Bata bakalinga banene ku United Church of Canada. Aboobo nsondo ansondo bakalinga kulwiita ndime amwanike wangu ayi tuye ku Sunday school. Lyalo pa 11:00 twakalinga kuyaabo mukupaila kuceeci. Malumwi twakalinga kuya ku Ŋanda ya Bwaami abama. Cakalinga cuubu kubona bupusano bwakalinga pa bupailishi ubu bobilo.

Bama bakalinga kulwiitako ba Bob aba Marion Hutcheson nshobakalinga kwiiya kuswa mu Baibo abo bakalinga beshicibusa mbobakalinga kunyumfwanaabo, alimwi mukuya kwaciindi abalo bakesa mukuba Bakamboni Bakwe Yehova. Mu 1958 ndyekwakalinga kubungana kunene kwanshiku 8 kwa baabo bakaswa mushishi uko kwakalinga kucite mutwi wakwaamba ayi Divine Will, mukwashi waba Hutcheson wakandwiita ayi tuye soonse kukubungana kunene uku pomwi abana babo basankwa botatwe bacanike. Kubungana uku kwakabeta mu tauni ya New York. Pacecino ciindi ndabona ayi tacakalinga cuubu kuli mbabo kuya andime kukubungana uku, sombi nkubungana nkweshi nkabule kuluba mubuumi bwangu.

Ndyendakalinga cikula bwangu twakalinga kukala pa faamu alimwi ndakalinga kunyumfwa kabotu kulama shinyama. Ndakalinga kusunishishi kuya kucikolo kwaamba ayi njiiye bwakushilika shinyama na shaciswa nabi kulicisa. Bama bakalwiitako munene umwi mulibungano pamakani anshondakalinga kusuni kucita. Calusuno wakanjibalusha ayi tutokala “munshiku shakweelaako” alimwi wakanjibalusha mbweenga kuya ku yunivesti kwamyaaka iinji kwakuma bushicibusa bwangu a Yehova. (2 Timo. 3:1) Aboobo ndakasalawo kutaya ku yunivesti.

 Ndakatolelela kuyeeya nsheenga ndaciita pesule lyakumanisha cikolo ca sekondali. Nabi kwaamba ayi ndakalinga kwaabanamo lubasu nsondo ansondo muncito yakushimikila, nshindakalinga kusangalalaawo muncito iyi alimwi ndakalinga kubona ayi inga nshicikoonshi kutalika bupainiya. Nacibi boobo, bata abo batakalinga Bakamboni pomwi abanike babo basankwa, bakanjuminisha kutalika kusebensa ku kampani ya inshuwalansi ku Toronto. Bata banike bakalinga kusebensa ncito iyandika mu kampani iyi, aboobo anebo ndakasumina kutalika kusebensa mu kampani iyi.

Ndyendakalinga kukala ku Toronto, liinji ndakalinga kusebensa akucanika abantu batakalinga Bakamboni alimwi ici cakapa kwaamba ayi ntanocanika kumabungano lyoonse akutanokwaabanamo lubasu lyoonse muncito yakushimikila. Ndakalinga kukala abakaapa basankwa batakalinga Bakamboni, lyalo pesule lyakwaamba ayi bafwa ndakalinga kweelete kulangoola musena umwi kwakukala.

Mukwashi waba Hutcheson abo bakalinga bantola kukubungana kunene mu 1958, bakalingabo anga mbashali bangu. Bakandwiita ayi nokala ambabo alimwi bakancafwa kuyumya bushicibusa bwangu a Yehova. Mu 1960, nebo pomwi a John mwanaabo musankwa twakabombekwa. John wakatalika bupainiya alimwi ici cakanjuminisha kunosebensa cankusu muncito yakushimikila. Bamakwesu bakabona mbondakalinga kuya panembo lwakumushimu, lyalo mukuya kwaciindi bakansala kuba musebenshi uyo pacecino ciindi ngotwiita ayi Mutanjilili wa Kubungana kwa Buumi Anciito.

