1-2. Ino Mwineklistu inga wakoshanishikwa kuŋanda ilaamfu munshila nshi? (1 Bene Kolinto 15:58)

 MU 1978, mutauni ya Tokyo mucishi ca Japan, mwakayakwa ŋanda ilaamfu abuumbi. Bantu bakalinga kutoonsha na ŋanda iyi teshi ikawe mukwiinga mutauni iyi mwakalinga kucitika shitentaanshi abuumbi. Ino bakaiyaka bakacita buyani kwaamba ayi itakawi nabi kwesa citentaanshi? Bakaiyaka munshila yakwaamba ayi na kwesa citentaanshi inga yasendamabo kwakubula kuwa alimwi mbasu shimwi inga shasena kwakubula kupasuka. Beneklistu abalo inga bakoshanishikwa kuŋanda ilaamfu iyi. Munshila nshi?

² Mwineklistu alyeelete kweelanya kabotu shintu pamakani akuyuma mulushomo akutayuminina pacintu comwi. Alayandika kuba alushomo luyumu lwakwaamba ayi kukonkela milawo yakwe Yehova nkubotu. (Amubelenge 1 Bene Kolinto 15:58.) ‘Alilibambite kunyumfwila’ alimwi taapwayi milawo yakwe Lesa. Nacibi boobo, taeelete kuyumininabo pacintu comwi na bukaalo kabusuminisha kucita cintu cimwi munshila ipuseneeko. (Jemu. 3:17) Mwineklistu wakeeya kweelanya kabotu shintu pamakani aya, tayumininibo pacintu comwi na kusuminisha bantu kunoocita shintu shitabete kabotu. Mumutwi uyu, tutobandika mbweenga tweemikana cakutatenkaana. Alimwi tutobandika nshila shili 5 Satana nshaasebensesha kwaamba ayi citubete ciyumu kutolelela kunyumfwila Yehova ambweenga twakaka nshila shakwe.

3. Ino ni milawo nshi Yehova njaakatupa icanika pa Milimo 15:28, 29?

³ Yehova ngwaacite nkusu shiinditeewo shakupanga milawo, alimwi lyoonse alapa bantu bakwe milawo yuubu kunyumfwisha. (Isa. 33:22) Kucakubonenaako, bamu likoto litanjilila lya muciindi ca Beneklistu bakutaanguna, bakaamba nshila shotatwe Beneklistu mbobakalinga kweelete kutolelela kukonkela milawo yakwe Lesa:  (1) kwiinda mukukaka kulambila shibumbwabumbwa, akunolambila Yehova eenkabo, (2) kwiinda mukukonkela mulawo wakwe Yehova waamba ayi bulowa bulisalalite, alimwi (3) kwiinda mukukonkela mulawo wamu Baibo ukasha kucita bufuule. (Amubelenge Milimo 15:28, 29.) Ino Beneklistu inga bacita buyani kwaamba ayi batolelele kukonkela milawo yakwe Lesa mumbasu ishi shotatwe?

4. Ino tulacita buyani kwaamba ayi tunolambila Yehova eenkabo? (Ciyubululo 4:11)

⁴ Tulakaka kulambila shibumbwabumbwa, akunolambila Yehova eenkabo. Yehova wakalwiita bene Isilaeli ayi banolambila nguwe eenkabo. (Duto. 5:6-10) Alimwi Yesu ndyakeeleshekwa kuli Satana, wakaamba cakuteenda mweela ayi tulyeelete kulambila Yehova eenkabo. (Mate. 4:8-10) Aboobo tatulambili shibumbwabumbwa. Alimwi tatulambili bantu. Kucakubonenaako, tatuboni mutanjilili wabupailishi, muntu uli mushamapolitiki, muntu ucita shisekano na shikwiimba upukite, anga ngu lesa. Tulasalawo kutolelela kuba kulubasu lwakwe Yehova alimwi akunolambilabo wooyo ‘wakalenga shintu shoonse.’​—Amubelenge Ciyubululo 4:11.

