1. Ino coolwe cakubandika a Yehova mumupailo tulyeelete kucibona buyani?

 MULENGI waliculu acishi capanshi wakatupa coolwe cilibetele cakupaila kuli nguwe. Amuyeeyebo paceeci: Inga twalwiita Yehova shili kumoyo wesu paciindi cili coonse alimwi mumushobo uli woonse. Inga twapaila kuli nguwe paciindi ndyetuli mucipatela na mujeele akushoma kwaamba ayi Ishiwesu shilusuno atootukutika. Tulalumba abuumbi pacipo ici.

2. Ino Mwaami Defedi wakatondesha buyani kulumba pacoolwe cakupaila?

² Mwaami Defedi wakatondesha kulumba pacoolwe cakupaila. Wakeembila Yehova ayi: “Mupailo wangu ube anga ntununkila kabotu pakutenta kunembo lyanu.” (Kulu. 141:1, 2) Paciindi Defedi ndyaakalinga muumi, tuli anga ntununkila kabotu bapailishi ntobakalinga kutenta mukulambila kwancine, twakalinga kubambwa cakubikila maano abuumbi. (Kulo. 30:34, 35) Bweenka mbuli bapailishi bakalinga kutenta tununkila kabotu mbobakalinga kucita, Defedi wakalinga kusuni kuyeeya cakubikila maano kumakani ngakalinga kusuni kwaamba kaatana kupaila kuli Yehova. Aswebo ici ncetusunishishi kucita. Tulisuni kwaamba ayi mipailo yesu inoosangalasha Yehova.

3. Ino tulyeelete kucita buyani ndyetutopaila kuli Yehova, alimwi ino nceebonshi?

³ Tulyeelete kutondesha bulemu abuumbi ndyetutopaila kuli Yehova. Amuyeeyebo pa shili anga nshiloto Isaya, Danyelo, alimwi a Joni nshebakabona. Nabi kwaamba ayi nshebakabona shakalinga kupusene, kuli cintu comwi cakalinga kukoshenye ncobakabona. Mu shili anga nshiloto boonse nshebakabona, Yehova bakamusansulula mbuli Mwaami wiinditewo. Isaya wakabona ‘Yehova kaashiite pacuuna ca bwaami ico cakalinga peculu akusumpulwa.’ (Isa. 6:1-3) Esekelo wakabona Yehova kaashiite pacikoci kwiculu alimwi “wakalinga  kushingulukitwe amumuni utuba tuu.” (Esek. 1:26-28) Danyelo wakabona “Lesa walyoonse alyoonse” kaafwete shakufwala shakalinga kutuba anga ncaandwa alimwi cuuna cakwe ca bwaami cakalinga kubilimabo mulilo. (Danye. 7:9, 10) Joni alakwe wakabona Yehova kaashiite pacuuna ca bwaami cakalinga kushingulukitwe ankongolo yakalinga kuboneka anga ndibwe liitwa ayi emalodi. (Ciyu. 4:2-4) Kuyeeya pa bulemu bwiinditeewo Yehova mbwaacite, kulatucafwa kwiibaluka kwaamba ayi kupaila kuli nguwe ncoolwe cinene abuumbi. Aboobo tulyeelete kutondesha bulemu ndyetutopaila. Ano ino nshiinshi nsheenga twapaililaawo?

4. Ino Yesu nshakaamba kumatalikilo amupailo wa cakubonenaako ngotucana pa Mateyo 6:9, 10, shilatwiisha nshi pamakani amupailo?

⁴ Amubelenge Mateyo 6:9, 10. Mulikani Yesu ndyaakaamba ndyaakalinga pa Kalundu, wakaiisha bashikwiiya bakwe mbobakalinga kweelete kupaila kwaamba ayi basangalashe Lesa. Pesule lyakwaamba ayi “mbulya mbomweelete kupaila,” Yesu wakaamba pashintu shiyandika nshotweelete kutaanguna kwaamba ndyetutopaila. Wakapailila pa kusalashikwa kwa liina lyakwe Yehova; kusa kwa Bwaami, ubo bweshi bukanyonyoole balwani bakwe Lesa boonse; alimwi apashintu shibotu Lesa nsheshi akacitile bantu kunembo pacishi capanshi. Kwiilika makani aya mumipailo yesu kulatondesha ayi kuyanda kwakwe Lesa kulayandika kuli ndiswe.

