wakalinga kuboneka muniini abuumbi. Nacibi boobo, mweenshi wakutaanguna ndyaakashalwabo, bakucipatela bushiku abushiku bakalinga kumpa ayi mulele. Ciindi cilya cakancafwa kuba pafwiifwi abuumbi amwanaangu. Pacecino ciindi ulicite myaaka 6 alimwi ulaboneka muniini pabamwi babete muciimo cakwe. Nacibi boobo, ndimusuni abuumbi mukwiinga tacakalinga cuubu kwaamba ayi abe muumi, alimwi kushalwa kwakwe kwampa kuba alusangalalo abuumbi!” Cilayuminisha abuumbi kushiba kwaamba ayi Yehova alitusuni abuumbi na wabona mbotutoosebensa cankusu kwaamba ayi tumusebensele kushika peela nkusu shesu!

20. Ino nciinshi ceelete kumupa kuba usangalete mbuli musebenshi wakwe Yehova?

²⁰ Mukwiinga muli musebenshi wakwe Yehova, mulayandika abuumbi mbuli lubasu lwa mukwashi wakwe alimwi taakuwo umwi uli mbuli ndimwe. Yehova taakwe kumuleta mumukwashi wakwe ceebo cakwaamba ayi muliindite bamwi. Wakamusenya kuli nguwe ceebo cakwaamba ayi wakalanga mumoyo wanu akubona ayi muli muntu uliceesha ulibambite kwiishikwa anguwe alimwi akwaaluka. (Kulu. 25:9) Inga mwashoma cakutatoonsha kwaamba ayi alalumba na kamusebensa kushika peela nkusu shanu muncito yakwe. Kuliyumya alimwi akushomeka kwanu kulatondesha patuba kwaamba ayi mulicite ‘moyo ubotu.’ (Luka 8:15) Aboobo amutolelele kusebensa kushika peela nkusu shanu. Lyalo mulaakusangalala.