1. Ino Yehova wakamucitila nshi?

INO cakalinga buyani kwaamba ayi mube Kamboni Wakwe Yehova? Mpashi mwakataanguna kunyumfwa “makani abotu” kubashali banu, ngomusebensaakwe na shicikolonyinaanu, nabi mpashi Bakamboni bakesa paŋanda pamishaanu ndyebakalinga kushimikila kuŋanda aŋanda. (Maako 13:10) Lyalo, Kamboni wakatola ciindi akusebensa cankusu kumwiisha Baibo. Ndyemwakalinga kwiiya, mwakatalika kusuna Yehova akwiiya kwaamba ayi alimusuni. Yehova ngwakamucafwa kwiiya cancine, aboobo mbuli shikwiiya wakwe Yesu Klistu ano, mutoolangila kuba abuumi bwamuyayaya kunembo. (Joni 6:44) Ncakutatoonsha mulalumba abuumbi kwaamba ayi Yehova wakayuminisha umwi kusa mukumwiisha cancine akumutambula mbuli musebenshi Wakwe.

2. Ino nshiinshi nsheshi twiiye mumutwi uyu?

² Mukwiinga twakeeya cancine ano, aswebo tulicite coolwe cakucafwa bamwi kwaamba ayi abalo batalike kweenda panshila itola kubuumi. Mpashi tulanyumfwa kabotu kushimikila kuŋanda aŋanda, sombi cilatubeta ciyumu kutalika shiiyo sha Baibo. Sa amwebo mbomulinyumfwa? Na mbomulinyumfwa, mpashi makani ngeshi twiiye mumutwi uyu atoomucafwa. Tutokwiiya cituyuminisha kucafwa bantu kuba bashikwiiya. Alimwi tutokwiiya ambweenga twakoma mapensho eenga apa kwaamba ayi twaalilwe kutalika shiiyo sha Baibo. Ano citaanshi, amuleke tubandike ncotweelete kushimikila akwiisha bantu makani abotu.

3. Ino nceebonshi tulashimikila?

³ Yesu ndyaakalinga pacishi capanshi, wakapa bashikwiiya bakwe mulawo wakusebensa ncito icite mbasu shobilo. Citaanshi, wakabalwiita kushimikila makani abotu a Bwaami, akubatondesha  mbobeelete kushimikila. (Mate. 10:7; Luka 8:1) Kucakubonenaako, Yesu wakalwiita bashikwiiya bakwe shakucita na muntu wasumina nabi kukaka kukutika kumakani abotu a Bwaami. (Luka 9:2-5) Alimwi wakaamba ayi bashikwiiya bakwe balaakushimikila bantu baanji alimwi kumisena iinji, ndyaakaamba ayi “balaakushimikila mucishi coonse.” (Mate. 24:14; Milimo 1:8) Nabi bantu basumina na kukaka kukutika, bashikwiiya bakwe Yesu bakalinga kweelete kushimikila makani abotu a Bwaami bwakwe Lesa ansheshi bukakumanishe.

4. Kweelana a Mateyo 28:18-20, ino nciinshi cimwi ncotweelete kucita kwiilika pa kushimikila makani a Bwaami?

⁴ Ino nciinshi cabili Yesu ncaakalwiita bashikwiiya bakwe kucita? Wakalwiita bashikwiiya bakwe kwiisha bantu kukonkela shintu shoonse nshaakabalwiita. Ano sa incito yakushimikila akwiisha yakapekwabo ku Beneklistu bakutaanguna kweelana abantu bamwi mbobaamba? Sobwe, Yesu wakaamba ayi incito iyandika iyi ilaakutolelela “kushikila kumamanino abweende bwashintu.” (Amubelenge Mateyo 28:18-20.) Cilyeelete Yesu wakapa mulawo uyu paciindi ndyaakabonekela kubashikwiiya bakwe beendilila 500. (1 Koli. 15:6) Alimwi mucili anga nciloto ncakatondesha Joni, Yesu wakatondesha patuba kwaamba ayi bashikwiiya bakwe boonse balyeelete kucafwa bamwi kwiiya pali Yehova.​—Ciyu. 22:17.