5. Sa cilibo kabotu kupailila pashintu nshetusuni palweesu?

⁵ Yesu nshakaamba palubasu lwabili lwa mupailo wacakubonenaako shakatondesha ayi cilibo kabotu kupailila pashintu nshetusuni palweesu. Inga twapaila kwaamba ayi Yehova atucaafwe kucana shakulya, atulekelele shibiibi shesu, atushitilishe kumeelesho, alimwi akutupulusha kuswa ku mubiibi. (Mate. 6:11-13) Kusenga Yehova kwaamba ayi atucaafwe pashintu ishi, kulatondesha kwaamba ayi tulishi ayi tulayandika lucafwo lwakwe alimwi tulisuni kucita shimusangalasha.

6. Sa tulyeelete kupaililabo pamakani akaambwa mumupailo wacakubonenaako? Amusansulule.

⁶ Yesu taakalinga kwiisha ayi bashikwiiya bakwe bakalinga kweelete kukonkela maswi  ngakaamba mumupailo wacakubonenaako. Ndyaakalinga kupaila paciindi cimwi, Yesu wakaamba pashintu shimwi shakalinga kuyandika paciindi ico. (Mate. 26:39, 42; Joni 17:1-26) Aswebo inga twapailila pashintu shili shoonse shitotusukamika. Inga twapaila kwaamba ayi Yehova atupe busongo akunyumfwishisha shintu katutana kusala cakucita. (Kulu. 119:33, 34) Na kuli ncito iyumu njetwapekwa, inga twapaila kwaamba ayi Yehova atucaafwe kushiba kabotu mbweenga twasebensa. (Tus. 2:6) Bashali inga bapaililako bana babo, abalo baana inga bapaililako bashali babo, alimwi soonse inga twapaililako shiiyo sha Baibo abaabo mbotushimikila. Nacibi boobo, tatweelete kupaililabo pa kusenga lucafwo.

7. Ino nceebonshi tulyeelete kulumbaisha Yehova ndyetutopaila?

⁷ Tulyeelete kwiibaluka kulumbaisha Yehova ndyetutopaila. Lesa wesu eenkabo ngoweelela kulumbaishikwa. Ngu ‘mubotu alimwi alilibambite kutulekelela.’ Alimwi ‘aliswite nkumbu aluse, taafwambaani kukalala, ulicite lusuno lutamaani alimwi alashomeka.’ (Kulu. 86:5, 15) Aboobo tulyeelete kumulumbaisha pamibo yakwe alimwi ashintu nshaacita.

8. Ino nshiinshi shimwi sheelete kutupa kulumba Yehova? (Kulumbaisha 104:12-15, 24)

⁸ Tatweelete kweelabo pakulumbaisha Yehova ndyetutopaila, sombi tulyeelete kumulumba apashintu shibotu nshaakalenga. Kucakubonenaako, inga twamulumba ceebo ca maluba abotu ngotubona, shakulya shibotu shipusenepusene, acoolwe cibotu cakuba abeshicibusa mbotusuni abuumbi. Ishiwesu shilusuno wakatupa shintu ishi kwiilikaawo ashimwi shiinji, kwaamba ayi tunoosangalala. (Amubelenge Kulumbaisha 104:12-15, 24.) Alimwi ciyandika abuumbi, tulalumba Yehova pakutupa shakulya shakumushimu shiinji abuumbi. Tulalumba apacishomesho ca buumi bubotu mbotutolangila kunembo.

9. Ino nciinshi ceenga catucafwa kwiibaluka kulumba Yehova? (1 Bene Tesalonika 5:17, 18)

⁹ Cimwi ciindi inga caba cuubu kulubaako kulumba Yehova pashintu nshaatucitila. Ino inga mwacita buyani kwaamba ayi munookwiibaluka? Inga mwalemba mulongo washintu shipusenepusene nshomwakapaililaawo, lyalo ciindi aciindi inga kamulangaawo pamulongo  uyo kwaamba ayi mubone Yehova mbwakakumbula mipailo yanu. Lyalo amupaile akumulumba palucafwo lwakwe. (Amubelenge 1 Bene Tesalonika 5:17, 18.) Amuyeeye paceeci: Tulanyumfwa kabotu na bamwi batulumba. Alakwe Yehova alasangalala na tweebaluka kumulumba palucafwo ndwatupa na twapaila. (Kolo. 3:15) Sombi kuli cintu acimwi ciyandika abuumbi Lesa ncaakatupa ncotweelete kumulumba.

