1. Ino Yehova wakacita buyani Adamu a Efa ndyebakabishabo? (Matalikilo 3:15)

 ADAMU a Efa ndyebakabishabo, Yehova wakaamba bushinshimi buyandika bwakapa kwaamba ayi bamulunyungu lwakwe Adamu a Efa balangile kuba abuumi. Bushinshimi ubu bulacanika palilembo lya Matalikilo 3:15.​—Amubelenge.

2. Ino nceebonshi bushinshimi ubu bulayandika?

² Bushinshimi ubu bulacanika mulibuku lyakutaanguna lyamu Baibo. Nacibi boobo, kuli nshila shimwi mabuku amu Baibo amwi oonse mbwaacatene abushinshimi ubu. Bweenka mbuli kava ya libuku mboicatanya mapeeji oonse, bushinshimi mbotucana pa Matalikilo 3:15 bulacatanya makani acanika mumabuku oonse amu Baibo, lyalo akuyuminisha citeente cinene comwi cakwaamba ayi Shikulubula alaakutumwa kwaamba ayi akese mukunyonyoola Satana abamucita shibiibi boonse. * Ici cilaakuba coolwe cinene abuumbi kubaabo basuni Yehova!

3. Ino tutobandika nshi mumutwi uyu?

³ Mumutwi uyu tutocana shikumbulo kumiipusho itokonkelaawo itokwaamba pabushinshimi bucanika palilembo lya Matalikilo 3:15: Ino mbaani batokwaambwa mubushinshimi ubu? Ino bushinshimi ubu butookumanishikwa buyani? Alimwi ino bulatucafwa buyani?

4. Ino “nsoka” ileemikaninaako nshi, alimwi ino tulishi buyani?

⁴ Bushinshimi mbotucana palilembo lya Matalikilo 3:14, 15 bulaamba pa “nsoka,” “lunyungu” lwa nsoka, “mwanakashi,” alimwi a “lunyungu” lwa mwanakashi. Baibo ilasansulula shoonse ishi ncoshiimikaninaako. * Citaanshi, amuleke tusansulule  “nsoka” ncoimikaninaako. Iyi teshi insoka iine mukwiinga naakwiinga taikwe kunyumfwishisha Yehova nshakaamba mumuunda wa Edeni. Aboobo cilyeelete kwaamba ayi ileemikaninaako cilengwa cimwi cicite maano Yehova ncaakoombolosha. Ino ncilengwa nshi? Ciyubululo 12:9 ilaamba ayi Satana “njensoka ikulukulu.” Ano ino bamu lunyungu lwa nsoka mbaani?

5. Ino bamulunyungu lwa nsoka mbaani?

⁵ Cimwi ciindi Baibo ilaamba maswi akwaamba ayi “bamulunyungu” kusansulula baabo bakonkela cakubonenaako ca umwi cakwaamba ayi inga beetwa ayi bana bakwe. Aboobo bamulunyungu lwa nsoka mbaanjelo babiibi alimwi abantu batashomeki, abo bakaka kukonkela Yehova nshaamba alimwi bapikisha bantu Bakwe bweenka mbuli Satana. Ici cileelikaawo abaanjelo bakapondoka akuswa kwiculu muciindi cakwe Nowa, alimwi abantu bacita shintu shibiibi bweenka mbuli ishiwabo Satana.​—Mata. 6:1, 2; Joni 8:44; 1 Joni 5:19; Judi 6.

6. Ino nceebonshi “mwanakashi” waambwa pa Matalikilo 3:15 teshi Efa?

⁶ Ano amuleke tubandike wiimikaninako “mwanakashi.” Uyu mwanakashi teshi Efa. Ino nceebonshi? Amuleke tubandike ceebo comwibo. Bushinshimi bulaamba ayi lunyungu lwa mwanakashi ‘lulaakulyata’ nsoka kumutwi. Kweelana ambotwabandikawo kale, insoka ngu munjelo mubiibi Satana, alimwi taakuwo muntu utamaninite kuswa mulunyungu lwakwe Efa weenga waba ankusu shakulyata Satana. Aboobo ino Satana alaakunyonyoolwa buyani?

