Ndakashalwa mu 1935 kumusena wiitwa ayi Darlaston, kulubasu lwa cishi ca England ciitwa ayi Cishi Cishiya. Lubasu ulu lwakapekwa liina lya kwaamba ayi Cishi Cishiya ceebo ca bwiishi bushiya bwakalinga kuswa kumafakitoli aanji acanika kumusena uku. Ndyendakalinga pafwiifwi akukwanisha myaaka 4, bashali bangu bakatalika kwiiya Baibo a Bakamboni Bakwe Yehova. Ndyendakalinga kucite myaaka pafwiifwi a 14, ndakashoma cakutatoonsha kwaamba ayi ndacana cancine, aboobo mu 1952 ndakabombekwa kaancite myaaka 16.

Alimwi paciindi ceenka ici, ndakatalika kwiiya ncito mukampani inene yakalinga kupanga shisebensesho shipusenepusene, kwiilikaawo asheela sha ku myotoka. Bakatalika kunjiisha ncito yakusebensa mbuli mulembi wa kampani, incito njendakalinga kusuni abuumbi.

Ndakaba acakusalawo ciyandika abuumbi mutanjilili walubasu ndyaakansenga ayi notanjilila Ciiyo ca Baibo Calibungano kumabungano amukati kansondo, mulibungano linemisheesu lya Willenhall. Sombi cakalinga ciyumu kusalawo. Paciindi cilya ndakalinga kubungana kumabungano obilo. Mukati kansondo ndakalinga kubungana kulibungano liitwa ayi Bromsgrove, lyakalinga pafwiifwi ankondakalinga kusebensela, uko kwalinga kulaale makilomita 32 kuswa kuŋanda. Alimwi kumamanino ansondo na ndaboolela kuŋanda ku bashali bangu, ndakalinga kubungana kulibungano lya Willenhall.

Mukwiinga ndakalinga kusuni kucita shiinji mulibunga lyakwe Yehova, ndakasumina mukuli mutanjilili walubasu ngwaakampa, nabi kwaamba ayi ici cakalinga kusansulula kucileka ncito njendakalinga kusuni abuumbi. Mukwiinga ndakasuminisha Yehova kutanjilila nshila yangu kuswabo paciindi cilya, ndacana buumi busangalasha abuumbi.

Ndyendakalinga kubungana kulibungano lya Bromsgrove, ndakashibana anankashi mubotu alimwi ubikila maano abuumbi kushintu shakumushimu waliina lya Anne. Mu 1957 twakeebana, alimwi twakasangalala ashoolwe mbuli kusebensa bupainiya bwaciindi coonse, bupainiya bulibetele, kufwakashila mabungano, alimwi akusebensela pa Bethel. Mubuumi bwangu boonse ba Anne balancafwa kuba alusangalalo.

 Mu 1966, twakasangalala abuumbi kucanika kucikolo ca Gilyadi ca namba 42. Pesule lyakumanisha cikolo bakatutuma ku Malawi, cishi cishibikitwe ayi balatambula kabotu abuumbi mu Africa. Nacibi boobo, tatwakalinga kucishiwo kwaamba ayi teshi tukekaleko ciindi cilaamfu.

Twakashika ku Malawi pa 1 February, 1967. Mu mweenshi wakutaanguna ndyetwakashika, twakatola ciindi cilaamfu kwiiya mushobo, lyalo twakatalika ncito yakufwakashila bamatanjilili balubasu. Twakalinga kweensha motoka yakalinga kwiitwa ayi Kaiser Jeep bantu njobakalinga kuyeeya ayi ileenda pali poonse, nabibo pamulonga. Nacibi boobo, ubu teshi mbocakalinga, mukwiinga yakalinga kucikonshabo kusubuka tulonga twakalinga kucite maanshi aniini. Cimwi ciindi twakalinga kukala mumaanda abulongo acite ciluli ca bwiisu acalo cakalinga kuyandika kubikawo tente muciindi ca mainsa kwaamba ayi tutalokwi. Yakalinga nshila iyumu abuumbi yakutalika ncito yesu yabumishonali, nacibi boobo, twakalinga kwiisuni abuumbi!

Mu mweenshi wa April, ndakesa mukushiba kwaamba ayi tutotalika kupenshekwa ku mfulumeende. Ndakanyumfwa makani akaamba pulesidenti waku Malawi waliina lya Dr Hastings Banda paledyo. Wakabekesha Bakamboni Bakwe Yehova ayi tabalipiliiwo misonko alimwi bakalinga kucita shintu shakalinga kupilinganya mfulumeende. Nacibi boobo, makani aya taakalinga ancine. Soonse twakalinga kucishi kwaamba ayi lipenshi linene ndyaakwaamba ayi tatwaabanimo lubasu mushacishi alimwi bunene bunene ceebo cakwaamba ayi twakalinga kukaka kutambula makaadi ashipani shamapolitiki.