5. Kweelana a 1 Bene Kolinto 3:6-9, ino Paulo wakaamba cikoshanyo nshi citondesha kushimikila akwiisha mboshicatene?

⁵ Mutumwi Paulo wakakoshanisha ncito yakucafwa bantu kuba bashikwiiya kuncito yakulima, kutondesha kwaamba ayi tatweelete kweelabo pakushanga mbuto. Wakebalusha bene Kolinto ayi: “Nebo ndakashanga, Apolosi wakashitilila . . . Mwebo muli muunda wakwe Lesa utoolimwa.” (Amubelenge 1 Bene Kolinto 3:6-9, NWT.) Tuli basebenshi “mumuunda wakwe Lesa.” Aboobo tulashanga mbuto kwiinda mukushimikila alimwi tulashitilila kwiinda mukwiisha. Alimwi ciindi aciindi tulashilanga langa kubona na shitokula. (Joni 4:35) Nacibi boobo, tulishi kwaamba ayi Lesa mwiine ngoopa kwaamba ayi imbuto ikule, nkokwaamba ayi ngoosenya bantu kuli nguwe.

6. Ino nshiinshi shimwi nshotweelete kucita kwiilika pakwiisha bantu?

⁶ Tutoolangoola bantu “bacite myoyo ilibambite kutambula buumi butamaani.” (Milimo 13:48, NWT) Kwaamba ayi tucafwe bantu aba kuba bashikwiiya, tulyeelete kubacafwa (1) kunyumfwishisha, (2) kushoma, alimwi (3) kukonkela shintu nshebatokwiiya mu Baibo. (Joni 17:3; Kolo. 2:6, 7; 1 Tesa. 2:13) Soonse mulibungano inga twacafwa beshikwiiya Baibo kwiinda mukubatondesha lusuno alimwi akubatambula camaansa obilo ndyebesa kumabungano. (Joni 13:35) Uyo utoobaiisha inga wayandika kusebensa cankusu kwaamba ayi abacaafwe kwaalula nshobakalinga kushoma na kucita, sheenga shaba mbuli “shintu shiyumu.” (2 Koli. 10:4, 5) Inga catola myeenshi iinji kwaamba ayi tucafwe muntu kwaalula buumi bwakwe kwaamba ayi mukuya kwaciindi acikoonshe kuya panembo akweelela kubombekwa. Nacibi boobo, kusebensa kwesu teshi kukayebo mumaanshi.

7. Ino nciinshi cituyuminisha kushimikila alimwi akwiisha bantu kuba bashikwiiya?

⁷ Ino nciinshi cituyuminisha kushimikila alimwi akwiisha bantu kuba bashikwiiya? Citaanshi, nceebo cakwaamba ayi tulisuni Yehova. Na mweelesha cankusu kukonkela mulawo wakushimikila alimwi akucafwa bantu kuba bashikwiiya, mulatondesha ayi mulisuni Lesa. (1 Joni 5:3) Amuyeeye paceeci: Mulashimikila bantu ceebo cakwaamba ayi mulisuni Yehova. Sa cakalinga cuubu kukonkela mulawo uyu? Mpashi sobwe. Sa mwakalinga kucite boowa bushiku bwakwiiya kuya muncito yakushimikila? Ncakutatoonsha mwakalinga kucite  boowa! Nacibi boobo, mwakalinga kucishi kwaamba ayi iyi njencito Yesu njaasuni ayi tusebense, aboobo mwakaukonkela mulawo. Alimwi cilyeelete kwaamba ayi mukuya kwaciindi, mwakatalika kushibila kushimikila. Ano ino mbuyani pamakani akucita shiiyo sha Baibo? Sa mulanyumfwa boowa na mwayeeya pamakani akutalika shiiyo sha Baibo? Mpashi mbomulinyumfwa. Nacibi boobo, na mwapaila akusenga Yehova kwaamba ayi amucaafwe kutaloonda kutalika shiiyo sha Baibo, inga wamucafwa kuba alusuno lwakucafwa bantu kuba bashikwiiya.