10. Kweelana a 1 Pita 2:21, ino nceebonshi tulyeelete kulumba Yehova kwaamba ayi wakatuma Mwanaakwe pacishi capanshi?

¹⁰ Amubelenge 1 Pita 2:21. Tulyeelete kulumba Yehova ceebo cakutuma Mwanaakwe ngwaasuni abuumbi kusa mukutwiisha. Kwiiya pali Yesu kulatucafwa kushiba shiinji pali Yehova akwiiya mbweenga twacita shimusangalasha. Na katucita shitondesha ayi tulashoma mumulambu wakwe Klistu, tulaakuba abushicibusa buyumu a Yehova Lesa alimwi akuba muluumuno anguwe.​—Loma. 5:1.

11. Ino nceebonshi tulyeelete kupaila kwiinda muliina lyakwe Yesu?

¹¹ Tulalumba Yehova ceebo cakwaamba ayi inga twapaila kuli nguwe kwiinda mu Mwanaakwe. Yehova alatupa nshetusenga mumupailo kwiinda muli Yesu. Yehova alakutika akukumbula mipailo njetupaila kwiinda muliina lyakwe Yesu. Yesu wakaamba ayi: “Cili coonse nceshi mukasenge muliina lyangu, ndaakucicita kwaamba ayi baTa bakapekwe bulemu kwiinda mu Mwanaabo.”​—Joni 14:13, 14.

12. Ino nceebo nshi acimwi ncotweelete kulumba Yehova pacipo ca Mwanaakwe?

¹² Yehova alatulekelela shibiibi shesu ceebo ca mulambu wa cilubula cakwe Yesu. Malembo alaamba ayi Yesu ‘ngomupailishi wesu munene [ushiite] kululyo lwa cuuna ca bwaami cakwe Lesa Wiindaawo kwiculu.’ (Ebu. 8:1) Yesu ngo “shikutucafwa utwaambililaako kuli Ishiwesu.” (1 Joni 2:1) Tulalumba abuumbi kwaamba ayi Yehova watupa Mupailishi Munene unyumfwishisha kwaamba ayi tatumaninite alimwi ‘utwaambililaako’! (Loma. 8:34; Ebu. 4:15) Mukwiinga tuli bantu batamaninite, tulacikonsha kupaila kuli Yehova ceebo ca mulambu wakwe Yesu. Aboobo tulalumba abuumbi pacipo ciinditeewo, Yehova ncaakatupa kwiinda mu Mwanaakwe ngwaasuni abuumbi!

13. Ino Yesu wakatondesha buyani ayi wakalinga kubasuni abuumbi bashikwiiya bakwe mashiku kaatana kufwa?

¹³ Mashiku Yesu kaatana kufwa, wakapailila bashikwiiya bakwe. Wakasenga Baishi kwaamba ayi ‘abafuune kuswa kuMubiibi.’ (Joni 17:15) Ici cakatondesha kwaamba ayi wakalinga kubasuni abuumbi. Nabi kwaamba ayi wakalinga kucishi ayi wakalinga pafwiifwi kupenshekwa abuumbi, wakalisukama pa batumwi bakwe.

14. Ino inga twatondesha buyani ayi tulibasuni bamakwesu abenankashi?

¹⁴ Aswebo tulakonkela cakubonenaako cakwe Yesu kwiinda mukutabikilabo maano kushintu nshetuyandika. Tulapaililako bamakwesu abenankashi lyoonse. Na twacita boobo nkokwaamba ayi tutookonkela mulawo wakwe Yesu wakwaamba ayi tulyeelete kusunana. Alimwi ici cilatupa kutondesha Yehova kwaamba ayi tulibasuni abuumbi bashominyineesu. (Joni 13:34) Kupaililako bamakwesu abenankashi teshi kusowabo ciindi. Maswi akwe Lesa alatulwiita ayi “mupailo wa muntu ululeme ulicite nkusu abuumbi.”​—Jemu. 5:16.

