1. Ino Yehova alisuni nshi?

 LESA alisuni kwaamba ayi makani abotu ashimikilwe pacishi coonse. (Maako 13:10; 1 Timo. 2:3, 4) Incito iyi njakwe Yehova, alimwi mukwiinga ilayandika abuumbi, wakaibika mumaansa a Mwanaakwe ngwaasuni abuumbi. Mukwiinga Yesu ngototanjilila ncito iyi, inga twashoma kwaamba ayi ilaakukumanishikwa kweelana akuyanda kwakwe Yehova, mamanino kaatana kushika.​—Mate. 24:14.

2. Ino tutokwiiya nshi mumutwi uyu?

² Mumutwi uyu, tutokwiiya Yesu mbwaatokwaabila shakulya shakumushimu kwiinda mu ‘musebenshi ushomeka alimwi ucite maano,’ akutanjilila bashikwiiya bakwe muncito inene abuumbi yakushimikila itana kucitwawo kale. (Mate. 24:45) Alimwi tutokwiiya ambweenga soonse twakonkela butanjilishi bwakwe Yesu alimwi amusebenshi ushomeka.

3. Ino Yesu wakapekwa nkusu shakucita nshi?

³ Ino tulishi buyani ayi Yesu ngototanjilila ncito yakushimikila? Ndyekwakacaalabo ciindi ciniini kwaamba ayi aboolele kwiculu, Yesu wakabungana abashikwiiya bakwe bamwi bashomeka pakalundu ku Galili. Wakabalwiita ayi: “Ndapeekwa nkusu shoonse kwiculu alimwi apacishi ca panshi.” Ano amunyumfwe maswi atokonkelaawo ngakaamba: ‘Kamuya mukaiishe bantu bamishobo yoonse kwaamba ayi babe bashikwiiya.’ (Mate. 28:18, 19) Aboobo incito yomwi pancito Yesu nshaakapekwa, ni nkusu shakutanjilila ncito yakushimikila.

4. Ino tulishi buyani ayi Yesu ngoocitanjilila ncito yakushimikila?

⁴ Yesu wakaamba ayi incito yakushimikila akucafwa bantu kuba bashikwiiya ilaakucitwa “mucishi coonse” alimwi alaakuba  abashikwiiya bakwe “kushikila kumamanino a cishi.” (Mate. 28:20) Maswi aya alatondesha patuba kwaamba ayi Yesu alaakutolelela kutanjilila ncito yakushimikila kushikila kumamanino.

5. Ino tulaabanamo buyani lubasu mukukumanisha shakaambwa pa Kulumbaisha 110:3?

⁵ Yesu taakwe kulisukamaawo ayi mpashi basebenshi balaakuceya muciindi camamanino abweende bwashintu. Wakalinga kucishi kwaamba ayi bushinshimi bwakaambwa mulibuku lya Kulumbaisha bwaamba ayi: ‘Bantu bako balakulyaaba amyoyo yoonse pabushiku bwa nkondo,’ bulaakukumanishikwa. (Kulu. 110:3) Na amwebo mulaabanamo lubasu muncito yakushimikila, nkokwaamba ayi mutokonkela butanjilishi bwakwe Yesu a musebenshi ushomeka alimwi ucite maano. Alimwi mutokwaabanamo lubasu mukukumanisha bushinshimi bwakaamba shikulumbaisha. Nabi kwaamba ayi incito itooya panembo, tuleenda mumapensho.

6. Ino ndipenshi nshi lyomwi ndyetucana ndyetutooshimikila bamwi makani a Bwaami?

⁶ Lipenshi lyomwi ndyetucana ndyetutooshimikila bamwi makani a Bwaami, nkupikishikwa. Bantu bakapondoka akuswa mucancine, beshibupailishi, alimwi abeshimapolitiki balalwiita bantu makani aanji akubeca pancito yesu. Na beshikamukowa, bantu bamwi mbotushi, alimwi abaabo mbotusebensaabo banyumfwa makani ayo, inga batalika kutupikisha kwaamba ayi tucileeke kushimikila akusebensela Yehova. Mushishi shimwi, balwani besu balatukonga, kutulwana, alimwi cimwi ciindi balacata bamakwesu abenankashi akubatola kujeele. Nacibi boobo, ishi tashitukankamiki mukwiinga Yesu wakaambila limwi ayi: “Bantu ba mishobo yoonse balaakumupata ceebo ca liina lyangu.” (Mate. 24:9) Alimwi kupatwa kulatutondesha patuba kwaamba ayi tutoocita shisangalasha Yehova. (Mate. 5:11, 12) Satana ngwalengesha kwaamba ayi tunoopikishikwa. Nacibi boobo, Yesu alicite nkusu kwiinda Satana! Kwiinda mulucafwo lwakwe Yesu, makani abotu atooshimikilwa kubantu bamushishi shoonse. Amuleke tubandike pabumboni bumwi.