7. Kweelana a Ciyubululo 12:1, 2, 5, 10, ino mwanakashi waambwa palilembo lya Matalikilo 3:15 aleemikaninako nshi?

⁷ Libuku lyakweelaako lyamu Baibo lilatulwiita wiimikaninako mwanakashi waambwa  palilembo lya Matalikilo 3:15. (Amubelenge Ciyubululo 12:1, 2, 5, 10.) Uyu teshi mwanakashi mwiine, mukwiinga Baibo ilaamba ayi panshi lya myeendo yakwe pakalinga mweenshi alimwi pamutwi wakwe pakalinga mushini wa nyenyeenshi shili 12. Wakashala mwaana ulibetele​—Bwaami bwakwe Lesa. Bwaami ubu buli kwiculu, aboobo cilyeelete kwaamba ayi mwanakashi alakwe ali kwiculu. Aleemikaninako lubasu lwakwiculu lwa libunga lyakwe Yehova lya baanjelo bakwe bashomeka.​—Gala. 4:26.

8. Ino lubasu luyandika abuumbi lwa lunyungu lwa mwanakashi ngani, alimwi ino ndilili ndyaakaba boobo? (Matalikilo 22:15-18)

⁸ Baibo ilatucafwa kushiba lubasu luyandika abuumbi lwa lunyungu lwa mwanakashi waambwa pa Matalikilo 3:15. Lunyungu ulo lwakalinga kweelete kuswa mumukowa wakwe Abulaamu. (Amubelenge Matalikilo 22:15-18.) Kweelana abushinshimi mbobwakatondesha, Yesu wakalinga wamulunyungu lwakwe Abulaamu, musankwa ushomeka. (Luka 3:23, 34) Nacibi boobo, kwaamba ayi wamulunyungu uyo acikoonshe kulyaatoola Satana, wakalinga kweelete kuba ankusu shiindite pankusu sha buntu. Aboobo Yesu ndyaakalinga kucite myaaka 30, wakananikwa amushimu usalashi mbuli Mwanaakwe Lesa wakashalwabo eenka. Ndyaakananikwa, Yesu wakaba lubasu luyandika abuumbi lwa lunyungu lwa mwanakashi. (Gala. 3:16) Yesu ndyaakabushikwa, Lesa ‘wakamupa bulemu a bwaami,’ alimwi wakamupa a “nkusu shoonse kwiculu alimwi apacishi ca panshi.” Ici cakeelikaawo ankusu shakunyonyoola sheesho shicita Satana.​—Ebu. 2:7; Mate. 28:18; 1 Joni 3:8.

9-10. (a) Ino mbaani abamwi babete lubasu lwa lunyungu lwa mwanakashi, alimwi ino ndilili ndyebaba? (b) Ino nshiinshi nsheshi twiiye ano?

⁹ Kuli abamwi beshi bakabe lubasu lwa lunyungu lwa mwanakashi. Mutumwi Paulo wakaamba palubasu lwa lunyungu ndyaakalwiita ba Juda alimwi a Beneklistu bamwi bananikitwe ayi: “Na muli bakwe Klistu, nkokwaamba ayi muli bamulunyungu lwakwe Abulaamu, beelete kutambula sheesho Lesa nshaakashomesha.” (Gala. 3:28, 29) Na Yehova wananika Mwineklistu amushimu usalashi, nkokwaamba ayi muntu uyo waba lubasu lwa lunyungu lwa mwanakashi. Aboobo lunyungu lwa mwanakashi ngu Yesu Klistu alimwi aba 144,000 beshibakanookweendelesha pomwi anguwe. (Ciyu. 14:1) Alimwi boonse baleelesha cankusu kuyeeya akucita shintu bweenka mbuli Ishiwabo, Yehova Lesa.

¹⁰ Mukwiinga twabashiba ano abo baambwa palilembo lya Matalikilo 3:15, amuleke twiiye Yehova nshaacita kale kwaamba ayi bushinshimi ubu bukumanishikwe alimwi akukumanishikwa kwa bushinshimi ubu mbokutucafwa munshiku shino.

11. Ino bushinshimi bwaamba ayi insoka ilaakuluma lunyungu lwa mwanakashi “kukashindi” bulasansulula nshi?

¹¹ Bushinshimi mbotucana palilembo lya Matalikilo 3:15 bulaamba ayi insoka ilaakuluma lunyungu lwa mwanakashi “kukashindi.” Satana wakacita boobo ndyaakapa kwaamba ayi ba Juda alimwi abene Loma bacaye Mwanaakwe Lesa. (Luka 23:13, 20-24) Bweenka muntu walumwa kukashindi mbweenga waalilwa kweenda kwakaciindi, Yesu taakalinga kucikonsha kucita cili coonse ndyaakafwa kwanshiku shotatwe.​—Mate. 16:21.