8. Kweelana a Maako 6:34, ino nciinshi cimwi ceenga catupa kusuna kwiisha bamwi?

⁸ Cabili citupa kwaamba ayi tushimikile bamwi cancine, nkusuna bantu. Kucakubonenaako, paciindi cimwi Yesu abashikwiiya bakwe bakalinga kulemete abuumbi pesule lyakushimikila abuumbi. Bakalinga kusuni kucana musena nkweenga bookeshaako, nacibi boobo, likoto lyakabakonkela. Yesu wakabanyumfwila nkumbu, aboobo wakatalika kubaiisha “shintu shiinji.” (Amubelenge Maako 6:34.) Wakasebensa cankusu nabi kwaamba ayi wakalinga kulemete. Ino nceebonshi ncaakacitila boobo? Yesu wakalinga kucishi bantu balya mbobakalinga kulinyumfwa. Wakalinga kusuni kubacafwa mukwiinga wakabona kwaamba ayi bakalinga kupengete alimwi bakalinga kuyandika makani eenga abacafwa kulangila. Amunshiku shino bantu balicite mapensho alimwi batoyandika makani eenga abacafwa kulangila, nabi kababoneka anga balikondetwe akukwana abuumi mbobacite. Bali anga ni mbelele shisowekete shitacite mweembeshi wakushitanjilila. Mutumwi Paulo wakaamba ayi bantu ba mushobo uyu tabamushiiwo Lesa alimwi tabacitewo akulangila. (Efe. 2:12) Bali “panshila inene itola kukunyonyoolwa”! (Mate. 7:13) Na twayeeya bantu bakumusena nkotushimikila mbobatoyandika kushiba Lesa, lusuno alimwi ankuumbu shilatuyuminisha kubacafwa. Alimwi nshila ibotu mbweenga twabacafwa nkwiinda mukubaiisha Baibo.

9. Kweelana a Bene Filipi 2:13, ino Yehova inga wamucafwa buyani?

⁹ Mpashi mulawayawaya kutalika ciiyo ca Baibo ceebo cakushiba kwaamba ayi mulaakuyandika ciindi cakulibambila alimwi akunooya kuciiyo. Na mbomulinyumfwa ubo, amulwiite Yehova mumupailo. Amumusenge kwaamba ayi amucaafwe kweelesha kulangoola muntu weenga wasuna kwiiya Baibo. (Amubelenge Bene Filipi 2:13.) Mutumwi Joni wakaamba ayi Lesa alakumbula mipailo yeendelana akuyanda kwakwe. (1 Joni 5:14, 15) Aboobo inga mwashoma kwaamba ayi Yehova alaakumucafwa kusuna kucafwa bamwi kuba bashikwiiya.

10-11. Ino nciinshi ceenga catupa kuwayawaya kutalika ciiyo ca Baibo?

¹⁰ Tulishi kwaamba ayi kwiisha kulayandika abuumbi, nacibi boobo, inga caba ciyumu kucikonsha kucita shiinji kweelana ambweenga twasuuna. Amuleke tubandike mapensho amwi akushiba mbweenga twaakoma.

¹¹ Inga twaalilwa kucita kweelana ambweenga twasuuna ceebo cabukaalo mbotubeteemo. Kucakubonenaako, beshikushimikila bamwi mbacinene alimwi bamwi balaciswa ciswa. Sa amwebo mbobukaalo mbomutokwiindaamo? Na mboboobo, amuyeeye cintu comwi ncotweeya ceebo ca bulwashi bwa COVID-19. Twakesa mukushiba kwaamba ayi anu inga twacikonsha kucita shiiyo sha Baibo pafooni na shisebensesho shimwi! Aboobo inga mwacikonsha kutalika ciiyo ca Baibo ndyemuli paŋanda yanu. Bubotu bumwi mbwakwaamba ayi bantu bamwi inga basuna kwiiya Baibo, sombi tabacaniki paŋanda paciindi bamakwesu ndyebaya mukushimikila. Nacibi boobo, mpashi inga bacanika macuunsa cuunsa na macolesha. Sa inga mwacikonsha kucita ciiyo ca Baibo pashiindi ishi? Yesu wakaiisha Nikodemasi mashiku, mukwiinga nceciindi Nikodemasi ndyaakalinga kusuni kwiiya.​—Joni 3:1, 2.