7. Ino nshiinshi shitotondesha ayi lilembo lya Ciyubululo 14:6, 7 litookumanishikwa?

⁷ Lipenshi limwi ndyetucana ndyetutooshimikila, nkucana bantu baamba mishobo ipusenepusene. Kwiinda mucili anga nciloto, Yesu wakalwiita Joni ayi munshiku shamamanino makani abotu alaakushimikilwa kubantu baamba mishobo ipusenepusene. (Amubelenge Ciyubululo 14:6, 7.) Ino ici cilakonsheka buyani? Pacecino ciindi tulicite mabuku aamba shamu Baibo pa webusaiti yesu ya jw.org ayo akalembwa mumishobo iindilila 1,000! Aboobo tulapa coolwe bantu baanji nsengwe yoonse cakukutika ku makani a Bwaami. Bamu Likoto Litanjilila bakasuminisha kwaamba ayi libuku ndyetusebensesha kucafwa bantu kuba bashikwiiya lya Amusangalale Abuumi Kwamuyayaya! lisansululwe mumishobo iindilila 700! Nshila imwi shakulya shakumushimu mboshaabilwa, nkwiinda mumavidyo abambilwa kucafwa bashinkite matwi alimwi amabuku aboofu. Tutoobona bushinshimi bwamu Baibo mbobutookumanishikwa. Bantu ‘kuswa mumishobo yoonse’ batokwiiya cancine camu Baibo. (Seka. 8:23, NWT; Sefa. 3:9) Ishi shoonse shitookumanishikwa ceebo ca butanjilishi bubotu bwakwe Yesu Klistu.

8. Ino nshiinshi shakumanishikwa pacecino ciindi ceebo ca ncito yakushimikila?

⁸ Pacecino ciindi, mulibunga lyakwe Yehova muli bantu beendilila 8,000,000 bacanika mushishi 240, alimwi mwaaka uli woonse bantu baanji balabombekwa! Nacibi boobo, cintu ciyandika abuumbi teshibo kufula kwa bantu, sombi njimibo ya Bwineklistu bashikwiiya bapya aba njobatondesha. (Kolo. 3:8-10) Baanji pesule lyakwiiya cancine balacileka mibo ibiibi mbuli bufuule, inkondo, kasalulushi, alimwi  balakaka akwaabanamo lubasu mushacishi. Ishi shilakumanisha bushinshimi mbotucana palilembo lya Isaya 2:4 bwaamba ayi teshi ‘bakeeye sha nkondo alimwi.’ Mukwiinga tulasebensa cankusu kutondesha mibo ya Bwineklistu, tulacafwa bantu kusa mulibunga lyakwe Lesa. Alimwi ici cilatondesha ayi tulakonkela mutanjilili wesu Yesu Klistu. (Joni 13:35; 1 Pit. 2:12) Ino ishi shilakonsheka buyani? Shilakonsheka ceebo ca lucafwo kuswa kuli Yesu.

9. Kweelana a Mateyo 24:45-47, ino Yesu wakaamba ayi nciinshi ceshi cikacitike muciindi camamanino?

⁹ Amubelenge Mateyo 24:45-47. Yesu wakaambila limwi ayi muciindi camamanino alaakusala ‘musebenshi ushomeka alimwi ucite maano,’ kwaamba ayi anookwaabila shakulya shakumushimu. Aboobo musebenshi uyu inga twamulangila kusebensa cankusu munshiku shino. Alimwi ubu mbocibete. Kwiinda mukakoto kabasankwa bananikitwe, Yesu atokwaabila ‘cakulya cakumushimu paciindi ceelete’ kubantu bakwe Lesa alimwi abaabo basuni kwiiya. Basankwa aba tabaliboni anga mbamatanjilili ba lushomo lwa bamwi. (2 Koli. 1:24) Sombi balicishi kwaamba ayi Yesu Klistu “ngomutanjilili alimwi ngomweendeleshi” wa bantu bakwe Lesa.​—Isa. 55:4, NWT.