15. Ino nceebonshi tulyeelete kupaililako bamakwesu abenankashi?

¹⁵ Tulyeelete kupaililako bamakwesu abenankashi mukwiinga baleenda mumapensho  apusenepusene. Inga twasenga Yehova kwaamba ayi abacaafwe kuliyumya ndyebatoociswa, ndyebapolelwa mapensho anene alicitikila, ndyebatoopenshekwa, na ndyebatokwiinda mumapensho amwi. Alimwi inga twapaililako bamakwesu abenankashi balyaaba kupa lucafwo kubaabo babulishite. Mpashi kuli bamwi mbomushi batokwiinda mumapensho mbuli aya. Mpashi inga mwabapaililaako kwiinda mukwaamba meenaabo. Tulatondesha ayi tulisuni bamakwesu abenankashi kwiinda mukusenga Yehova kwaamba ayi abacaafwe kuliyumya.

16. Ino nceebonshi tulyeelete kupaililako baabo bacite mikuli mulibungano?

¹⁶ Bamakwesu bacite mikuli mulibungano balalumba abuumbi na katubapaililaako, alimwi mipailo iyo ilabacafwa. Ubu mbocakalinga aku mutumwi Paulo. Wakalemba ayi: “Anebo kamumpaililaako kwaamba ayi andwiite maswi ngoonjelete kwaamba pakushimikila, ayi nshibishe bantu isho shakalinga kushisitwe pa makani abotu cakutaloonda.” (Efe. 6:19) Amunshiku shino tulicite bamakwesu baanji basebensa cankusu kututanjilila. Tulatondesha ayi tulibasuni kwiinda mukupaila kwaamba ayi Yehova abape shoolwe muncito yabo.

17-18. Ino ndilili ndyeenga twapekwa coolwe cakwiimikaninaako bamwi mumupailo, alimwi ino nciinshi ncotweelete kwiibaluka?

¹⁷ Cimwi ciindi inga twapeekwa coolwe cakwiimikaninaako bamwi mumupailo. Kucakubonenaako, nankashi utootanjilila ciiyo ca Baibo inga wasenga nankashi ngwayaakwe kwaamba ayi apaile paciiyo. Mukwiinga nankashi uyo wasengwa ayi apaile taamushi kabotu shikwiiya, mpashi inga wasenga ayi aambe mupailo wakweelaako. Ici inga camucafwa kwaamba ayi apaile kweelana ashitoyandika shikwiiya.

¹⁸ Mukwesu inga wapekwa coolwe cakwaamba mupailo pa mubandi wakulibambila kuya muncito yakushimikila na pakubungana. Bamakwesu bapekwa mukuli uyu balyeelete kwiibaluka luyaando lwakubungana uko. Tabeelete kutalika kululika na kwaamba shakoolobesha mumupailo. Liinji ndyetutobungana, mupailo alwiimbo shilyeelete kucitwa mumamineti ali 5. Aboobo mukwesu wapekwa mukuli wakwaamba  mupailo bunene bunene wakutaanguna, taeelete ‘kufusha maswi’ na shakwaamba.​—Mate. 6:7.

19. Ino nciinshi ceshi cikatucaafwe kulibambila bushiku bwa boomboloshi bwakwe Yehova?

¹⁹ Kupaila kulyeelete kuba cintu ciyandika abuumbi mubuumi bwesu mukwiinga bushiku bwa boomboloshi bwakwe Yehova buli pafwiifwi. Aboobo Yesu wakaamba ayi: “Amwikale kamulibambite lyoonse, kamupaila ayi mube ankusu sha kwiinda musheeshi shintu sheshi shikacitike.” (Luka 21:36) Na katupaila lyoonse tulaakuyumya lushomo lwesu alimwi tulaakuba balibambite bushiku bwa boomboloshi bwakwe Lesa na bukashiike.

20. Ino inga twacita buyani kwaamba ayi mipailo yesu ibe anga ntununkila kabotu pakutenta?

²⁰ Ino nshiinshi nshetwabandika? Tulalumba abuumbi pacoolwe cakupaila. Shintu shiyandika abuumbi nshotweelete kupaililaawo nsheesho shikumite luyaando lwakwe Yehova. Tulalumba pacipo Lesa ncaakatupa kwiinda mu Mwanaakwe alimwi tulapaililako bamakwesu abenankashi. Yehova alisuni kwaamba ayi tunopaila kwaamba ayi atucaafwe kucana nshetuyandika lwakumubili alimwi alwakumushimu. Inga twatondesha ayi tulalumba abuumbi pacipo ici cibotu, kwiinda mukuyeeya cakubikila maano nshetwaamba mumipailo yesu. Kucita boobo kulaakupa kwaamba ayi nshetwaamba mumipailo yesu shibe anga ntununkila kabotu pakutenta na shisangalasha kuli Yehova.​—Tus. 15:8.