Mu 1966, ndakeeba ba Randi Berge, abo bakalinga painiya usebensa cankusu alimwi bakalinga kusunishishi kuya mukusebensela kumusena ubulishite. Mutanjilili wesu walubasu wakatutondesha kubikila maano alimwi wakatuyuminisha kuya mukucafwilisha libungano lyakalinga ku Orillia mu Ontario. Aboobo peenkaapo twakalongela ku Orillia.

Ndyepakeendabo ciindi ciniini kuswa ndyetwakashika ku Orillia, anebo ndakatalika bupainiya bwaciindi coonse. Anebo ndakalinga kusangalete kusebensa bupainiya bweenka mbuli ba Randi! Ndyendakatalika kusebensa cankusu kwaamba ayi nosebensa kabotu bupainiya, ndakatalika kusangalala kusebensesha Baibo akubona bantu mbobakalinga kwiinyumfwishisha. Cakalinga cintu cisangalasha abuumbi kucafwa beebene bamwi bakalinga kukala ku Orillia kwaalula buumi bwabo akuba basebenshi bakwe Yehova.

Ndyetwakaya mukufwakasha ku Toronto, twakabonana a Mukwesu Arnold MacNamara, uyo wakalinga womwi wabamakwesu bakalinga kutanjilila pa Bethel. Wakatusenga na inga twasuna kusebensako bupainiya bulibetele. Peenkaapo ndakakumbula ayi: “Ee! Inga twaya mukusebensela kuli koonse sombi kuteshi ku Quebec!” Ndakakumwa akuyeeya kutabete kabotu kwa bantu abo bakalinga kwaamba Cisungu bakalinga kukala mu Canada pamakani ankoondo yakalingaako kumusena wiitwa ayi Quebec, uko kwakalinga kukala bantu bakalinga kwaamba mushobo wa ciFrench. Paciindi cilya bantu bakalinga babukila mfulumeende alimwi bakalinga kusuni kwaamba ayi musena wa Quebec utabi lubasu lwa cishi ca Canada.

Ba Arnold bakakumbula ayi, “Pacecino ciindi ofesi ya musampi utootumabo bapainiya balibetele kuya mukusebensela ku Quebec.” Peenkaapo ndakasumina ayi inga ndaya. Alimwi ndakalinga kucishi kale ayi ba Randi bakalinga kusuni kuya mukusebensela ku Quebec. Mukuya kwaciindi, ndakesa mukushiba ayi uku kwakalinga kusala kubotu nkotwakacita mubuumi bwesu!

Pesule lyakucanika kucikolo cakwiiya mushobo wa ciFrench kwansondo shili 5, nebo aba Randi pomwi abeebene bamwi twakaya ku Rimouski, musena uli kumatwa lya tauni ya Montreal pakweenda mushinso wa makilomita ashika pafwiifwi a 540. Kuli shiinji nshetwakalinga kuyandika kwiiya. Alimwi ici cakabonekela patuba ndyendakabelenga shakoolobesha shimwi pakubungana. Muciindi cakwaamba ayi pakubungana kunene kutoosa “tulaakutambula bamakwesu baanji kuswa ku Austria,” ndakaamba ayi “tulaakutambula shiyuni shinene shiinji.”

Ndyetwakalinga ku Rimouski, kwakesa benankashi bali 4 bateebetwe abo bakalinga kusebensa cankusu alimwi a Mukwesu a Nankashi Huberdeau pomwi abana babo banakashi bobilo. Mukwesu a Nankashi Huberdeau bakatalika kucita lenti ŋanda inene alimwi bapainiya boonse bakalinga kukalaamo bakalinga kucafwana kulipila maali a lenti. Twakalinga kuiita ayi Ŋanda Ituba mukwiinga kunembo yakalinga kupentetwe mubala utuba alimwi yakalinga kucite macinko atuba. Liinji twakalinga kukala bantu bali 12 na 14 muŋanda iyi. Mbuli bapainiya balibetele, nebo aba Randi twakalinga kuya muncito yakushimikila macuunsa, malumwi alimwi amacolesha. Alimwi twakalinga kunyumfwa kabotu mukwiinga lyoonse twakalinga kuba a wakuyaakwe muncito yakushimikila, nabi kwaamba ayi inshiku shimwi macolesha kwakalinga kutontola abuumbi.

