1. Ino nceebonshi ncintu ca busongo kulibambilila limwi mapensho akuteengashila kaatana kucitika?

 KULIBAMBILILA limwi cintu cimwi kacitana kucitika inga kwapulusha buumi bwesu. Kucakubonenaako, na kwacitika mapensho akuteengashila, liinji bantu bakalibambilila limwi balapuluka alimwi balacikonsha akucafwako bamwi. Libunga limwi lya ku Europe lyeelesha kucafwa bantu lyakaamba ayi: “Kulibambila kabotu inga kwapulusha buumi bwa bantu.”

2. Ino nceebonshi tulyeelete kulibambila kusa kwa mapensho anene? (Mateyo 24:44)

² “Mapensho anene” alaakutalika cakuteengashila. (Mate. 24:21) Mubupusano amapensho aanji acitika cakuteengashila, tulishi kwaamba ayi mapensho anene alaakusa. Myaaka mpashi 2,000 yainda, Yesu wakacenjesha bashikwiiya bakwe kuba balibambite kusa kwa mapensho anene. (Amubelenge Mateyo 24:44.) Na twalibambilila limwi, cilaakuba cuubu kuliyumya paciindi ici ciyumu alimwi akucafwa bamwi kucita boobo.​—Luka 21:36.

3. Ino kuliyumya, kutondesha nkumbu alimwi alusuno kulaakutucafwa buyani kulibambila mapensho anene?

³ Amuleke tubandike pamibo yotatwe yeenga yatucafwa kulibambila kusa kwa mapensho anene. Ino tulaakucita buyani na tukalwiitikwe kushimikila makani ayumu aboomboloshi alimwi bantu bateshi Bakamboni ndyeshi bakanootupikisha? (Ciyu. 16:21) Tulaakuyandika kuliyumya kwaamba ayi tunyumfwile Yehova, akushoma kwaamba ayi alaakutushitilisha. Ino tulaakucita buyani na bamakwesu bakasowekelwe shintu shimwi na shintu shabo shoonse? (Abaku. 3:17, 18) Tulaakuyandika kubatondesha nkumbu kwiinda mukunoobapako shintu nsheshi bakanoyandika. Ino tulaakucita buyani na tukayandike kunookala pomwi abamakwesu abenankashi kwakaciindi, paciindi shishi sheshi shikacatane pomwi ndyeshi shikanootulwana? (Esek. 38:10-12) Tulaakuyandika kubasuna abuumbi kwaamba ayi tukacikoonshe kuliyumya paciindi ici ciyumu.

4. Ino Baibo ilatucafwa buyani kushiba ayi tulyeelete kutolelela kwiiya kutondesha mibo mbuli kuliyumya, inkumbu alimwi alusuno?

 ⁴ Maswi akwe Lesa alatuyuminisha kwiiya kutolelela kutondesha mibo mbuli kuliyumya, kutondesha nkumbu alimwi alusuno. Kucakubonenaako, Luka 21:19 ilaamba ayi: ‘Kwiinda mukuliyumya kwanu, mulaakupulusha buumi bwanu.’ Bene Kolose 3:12 ilaamba ayi: ‘Amulifwalike . . . nkumbu.’ Alimwi 1 Bene Tesalonika 4:9, 10 ilaamba ayi: “Lesa wamwiisha kale mbomweelete kusunana. . . . Ono twamusenga nobamakwesu kwaamba ayi mwiindilisheewo kusunana.” Malembo oonse aya akalembelwa Beneklistu abo bakalinga kutondesha kale kuliyumya, inkumbu alimwi alusuno. Sombi bakalinga kweelete kutolelela kwiiya kutondesha mibo iyi. Aswebo tulyeelete kwiiya kunotondesha mibo iyi. Kwaamba ayi tucikoonshe kucita boobo, tutokwiiya Beneklistu bakutaanguna mbobakeeya kutondesha mubo womwi awomwi. Lyalo tutobandika mbweenga twakonkela cakubonenaako cabo akutondesha ayi tulilibambite kusa kwa mapensho anene.

