1. Ino Beneklistu inga bakoshanishikwa kucisamu munshila nshi? (Amubone acikope.)

 “MUUWO inga tautyooli cisamu citimfuka.” Maswi aya alatondesha ayi cisamu cilyeelete kunootimfuka kwaamba ayi citatyooki nabi kuwa na kwesa muuwo unene. Kwaamba ayi Beneklistu batolelele kusebensela Yehova calusangalalo, balyeelete kunootimfuka, nkokwaamba ayi kutayumininabo pacintu comwi. Munshila nshi? Tulyeelete kuba balibambite kwaaluka na bukaalo bwesu bwaaluka alimwi akulemeka bamwi nshobasalawo kucita na mbobabona shintu.

2. Ino ni mibo nshi yeenga yatucafwa na bukaalo bwaaluka, alimwi ino tutokwiiya nshi mumutwi uyu?

² Mbuli basebenshi bakwe Yehova, tulisuni kuba bantu batayumininibo pacintu comwi. Kwiilikaawo, tulisuni kuba bantu baliceesha alimwi batondesha nkumbu. Mumutwi uyu, tutokwiiya kuba amibo iyi mbokwakacafwa Beneklistu bamwi bukaalo ndyebwakaaluka. Tutokwiiya ambweenga kuba amibo iyi kwatucafwa. Sombi cakutaanguna, amuleke twiiye pacakubonenaako cibotu abuumbi cakwe Yehova a Yesu cakutayumininabo pacintu comwi.

3. Ino nshiinshi shitondesha ayi Yehova tayumininibo pacintu comwi?

³ Baibo ilaamba ayi Yehova ngu “Mwaandami,” mukwiinga taaluki alimwi taaseni. (Duto. 32:4) Nacibi boobo, tayumininibo pacintu comwi. Shintu ndyeshitooya caaluka mu cishi cino, Yehova alatolelela kwaaluka kwaamba ayi akumanishe kuyanda kwakwe. Yehova wakalenga bantu mucikoshanyo cakwe kwaamba ayi kabacikonsha kwaaluka na shintu shaaluka mubuumi. Wakatupa njiisho shamu Baibo shitucafwa kusala kabotu shakucita nabi tweenda mumapensho ali  buyani. Cakubonenaako cakwe Yehova alimwi anjiisho shamu Baibo nshaakatupa, shilatondesha ayi tayumininibo pacintu comwi nabi kwaamba ayi ngu “Mwaandami.”

4. Amwaambe cakubonenaako citondesha ayi Yehova tayumininibo pacintu comwi. (Bene Lefi 5:7, 11)

⁴ Yehova nshaatulwiita kucita shiluleme alimwi nshintu nsheenga twacikonsha kucita. Taakakatishi bantu kucita shintu nsheenga tabacikoonshi. Kucakubonenaako, amubone Yehova mbwaakatondesha ayi tayumininibo pacintu comwi kubene Isilaeli. Taakalinga kulangila ayi mwine Isilaeli mubile amukandu banoobenga milambu yeelene. Pashiindi shimwi, wakalinga kusuminisha muntu kubenga mulambu kweelana abukaalo mbwabeteemo.​—Amubelenge Bene Lefi 5:7, 11.

5. Amwaambe cakubonenaako citondesha Yehova mbwaakatondesha kuliceesha ankumbu.

⁵ Yehova tayumininibo pacintu comwi mukwiinga alaliceesha alimwi alicite nkumbu. Kucakubonenaako, Yehova wakatondesha kuliceesha ndyaakalinga kusuni kunyonyoola bantu babiibi bamu Sodoma. Kwiinda mubaanjelo bakwe, Yehova wakalwiita Loti, musankwa ululeme, kucicila kumusena watulundu. Loti wakaloonda kucicila kumusena uyo. Aboobo wakasenga ayi lakwe amukwashi wakwe bacicile ku Sowa, ndabala iniini yakalinga kweelete kunyonyoolwa. Yehova naakwiinga wakayumabo ayi Loti acicile kutulundu. Nacibi boobo, Yehova wakasuminisha Loti kucicila ku Sowa alimwi taakwe kwinyonyoola ndabala iyi. (Mata. 19:18-22) Ndyepakeenda myaaka iinji, Yehova wakatondesha nkumbu ku bantu bamundabala ya Ninife. Wakatuma Jona kuya mukwaambilisha makani akunyonyoolwa kwa ndabala iyi pomwi abantu bakalinga kukalaamo. Sombi bene Ninife ndyebakaana, Yehova wakabanyumfwila nkumbu alimwi taakwe kwinyonyoola ndabala.​—Jona 3:1, 10; 4:10, 11.