12. Ino nsoka ilaakulyatwa buyani kumutwi, alimwi ino ndilili?

¹² Kwaamba ayi bushinshimi mbotucana palilembo lya Matalikilo 3:15 bukumanishikwe, Yesu wakalinga kweelete kubushikwa. Ino nceebonshi? Kweelana abushinshimi, lunyungu  lwa mwanakashi lulaakulyata nsoka kumutwi. Alimwi ncakwiila wakabushikwa! Pabushiku bwatatu, Yesu wakabushikwa amubili utafwi akuya kwiculu. Alimwi paciindi ceelete Lesa ncaakabika, Yesu alaakunyonyoola Satana kwamuyayaya. (Ebu. 2:14) Klistu alimwi abaabo beshibakanookweendelesha pomwi anguwe balaakunyonyoola balwani bakwe Lesa na lunyungu lwa nsoka.​—Ciyu. 17:14; 20:4, 10. *

13. Ino kukumanishikwa kwa bushinshimi ubu kulatucafwa buyani?

¹³ Na muli musebenshi wakwe Yehova wakalyaaba, nkokwaamba ayi kukumanishikwa kwa bushinshimi ubu kulamucafwa. Yesu wakesa pacishi capanshi mbuli muntu. Wakakonkela mibo ya Baishi cakumaninina. (Joni 14:9) Aboobo kwiiya pali nguwe kwatucafwa kumushiba kabotu Yehova Lesa alimwi akumusuna. Alimwi njiisho shakwe Yesu abutanjilishi mbwatupa kwiinda mulibungano lya Bwineklistu shatucafwa abuumbi. Watucafwa kwiiya nsheenga twaciita kwaamba ayi tunoocita shisangalasha Yehova. Alimwi soonse inga twacafwikwa ceebo ca kulumwa kukashindi kwakwe Yesu na lufu lwakwe. Munshila nshi? Yesu ndyaakabushikwa, Yehova wakasumina mulambu wa Mwanaakwe utacite kampenda uyo ‘utusalasha kuswa kushibiibi shoonse.’​—1 Joni 1:7.

14. Ino tulishi buyani kwaamba ayi bushinshimi Yehova mbwakaamba mumuunda wa Edeni tabuna kukumanishikwa paciindi ceenka cilya? Amusansulule.

¹⁴ Bushinshimi Yehova mbwakaamba mumuunda wa Edeni tabuna kukumanishikwa paciindi ceenka cilya. Cakalinga kusa mukutola ciindi kwaamba ayi mwanakashi abe alunyungu lwakashomeshekwa, Satana abunganye bashikwiiya bakwe, alimwi akwaamba ayi pabe lupato pakati kamakoto obilo. Kunyumfwisha bushinshimi ubu kulatucafwa mukwiinga kulatucenjesha kwaamba ayi cishi ceendeleshekwa a Satana cilaakupata basebenshi bakwe Yehova. Paciindi cimwi Yesu wakacenjesha bashikwiiya bakwe pamakani aya. (Maako 13:13; Joni 17:14) Ncakutatoonsha kwaamba ayi kukumanishikwa kwa lubasu lwa bushinshimi ubu kwabonekela patuba, bunene bunene mumyaaka 100 yaiinda. Munshila nshi?

15. Ino nceebonshi bantu bamucishi balitupatite abuumbi, alimwi ino nceebonshi tatweelete kuloonda Satana?

¹⁵ Kapatana kwiinda aciindi cilaamfu Yesu ndyaakabikwa pa Bwaami bwabu Mesiya mu 1914, Satana wakatandwa kwiculu. Kuswabo ciindi cilya ali pacishi capanshi, kulindila bushiku ndyeshi akanyonyoolwe. (Ciyu. 12:9, 12) Nacibi boobo, ici tacaambi ayi alishiitebo kulindilila kunyonyoolwa. Satana alikalalite abuumbi, aboobo watolelela kulwana bantu bakwe Lesa. (Ciyu. 12:13, 17) Paceebo ceeco, bantu bamucishi cakwe Satana balitupatite abuumbi. Sombi tatweelete kuloonda Satana abantu bakwe. Muciindi cakuloonda, inga twashoma cakutatoonsha bweenka mbuli mutumwi Paulo uyo wakalemba ayi: “Na Lesa ali andiswe, ino ngani weenga watulwana?” (Loma. 8:31, NWT) Inga twacinka manungo muli Yehova mukwiinga kweelana ambotwabona, shiinji shakaambwa mubushinshimi mbotucana palilembo lya Matalikilo 3:15 shakakumanishikwa.

