1. Ino nshiinshi nshomwakeeya ndyemwakatalika kwiiya Baibo?

 SA MUTOKWIIBALUKA shoonse nshomwakeeya ndyemwakatalika kwiiya Baibo? Mpashi mwakakankamana ndyemwakashiba ayi Lesa alicite liina. Mpashi mwakanyumfwa kabotu kushiba ayi Lesa taanishi bantu mumulilo wa helo. Alimwi mpashi mwakasangalala ndyemwakashiba ayi inga mwalangila kubonana abeshikamukowa abeshicibusa banu bakafwa alimwi akukala pomwi ambabo pacishi capanshi mu paladaiso.

2. Kwiilika pacancine ncomwakeeya kuswa mu Baibo, ino nshiinshi shimwi nshomwakacita kwaamba ayi mutolelele kuya panembo? (Bene Efeso 5:1, 2)

² Kwiiya Maswi akwe Lesa abuumbi, kwakamucafwa kusuna Yehova abuumbi. Lusuno ulo lwakamuyuminisha kukonkela nshomwakalinga kwiiya. Mwakalinga kusala kucita shintu sheendelana anjiisho shamu Baibo. Mwakeeya kunooyeeya akucita shintu shili kabotu mukwiinga mwakalinga kusuni kusangalasha Lesa. Bweenka mwaana mbwaakonkela cakubonenaako ca bashali bakwe bacite lusuno, andimwe mwakalinga kukonkela cakubonenaako cakwe Ishiwanu wakwiculu.​—Amubelenge Bene Efeso 5:1, 2.

3. Ino njimiipusho nshi njeenga twaliipusha?

³ Mpashi inga twaliipusha ayi: ‘Sa ndimusuni abuumbi Yehova kwiinda mbondakalinga kumusuni kaantana kubombekwa? Sa kuswabo ndyendakabombekwa ndatolelela kukonkela cakubonenaako cakwe Yehova kwiinda mukusuna bamakwesu abenankashi?’ Na twaboona ayi tatusuni Yehova alimwi abamakwesu abenankashi bweenka mbotwakalinga kubasuni pakutaanguna, tatweelete kulefuka. Ici cakacitikawo ku Beneklistu bakutaanguna. Nacibi boobo, Yesu taakwe kubakaka alimwi aswebo teshi akatukakeewo. (Ciyu. 2:4, 7) Alicishi kwaamba ayi inga twaba alusuno lweenka ndotwakalinga kucite ndyetwakeeyabo cancine.

4. Ino tutokwiiya nshi mumutwi uyu?

⁴ Mumutwi uyu tutokwiiya mbweenga twatolelela kusuna Yehova  abamakwesu abenankashi abuumbi. Lyalo tutobandika pashoolwe shimwi nsheenga twacaana na twasuna Yehova alimwi abamakwesu abenankashi abuumbi.

5-6. (a) Ino nga mapensho nshi Paulo ngaakendaamo ndyaakalinga kusebensa ncito yakushimikila? (b) Ino nciinshi cakacafwa Paulo kutolelela kusebensela Yehova?

⁵ Mutumwi Paulo wakalinga kusangalete kusebensela Yehova, sombi wakalinga kwiinda mumapensho apusenepusene. Liinji Paulo wakalinga kweenda mishinso ilaamfu alimwi paciindi cilya tacakalinga cuubu kweenda. Pashiindi shimwi Paulo ndyaakalinga palweendo, wakalinga ‘kupulukila kwempe kumaanshi akubapambi.’ Alimwi pashiindi shimwi wakoomwa kubalwani bakwe. (2 Koli. 11:23-27) Kwiilikaawo, teshi lyoonse bashominyina ndyebakalinga kumulumba pashintu nshaakalinga kucita kwaamba ayi abacaafwe.​—2 Koli. 10:10; Filip. 4:15.

⁶ Ino nciinshi cakacafwa Paulo kutolelela kusebensela Yehova? Paulo wakeeya shiinji pamibo yakwe Yehova kuswa mu Malembo akushintu shakamucitikila. Paulo wakashoma cakutatoonsha ayi Yehova Lesa alimusuni. (Loma. 8:38, 39; Efe. 2:4, 5) Alimwi ici cakamupa kusuna Yehova abuumbi. Paulo wakatondesha ayi wakalinga kusuni Yehova kwiinda mukutolelela kucafwa bashominyina.​—Ebu. 6:10.