12. Ino nshiinshi shitupa kushoma kwaamba ayi inga twacikonsha kwiisha kabotu?

 ¹² Mpashi inga katuyeeya ayi tatucishi kwiisha kabotu. Mpashi tulayeeya ayi katutana kwiisha muntu umwi tulyeelete kutaanguna kuba alushibo lwiinditeewo mbuli shikwiisha. Na mbomulinyumfwa ubo, amuyeeye pashintu shotatwe sheenga shamucafwa. Citaanshi, Yehova alamubona ayi muleelela kwiisha bamwi. (2 Koli. 3:5) Cabili, Yesu, uyo ucite “nkusu shoonse kwiculu alimwi apacishi capanshi,” ngowakamupa mulawo wakwiisha. (Mate. 28:18) Alimwi catatu, inga mwatambula lucafwo kuswa kuli Yehova alimwi abamakwesu. Na Yehova wakacafwa Yesu kushiba shakwaamba, nkokwaamba ayi amwebo inga wamucafwa. (Joni 8:28; 12:49) Kwiilikaawo, inga mwasenga mukwesu utanjilila kakoto kakushimikila momubete, painiya usebensa kabotu, na shikushimikila wasebensa kwa myaaka iinji kwaamba ayi amucaafwe kushiba mbweenga mwatalika ciiyo ca Baibo. Nshila yomwi mbweenga mweeya bwakwiisha kabotu nkwiinda mukusebensa abeshikushimikila bamwi ndyebatoocita shiiyo sha Baibo.

13. Ino nceebonshi tulyeelete kuba balibambite kwiisha munshila shipusenepusene?

¹³ Inga caba ciyumu kushimikila munshila ipya alimwi akusebensesha shisebensesho shipya. Nshila mbotwiisha shiiyo sha Baibo yakaaluka ano. Tulasebensesha libuku lya, Amusangalale Abuumi Kwamuyayaya! Libuku ili lilayandika kulibambila alimwi akwiisha munshila ipusene ambotwakalinga kwiisha kale kale. Tulabelengabo mapalagilafu aniini lyalo akubandika bunene ashikwiiya. Ndyetutokwiisha, tulasebensesha bunene mavidyo, makani apa webusaiti yesu alimwi a JW Library^®. Na tamucishiwo bwakusebensesha shisebensesho ishi, amusenge umwi kwaamba ayi amucaafwe kwiiya bwakushisebensesha. Sobantu liinji cilatubeta cuubu kusebensesha shintu nshotwakashibila. Cilaba ciyumu kucita shintu munshila ipya. Nacibi boobo, kwiinda mulucafwo lwakwe Yehova alimwi abamwi, mulaakucikonsha kwiiya alimwi mulaakunoonyumfwa kabotu kwiisha bantu. Bweenka mbuli painiya umwi mbwaakaamba ayi, nshila ipya iyi “ilasangalasha shikwiiya alimwi autokwiisha.”

14. Ino nshiinshi nshotweelete kwiibaluka ndyetutoshimikila kumusena bantu nkobakaka, alimwi ino 1 Bene Kolinto 3:6, 7 inga yatuyuminisha buyani?