6. Amwaambe shakubonenaako shitondesha Yesu mbwaakakonkela cakubonenaako cakwe Yehova cakutayumininabo pacintu comwi.

⁶ Yesu wakalinga kukonkela cakubonenaako cakwe Yehova cakutayumininabo pacintu comwi. Wakatumwa pacishi capanshi kusa mukushimikila “mbelele shisowekete sha mushobo wa bene Isilaeli.” Sombi wakatondesha ayi taakalinga kuyumininabo pacintu comwi ndyaakalinga kusebensa ncito yakushimikila. Paciindi cimwi, mwanakashi umwi watakalinga mwine Isilaeli wakamusenga ayi ashilike mwanaakwe mwanakashi uyo ‘wakalinga kucite bashikaswa.’ Yesu wakatondesha nkumbu mwanakashi uyu akushilika mwanaakwe mwanakashi kweelana ambwakamusenga. (Mate. 15:21-28) Amuyeeye pacakubonenaako acimwi. Yesu ndyaakatalika kushimikila, wakaamba ayi: “Uyo weenga wankaka . . . , anebo ndaakumukaka.” (Mate. 10:33) Ano sa wakamukaka Pita uyo wakamukaka mankanda otatwe? Sobwe. Yesu wakashiba ayi Pita wakaana panshaakacita alimwi wakalinga muntu ushomeka. Pesule lyakubushikwa, Yesu wakabonekela kuli Pita alimwi cilyeelete wakamulwiita ayi wakamulekelela alimwi ayi wakalinga kumusuni.​—Luka 24:33, 34.

7. Kweelana a Jemusi 3:17, ino tulisuni kwaamba ayi bamwi banootubona buyani?

⁷ Twaboona kwaamba ayi Yehova Lesa alimwi a Yesu Klistu tabayumininibo pacintu comwi. Aswebo Yehova alatulangila kutayumininabo pacintu comwi. (Amubelenge Jemusi 3:17.) Munootondesha ayi tamuyumininibo pacintu  comwi kwiinda mushintu nshemucita. Inga twalipusha ayi: ‘Sa bantu balambona ayi ndimuntu utayumininibo pacintu comwi alimwi ulibambite kwaaluka? Na sa balambona ayi ndimuntu uyumininibo pacintu comwi alimwi utaaluki? Sa ndayumabo kwaamba ayi bantu bamwi banoocita shintu kweelana ambonsuni ayi shicitwe? Na sa ndakutika kushaamba bamwi akukonkela nshobasalawo kucita na kaceelela?’ Kutayuminina pashintu inga kwatondesha na tulakonkela cakubonenaako cakwe Yehova a Yesu nabi sobwe. Amuleke tubandike pabukaalo bobilo ndyeenga twayandika kutondesha ayi tatuyumininibo pacintu comwi—na bukaalo bwesu bwaaluka alimwi a na mbotubona shintu anshetusala shapusana asha bamwi.

8. Ino nshiinshi sheenga shatucafwa kutayumininabo pacintu comwi na shintu shaaluka? (Amubone amakani amweela.)

⁸ Tatweelete kuyumininabo pacintu comwi na shintu shaaluka mubuumi bwesu. Na shintu shaaluka buumi bwesu inga twatalika kwiinda mumapensho ngotwatalinga kuyeeyela. Kucakubonenaako, mpashi inga twaciswa cakutengashila. Na mpashi cakutengashila inga twalicana mulipensho lyakubula maali, na mpashi shintu inga shatuyumina mubuumi bwesu ceebo cakwaaluka kwa mfulumeende. (Shiku. 9:11; 1 Koli. 7:31) Alimwi inga catuyumina na libunga lyatupa incito imwi na kutulwiita kuya mukusebensela kumusena kumwi. Tacicite mulandu alipensho ndyeenga tweendaamo, inga twacikonsha kushibila bukaalo bupya na twaciita shintu shili 4 shitokonkelaawo: (1) amusumine kwaaluka kwa shintu, (2) munooyeeya nsheshi munoocita kuteshi nshomwakalinga kucita, (3) amubikile maano kushintu shibotu, alimwi (4) amucafweko bamwi. b Amuleke tubandike pashakubonenaako sha bamakwesu abenankashi abo bakafubilaamo ceebo cakucita shintu ishi shili 4.