Twakasunana abuumbi abapainiya aba bashomeka, cakwaamba ayi twakababo mbuli mukwashi. Cimwi ciindi soonse twakalinga kukala akuyota mulilo pomwi, na kutelekela pomwi shakulya. Mukwesu umwi wakalinga kucishi shakulishalisha. Aboobo liinji Pacibelu mashiku, twakalinga kwiimba akushaana.

Bantu baanji ku Rimouski bakalinga kusuni kwiiya Baibo! Mumyaaka ilibo 5, twakasangalala kubona beshikwiiya Baibo baanji mbobakaya panembo akubombekwa, alimwi akubona libungano mbolyakaya panembo cakwaamba ayi mwakaba beshikushimikila bashika pafwiifwi a 35.

Ndyetwakalinga mu Quebec, twakatambula lwiiyo lubotu abuumbi lwakatucafwa muncito yesu yakushimikila. Twakabona Yehova mbwaakalinga kutucafwa muncito yakushimikila, akutupa shintu nshetwakalinga kuyandika lwakumubili. Kwiilikaawo, twakasuna bantu baamba mushobo wa ciFrench, alimwi ambobacita shintu. Alimwi ici cakapa kwaamba ayi tusune bantu baamba mishobo imwi mbobacita shintu.​—2 Koli. 6:13.

Cakuteengashila, baku ofesi ya musampi bakatutuma kuya mukusebensela ku Tracadie, tauni ili kulubasu lwa kwicwe lwa musena wa New Brunswick. Ici cakatubeta ciyumu mukwiinga paciindi ici ndyetwakasainabo cipepa cakucita lenti ŋanda imwi alimwi ndakalinga kwiishako pacikolo cimwi inshiku shimwi munsondo. Kwiilikaawo, bantu bamwi mbotwakalinga kwiisha Baibo ndyebakababo beshikushimikila alimwi paciindi ici twakalinga kuyaka Ŋanda ya Bwaami.

Twakapaililaawo abuumbi pamakani aya Pacibelu a Pasondo alimwi twakafwakashila tauni ya Tracadie, iyo  yakalinga kupusene abuumbi aku Rimouski. Sombi twakasalawo ayi tutooya mukwiinga Yehova wakalinga kusuni kwaamba ayi tuye mukusebensela kumusena uku. Twakeelesha kucita Yehova nshaakatulwiita alimwi twakabona mbwakatucafwa mumapensho ngotwakacana. (Mala. 3:10) Ceebo cakwaamba ayi ba Randi mbayumu lwakumushimu, balicite mushimu wakulyaaba alimwi mbacisangalashi, cakaba cuubu kulongela kumusena uyu.

Mulibungano lipya motwakalongela mwakalingabo munene womwi waliina lya Robert Ross. Wakalinga kusebensa bupainiya kumusena uyu pomwi aba Linda bakaakwe, sombi ndyebakaba amwaana wakutaanguna, bakasalawo kukala kumusena weenka uyu. Nabi kwaamba ayi bakalinga kulama mwanaabo musankwa muniini, bakatuyuminisha abuumbi mukwiinga bakatutambula kabotu alimwi bakalinga kusebensa cankusu muncito yakushimikila.