5. Ino Beneklistu bakutaanguna bakacita buyani kwaamba ayi baliyumye mumapensho ngobakalinga kwiindaamo?

⁵ Beneklistu bakutaanguna bakalinga kuyandika kuliyumya. (Ebu. 10:36) Kwiilika pa kwiinda mumapensho amwi ngobakalinga kwiindaamo paciindi cilya, kuli mapensho aamwi ngobakalinga kwiindaamo. Baanji bakalinga kupenshekwa ku bamatanjilili ba baJuda, kubeendeleshi ba bene Loma alimwi akubeshikamukowa babo. (Mate. 10:21) Alimwi bakalinga kweelete kushinisha kwaamba ayi babula kuyungwa kunjiisho shakubeca isho shakalinga kwaamba baabo bakapondoka alimwi abaabo bakalinga kweelesha kupansaanya libungano. (Milimo 20:29, 30) Nacibi boobo, Beneklistu abo bakatolelela kuliyumya. (Ciyu. 2:3) Ino nshiinshi shakabacafwa? Bakayeeya pashakubonenaako shamu Malembo sha baabo bakaliyumya, mbuli cakubonenako cakwe Jobo. (Jemu. 5:10, 11) Bakapaila kuli Lesa kwaamba ayi abape nkusu shakuliyumya. (Milimo 4:29-31) Alimwi bakatolelela kwiibaluka kwaamba ayi Yehova alaakubapa shoolwe na batolelela kuliyumya.​—Milimo 5:41.

6. Ino nshiinshi nshomweeya kuswa ku sheesho ba Merita nshobakacita kwaamba ayi bacikonshe kuliyumya ndyebakalinga kupikishikwa?

⁶ Aswebo inga twatolelela kuliyumya na lyoonse katwiiya shakubonenaako sha bantu abo baambwa mu Maswi akwe Lesa amumabuku esu lyalo akukutumana kuyeeyawo. Kucita boobo, kwakacafwa Nankashi Merita ukala ku Albania kuliyumya ndyaakalinga kupikishikwa abuumbi ku bamumukwashi wakwe. Wakaamba ayi: “Ndakayuminishikwa abuumbi ndyendakabelenga makani amu Baibo aamba pali Jobo. Wakapenga abuumbi alimwi nabi kwaamba ayi taakalinga kucishiwo wakalinga kupa kwaamba anoopenga, wakaamba ayi: ‘Kushikila nkafwe, teshi nkacileke kushomeka!’ (Jobo 27:5) Ndakesa mukushiba kwaamba ayi Jobo wakeenda mumapensho ayumu abuumbi kwiinda ngondakalinga kwiindaamo. Mubupusano a Jobo, nebo ndakalinga kucishi wakalinga kupa kwaamba ayi noopenga.”

7. Nabi kwaamba ayi pacecino ciindi tatutokwiinda mulipensho liyumu, ino nciinshi ncotweelete kwiiya kunocita?

⁷ Aswebo inga twatolelela kuliyumya na lyoonse katupaila kuli Yehova akumulwiita shoonse shitusukamika. (Filip. 4:6; 1 Tesa. 5:17) Mpashi pacecino ciindi tamutokwiinda mulipensho liyumu abuumbi. Nacibi boobo, sa mulapaila kuli Yehova akumusenga kwaamba ayi amucaafwe kuliyumya ndyemwakalala, ndyemwapilinganishikwa na ndyemutacishi shakucita? Na lyoonse mulapaila kuli Lesa wesu kwaamba ayi amucaafwe ndyemutokwiinda mumapensho aniini pacecino ciindi, cilaakumubeta cuubu kucita boobo ndyeshi mukanokwiinda mumapensho ayumu kunembo.​—Kulu. 27:1, 3.

8. Ino cakubonenaako ca ba Mira cilatondesha buyani ayi kuliyumya ndyetutokwiinda mumapensho pacecino ciindi inga kwatucafwa kuliyumya ndyeshi tukanokwiinda mumapensho kunembo? (Jemusi 1:2-4) (Amubone acikope.)