7. Ino ninshila nshi yomwi mbweenga tweeya kusuna Yehova abuumbi?

⁷ Inga tweeya kusuna Lesa abuumbi kwiinda mukwiiya Maswi akwe cakubikila maano. Ndyemutobelenga Baibo, amweeleshe kubona nshomutokwiiya pali Yehova kuswa kumakani ayo ngomutobelenga. Amuliipushe ayi: ‘Ino makani aya atotondesha buyani ayi Yehova alinsuni? Kweelana amakani aya, ino nshiinshi sheelete kumpa kusuna Yehova?’

8. Ino kupaila inga kwatucafwa buyani kusuna Lesa abuumbi?

⁸ Cimwi nceenga twaciita kwaamba ayi tusune Yehova abuumbi, nkwiinda mukunoopaila lyoonse kuli nguwe alimwi akumulwiita shoonse shili mumoyo wesu. (Kulu. 25:4, 5) Yehova alaakukumbula mipailo yesu. (1 Joni 3:21, 22) Nankashi waliina lya Khanh ukala ku Asia wakaamba ayi: “Pakutaanguna, ndakalinga kusuni Yehova ceebo ca nshondakeeya pali nguwe. Sombi ndyendakabona mbwaakalinga kukumbula mipailo yangu, ndakamusuna abuumbi. Ici cakampa kusuna kunoocita shintu shimusangalasha.” b

9. Ino Timoti wakatondesha buyani ayi wakalinga kubasuni abuumbi bashominyina?

⁹ Ndyepakeendabo myaaka iniini kuswa ciindi Paulo ndyaakaba Mwineklistu, wakashibana amusankwa wacanike waliina lya Timoti. Timoti wakalinga kusuni Yehova alimwi abantu. Paulo wakalwiita Beneklistu ba mulibungano lyaku Filipi ayi: “Nshiciteewo aumwi muntu ngoonshoma ayi inga wamubikaako maano.” (Filip. 2:20) Paulo ndyaakaamba maswi aya taakwe kwaamba pali Timoti ayi wakalinga kucishi kabotu kubamba shintu nabi kwaamba makani. Sombi wakabona ayi Timoti wakalinga kubasuni abuumbi bashominyina. Cakutatoonsha kwaamba ayi Beneklistu abo bakalinga mumabungano ayo Timoti ngaakalinga kufwakashila, bakalinga kunyumfwa kabotu na wabafwakashila.​—1 Koli. 4:17.

10. Ino ba Anna abeebaabo bakatondesha buyani ayi balibasuni bamakwesu abenankashi?

¹⁰ Aswebo tuleelesha kucana nshila sha mbweenga twacafwa bamakwesu abenankashi. (Ebu. 13:16) Amuyeeye pacakubonenaako cakwe Nankashi Anna, ngotwakambaawo mumutwi wamana. Pesule lya mfula inene yacipuupu, lakwe abeebaye bakafwakashila mukwashi umwi wa Bakamboni. Lyalo bakacana ayi ciluli ca ŋanda ya mukwashi uyo cakanyonyooka. Aboobo shakufwala shoonse shamukwashi uyo shakashipila. Ba Anna bakaamba ayi: “Twakabwesa shakufwala shabo akuya mu kushiwaasha, kushiciisa, kushipeta  lyalo akushiboosha. Tacakalinga ciyumu kuli ndiswe kucita sheeshi. Sombi ceebo cakwaamba ayi twakabacafwa, tulanyumfwana abuumbi ambabo kushika apacecino ciindi.” Lusuno ba Anna abeebaabo ndobakalinga kucite pa bamakwesu abenankashi, lwakabayuminisha kucafwako bamwi.​—1 Joni 3:17, 18.

11. (a) Ino bamwi balalinyumfwa buyani na twatondesha ayi tulibasuni? (b) Kweelana a Tushimpi 19:17, ino Yehova alacita buyani na twatondesha lusuno kubamwi?