Pesule lya kusebensa bupainiya ku Tracadie kwamyaaka yobilo, twakatambula ncito aimwi cakuteengashila. Twakapekwa ncito yakufwakashila mabungano. Twakafwakashila mabungano a Cisungu kwamyaaka 7, lyalo pesule twatalika kufwakashila mabungano asebensesha mushobo wa ciFrench kumusena wa Quebec. Mukwesu Léonce Crépeault uyo wakalinga kufwakashila bamatanjilili balubasu, wakalinga kundumba pamakani ngondakalinga kwaamba. Sombi lyoonse pesule lyakwaamba likani, wakalinga kunjipusha ayi, “Sa kuli nsheenga mwaciita kwaamba ayi munokwaamba makani acafwa?” a Ceebo cakwaamba ayi bakalinga kumbikilako maano, ndakasebensa cankusu kutalika kwaamba makani acafwa alimwi munshila yuubu kunyumfwisha.

Incito njeshi nkabule kuluba mubuumi bwangu, ni ncito njondakalinga kucite mu 1978 pakubungana kunene kwa baabo bakaswa mushishi kwakalinga kucite mutwi waamba ayi “Victorious Faith,” uko kwakabeta ku Montreal. Ndakalinga kusebensela ku Dipatimenti Yakubamba Shakulya. Twakalinga kulangila kutambula bantu bali 80,000, akubapa shakulya munshila ipuseneeko ambotwakalinga kucita kale kale. Twakalinga kucite shisebensesho shipya, shakulya nshotutana kutelekaawo kale alimwi anshila ipya ya kushitelekelaamo. Twakalinga kucite mafiliji anene ali 20, sombi cimwi ciindi taakalinga kusebensa bweelete. Ndyekwakacaalabo bushiku bomwi ayi kubungana kutalike, tatuna kucikonsha kunjila mu sitediyamu kwaamba ayi tubaambe shintu mukwiinga mwakalinga beshikucita shisekano. Sombi twakesa mukunjila pakati kamashiku. Alimwi twakalinga kweelete kutalika kuteleka shakulya shamacuunsa kakutana kuca! Twakalema, sombi ndakeeya shiinji kuswa ku bamakwesu abo bakalinga kusebensa cankusu, bakalinga kucite mibo ibotu alimwi bakalinga kucite lusangalalo. Twakaba abushicibusa buyumu alimwi tucinyumfwana kushika apacecino ciindi. Cakalinga cintu  cisangalasha kuba akubungana kunene uku ku Quebec, musena Bakamboni nkobakalinga kupenshekwa abuumbi mumyaaka yamuma 1940 amuma 1950!

Ndakeeya shiinji kuswa kubamakwesu bakalinga kutanjilila ma dipatimenti amwi ndyetwakalinga kuba akubungana kunene ku Montreal. Mwaaka umwi, ba David Splane abo basebensa mu Likoto Litanjilila pacecino ciindi, mbobakalinga kutanjilila kubungana kunene. Pakubungana kunene kumwi kwakabaako, bakansenga ayi mbe mutanjilili wakubungana uko. Alimwi ba David bakancafwa abuumbi.

Mu 2011, pesule lyakwaamba ayi nebo aba Randi twasebensa muncito yakufwakashila mabungano kwamyaaka 36, bakandwiita ayi nookwiisha mu Cikolo ca Bamanene. Kwamyaaka yobilo, twakoona pa malo apusenepusene ali 75, sombi shoolwe nshotwakacana nshiinji kwiinda kulyaaba kwesu. Kumamanino ansondo ili yoonse, bamanene bakalinga kulumba abuumbi mukwiinga bakabona kwaamba ayi bamu Likoto Litanjilila bakalinga kubacafwa kuba abushicibusa buyumu a Yehova.