Kushika mu September, makani akaswa pa nyusi akwaamba ayi pulesidenti wabekesha bamakwesu ayi batopilinganya bantu kumisena kuli koonse. Wakoolobesha pakubungana kwa beshimapolitiki kwaamba ayi mfulumeende yakwe ilaakukasha ncito ya Bakamboni Bakwe Yehova. Kushika pabushiku  bwa 20 October, 1967, incito yesu yakakashikwa. Aboobo paciindi ciniinibo bakapokola abeshikulanga pamakani abeshikunjila mucishi kuswa kushishi shimwi bakashika pa Bethel akucala musampi, lyalo akulwiita ba mishonali boonse ayi balyeelete kuswa mucishi ca Malawi.

Pesule lyakumana nshiku shotatwe mujeele, bakatutuma kucishi ca Mauritius cakalinga kweendeleshekwa acishi ca Britain. Nacibi boobo, mfulumeende yaku Mauritius yakakaka kutusuminisha kusebensa mbuli ba mishonali. Aboobo twakatumwa kucishi ca Rhodesia (pacecino ciindi ciitwa ayi Zimbabwe). Ndyetwakashika ku Rhodesia twakacana shikusebensela ku ofesi ilanga pabantu batoonjila alimwi abatooswa mucishi mukali abuumbi, aboobo wakatukasha kunjila mucishi. Wakaamba ayi: “Bakamutanda ku Malawi, akwalo ku Mauritius tabakwe kumusuminisha, mwesa kokuno ceebo cakwaamba ayi nkweshi cibe cuubu.” Ba Anne bakatalika kulila. Cakaboneka anga taakuwo wakalinga kutusuni! Paciindi cilya, ndakalinga kusuni kuboolelabo kucishi cinemisheesu ku England. Lyalo bakatusuminisha ayi inga twakalako bushiku bomwi pa ofesi ya musampi na tushomeshe kwaamba ayi tulaakuboolela alimwi ku ofesi inene ilanga pabantu batoonjila alimwi abatooswa mucishi, bushiku bwakaboolaawo. Twakalinga kulemete abuumbi, nacibi boobo, twakatolelela kucinka manungo muli Yehova. Bushiku bwakaboolaawo malumwi, cakuteengashila twakatambula nkalata yakutusuminisha kukala mucishi ca Zimbabwe mbuli beensu. Teshi nkalubewo mbondakalinyumfwa bushiku bulya—ndakashoma cakutatoonsha kwaamba ayi Yehova ngowakalinga kutanjilila nshila yesu.

Ndyendakalinga ku ofesi ya musampi ku Zimbabwe, bakampa ncito yakusebensela ku Dipatimenti ya Ncito, yakalinga kulama ncito yaku Malawi aku Mozambique. Bamakwesu ku Malawi bakalinga kupenshekwa abuumbi. Incito yangu yakalinga kwiilikaawo kusansulula malipooti ngotwakalinga kutambula kuswa ku bamatanjilili balubasu baku Malawi. Bushiku bumwi mashiku ndyendakalinga kumanisha kulemba lipooti, ndakalila ndyendakabelenga bamakwesu abenankashi mbobakalinga kupenshekwa. * Nacibi boobo, ndakayuminishikwa abuumbi kushiba bamakwesu mbobakatolelela kushomeka, kutondesha lushomo, alimwi akuliyumya.​—2 Koli. 6:4, 5.

Twakacita shoonse nshetwakalinga kucikonsha kwaamba ayi twaabile shakulya shakumushimu kubamakwesu bakacaala ku Malawi alimwi abaabo bakacicila ku Mozambique. Tiimu yabasansulushi ba mushobo wa Chichewa, bantu baanji ngobaamba ku Malawi yakalongela ku Zimbabwe pa faamu inene ya mukwesu umwi. Mukwesu uyu wakabayakila maanda alimwi a ofesi. Aboobo bakatolelela kusebensa ncito yabo iyandika abuumbi yakusansulula mabuku aamba shamu Baibo.

Twakabamba bubaambo bwakwaamba ayi mwaaka uli woonse bamatanjili balubasu banoosa kukubungana kunene kwamu Chichewa ku Zimbabwe. Na besa kukubungana uku bakalinga kutambula ma autilaini amakani apakubungana kunene. Ndyebakalinga kuboolela ku Malawi bakalinga kucita nshebakalinga kucikonsha kwaamba ayi balwiiteko bamakwesu nshobakeeya pakubungana kunene. Mwaaka umwi ndyebakalinga kufwakasha ku Zimbabwe, twakacikonsha kubika bubaambo bwakwaamba ayi bacanikeeko ku Cikolo ca Ncito cakuyuminisha bamatanjilili balubasu aba batakalinga kucite boowa.