¹¹ Na katucitila bamwi shibotu akubatondesha lusuno, inga babona ayi tutokweelesha kukonkela cakubonenaako cakwe Yehova. Alimwi balalumba abuumbi pashintu shibotu nshetubacitila. Nankashi Khanh ngotwalinga twambaawo, aleebaluka baabo bakamucafwa. Wakaamba ayi: “Ndabalumba abuumbi benankashi abo bakalinga kusebensa andime muncito yakushimikila. Bakalinga kusa mukumbwesa, kunjitaako ku cakulya ca malumwi, alimwi akumboosha kuŋanda. Pacecino ciindi ndabona ayi tacakalinga cuubu kucita boobo kuli mbabo. Sombi bakalinga kusangalete kucita boobo.” Kwalo teshi boonse beenga batulumba pashintu nshotubacitila. Kwaamba pabaabo bakalinga kubacafwa, ba Khanh bakaamba ayi: “Naakwiinga anebo ndakabacitilako shibotu ceebo ca shintu shoonse shibotu nshobakancitila. Sombi nshicishiiwo boonse nkobakala pacecino ciindi. Nacibi boobo, Yehova alicishi nkobakala alimwi ntopaila ayi akabape shoolwe pashintu shibotu nshobakancitila.” Ba Khanh bakaamba cancine. Yehova alabona nabi tuntu tuniini ntotucitila bamwi kwaamba ayi tubacaafwe. Alabona kulyaaba kwesu kucafwa bamwi ayi kulayandika abuumbi alimwi anga ni nkongole njeshi akabooshe.​—Amubelenge Tushimpi 19:17.

12. Ino bamakwesu inga batondesha buyani lusuno kubamwi mulibungano? (Amubone ashikope.)

¹² Na muli mukwesu, ino inga mwacita buyani kwaamba ayi mutondeshe lusuno kubamwi alimwi akucita shintu sheenga shabacafwa? Mukwesu wacanike waliina lya Jordan wakeepusha munene nsheenga wacita kwaamba ayi acite shiinji kucafwa bamwi mulibungano. Munene wakalumba  Jordan pakuya panembo kwakwe lyalo wakamulwiitako shimwi nsheenga wacita kwaamba ayi acite shiinji mulibungano. Kucakubonenaako, wakalwiita Jordan ayi anofwambaana kushika pa Ŋanda ya Bwaami alimwi akwaansha bantu, kukumbulawo kumabungano, kwaabanamo lubasu lyoonse muncito yakushimikila pomwi abaabo mbaakalingaabo mukakoto kakushimikila alimwi akuyeeya nsheenga wacita kwaamba ayi acafweko bamwi. Jordan ndyaakakonkela nshebakamulwiita, taakwe kwiiyabo bwakucita shintu shimwi sombi wakeeya akusuna bamakwesu abenankashi abuumbi. Jordan wakashiba ayi na mukwesu waba musebenshi ucafwilisha, teshi kwaamba ayi ndyaatootalika kucafwa bamwi; ncaeelete kucita nkutolelela kucafwa bamwi.​—1 Timo. 3:8-10, 13.

13. Ino lusuno lwakamucafwa buyani munene waliina lya Christian kwaamba ayi eelele kusebensa mbuli munene alimwi?

¹³ Ino mbuyani na kale kale mwakalinga kusebensa mbuli musebenshi ucafwilisha na munene? Yehova aleebaluka ncito njomwakasebensa alimwi alusuno ndomwakatondesha. (1 Koli. 15:58) Alimwi alabona lusuno ndomwatolelela kutondesha. Mukwesu waliina lya Christian wakalinyumfwa cibiibi ndyebakamukusha pa bunene. Nacibi boobo, wakaamba ayi: “Ndakasalawo kucita nsheenga ndacikonsha kwaamba ayi nsebensele Yehova, inga caba ayi ntosebensa mbuli munene nabi sobwe.” Mukuya kwaciindi, wakasalwa alimwi kusebensa mbuli bunene. Ba Christian bakaamba ayi: “Ndakalinga kuciteko boowa kusebensa mbuli munene alimwi. Sombi ndakasalawo ayi na Yehova wansuminisha kusebensa mbuli munene ceebo cankumbu shakwe, ntomusebensela ceebo cakwaamba ayi ndimusuni alimwi ndisuni bamakwesu abenankashi.”

14. Ino nshiinshi nshomweeya kuswa ku nshaakaamba nankashi umwi ukala ku Georgia?

¹⁴ Basebenshi bakwe Yehova balatondesha lusuno akubantu bamwi. (Mate. 22:37-39) Kucakubonenaako, nankashi waliina lya Elena uyo ukala kucishi ca Georgia, wakaamba ayi: “Pakutaanguna, cintu comwibo cakalinga kumpa  kwaabanamo lubasu muncito yakushimikila nkusuna Yehova. Sombi ndyendakamusuna abuumbi Ishiwesu wakwiculu, ndakatalika kubasuna abuumbi bantu. Ndakalinga kweelesha kuyeeya mapensho ngobakalinga kwiindaamo alimwi amakani eenga abashika pamoyo. Kuyeeya bunene mapensho bantu ngobakalinga kwiindaamo alimwi amakani eenga abashika pamoyo, kwakancafwa kusunishisha kubacafwa.”​—Loma. 10:13-15.