5. Ino nceebonshi tulakonkela mulawo wakwe Yehova waamba ayi buumi abulowa bulisalalite?

⁵ Tulakonkela mulawo wakwe Yehova waamba ayi buumi abulowa bulisalalite. Ino nceebonshi? Mukwiinga Yehova wakaamba ayi bulowa buleemikaninaako buumi. Alimwi buumi ncipo cibotu abuumbi ncaakatupa. (Lefi. 17:14) Yehova ndyaakasuminisha bantu kulya nyama, wakabalwiita ayi tabeelete kulya bulowa. (Mata. 9:4) Wakaboshaawo kwaamba mulawo uyu ciindi ndyaakapa bene Isilaeli Mulawo wakwe Mose. (Lefi. 17:10) Alimwi wakatanjilila bamu likoto litanjilila lya muciindi ca Beneklistu bakutaanguna kulwiita Beneklistu boonse ayi ‘tabeelete kulya bulowa.’ (Milimo 15:28, 29) Tulakonkela mulawo uyu ndyetutosalawo mbotweelete kushilikwa kucipatela. b

6. Ino tulacita buyani kwaamba ayi tutolelele kukonkela mulawo wamu Baibo ukasha kucita bufuule?

⁶ Tulaba bashinishite kutolelela kukonkela mulawo wamu Baibo ukasha kucita bufuule. (Ebu. 13:4) Mutumwi Paulo wakatulwiita ‘kucaya’ shipansha sha mubili wesu. Ici cilaamba ayi tulyeelete kucita shoonse nsheenga twacikonsha kwaamba ayi tucileeke kuba alunkumbwa luli loonse lutabete kabotu. Tulaleya kulangilisha na kucita cintu cili coonse ceenga catupa kucita bufuule. (Kolo. 3:5; Jobo 31:1) Na tweeleshekwa kucita cintu citabete kabotu, peenkapo tulakaka kuyeeya na kucita cintu ceenga canyonyoola bushicibusa bwesu a Lesa.

7. Ino nciinshi ncotweelete kuba bashinishite kucita, alimwi ino nceebonshi?

⁷ Yehova alisuni ayi ‘tunomunyumfwila kuswa panshi lya moyo.’ (Loma. 6:17) Lyoonse nshaatulwiita kucita shilatucafwa alimwi inga tatwaaluli milawo yakwe. (Isa. 48:17, 18; 1 Koli. 6:9, 10) Tuleelesha cankusu kusangalasha Yehova akuba bashinishite kumunyumfwila bweenka mbuli shikulumbaisha uyo wakaamba ayi: “Moyo wangu uliimfwibo pakukonkela milasho yanu. Ee, ndaakunooikonkela kushikila kulufu.” (Kulu. 119:112) Nacibi boobo, Satana alaakweelesha kupa kwaamba ayi citubete ciyumu kutolelela kunyumfwila Lesa. Ino ni nshila nshi nshaasebensesha?

8. Ino Satana alacita buyani kwaamba ayi citubete ciyumu kutolelela kunyumfwila Lesa?

⁸ Kupenshekwa. Satana alasebensesha bantu bamwi kwaamba ayi batupenshe akutukakatisha kucita shintu shitabete kabotu kwaamba ayi citubete ciyumu kutolelela kunyumfwila Lesa. Alisuni kwaamba ayi ‘atulye,’ nkokwaamba ayi kunyonyoola bushicibusa bwesu a Yehova. (1 Pit. 5:8) Beneklistu bakutaanguna bakalinga kuloondeshekwa, kuumwa alimwi akucaikwa ceebo cakwaamba ayi bakalinga kushinishite kutolelela kunyumfwila Lesa. (Milimo 5:27, 28, 40; 7:54-60) Satana watolelela kupensha bantu bakwe Lesa kushika apacecino ciindi. Ishi nsheshitoocitika na twabona bamakwesu abenankashi  mbobatopenshekwa abuumbi mucishi ca Russia alimwi amushishi shimwi. Alimwi beshikutupikisha batopensha bamakwesu abenankashi munshila shipusenepusene.

9. Amwaambe cakubonenaako citondesha ncotuyandikila kucenjela na twakakatishikwa kucita shintu shitabete kabotu.

⁹ Kusebensesha bucenjeshi kwaamba ayi atukakatishe kucita shintu shitabete kabotu. Satana alasebensesha “bucenjeshi” kwiilika pa kupenshekwa. (Efe. 6:11) Amuyeeye pa shakacitikila mukwesu waliina lya Robert, uyo wakatolwa kucipatela kwaamba ayi bamucite opaleshoni inene. Wakalwiita bamadokota ayi inga taasuminiiwo nabibo paniini kubikwa bulowa. Dokota wakalinga kusuni kumucita opaleshoni, wakalemeka nshaakasala kucita Mukwesu Robert. Nacibi boobo, ndyekwakacaala bushiku bomwi kwaamba ayi ba Robert babacite opaleshoni, dokota umwi wakesa mukubabona pesule lyakwaamba ayi bamumukwashi wabo baboolela kuŋanda. Wakabalwiita ayi bamadokota teshi bababiike bulowa sombi butooba pafwiifwi kwaamba ayi inga babikwa bulowa na cashuupa. Mpashi dokota uyo wakalinga kuyeeya ayi ba Robert inga baalula nshobakasalawo kucita pesule lyakwaamba ayi bamumukwashi wabo baya. Sombi bakatolelela kukonkela mulawo wakwe Lesa waamba pabulowa, alimwi bakalwiita bamadokota ayi inga tabasuminiiwo kubikwa bulowa nabi caba buyani.