Mu February 1975, ndakaya ku Mozambique mukufwakashila Bakamboni bakacica ku Malawi. Bamakwesu aba bakatolelela kukonkela butanjilishi kuswa kulibunga lyakwe Yehova, kwiilikaawo akukonkela bubaambo bwakuba alikoto lya bamanene. Bamanene bapya bakabika bubaambo bwakucita shintu shiinji shakumushimu, mbuli kwaamba makani a Baibo, kubandika lilembo lya bushiku alimwi a Njashi Yamulindilishi, kwiilikaawo akubungana kwalubasu. Misumba mobakalinga kukala yakalinga kubambitwe kabotu abuumbi bweenka mbuli mbotucita pakubungana kunene, kwakalinga dipatimenti yakulanga pamakani abuuya, kwaabila shakulya, alimwi abakulanga pamakani abumalonda. Bamakwesu bashomeka aba bakacita shiinji abuumbi kwiinda mukucafwikwa a Yehova, aboobo ndakayuminishikwa abuumbi pesule lya kubafwakashila.

Camuma 1970 ofesi ya musampi wamu Zambia yakatalika kulama ncito yaku Malawi. Nacibi boobo, ndakatolelela kuyeeya pabamakwesu baku Malawi alimwi akubapaililaako. Alimwi bamakwesu baanji abalo bakatolelela kucita boobo. Mbuli usebensela mu Komiti ya Musampi waku Zimbabwe, liinji twakalinga kubungana  abamakwesu beemikaninaako maofesi anene alimwi abamakwesu bakalinga kutanjilila ku Malawi, South Africa, alimwi a Zambia. Lyoonse twakalinga kubandika pamwiipusho wakwaamba ayi, “Ino nshiinshi shimwi nsheenga twacitila bamakwesu baku Malawi?”

Mukuya kwaciindi, kupenshekwa kwakaceya. Lyalo paniini paniini bamakwesu bakalinga bacica mucishi ca Malawi bakatalika kuboolela. Kupenshekwa kwa baabo bakalinga bacaala kwakatalika kuya buceya. Mushishi shili pafwiifwi a Malawi Bakamboni Bakwe Yehova bakasuminishikwa kutalika kushimikila akubungana, alimwi milawo yakukasha yakakushikwaawo. Mu 1991 akwalo kucishi ca Mozambique Bakamboni Bakwe Yehova bakasuminishikwa. Sombi twakatolelela kuliipusha ayi, ‘Ino Bakamboni Bakwe Yehova balaakusuminishikwa lili ku Malawi?’

Mukuya kwaciindi, bukaalo ku Malawi bwakaaluka, aboobo mu 1993 mfulumeende yakasuminisha Bakamboni Bakwe Yehova. Ndipakeendabo ciindi ciniini, ndakatalika kubandika a mukwesu umwi mishonali, lyalo wakanjipusha ayi, “Sa mulaakuboolela ku Malawi?” Paciindi ici ndakalinga kucite myaaka 59, aboobo ndakakumbula ayi, “Sobwe, ndacembela!” Nacibi boobo, pabushiku bweenka ubu twakatambula nkalata kuswa ku Likoto Litanjilila yakutusenga ayi tuboolele ku Malawi.

Twakalinga kwiisuni abuumbi incito yesu ku Zimbabwe alimwi twakalinga kucite beshicibusa bali kabotu, aboobo cakalinga ciyumu kusalawo. Bamu Likoto Litanjilila bakatulwiita ayi na tulisuni inga twatolelela kusebensela ku Zimbabwe. Aboobo cakalinga cuubu kusala nshetwakalinga kusuni akutolelela kusebensela ku Zimbabwe. Sombi ntokwiibaluka kuyeeya pali Abulaamu a Saala mbobakanyumfwila butanjilishi bwakwe Yehova kwiinda mukushiya ŋanda yabo ibotu kabali bacembela kale.​—Mata. 12:1-5.

Twakasalawo kukonkela butanjilishi kuswa kulibunga lyakwe Yehova, aboobo pa 1 February, 1995, twakaboolela ku Malawi. Paciindi ici kapali peenda myaaka 28 kuswa ciindi cakutaanguna ndyetwakapola mu Malawi. Komiti ya Musampi yakabambwa, umo mwakalinga bamakwesu bamwi bobilo alimwi andime. Lyalo tapana kwiinda aciindi cilaamfu incito ya Bakamboni Bakwe Yehova yakatalika alimwi.