9. Ino bamishonali bamwi beebene bakacita buyani kwaamba ayi bacikonshe kuliyumya ndyebakalinga kwiinda mumapensho akesa cakutengashila?

⁹ Amusumine kwaaluka kwa shintu. Ba Emanuele aba Francesca bakapekwa ncito yakusebensa mbuli bamishonali ku cishi cimwi. Ndyebakatalikabo kwiiya mushobo akushibana abamakwesu abenankashi bamulibungano lipya, bulwashi bwa COVID-19 bwakatalika alimwi tabakalinga kucikonsha kuba pomwi ambabo. Lyalo cakutengashila banyinawabo ba Francesca bakafwa. Ba Francesca bakalinga kusunishishi abuumbi kuba pomwi amukwashi wabo, sombi tabakwe kucikonsha kucita boobo ceebo ca bulwashi bwa COVID-19. Ino nciinshi cakabacafwa kuliyumya paciindi ndyebakalinga kwiinda mumapensho aya? Cakutaanguna, ba Emanuele aba Francesca bakalinga kupaila pomwi kusenga busongo kwaamba ayi bacikonshe kuliyumya bushiku abushiku akutanoolisukama bunene. Yehova wakakumbula mipailo yabo paciindi ceelete kwiinda mulibunga lyakwe. Kucakubonenaako, bakayuminishikwa ndyebakeebela vidyo yakatondesha mukwesu uyo wakaamba ayi: “Na twafwaambana kusumina kwaaluka kwa shintu, tulatolelela kuba alusangalalo alimwi tulatalika kucita nsheenga twacikonsha mubukaalo bupya.” c Cabili, bakeeya bwakushimikila kabotu kusebensesha fooni alimwi bakatalika aciiyo ca Baibo. Catatu, bakasumina kuyuminishikwa akucafwikwa kubamakwesu abenankashi bakumusena uko alimwi bakalinga kulumba palucafwo lwabo. Nankashi umwi utondesha nkumbu, bushiku abushiku wakalinga kubatumina meseji ifwiifwi pakalinga kuba alilembo. Alimwi wakacita boobo kwa mwaaka womwi. Aswebo na twasumina kwaaluka kwa shintu, tulaakutolelela kuba alusangalalo mushintu nsheenga twacikonsha kucita.

10. Ino nshiinshi shakacafwa nankashi umwi kuliyumya shintu ndyeshakaaluka abuumbi mubuumi bwakwe?

¹⁰ Munooyeeya nsheshi munoocita, kuteshi nshomwakalinga kucita alimwi amubikile maano kushintu  shibotu. Nankashi Christina waku Romania uyo ukala ku Japan, wakalinyumfwa cibiibi libungano lya Cisungu uko nkwaakalinga kubungana ndyebakalicala. Nacibi boobo, taakwe kutolelela kuyeeya pashakacitika. Sombi wakasalawo kuya kulibungano lyakalinga kusebensesha mushobo waci Japanese akunosebensa cankusu muncito yakushimikila. Wakasenga mwanakashi umwi ngwaakalinga kusebensaakwe kale kale kwaamba ayi amwiishe bwakunookwaamba kabotu mushobo waci Japanese. Mwanakashi uyo wakasumina kwiisha ba Christina mushobo waci Japanese kusebensesha Baibo a buloshuwa ya Amusangalale Abuumi Kwamuyayaya! Ba Christina bakaya panembo mukwaamba mushobo waci Japanese alimwi mwanakashi wakalinga kubaiisha wakatondesha ayi inga wasuna kwiiya shiinji pamakani amu Baibo. Na twabikila maano kushintu nsheshi tunoocita akuyeeya pashintu shibotu, kwaaluka kwa shintu inga kwapa kwaamba ayi tutambule shoolwe nshetwatalinga kuyeeyela.

11. Ino nshiinshi shakacafwa beebene bamwi ndyebakalinga kwiinda mulipensho lyakubula maali?

¹¹ Amucafweko bamwi. Beebene bamwi bakala mucishi incito yesu moyakakashikwa bakatalika kwiinda mulipensho lyakucana maali mu cishi mobakala ndyemwakaba lipensho lya maali. Ino nciinshi cakabacafwa kushibila bukaalo ubu? Cakutaanguna, bakatalika kukala buumi bwakutalila shiinji. Lyalo, muciindi cakubikila maano ku mapensho ngobakalinga kwiindaamo, bakabikila maano kukucafwa bamwi kwiinda mukusebensa cankusu muncito yakushimikila. (Milimo 20:35) Basankwa bakaamba ayi, “Kusebensa cankusu muncito yakushimikila kulatucafwa kubikila maano ku kucita kuyanda kwakwe Lesa muciindi cakunoyeeya pashintu shitabete kabotu.” Na shintu shaaluka mubuumi bwesu, tulyeelete kwiibaluka kuyandika kwakutolelela kucafwako bamwi bunene bunene kwiinda mukubashimikila.