10. Ino nceebonshi kuyeeya kwa bantu abo batalemeki milawo yakwe Yehova takubete kabotu? (1 Bene Kolinto 3:19, 20)

¹⁰ Kuyeeya kwa bantu abo batalemeki milawo yakwe Yehova. Na katuyeeya mbuli bantu abo batalemeki milawo yakwe Yehova, aswebo inga twacileka kukonkela milawo yakwe. (Amubelenge 1 Bene Kolinto 3:19, 20.) Liinji ‘busongo bwa mucishi ici’ bulapa kwaamba ayi bantu batanonyumfwila Lesa. Beneklistu bamwi bamulibungano lya Pegamamu alya Tiyatila bakalinga kuyungwa abantu abo bakalinga kucita bufuule akulambila shibumbwabumbwa. Yesu wakalulika cankusu mabungano aya oonse obilo ceebo cakusuminisha bantu bakalinga kucita bufuule kutolelela kuba pakati kabo. (Ciyu. 2:14, 20) Munshiku shino, bantu bakumusena nkotukala inga batuyunga kunoocita shintu shitabete kabotu. Bamumukwashi wesu alimwi abantu mbotushibenaabo inga beelesha kutupa kushoma ayi tulaciindilisha kukonkela milawo yakwe Yehova alimwi ayi palibo kabotu nabi twabula kwiikonkela. Kucakubonenaako, mpashi inga batulwiita ayi taciyandiki kutolelela kuba amibo ibotu, alimwi ayi njiisho shamu Baibo shaamba pamakani akulilemeka nshakale kale.

11. Ino nciinshi ncotweelete kuleya kucita ndyetutokonkela milawo yakwe Lesa?

¹¹ Cimwi ciindi mpashi inga twayeeya ayi butanjilishi Yehova mbwaatupa teshi buubu kunyumfwisha. Alimwi mpashi inga tweeleshekwa ‘kwiindilila shintu shilembetwe.’ (1 Koli. 4:6) Bamatanjilili babupailishi bakalingaako muciindi cakwe Yesu, bakeendilila shintu shilembetwe. Pa Mulawo wakwe Mose bakeelikaawo milawo yabo iyo yakapa kwaamba ayi cibe ciyumu abuumbi kubantu bataaku mbobabete kukonkela milawo iyo. (Mate. 23:4) Yehova alatupa butanjilishi buubu kunyumfwisha kwiinda mu Maswi akwe amulibunga lyakwe. Taakuwo cili coonse ceelete kutupa kwiilikaawo milawo aimwi pabutanjilishi mbwaatupa. (Tus. 3:5-7) Aboobo tatwiindilili shintu shilembetwe mu Baibo na kubika milawo pamakani bamakwesu abenankashi ngobeelete kulisalila.

12. Ino Satana alasebensesha buyani “bubeshi”?

¹² Bubeshi. Satana alasebensesha “bubeshi” alimwi ashintu ‘shitaaku mboshibete shamucishi ici’ kwaamba ayi acenjeeke akupansaanya bantu. (Kolo. 2:8) Muciindi ca Beneklistu bakutaanguna, shintu shitaaku mboshibete shakalinga kwiilikaawo njiisho sha busongo bwa bantu, njiisho sha baJuda shatakalinga shamu Malembo alimwi anjiisho yakwaamba ayi Beneklistu balyeelete kukonkela Mulawo wakwe Mose. Ishi shakalinga njiisho shakubeca mukwiinga shakapa kwaamba ayi bantu batanoobikila maano kuli Yehova, Kantupu kancine ka busongo. Munshiku shino, Satana alaamba makani atashibikitwe kabotu na ngancine alimwi  amakani akubeca ayo bamatanjilili ba beshimapolitiki ngobaamba panyusi alimwi apa intaneti. Paciindi ca bulwashi bwa COVID-19, twakanyumfwa makani aanji akubeca. c Bakamboni Bakwe Yehova abo bakalinga kukonkela butanjilishi kuswa kulibunga lyesu, tabakwe kulisukamaawo mbuli mbobakalinga kulisukama abo bakalinga kukutika kumakani akubeca.​—Mate. 24:45.