16-18. Ino kunyumfwishisha bushinshimi mbotucana palilembo lya Matalikilo 3:15 kwabacafwa buyani ba Curtis, ba Ursula, alimwi aba Jessica?

¹⁶ Cishomesho cakwe Yehova ncetucana palilembo lya Matalikilo 3:15 inga catucafwa kuliyumya mumapensho ali oonse ngeenga tweendaamo. Ba Curtis basebensa mbuli mishonali  ku Guam bakaamba ayi: “Cimwi ciindi ndeenda mubukaalo buyumu ubo bupa kwaamba ayi cibe ciyumu kutolelela kushomeka kuli Yehova. Nacibi boobo, kukutumana kuyeeya pabushinshimi mbotucana palilembo lya Matalikilo 3:15 kwancafwa kutolelela kucinka manungo muli Ishiwesu wakwiculu.” Ba Curtis batoolangila kuciindi Yehova ndyeshi akamane mapensho oonse ngotwiindaamo.

¹⁷ Nankashi waliina lya Ursula ukala ku Bavaria wakaamba ayi, kunyumfwishisha lilembo lya Matalikilo 3:15 kwakamucafwa kushoma cakutatoonsha kwaamba ayi Baibo nga Maswi akatanjililwa a Lesa. Wakayuminishikwa abuumbi ndyaakabona bushinshimi bumwi boonse mbobucatene abushinshimi ubu. Alimwi wakaamba ayi: “Ndyendakeeya kwaamba ayi Yehova wakacitawo comwi cakufwambaana kwaamba ayi atucaafwe kuba akulangila, lusuno lwangu pali nguwe lwakakomenenaako.”

¹⁸ Nankashi waliina lya Jessica ukala kucishi ca Micronesia, wakaamba ayi: “Ntokwiibaluka mbondakalinyumfwa ciindi cakutaanguna ndyendakashiba ayi ndacana cancine! Bushinshimi mbotucana palilembo lya Matalikilo 3:15 bwakalinga kukumanishikwa. Bushinshimi ubu bwancafwa kwiibaluka kwaamba ayi Yehova taakwe kutulenga kwaamba ayi tunookwiinda mumapensho ngotutokwiindaamo pacecino ciindi. Alimwi bwancafwa kushoma cakutatoonsha kwaamba ayi kusebensela Yehova kulapa kukala buumi bubotu pacecino ciindi alimwi abwiinditeewo kubota kunembo.”

19. Ino nceebonshi inga twashoma cakutatoonsha kwaamba ayi lubasu lwakweelaako lwa bushinshimi mbotucana palilembo lya Matalikilo 3:15 lulaakukumanishikwa?

¹⁹ Kweelana ambotwabona, lilembo lya Matalikilo 3:15 litookumanishikwa pacecino ciindi. Twashiba kabotu lunyungu lwa mwanakashi alimwi alunyungu lwa nsoka. Yesu uyo ubete lubasu luyandika lwa lunyungu lwa mwanakashi wakabushikwa alimwi pacecino ciindi ngu Mwaami utafwi alimwi ucite nkusu. Alimwi kwacaalabo paniini kwaamba ayi abo Yehova mbaakasala kwaamba ayi bakanookweendelesha pomwi a Mwanaakwe kwiculu boonse bakwane. Mukwiinga lubasu lwakutaanguna lwa bushinshimi ubu lwakakumanishikwa, inga twashoma cakutatoonsha kwaamba ayi lubasu lwakweelaako, lwakulyaatoola mutwi wa nsoka, alwalo lulaakukumanishikwa. Bantu bakwe Lesa balaakukondwa abuumbi na Satana akanyonyoolwe! Aboobo kushikila ciindi ico cikashiike, mutabooleli mwisule. Lesa wesu ngu Lesa ushomeka. Kwiinda mulunyungu lwa mwanakashi, alaakuleta shoolwe shitaambiki ‘kumishobo yoonse ya pacishi ca panshi.’​—Mata. 22:18.