⁸ Na twatolelela kunooshomeka kuli Yehova ndyetutokwiinda mumapensho pacecino ciindi, tulaakucikonsha kutolelela kuliyumya ndyeshi tukanokwiinda mumapensho ayumu kunembo. (Loma. 5:3) Ino nceebonshi nceenga twaambila boobo? Bamakwesu  abenankashi baanji balaamba ayi lyoonse na bacikonsha kuliyumya ndyebatokwiinda mubukaalo buyumu, cilabacafwa kuliyumya na bapolelwa lipensho limwi. Na Yehova wabacafwa kuliyumya ndyebatokwiinda mulipensho limwi, lushomo lwabo lwa kwaamba ayi Yehova alaakubacafwa lulayuminaako, lyalo na bapolelwa lipensho limwi, lushomo ulo lulabacafwa kuliyumya. (Amubelenge Jemusi 1:2-4.) Ba Mira bekala ku Albania alimwi basebensa mbuli painiya, bakacana kwaamba ayi kuliyumya ndyebakalinga kwiinda mumapensho kale kale kwabacafwa kutolelela kuliyumya kushika apacecino ciindi. Bakaamba ayi cimwi ciindi balalinyumfwa anga balo beenkabo mbobeenda mumapensho aanji abuumbi. Sombi balebaluka Yehova mbwaabacafwa mumyaka 20 yainda, alimwi akulilwiita ayi: ‘Tolelela kushomeka. Utacileeki kusebensela Yehova pesule lya kwaamba ayi wakucafwa kuliyumya mubukalo buyumu abuumbi.’ Amwebo inga mwayeeya Yehova mbwakamucafwa kuliyumya. Amushome cakutatonsha kwaamba ayi lyoonse alabona mbomuliyumya ndyemutokwiinda mumapensho alimwi alaakumupa shoolwe. (Mate. 5:10-12) Lyalo na mapensho anene akatalike, cilaakuba cuubu kuliyumya alimwi mulaakuba bashinishite kutolelela kuliyumya.

9. Ino bamulibungano lyaku Antyoki yaku Silya bakacita buyani kwaamba ayi batondeshe nkumbu kubashominyinaabo?

⁹ Amuyeeye shakacitika ku Beneklistu baku Judeya ndyekwakaba nsala inene. Bamulibungano lyaku Antyoki yaku Silya ndyebakanyumfwa ayi kuli nsala, bakabanyumfwila nkumbu bashominyinaabo bakalinga kukala ku Judeya. Aboobo bakacitawo comwi kwaamba ayi bacafwe bashominyinaabo. “Bakasalawo kwaamba ayi womwi awomwi atume lucafwo ku bashominyinaabo abo bakalinga kukala ku Judeya kweelana ambwaakalinga kukonsha.” (Milimo 11:27-30) Nabi kwaamba ayi bashominyinaabo bakakumwa kunsala bakalinga kukala kulaale abuumbi, Beneklistu baku Antyoki bakalinga kushinishite kubacafwa.​—1 Joni 3:17, 18.

10. Ino nshiinshi nsheenga twaciita kwaamba ayi tutondeshe nkumbu kubashominyineesu abo bacitikilwa mapensho akuteengashila? (Amubone acikope.)

¹⁰ Aswebo pacecino ciindi inga twatondesha nkumbu kubashominyineesu na twanyumfwa ayi bacitikilwa mapensho akuteengashila. Tulafwambaana kulyaaba kucafwilisha mpashi kwiinda mukwiipusha bamanene na inga twaya mukucafwilisha kumusena uko kwacitika mapensho, kupa maali akucafwilisha ncito yansengwe yoonse, na kupaililaako baabo bakacitikilwa mapensho akuteengashila. b (Tus. 17:17) Kucakubonenaako, mu 2020 kwakapangwa ma komiti eendilila 950 apa lucafwo na kwacitika mapensho akuteengashila, kwaamba ayi bacafwe baabo bakalinga kuyandika lucafwo paciindi ca bulwashi bwa COVID-19. Tulabalumba abuumbi bamakwesu abenankashi basebensa muncito yakupa lucafwo. Mukwiinga balanyumfwila nkumbu bamakwesu abenankashi, balabatolela shintu nshebayandika lwakumubili, kubacafwa kutolelela kusebensela Yehova alimwi akubacafwa kubaamba na kuyaka cipya maanda amisena njetusebensesha muncito yakwe Lesa.​—Amweelanye a 2 Bene Kolinto 8:1-4.

11.Ino kutondesha nkumbu ku bamwi kulapa buyani kwaamba ayi Ishiwesu wa kwiculu alemekwe?

