Yesu wakalinga kwiisha bantu kukala muluumuno abamwi. Nacibi boobo, paciindi cimwi wakalwiita batumwi bakwe ayi: “Mutayeeyi ayi ndakesa mukuleta luumuno mucishi capanshi. Nshikwe kuleta luumuno, sombi nkondo. Mukwiinga nebo ndakesa mukupansaanya mwaana musankwa abaishi, mwaana mwanakashi abanyina, alakwe mulokashi abapongoshi bakwe banakashi.” (Mate. 10:34, 35) Ino Yesu wakalinga kusansulula nshi?

Yesu taakalinga kusuni kupaansanya mikwashi, sombi wakalinga kucishi kwaamba ayi makani ngaakalinga kwiisha bantu alaakupa kwaamba ayi bamumikwashi imwi bapansaane. Aboobo abo basuni kuba bashikwiiya bakwe Klistu akubombekwa, balyeelete kushiba kwaamba ayi cimwi ciindi beshikamukowa babo inga bakalala ceebo cakusala kwabo. Cimwi ciindi uyo ngobeebenaakwe na umwi mumukwashi, inga watalika kubapikisha akucita sheenga shapa kwaamba ayi cibabete ciyumu kutolelela kukonkela njiisho shakwe Klistu.

Mbuli Beneklistu, Baibo ilatulwiita ayi ‘tulyeelete kwikala muluumuno abantu boonse.’ (Loma. 12:18) Nacibi boobo, kukonkela shintu Yesu nshaakalinga kwiisha inga kwaleta “nkondo” mumikwashi imwi. Ici cilacitika na umwi mumukwashi wasumina kukonkela njiisho shakwe Yesu, lyalo bamwi bakaka na batalika kupikisha. Na ici cacitika, beshikamukowa abo balaba ‘balwani’ kuwooyo utookwiiya cancine.​—Mate. 10:36.

Bashikwiiya bakwe Klistu bekala abeshikamukowa bateshi Bakamboni, balyeelete kusalawo kucita sheenga shasangalasha Yehova a Yesu, na kucita sheenga shasangalasha beshikamukowa babo. Kucakubonenaako, beshikamukowa bateshi Bakamboni inga babayuminisha kwaabanamo lubasu mushakusekelela shiteendelani amalembo. Aboobo balyeelete kusalawo ngobasuni kusangalasha. Yesu wakaamba ayi: “Uyo woonse usuni baishi nabi banyina kwiinda ndime, taaelete kuba shikwiiya wangu.” (Mate. 10:37) Nacibi boobo, Yesu takalinga kusansulula ayi abo batokwiiya cancine balyeelete kucileka kusuna bashali babo kwaamba ayi babe bashikwiiya bakwe. Sombi wakalinga kubeeisha mbweenga basala shintu shiyandika abuumbi mubuumi bwabo. Na beshikamukowa bateshi Bakamboni batalika kutupikisha kwaamba ayi tucileeke kulambila Yehova, tulatolelela kubatondesha lusuno, sombi tulishi kwaamba ayi kusuna Yehova nkokuyandika abuumbi.

Ncakutatoonsha kwaamba ayi inga twalinyumfwa cibiibi na beshikamukowa batotupikisha. Nacibi boobo, bashikwiiya bakwe Yesu balyeelete kwiibaluka maswi ngakabalwiita ayi: ‘Uyo woonse utayumuni cisamu cakwe cakupenshesha akunkonkela, taaelete kuba wangu.’ (Mate. 10:38) Aboobo munshila imwi inga twaamba ayi, Beneklistu balabona kupikishikwa kubeshikamukowa mbuli lubasu lwa mapensho bashikwiiya bakwe Klistu ngobeelete kuliyumya. Sombi balalangila ayi bushiku bumwi, mibo yabo ibotu ilaakucafwa beshikamukowa babo kwaalula mbobayeeya akusuna kwiiya cancine camu Baibo.​—1 Pit. 3:1, 2.