Cakalinga ncoolwe cinene kubona Yehova mbwakapa kwaamba ayi incito iye panembo paciindi ciniinibo! Beshikushimikila bakafulilaako, mu 1993 bakalingabo 30,000 ano kushika mu 1998 bakashika 42,000. * Bamu Likoto Litanjilila bakasuminisha ayi ofesi ya musampi ipya iyakwe kwaamba ayi tucikoonshe kulama  kabotu incito yakalinga kuya panembo. Twakoola musena mutauni ya Lilongwe unene ma hekita 12, alimwi ndakapekwa mukuli wakusebensa mu komiti yakuyaka.

Mukwesu Guy Pierce wamu Likoto Litanjilila, ngowakaamba likani lyakwaaba musampi upya mu mwaaka wa 2001 mu mweenshi wa May. Kukubungana uku kwakalinga Bakamboni beendilila 2,000, buunji bwa mbabo bakabombekwa kwa myaaka iindilila 40. Bamakwesu abenankashi bashomeka aba bakapenshekwa abuumbi kwa myaaka iinji, paciindi incito yesu ndyeyakakashikwa. Nabi kwaamba ayi bakalinga bakandu lwakumubili, bakalinga kucite lushomo alimwi abushicibusa buyumu a Yehova. Aboobo bakalinga kukondetwe abuumbi kufwakashila Bethel ipya. Kuli koonse nkobashingulukila mu Bethel, bamakwesu abenankashi bakalinga kwiimba nyimbo sha Bwaami kweelana ambobeemba mu Africa, ici cakapa kwaamba ayi kubungana uku kube cakucitika ncentana kubonaawo kale mubuumi bwangu. Cakatondesha patuba kwaamba ayi Yehova alapa shoolwe abo batolelela kuliyumya cakushomeka.

Pesule lyakwaamba ayi musampi wayakwa, ndakakondwa kuba acoolwe cakunookwaamba makani pakubungana kwa kwaaba Ŋanda ya Bwaami. Mabungano ku Malawi akapekwa coolwe cakwaabanamo lubasu mububaambo bupya bwa libunga bwakucafwa bamakwesu kuyaka Maanda a Bwaami mushishi bamakwesu mobatacite maali aanji. Bubaambo ubu kabutana kutalika, mabungano amwi bakalinga kubunganina mu twaanda twashisamu aciluli cakubikawo mpasa. Bakalinga kukala pashuuna shilaamfu shakubumba. Ano paciindi ici bamakwesu bakatalika kusebensa cankusu kuuma ncelwa akushitenta, lyalo akuyaka misena ibotu ipya mwakubunganina. Nacibi boobo, bamakwesu bakasalawo kusebensesha mabeenci muciindi ca shuuna, mukwiinga citooboneka kwaamba ayi pa beenci palakala bantu baanji!

Alimwi ndakasangalala abuumbi kubona Yehova mbwacafwa bantu kuya panembo lwakumushimu. Ndakanyumfwa kabotu abuumbi kubona bamakwesu bacanike bamu Africa, mbobakalinga kulyaaba alimwi akwiiya shintu shiinji kuswa ku kwiishikwa alibunga lyakwe Yehova akusebensa ncito. Aboobo bakacikonsha kulama mikuli inene pa Bethel alimwi amumabungano. Alimwi cimwi cakacafwa mabungano mbamatanjilili balubasu bapya baku Malawi, buunji bwa mbabo bakalinga kweebete. Nabi kwaamba ayi bantu baanji kwiilikaawo amikwashi yabo bakalinga kubalangila kuba abaana, beebene aba bakasalawo kusebensela Yehova muncito yaciindi coonse.

Pesule lyakusebensela mu Africa kwa myaaka 52, ndakatalika kuciswa. Bamu Likoto Litanjilila bakasuminisha muyeeyo wakaamba bamakwesu bamu Komiti ya Musampi kwaamba ayi tuboolele ku Britain. Twakalinyumfwa cibiibi kushiya ncito njetwakalinga kusuni, nacibi boobo, mukwashi wa Bethel yaku Britain utootulama kabotu abuumbi mbuli bacinene.

Ndishomete cakutatoonsha kwaamba ayi ndakacita kabotu abuumbi kusuminisha Yehova kuntanjilila mubuumi bwangu. Naakwiinga ndakacinka manungo mumaano angu akutolelela kusebensa ncito yakumubili, naakwiinga buumi bwangu bwakapusana ambobubete pacecino ciindi. Yehova wakalinga kucishi kale nshendakalinga kuyandika kwaamba ayi ‘ndulamike nshila shangu.’ (Tus. 3:5, 6) Mbuli musankwa wacanike ndakalinga kusuni abuumbi kwiiya kampani inene mboisebensa. Nacibi boobo, libunga lyakwe Yehova lyakampa ncito yakumushimu yakampa kusangalala abuumbi. Aboobo inga ndaamba ayi kusebensela Yehova ncintu comwi campa kuba abuumi bucite mpindu!