Mukuya kwaciindi, ndakatalika kwiisha mu Cikolo ca Bashimikila sha Bwaami. Abo bakalinga kuba mucikolo bakalinga kulema abuumbi alimwi bakalinga kulisukama ceebo ca shakucita kufula. Kucakubonenaako, bakalinga kwiiya kwa mawoola ali 7 bushiku abushiku, mawoola otatwe macolesha bakalinga kubelenga nsheenga babalwiita kucita alimwi nsondo ansondo bakalinga kupekwa mbasu shili 4 na shili 5 mucikolo. Mukwesu umwi wakalinga kwiisha mucikolo ici andime, twakabalwiita ayi inga tabacikoonshiiwo palwaabo kwakubula lucafwo lwakwe Yehova. Teshi nkaluube abo bakalinga mucikolo mbobakalinga kukankamana kwaamba ayi na bacinka manungo muli Yehova, bakalinga kucikonsha kucita shintu nshobakalinga kubona ayi inga tabacikonshi.

Ceebo cakwaamba ayi bama bakalinga kubikila maano kubamwi, bakacafwa bantu mbobakalinga kwiisha Baibo kuya panembo alimwi bakacafwa abata kwaalula mbobakalinga kubona Bakamboni Bakwe Yehova. Ndyepakeenda nshiku shotatwe pesule lyakwaamba ayi bama bafwa, twakakankamana bata ndyebakesa mukukutika ku likani lya Baibo mu Ŋanda ya Bwaami alimwi bakatolelela kucanika kumabungano kwamyaaka 26. Nabi kwaamba ayi bata tabakwe kubombekwa, bamanene bakandwiita ayi lyoonse bata bakalinga kuba bakutaanguna kushika kumabungano nsondo ansondo.

Bama bakalinga cakubonenaako cibotu abuumbi kuli ndime akubenankashi shangu. Bamanike bangu boonse botatwe banakashi abameebaabo batosebensela Yehova cakushomeka. Benankashi shangu bobilo balasebensela ku ofesi ya musampi. Womwi ali ku Portugal lyalo umwi ali ku Haiti.

Pacecino ciindi, nebo aba Randi tutosebensa mbuli bapainiya balibetele ku Hamilton mu Ontario. Ndyetwakalinga kusebensa ncito yakufwakashila mabungano twakalinga kusangalala kusebensela pomwi abamakwesu, kuboolela kubantu mbobakashimikila akuya ku shiiyo shabo sha Baibo. Ano pacecino ciindi tulasangalala kubona bantu mbotwiisha Baibo mbobaya panembo lwakumushimu. Alimwi ndyetutooba bushicibusa abamakwesu abenankashi mulibungano lipya, tulayuminishikwa kubona Yehova mbwaatobacafwa shintu ndyeshili kabotu andyeshitabete kabotu.

Na twayeeya nshotwakeendaamo, tulalumba kubamakwesu abenankashi baanji abo bakatutondesha kubikila maano. Aswebo tulacita nsheenga twacikonsha kubikila maano kubamwi akubayuminisha kusebensela Yehova peela nkusu shabo. (2 Koli. 7:6, 7) Kucakubonenaako, mumukwashi umwi, mushali mwanakashi, mwanaakwe musankwa amwanaakwe mwanakashi, bakalinga kusebensa bupainiya bwaciindi coonse. Ndakeepusha mushali musankwa, na wakayeeyawo pakutalika bupainiya bwaciindi coonse. Wakankumbula ayi wakalinga kucafwa bapainiya botatwe. Aboobo ndakamwiipusha ayi, “Sa mwebo inga mwabacafwa kabotu kwiinda Yehova mbweenga wabacafwa?” Ndakamuyuminisha ayi alakwe inga waba alusangalalo na watalika bupainiya bweenka mbuli mbabo. Ndyepakeendabo myeenshi 6, wakatalika bupainiya bwaciindi coonse.

Nebo aba Randi tulaakutolelela kulwiita “lishalane licisa kunembo” ‘pancito shikankamika’ shakwe Yehova, alimwi tutolangila ayi abalo balaakusangalala kusebensela Yehova bweenka mbotusangalete.​—Kulu. 71:17, 18.