12. Ino cakubonenaako ca mutumwi Paulo inga catucafwa buyani kuba balibambite kwaaluka ndyetuli muncito yakushimikila?

¹² Tulyeelete kuba balibambite kwaaluka ndyetutoshimikila. Ndyetutoshimikila tulacana bantu bapusenepusene bashoma shintu shipusenepusene pali Lesa, bakaswa mumisena ipusenepusene alimwi bakakomenena mubukaalo bupusenepusene. Mutumwi Paulo wakalinga kulibambite kwaaluka ndyaatooshimikila. Aswebo inga twakonkela cakubonenaako cakwe ndyetuli muncito yakushimikila. Yesu wakasala Paulo kuba “mutumwi kubaswamashi bakunsengwe.” (Loma. 11:13) Aboobo, Paulo wakalinga kushimikila ku baJuda, ba Giliki, bantu beeite, bantu bakalinga kukala mumishi, bacinenenene bamu mfulumeende aku bamaami. Kwaamba ayi Paulo acikoonshe kubashika pamoyo bantu aba boonse bapusenepusene, ‘wakaba shintu shoonse kubantu bamishobo yoonse.’ (1 Koli. 9:19-23) Wakalinga kubikila maano kushintu bantu nshobashoma alimwi ankulilo yabo, lyalo akwaalula mubandi kweelana abantu mbwaacana. Aswebo inga katusebensa kabotu muncito yakushimikila na katuba balibambite kwaalula mubandi kweelana abantu mbotwacana.

13. Kweelana a 1 Bene Kolinto 8:9, ino nciinshi citabete kabotu nceenga twaleya kucita na katulemeka bamwi mbobabona shintu?

¹³ Kutayuminina pashintu inga kwatucafwa kunoolemeka bamwi mbobabona shintu. Kucakubonenaako, benankashi bamwi balisuni bunene shakulipenta penta, sombi bamwi tabasuni bunene shakulipenta penta. Beneklistu bamwi balanyumfwa kabotu kunwako bwalwa mukweelanya, sombi bamwi balasalawo kutanwa. Beneklistu boonse balasuna kuba abuumi buli kabotu, sombi balasala nshila shakushilikwa shipusenepusene. Na katuyeeya ayi swebo nshetucita nshoshili kabotu akweelesha kukakatisha bamakwesu abenankashi kucita nshetucita, inga twabakalasha akupa kwaamba ayi mulibungano mutabi lucatano. Ncakutatoonsha kwaamba ayi tatusuniiwo kucita  boobo! (Amubelenge 1 Bene Kolinto 8:9; 10:23, 24) Amuleke tubandike pashakubonenaako shobilo shitondesha mbweenga njiisho shamu Baibo shatucafwa kunookweelanya kabotu shintu akutolelela kuyuminisha luumuno.

14. Ino ni njiisho nshi shamu Baibo nshotweelete kukonkela ndyetutosala shakufwala ambotulibotesha?

¹⁴ Nshetufwala ambotulibotesha. Yehova taatulwiiti nshotweelete kufwala, sombi wakatupa njiisho nshotweelete kukonkela. Tulyeelete kufwala shakufwala shilemeka Lesa, shabulemu alimwi shitondesha ayi ‘tulalibombya.’ (1 Timo. 2:9, 10; 1 Pit. 3:3) Aboobo, tatusuni kufwala munshila yeenga yapa kwaamba ayi bamwi banobikilabo maano kumbotutoboneka. Alimwi njiisho shamu Baibo inga shacafwa bamanene kuleya kubika milawo pamakani ambotufwala ambotubotesha misusu yesu. Kucakubonenaako, bamanene mulibungano limwi, bakalinga kusuni kucafwa bamakwesu bacanike abo bakalinga batalika kucesa mbuli bacanike bamwi bakucishi mbobakalinga kucesa. Nacibi boobo, nceselo iyo tayakalinga kuboneka kabotu. Ino bamanene bakabacafwa buyani bamakwesu bacanike aba kwakubula kubika mulawo? Mutanjilili walubasu wakalwiita bamanene kulwiita bamakwesu bacanike abo ayi, “Na uli kupulatifomu, lyalo batookutika batobikila bunene maano kumbotoboneka muciindi ca nshotokwaamba, nkokwaamba ayi toona kufwala akulibotesha kabotu.” Maswi aya aniinibo akacafwa bamakwesu bacanike kunyumfwishisha nshobakalinga kweelete kucita, alimwi bamanene tabakwe kubika mulawo. d