10. Ino ndibuku lili pamabuku atondeshekwa pacikope lyakamucafwa kwaamba ayi mutalike kusebensela Yehova?

¹⁰ Kuswabo mu 1919, musebenshi ushomeka alabamba mabuku apusenepusene acafwa bantu kuba acoolwe cakwiiya cancine camu Baibo kwaciindi cakutaanguna. Kwaamba ayi bantu bacafwikwe kwiiya njiisho shakutaanguna shamu Baibo, mu 1921, musebenshi wakabamba libuku lyamu Cisungu lyakalinga kucite mutwi waamba ayi The Harp of God. Ceebo cakwaaluka kwashintu, kwakesa mukuba mabuku aamwi. Ino ndibuku nshi lyakamucafwa kwiiya akusuna Ishiwesu wakwiculu? Sa ndibuku lya “Let God Be True,” The Truth That Leads to  Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, Ino Baibo Ilaiisha Nshi?, na mpashi ndibuku lipya lya Amusangalale Abuumi Kwamuyayaya! ilyo ndyetutoosebensesha pacecino ciindi? Mabuku oonse aya akabambilwa kutucafwa muncito yakucafwa bantu kuba bashikwiiya. Alimwi oonse akalinga mabuku akabambwa paciindi ceelete.

11. Ino nceebonshi soonse tulayandika kwiiya shiinji pali Yehova a Maswi akwe Baibo?

¹¹ Teshibo bashikwiiya Baibo beenka bayandika kwiiya shiinji pali Yehova alimwi a Maswi akwe. Soonse tulayandika kucita boobo. Mutumwi Paulo wakalemba ayi: “Shakulya shiyumuyumu nsha bamanene.” Wakeelikawo akwaamba ayi kukonkela nshetwiiya kuswa mu Baibo kulatucafwa “kupansaanya cibotu acibiibi.” (Ebu. 5:14) Teshi cuubu kukonkela milawo yakwe Yehova pacecino ciindi mukwiinga bantu baanji balacita shintu shibiibi. Nacibi boobo, Yesu alashinisha kwaamba ayi tutokwiiya shintu sheenga shatucafwa kwaamba ayi tutolelele kuba alushomo luyumu. Nshetwiiya shilaswa mu Baibo, Maswi akatanjililwa amushimu wakwe Lesa. Kwiinda mukutanjililwa a Yesu, musebenshi ushomeka alatubambila nshetwiiya.

12. Ino tulatondesha buyani ayi tulalemeka liina lyakwe Lesa bweenka mbuli Yesu?

¹² Bweenka mbuli Yesu, aswebo tulalemeka liina lyakwe Lesa. (Joni 17:6, 26) Kucakubonenaako, mu 1931 twakasala kunookwiitwa liina lyakwaamba ayi Bakamboni Bakwe Yehova, ilyo lyakaswa mu Malembo. Kucita boobo kwakatupa kutondesha liina lyakwe Lesa mboliyandika kuli ndiswe, akutondesha ayi twakalinga kusuni kushibikwa aliina lyakwe Ishiwesu wakwiculu. (Isa. 43:10-12) Alimwi kuswabo mu October 1931, liina lyakwe Lesa lilacanika papeeji yakutaanguna ya magazini iyi. Kwiilikaawo, mu Baibo ya New World Translation of the Holy Scriptures liina lyakwe Lesa lyakabooshekwa mumavesi oonse molyeelete kucanika mu Maswi akwe. Ici cilipusene abuumbi ashakacita  beshibupailishi baliita ayi Mbeneklistu abo bakakusha liina lyakwe Lesa muma Baibo abo!

13. Ino nciinshi cimupa kushoma kwaamba ayi ncakwiila Yesu atootanjilila ‘musebenshi ushomeka alimwi ucite maano’ munshiku shino? (Joni 6:68)

¹³ Kwiinda mu ‘musebenshi ushomeka alimwi ucite maano,’ Yesu wapa kwaamba ayi pacishi capanshi pabe libunga lilibetele liyuminisha kulambila kusalalite. Ino mulalinyumfwa buyani palibunga ili? Mpashi mulalinyumfwa bweenka bwakalinyumfwa mutumwi Pita uyo wakalwiita Yesu ayi: “Inga twaya kuli ni? Mwebo ndimwe mucite maswi abuumi butamaani.” (Joni 6:68) Ino naakwiinga womwi awomwi ali kuli pacecino ciindi, naakwiinga teshi kuba mulibunga lyakwe Yehova? Kwiinda mulibunga ili, Klistu alashinisha kwaamba ayi tulicite shoonse nshetuyandika lwakumushimu. Alimwi alatwiisha ambweenga twasebensa kabotu incito yakushimikila. Alimwi alatucafwa “kufwala buntu bupya,” kwaamba ayi tunoocita shisangalasha Yehova.​—Efe. 4:24.