13. Ino nceebonshi tulyeelete kucenjela kushintu sheenga shatupilinganya?

¹³ Shintu sheenga shatupilinganya. Tulyeelete kutolelela kubikila maano ku “shintu shiyandika abuumbi.” (Filip. 1:9, 10) Na shintu shimwi shatupilinganya, tulasowa ciindi cinene cakucita shintu shiyandika alimwi ingayi nkusu shesu shanyonyookabo. Shintu nshotucita bushiku abushiku mbuli kulya, kunwa, kucita shakulikondelesha, alimwi akusebensa ncito yakumubili, inga shatupilinganya na twatalika kubikila maano abuumbi kushintu ishi. (Luka 21:34, 35) Kwiilikaawo, bushiku abushiku tulanyumfwa akubelenga makani aamba pabantu babusha shoongo alimwi amakani aamba pa kupikishanya kwa beshimapolitiki. Tulyeelete kushinisha kwaamba ayi twabula kupilinganishikwa kumakani aamba pa kupikishanya kwa beshimapolitiki. Mukwiinga na tatuna kucenjela, inga twaba kulubasu lumwi lwa beshimapolitiki kwiinda mushintu nshetuyeeya ambotulinyumfwa. Satana alasebensesha nshila shoonse ishi nshetwabandikaawo kwaamba ayi twaalilwe kutolelela kucita shintu shiluleme. Amuleke tubandike nsheenga twaciita kwaamba ayi tukake nshila ishi nshaasebensesha akwiimikana cakutatenkaana mulushomo.

14. Ino ncintu nshi comwi ceenga catucafwa kutolelela kuba kulubasu lwakwe Yehova?

¹⁴ Munoyeeya cakapa kwaamba ayi mwaabe buumi bwanu kuli Yehova akubombekwa. Mwakasalawo kucita boobo mukwiinga mwakalinga kusuni kuba kulubasu lwakwe Yehova. Amuyeeye shakamupa kushoma cakutatoonsha ayi mwacana cancine. Mwakamushiba kabotu Yehova, mwakatalika kumulemeka alimwi mwakamusuna mbuli Ishiwanu wakwiculu. Mwakaba alushomo alimwi lushomo ulo lwakamucafwa kwaana kuswa kushibiibi shanu. Mwakacileka kucita shintu Yehova nshaapatite akutalika kucita shintu shimusangalasha. Mwakanyumfwa kabotu ndyemwakashiba ayi Lesa  wamulekelela. (Kulu. 32:1, 2) Mwakatalika kucanika kumabungano a Bwineklistu alimwi akulwiitako bamwi shintu shibotu nshomwakeeya. Mbuli Mwineklistu wakalyaaba akubombekwa, mutokweenda munshila itola kubuumi alimwi mulishinishite kutolelela kweenda munshila iyi.​—Mate. 7:13, 14.

15. Ino kwiiya Maswi akwe Lesa akukutumana kuyeeyawo inga kwatucafwa buyani?

¹⁵ Amwiiye Maswi akwe Lesa akukutumana kuyeeyawo. Bweenka cisamu mbociimikana cakutatenkaana na miyanda yakaya panshi abuumbi, aswebo tulaakwiimikana cakutatenkaana na katucite lushomo luyumu muli Yehova. Cisamu ndyecitooya cikomena, miyanda imwi ilaya panshi abuumbi lyalo imwi ilaya mweela. Ndyetutokwiiya Maswi akwe Lesa akukutumana kuyeeyawo, tulayumya lushomo lwesu alimwi tulashoma cakutatoonsha ayi nshaatulwiita kucita shili kabotu. (Kolo. 2:6, 7) Amuyeeye Yehova mbwaakacafwa basebenshi bakwe kale kale, kwiinda mukubatanjilila akubashitilisha. Kucakubonenaako, Esekelo wakabikilako maano abuumbi munjelo ndyaakalinga kupima cakubikila maano tempele Esekelo njaakabona mucili anga nciloto. Cili anga nciloto ici cakamuyuminisha Esekelo, alimwi cilatucafwa kushiba mbweenga twakonkela njiisho shakwe Yehova nshaamba pakulambila kusalalite. d (Esek. 40:1-4; 43:10-12) Aswebo tulaakucafwikwa na katucana ciindi cakwiiya akukutumana kuyeeya pamakani ayumu kunyumfwisha acanika mu Maswi akwe Lesa.

