Ncakutatoonsha kwaamba ayi Yehova alisuni ayi bantu na beebana batolelele kuba alusangalalo alimwi abushicibusa buyumu. (Mate. 19:4-6) Ano nkuli nkweenga mwacana wakweebanaakwe uli kabotu na mulisuni kweeba na kweebwa? Mukwiinga Yehova ngo Mulengi wesu, alicishi nshotweelete kucita kwaamba ayi tube alusangalalo mucikwati. Aboobo na mwakonkela njiisho nshaakatupa, mulaakucana lusangalalo lwancinencine. Amuleke tubandikeewo panjiisho shimwi.

Citaanshi, tulyeelete kushiba cancine ici pali ndiswe sobantu: “Moyo wa muntu ngubeshi abuumbi kwiinda pashintu shimwi shoonse alimwi ulapensha abuumbi.” (Jele. 17:9) Na bantu bobilo basuni kweebana batalika kushibana, inga batalika kunyumfwana abuumbi paciindi ciniinibo, na caba boobo, cilaba ciyumu kusala kabotu. Na bantu basala kweebana ceebo ca mbobatoolinyumfwa, liinji shintu tashibeendeli kabotu kunembo. (Tus. 28:26) Aboobo teshi cintu camaano bantu bobilo kutalika kunyumfwana abuumbi na kushomeshanya kabatana kushibana kabotu.

Tushimpi 22:3 ilaamba ayi: “Muntu ucenjete ulabona mapensho ali kunembo akwaayuba, sombi muluya ulaya mukulinjishamobo akupengelaamo.” Ino ngamapensho nshi ngeenga muntu wacana na kaalangoola wakweebanaakwe pa intaneti? Cabicaako ncakwaamba ayi bamwi bakatalika kunyumfwana abantu mbobateshiwo pa intaneti, lyalo mukuya kwaciindi bakesa mukushiba ayi muntu wakababeca. Alimwi bantu bamwi balabeca bantu pa intaneti kwaamba ayi babeepile maali. Alimwi cimwi ciindi abo beshikubeca bantu pa intaneti balabeca ayi Mbakamboni.

Amuyeeye palipenshi alimwi ili. Ma webusaiti acite makani akulangwetaawo wakweebanaakwe alasebensesha nsamushi shapakompyuta kwaamba ayi basale bantu bobilo beelete kutalika kushibana. Nacibi boobo, taakuwo bumboni butondesha ayi nshila iyo ilasebensa. Ano sa inga caba camaano kushoma pulogilamu yapakompyuta yakapangwa amuntu, kwaamba ayi icafwe muntu kusala cintu ciyandika abuumbi mbuli kucana muntu weelela wakweebanaakwe? Alimwi sa inga tweelanisha mapulogilamu apakompyuta kunjiisho shamu Baibo?​—Tus. 1:7; 3:5-7.

Lilembo lya Tushimpi 14:15 lilaamba ayi: “Muluya ulashoma shoonse nsheenga wanyumfwa,  sombi muntu ucenjete ulataanguna kuyeeya ncaaelete kucita.” Kamutana kusalawo kwaamba ayi uyu ngomuntu weelela kubaakwe mucikwati, mulyeelete kutaanguna kumushiba kabotu. Ano ici inga tacikonsheki na muntu mwashibanaakwe pa intaneti. Alimwi sa kulembelana makani akubandikishanya ciindi cilaamfu pa intaneti, inga kwamupa kumushiba kabotu muntu? Bamwi bakalinga kuyeeya ayi bacana muntu ubasuni cancine pa intaneti bakakankamana ndyebakakumanya muntu uyo.

Shikulumbaisha wakaamba ayi: “Nebo nsheendi abantu batabete kabotu sobwe, nabi kweenda abantu baamba nshebataciti.” (Kulu. 26:4) Bantu baanji balayeeya ayi cilibo kabotu kwaamba makani akubeca na kooli pa intaneti kwaamba ayi bamwi bakubone kabotu. Balashisa mibo yabo itabete kabotu, na mpashi mibo yabo ibiibi inga taibonekeli mumakani ngobatumina bamwi pa intaneti. Alimwi nabi kwaamba ayi bamwi inga balyaamba ayi Mbakamboni Bakwe Yehova, ano sa ncakwiila Mbakamboni bakabombekwa? Sa balishimpite lwakumushimu? Sa balicite bushicibusa buyumu a Yehova? Sa balicite mpuwo ibotu mulibungano mobabete? Na sa balicite cakubonenaako citabete kabotu na mpashi mbantu ‘batabete kabotu’? (1 Koli. 15:33; 2 Timo. 2:20, 21) Alimwi sa balyaangulukite kuba mucikwati kweelana a Malembo mbwaamba? Mulyeelete kushiba shikumbulo kumiipusho iyi. Sombi inga caba ciyumu kucana shikumbulo na taakuwo Bakamboni bamwi bamushi kabotu muntu uyo mbweenga mweepusha. (Tus. 15:22) Alimwi ncakwiila kwaamba ayi musebenshi wakwe Yehova ushomeka inga taeeleshi kuyeeya sha kweeba muntu uteshi Kamboni ‘akulinjisha mulijoko lyomwi’ amuntu uyo.​—2 Koli. 6:14; 1 Koli. 7:39.

Mukwiinga tacibete kabotu kulangoola muntu wakweebanaakwe pa intaneti, kuli nshila shibotu mbweenga mwalangoola muntu wakweebanaakwe. Ino nkuli nkweenga mwacana muntu weenga weelela kubaakwe mucikwati? Cilaba cuubu kushibana abamwi ndyetwabungana pantu pomwi kumabungano ansondo ansondo, kubungana kwalubasu, kubungana kunene alimwi akubungana kumwi.

Na taakuwo kubungana uku bweenka mbuli ciindi ca bulwashi bwa COVID-19, tulacita mabungano aya kwiinda mukusebensesha mafooni, matabuleti, makompyuta na shimwi. Aboobo cilaba cuubu kushibana a Bakamboni bamwi batabete mucikwati. Cilaba cuubu kubashiba kabotu mukwiinga inga mwanyumfwa mbobatokwaabanamo lubasu mumabungano. (1 Timo. 6:11, 12) Alimwi mpashi inga mwacikonsha akubandikishanya pesule lyamabungano. Alimwi ndyekuli kubungana pomwi a Bakamboni bamwi kwiinda mukusebensesha vidyo, inga mwabona muntu uyo mbwatoonyumfwana abantu bamwi, munshila iyi cilaba cuubu kumushiba kabotu mbwaabete. (1 Pit. 3:4) Mukuya kwaciindi, ndyemutooya cishibana kabotu, inga mwasalawo nobeene na nshemusuni kucita alimwi anshemubona kuyandika shitokweendelana alimwi inga mweelela kweebana.

Na abo batabete mucikwati bakonkela njiisho shamu Baibo ndyebatolangoola wakweebanaakwe, inga baba alusangalalo mucikwati cabo bweenka mbuli lilembo lya Tushimpi mbolyaamba ayi: “Uyo wacana mwanakashi [na musankwa] mubotu wacana cintu cibotu, alimwi ulacana shoolwe kuswa kuli Yehova.”​—Tus. 18:22, NWT.