Sa Mulicishi?
Ino incelwa nshobakacana ku matongo a Babiloni alimwi ambobakalinga kushipanga shilatondesha buyani ayi Baibo nshoyaamba nshancine?
BESHIKUKABA shakukabakaba bakacana ncelwa shiinji abuumbi ku matongo a Babiloni, isho nshobakasebensesha pakuyaka ndabala iyi. Shikukaba shakukabakaba waliina lya Robert Koldewey, wakaamba ayi incelwa ishi shakalinga kutentelwa muminyumbi “pansengwe lya ndabala uko kwakalinga bulongo bubotu bwakumisha ncelwa alimwi kwakalinga shisamu shiinji nsheenga basebensesha pakutenta ncelwa.”
Beshikukaba shakukabakaba bakacana bumboni butondesha kwaamba ayi beendeleshi ba bene Babiloni, cimwi ciindi bakalinga kusebensesha minyumbi iyo kucita shintu shimwi shitabete kabotu. Ba Paul-Alain Beaulieu ba pulofesa baku University of Toronto, abo bacishi kabotu makani akale kale aamba pabene Asilya alimwi amushobo ngobakalinga kusebensesha, bakaamba ayi: “Makani bene Babiloni ngobakalemba . . . alatondesha ayi mwaami wakapa mulawo wakwaamba ayi abo batakalinga kumunyumfwila na abo batakalinga kulemeka balesa ba bene Babiloni, bakalinga kweelete kuwaalwa mumunyumbi kwaamba ayi bapiteemo.” Makani amwi akalembwa paciindi Nebukadinesa ndyaakalinga mwaami, alaamba ayi: “Amubanyonyoole, amubatente . . . bwishi bwabo abuye mwiculu, alimwi amubacaaye kwiinda mukubawaala mumulilo.”
Makani aya alatwiibalusha makani ngotucana mulibuku lya Danyelo capita 3. Makani acanika mucapita iyi alatondesha ayi Mwaami Nebukadinesa wakeemika cibumbwabumbwa cinene ca golodi muliwesa lya Dula, pansengwe lya ndabala ya Babiloni. Shadileki, Mishaki alimwi a Abedinego, basankwa aba bacanike bene Ebulu ndyebakakaka kufukama kwaamba ayi balambile cibumbwabumbwa, Nebukadinesa wakakalala abuumbi cakwaamba ayi wakapa mulawo wakwaamba ayi mumunyumbi balengeshemo “kulungula kwiinda mbomuba lyoonse mankanda ali osanwe aobilo.” Lyalo wakaamba ayi babawaale mumunyumbi ‘mwakalinga kunyaka mulilo abuumbi.’ Nacibi boobo, munjelo wakabapulusha kwaamba ayi batafwi.—Danye. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Lucelwa lwakutenta palembetwe liina lyakwe Nebukadinesa
Incelwa nshobakacana mumatongo a Babiloni ashalo shilatondesha ayi Baibo nshoyaamba nshancine. Pancelwa shiinji palilembetwe maswi akulumbaisha mwaami. Kucakubonenaako, palucelwa lomwi palilembetwe ayi: “Nebukadinesa, Mwaami wa Babiloni . . . Ŋanda ya bwaami, nebo ne Mwaami Wiinditeewo njendakayaka . . . Bamulunyungu lwangu abakatolelele kweendelesha mundabala iyi kwamuyayaya.” Maswi aya alikoshenye abuumbi amaswi ngotucana pa Danyelo 4:30, apo Nebukadinesa mpakaamba cakulisumpula ayi: ‘Sa ino teshi Babiloni ndabala inene iyo njendakayaka kwaamba ayi ibe ŋanda ya bwaami kutondesha nkusu shangu shoonse, bulemu bwangu alimwi abwaami?’