15. Ino njimilawo nshi anjiisho shamu Baibo sheenga shatucafwa kusalawo shakucita pamakani ambotweelete kushilikwa? (Bene Loma 14:5)

¹⁵ Nshetusala pamakani akushilikwa. Mwineklistu uli woonse alyeelete kulisalila mbwaasuni kushilikwa. (Gala. 6:5) Sombi Mwineklistu ndyaatosalawo mbwaasuni kushilikwa, alyeelete kukonkela milawo yamu Baibo yaamba pakutabikwa bulowa alimwi akuleya shamishimu. (Milimo 15:20;  Gala. 5:19, 20) Nacibi boobo, inga balisalila beene pamakani ambobasuni kushilikwa. Bantu bamwi balasunabo kuya kucipatela na baciswa, sombi bamwi balasuna kusebensesha nshila shimwi shakushilikwa. Mpashi inga katushinishite ayi nshila imwi yakushilikwa njibotu na taibete kabotu. Nacibi boobo, tulyeelete kulemeka bamakwesu abenankashi nshobasalawo kucita pamakani ambobasuni kushilikwa. Aboobo ndyetutosalawo shakucita pamakani aya, tulyeelete kunookwiibaluka shiteente shili 4 shitokonkelaawo: (1) Bwaami bwakwe Lesa bweenkabo mbweshi bukamane malwashi oonse cakumaninina. (Isa. 33:24) (2) Mwineklistu uli woonse alyeelete kushinisha nshila ili kabotu kuli nguwe ndyaatosalawo mbwaasuni kushilikwa. (Amubelenge Bene Loma 14:5, NWT.) (3) Tatweelete koombolosha bamwi pa nshobasalawo kucita na kucita cintu cimwi cili coonse ceenga cabakalasha. (Loma. 14:13) (4) Beneklistu balatondesha lusuno alimwi balanyumfwishisha kwaamba ayi lucatano mulibungano ncintu ciyandika abuumbi kwiinda mbobayeeya. (Loma. 14:15, 19, 20) Na katuyeeya pashiteente ishi, tulaakutolelela kuba abushicibusa buyumu abamakwesu abenankashi alimwi tulaakuyuminisha luumuno mulibungano.

16. Ino munene inga watondesha buyani ayi tayumininibo pacintu comwi likoto lya bamanene ndyelitosalawo cakucita? (Amubone ashikope.)

¹⁶ Bamanene balyeelete kutondesha cakubonenaako cibotu pamakani akutayuminina pashintu. (1 Timo. 3:2, 3) Kucakubonenaako, munene taeelete kulangila ayi lyoonse bamwi bananokonkela nshaamba ceebo cakwaamba ayi ngumunene mumyaaka pabamanene bamwi. Aleebaluka kwaamba ayi mushimu wakwe Yehova inga wacafwa munene uli woonse kwaamba muyeeyo weenga wapa kwaamba ayi basale cakucita cili kabotu. Alimwi na bamanene baanji basuminishanya pacintu cimwi ncobasalawo kucita, alimwi tacitopwaya njiisho shamu Baibo, munene utayumininibo pacintu comwi alakonkela bamwi nshobasalawo kucita nabi kwaamba ayi inga kaacite muyeeyo upuseneeko.

17. Ino nshoolwe nshi nshobacana Beneklistu batayumininibo pacintu comwi?

¹⁷ Tulacana shoolwe shiinji na katutayumininibo pacintu comwi. Tulaba abushicibusa bubotu abamakwesu abenankashi, alimwi mulibungano mulaba luumuno. Tulasangalala kuba pomwi abamakwesu abenankashi bacite nkulilo amibo ipusenepusene mukwiinga soonse tulalambila Yehova mbuli mukwashi womwi ucatene. Alimwi ciyandika abuumbi, tulasangalala kushiba ayi tutokonkela cakubonenaako cakwe Yehova Lesa wesu, uyo utayumininibo pacintu comwi.