14. Ino kuba mulibunga lyakwe Yehova kwamucafwa buyani paciindi ca bulwashi bwa COVID-19?

¹⁴ Yesu alatupa butanjilishi bucafwa abuumbi paciindi ndyekuli mapensho anene. Twakabona butanjilishi ubu mbobucafwa paciindi bulwashi bwa COVID-19 ndyebwakatalika. Bantu baanji mucishi ndyebatakalinga kucishiwo shakucita, Yesu wakashinisha kwaamba ayi watupa butanjilishi bweenga bwatucafwa kulishitilisha. Twakayuminishikwa kufwala shakucala kumulomo ndyetuli pa bantu baanji alimwi akutalamukana. Bamanene bakayuminishikwa kutolelela kubandika aboonse mulibungano akushinisha kwaamba ayi boonse balicite nshebayandika lwakumubili alwakumushimu. (Isa. 32:1, 2) Twakatambula butanjilishi abumwi akuyuminishikwa kwiinda mu malipooti kuswa ku Likoto Litanjilila.

15. Ino mbutanjilishi nshi mbotwakatambula pamakani akubungana anciito yakushimikila paciindi ca bulwashi bwa COVID-19, alimwi ino nshiinshi shakacitika?

 ¹⁵ Cimwi ncetwakatambula bulwashi bwa COVID-19 ndyebwakatalika, mbutanjilishi bwa mbotwakalinga kweelete kucita mabungano alimwi anciito yakushimikila. Aboobo tapana kwiinda aciindi kubungana kwa nsondo ansondo, kubungana kwalubasu, alimwi akubungana kunene kwakatolelela kwiinda mukusebensesha intaneti. Alimwi kushimikila kwiinda mukulemba makalata akutuma mafooni kwakababo anga njenshila yeenkabo. Yehova wakatupa shoolwe ceebo cakusebensa cankusu kwesu. Misampi iinji itootuma malipooti atotondesha ayi beshikushimikila batooya cifulilaakobo. Alimwi kuli shoolwe shiinji baanji nshebakacana.​—Amubone kabokosi kacite mutwi utokwaamba ayi “ Yehova Alatupa Shoolwe Muncito Yesu Yakushimikila.”

16. Ino nciinshi nceenga twashoma cakutatoonsha?

¹⁶ Mpashi bamwi inga bayeeya ayi libunga lyakaciindilisha pamakani akulishitilisha kubulwashi bwa COVID-19. Nacibi boobo, mukuya kwaciindi cakabonekela patuba kwaamba ayi cakalinga ca busongo kukonkela butanjilishi mbotwakatambula. (Mate. 11:19) Alimwi na twakutumana akuyeeya Yesu mbwatutanjilila calusuno, tulashoma cakutatoonsha kwaamba ayi Yehova a Mwanaakwe ngwaasuni abuumbi balaakutolelela kututanjilila nabi tukeende mubukaalo buli buyani kunembo.​—Amubelenge Bene Ebulu 13:5, 6.

17. Ino kukonkela butanjilishi bwakwe Yesu kulamupa kulinyumfwa buyani?

¹⁷ Tulikondetwe abuumbi kwaamba ayi Yesu ngomutanjilili wesu! Tuli mulibunga licatene nabi kwaamba ayi bantu baliimo balicite nkulilo shipusenepusene, bakaswa mushishi shipusenepusene, alimwi balaamba mishobo ipusenepusene. Tulatambula shakulya shakumushimu shikwene kabotu alimwi abutanjilishi butucafwa kusebensa kabotu ncito yakushimikila. Alimwi womwi awomwi alacafwikwa kwiiya mbweenga waba amibo ya Bwineklistu akutondesha lusuno kubamwi. Aboobo inga twalisumpula mukwiinga Yesu ngomutanjilili wesu!