¹⁴ Mpashi tulashimikila kumusena nkocibete ciyumu kutalika shiiyo sha Baibo. Mpashi bantu balakaka kukutika makani ngotushimikila na kutupikisha. Ino nciinshi ceenga catucafwa kutolelela kushoma ayi bushiku bumwi balaakukutika? Mutaluubi kwaamba ayi bukaalo bwa bantu inga bwaaluka paciindi ciniinibo mucishi cino ciswite mapensho, alimwi ici inga capa kwaamba ayi bantu bakalinga kukaka kukutika bashibe kwaamba ayi balayandika butanjilishi bwakwe Lesa mubuumi bwabo. (Mate. 5:3) Bamwi bakalinga kukaka kutambula mabuku esu kale kale, mukuya kwaciindi bakasumina kwiiya Baibo. Alimwi tulicishi kwaamba ayi Yehova ngo Mwine ncito yakutebula. (Mate. 9:38) Alisuni kwaamba ayi tutolelele kushanga alimwi akutilila, Lakwe ngoopa kwaamba ayi shikule. (1 Koli. 3:6, 7) Alimwi cilayuminisha abuumbi kwiibaluka cancine cakwaamba ayi nabi tatucitewo ciiyo ca Baibo pacecino ciindi, Yehova alatupa shilambu ceebo cakweelesha kwesu cankusu kwaamba ayi tucafwe bantu, kuteshi ceebo cakufula kwa bantu mbotwacikonsha kwaabila mabuku na kwiisha Baibo! *

15. Ino Yehova alanyumfwa buyani na muntu wasumina kwiiya Baibo alimwi akukonkela nshatokwiiya?

¹⁵ Yehova alasangalala na muntu wasumina kwiiya cancine akutalika kulwiitaako bamwi nshatokwiiya. (Tus. 23:15, 16) Cilyeelete Yehova  alikondetwe abuumbi kubona bantu bakwe mbobatosebensa cankusu muncito yakushimikila akwiisha bantu munshiku shino! Kucakubonenaako, nabi ndyekwakalinga bulwashi bwa COVID-19 mumwaaka wancito wa 2020, kwakacitwa shiiyo sha Baibo shishika 7,705,765, ici cakapa kwaamba ayi tucafwe bantu bashika 241,994 kulyaaba kuli Yehova akubombekwa. Beshikwiiya bapya aba abalo balaakucafwa bantu baanji kuba bashikwiiya. (Luka 6:40) Inga twashoma cakutatonsha kwaamba ayi Yehova alasangalala na katucafwa bamwi kuba bashikwiiya.

16. Ino nciinshi nceenga twaba bashinishite kucita?

¹⁶ Kucafwa bantu kuba bashikwiiya kulayandika kusebensa cankusu, nacibi boobo, kwiinda mulucafwo lwakwe Yehova inga twacikonsha kwaabanamo lubasu muncito yakwiisha bapya kusuna Ishiwesu wakwiculu. Ino mbuyani kuba bashinishite kucanako ciiyo ca Baibo nabibo comwi? Ici inga cakonsheka na tweelesha cankusu kulangoola muntu ngweenga twaiisha Baibo. Alimwi Yehova alaakutupa shoolwe na katweelesha kulangoola basuni kwiiya.

17. Ino tulaakulinyumfwa buyani na tukacikoonshe kucafwa muntu kwiiya cancine?

¹⁷ Ncoolwe cinene abuumbi kushimikila alimwi akwiisha bamwi cancine! Kwaabanamo lubasu muncito iyi kulatupa kuba alusangalalo lwancinencine. Mutumwi Paulo uyo wakacafwa bantu baanji kuba bashikwiiya ku Tesalonika wakaamba ayi: “Mwebo ndimwe mwalengesha kwaamba ayi tube akulangila, kusangalala alimwi akwaamba cakutatonsha cikani ca kupuluka kwesu pameenso aMwaami wesu Yesu Klistu bushiku aakwisa. Ncakwiila mulalengesha ayi twaambe mbotukondetwe pali ndimwe akusangalala.” (1 Tesa. 2:19, 20; Milimo 17:1-4) Amunshiku shino baanji mbobalinyumfwa. Kucakubonenaako, nankashi waliina lya Stéphanie uyo pomwi abeebaye wakacafwa bantu baanji kuya panembo akubombekwa wakaamba ayi, “Taakuwo cintu cisangalasha abuumbi kwiinda kucafwa bantu kulyaaba kuli Yehova.”