15-16. Kweelana ashikope shatondeshekwa, ino nshoolwe nshi nsheenga twacaana na katutondesha lusuno kubamakwesu abenankashi?

¹⁵ Kutondesha lusuno kubamakwesu takucafwibo mbabo beenka. Bulwashi bwa COVID-19 ndyebwakatalika, mukwesu waliina lya Paolo alimwi amukaakwe bakacafwa benankashi baanji bacinene kwiiya bwakusebensesha mafooni, matabuleti na makompyuta abo kwaamba ayi bacikonshe kushimikilako bamwi. Nankashi umwi ngocakalinga kubeta ciyumu kwiiya bwakusebensesha cisebensesho cakwe, mukweelaako wakeeya. Wakacikonsha kusebensesha cisebensesho cakwe kwiitako beshikamukowa bakwe kwaamba ayi bacanikeeko ku Ciibalusho. Bali 60 bakacanikaako ku Ciibalusho kwiinda mukusebensesha pulogilamu imwi yapa intaneti! Nankashi uyo alimwi abeshikamukowa bakwe boonse bakafubilaamo ceebo cakusebensa cankusu kwaba Paolo abakaabo. Ndipakeenda ciindi, nankashi uyo wakalembela ba Paolo ayi: “Twalumba abuumbi pa kutwiisha sobacinene. Teshi nkalube Yehova mbwaatubikilako maano abuumbi alimwi ambomwakasebensa cankusu kwaamba ayi mutucaafwe.”

¹⁶ Ishi shakacitika shakacafwa ba Paolo kwiiya  ciiyo ciyandika. Shakabeebalusha ayi kutondesha lusuno kulayandika abuumbi kwiinda kuba alushibo nabi nkusu shakucita shintu shimwi. Bakaamba ayi: “Ndakalinga kusebensa mbuli mutanjilili walubasu. Pacecino ciindi, ndeebaluka ayi nabi kwaamba ayi bamakwesu abenankashi mpashi bakalubaako makani a Baibo ngondakaamba, baciibaluka shintu shimwi nshondakacita kwaamba ayi mbacaafwe.”

17. Ino mbaani bamwi bafubilaamo na katutondesha lusuno kubamwi?

¹⁷ Na katutondesha lusuno kubamwi, aswebo tulafubilaamo munshila nshetwatalinga kulangila. Ishi nshoshakacitika kuli ba Jonathan abo bakala ku New Zealand. Bushiku bumwi Pacibelu malumwi ndyekwakalinga kulungula abuumbi, wakabona mukwesu umwi painiya kaali muncito yakushimikila eenka. Ba Jonathan bakasalawo kunosebensa amukwesu uyu Pacibelu malumwi. Pakutaanguna ba Jonathan tabakalinga kucishiiwo mbobakalinga kusa mukucafwikwa ceebo cakusalawo kunosebensa amukwesu uyu muncito yakushimikila. Bakaamba ayi: “Paciindi cilya, kushimikila takwakalinga kunsangalashaawo. Ndyendakabona painiya uyu mbwaakalinga kushimikila alimwi ashibotu shakalinga kuswaamo muncito yakwe yakushimikila, anebo ndakatalika kusangalala kusebensa ncito iyi. Alimwi mukwesu uyu wakancafwa kuya panembo lwakumushimu, kusuna ncito yakushimikila akuba abushicibusa buyumu a Yehova.”

18. Ino Yehova alisuni ayi tucite nshi?

¹⁸ Yehova alisuni ayi soonse twiiye kumusuna abuumbi akusuna bamakwesu abenankashi. Kweelana ambotweeya, inga tweeya kusuna Yehova abuumbi na katubelenga Maswi akwe, kukutumana kuyeeyawo alimwi akunoopaila lyoonse kuli nguwe. Inga tweeya kusuna bamakwesu abenankashi na katubacafwa mushintu nshebatoyandika. Kusuna Yehova abamakwesu abenankashi abuumbi, kulaakutucafwa kuba abushicibusa buyumu anguwe alimwi abashominyineesu. Alimwi bushicibusa ubo bulaakutolelela kwamuyayaya!