16. Ino kuba amoyo ucite lushomo kwakabacafwa buyani ba Robert? (Kulumbaisha 112:7)

¹⁶ Amube amoyo ucite lushomo. Mwaami Defedi wakaamba cakushinisha ayi alaakutolelela kusuna Yehova ndyakeemba ayi: “Ono moyo wangu ulicite lushomo noba Lesa.” (Kulu. 57:7) Aswebo inga twaba amoyo ucite lushomo, akucinka manungo muli Yehova cakumaninina. (Amubelenge Kulumbaisha 112:7.) Amuyeeye kucita boobo mbokwakacafwa ba Robert abo mbotwalinga twaambawo. Ndyebakabalwiita ayi bamadokota teshi bababiike bulowa sombi butooba pafwiifwi kwaamba ayi inga babikwa bulowa na cashuupa, bakakumbula ayi na bamadokota basune kubabika bulowa, batoswaamo mucipatela peenkaapo. Paciindi cimwi, ba Robert bakaamba ayi, “Nshindakalinga kutoonshawo nabibo paniini pa nshondakalinga kweelete kucita alimwi nshindakalinga kulisukamaawo pa sheenga shacitika.”

17. Ino nshiinshi nsheenga tweeya kuswa kucakubonenaako caba Robert? (Amubone acikope.)

 ¹⁷ Ba Robert bakatolelela kukonkela mulawo wakwe Lesa waamba pa bulowa mukwiinga bakasalawo kwiimikana cakutatenkaana mulushomo kabatana kuya kucipatela. Cakutaanguna, bakalinga kusunishishi kusangalasha Yehova. Cabili, bakeeya cakubikila maano Baibo alimwi amabuku esu aamba shamu Baibo pamulawo wakwe Yehova waamba ayi buumi abulowa bulisalalite. Catatu, bakalinga kushomete cakutatoonsha ayi Yehova alaakubapa shoolwe ceebo cakusalaawo kumunyumfwila. Aswebo inga twatolelela kunyumfwila Lesa nabi twiinde mumapensho ali buyani.

18. Ino cakubonenaako cakwe Balaki cilatwiisha nshi pamakani akucinka manungo muli Yehova? (Amubone cikope cili papeeji yakutaanguna.)

¹⁸ Amucinke manungo muli Yehova. Amuyeeye Balaki mbwakacikonsha kukoma balwani ceebo cakucinka manungo mubutanjilishi bwakwe Yehova. Paciindi ici, bene Isilaeli tabakalinga kulibambiteewo kulwana alimwi tabakalinga kuciteewo ashilwanisho. Nacibi boobo, Yehova wakalwiita Balaki kuya mukulwana Sisela mutanjilili wabashilumamba bene Kenani pomwi abashilumamba bakwe abo bakalinga kucite shilwanisho shiinji. (Boombo. 5:8) Debola mushinshimi mwanakashi wakalwiita Balaki kuswa pakalundu akuya pamusena peelenebo mukulwana Sisela abaabo bakalinga mu shikoci shankondo shili 900. Cakalinga kusa mukuba ciyumu bene Isilaeli kulwana baabo bakalinga mu shikoci shankondo pamusena peelenebo mukwiinga cakalinga cuubu kweensha shikoci. Nacibi boobo, Balaki wakanyumfwila Yehova. Bashilumamba bakwe Balaki ndyebakalinga kukunkuluka Kalundu ka Tabo, Yehova wakalonsha mfula inene abuumbi. Shikoci shankondo shakwe Sisela shakatalika kucatwa mumatipa, alimwi Yehova wakapa kwaamba ayi Balaki akome. (Boombo. 4:1-7, 10, 13-16) Aswebo tulaakucikonsha kukoma na katucinka manungo muli Yehova alimwi amubutanjilishi mbwaatupa kwiinda mulibunga lyakwe.​—Duto. 31:6.

19. Ino nceebonshi mulisuni kutolelela kukonkela milawo yakwe Lesa?

¹⁹ Tulaakutolelela kweelesha cankusu kukonkela milawo yakwe Lesa ndyetuli mucishi cino cibiibi. (1 Timo. 6:11, 12; 2 Pit. 3:17) Atube bashinishite kutatenkaanishikwa na Satana watweelesha kusebensesha kupenshekwa, bucenjeshi kwaamba ayi atukakatishe kucita shintu shitabete kabotu, kuyeeya kwa bantu abo batalemeki milawo yakwe Yehova, bubeshi alimwi ashintu sheenga shatupilinganya. (Efe. 4:14) Sombi atwiimikane cakutatenkaana mulushomo alimwi akutolelela kusuna Yehova akunokonkela milawo yakwe. Nacibi boobo, tatweelete kuyumininabo pacintu comwi. Mumutwi utokonkelaawo, tulaakubandika Yehova a Yesu mbobatondesha cakubonenaako cibotu abuumbi pamakani akutayumininabo pacintu comwi.