¹¹ Na twatondesha nkumbu ku bashominyineesu abo bacitikilwa mapensho akuteengashila, bantu bamwi balabona kulyaaba kwesu kwaamba ayi tucafwe bamwi. Kucakubonenaako, mu 2019 imfula yacipuupu yakalinga kwiitwa ayi Hurricane Dorian yakanyonyoola Ŋanda ya Bwaami imwi ku Bahamas. Bamakwesu ndyebakalinga kuyaka cipya Ŋanda ya Bwaami, bakeepusha muntu umwi uteshi Kamboni, kwaamba ayi abalwiite maali ngeenga bayandika kumupa kwaamba ayi asebenseko ncito shimwi. Wakabalwiita ayi: “Ntoosebensesha shisebensesho shangu, ashintu shangu kumucafwa . . . kwakubula kumulipilisha. . . . Ndisunibo kucafwa libunga lyanu. Ndakayuminishikwa abuumbi kubona mbomucafwa  bashominyinaanu.” Bantu baanji tabamushiiwo Yehova. Sombi baanji balabona Bakamboni Bakwe Yehova nshebacita kwaamba ayi bacafwe bamwi. Tulasangalala abuumbi kushiba kwaamba ayi na twatondesha nkumbu ku bamwi, tulapa kwaamba ayi bantu bamwi basune kwiiya shiinji pali Yehova uyo ‘ucite nkumbu abuumbi’!​—Efe. 2:4.

12. Ino kwiiya kutondesha nkumbu pacecino ciindi kulaakutucafwa buyani kulibambila mapensho anene? (Ciyubululo 13:16, 17)

¹² Ino nceebonshi tulaakuyandika kunotondesha nkumbu paciindi ca mapensho anene? Baibo ilatondesha ayi abo beshibakabule kuba kulubasu lwa mfulumeende sha mucishi, balaakwiinda mumapensho pacecino ciindi alimwi apaciindi ca mapensho anene. (Amubelenge Ciyubululo 13:16, 17.) Mpashi bamakwesu abenankashi balaakuyandika kucafwikwa kwaamba ayi babe ashintu nshebayandika. Na Klistu Yesu Mwaami wesu akese mukoombolosha bantu, aakatucaane katutondesha nkumbu alimwi akutulwiita ayi ‘amwiinjile mu Bwaami.’​—Mate. 25:34-40.

13. Kweelana a Bene Loma 15:7, ino Beneklistu bakutaanguna bakacita buyani kwaamba ayi batolelele kunosunana abuumbi?

¹³ Beneklistu bakutaanguna bakalinga kushibikitwe ayi bakalinga kutondeshanya lusuno. Ano sa cakalinga cuubu kuli mbabo kunootondeshanya lusuno? Amuyeeye kupusanapusana kwa Beneklistu bakalinga mulibungano lyaku Loma. Bamwi bakalinga baJuda, abo bakeeishikwa kukonkela Mulawo wakwe Mose, lyalo bamwi bakalinga baswamashi abo bakalinga kukonkela milawo ipuseneeko. Citoboneka ayi Beneklistu bamwi bakalinga basha lyalo bamwi bakalinga kucite basha. Ino Beneklistu aba bakacita buyani kwaamba ayi batolelele kunootondeshanya lusuno nabi kwaamba ayi bakalinga mubukaalo bupusenepusene? Mutumwi Paulo wakabayuminisha ayi “amutambulane ca maansa obilo.” (Amubelenge Bene Loma 15:7.) Ino wakalinga kusansulula nshi? Liswi lyakasansululwa ayi “amutambulane” inga lyasansulula kutambula kabotu muntu umwi muŋanda yanu, na kusumina kuba bushicibusa anguwe. Kucakubonenaako, Paulo wakalwiita Filimoni ‘kutambula kabotu’ Onesimasi uyo wakalinga wacica Filimoni mwaami wakwe. (Filimo. 17) Alimwi Pulisila a Akula bakatambula Apolosi uyo watakalinga kucishi shiinji pa Beneklistu, kwiinda ‘mukuyaakwe kuŋanda yabo.’ (Milimo 18:26) Beneklistu aba tabana kusuminisha bukaalo mbobakalingaamo kupa kwaamba ayi babe batacatene, alimwi bakatolelela kunotambulana.

14. Ino ba Anna abeebaabo bakacita buyani kwaamba ayi batondeshe lusuno ku bamakwesu abenankashi?

¹⁴ Aswebo inga twatondesha lusuno ku bamakwesu abenankashi kwiinda mukuba bushicibusa ambabo akucana ciindi cakuba pomwi ambabo. Kucita boobo, kulaakupa kwaamba ayi abalo banotutondesha lusuno. (2 Koli. 6:11-13) Amubone shakacitikila ba Anna abeebaabo. Ndyepakeendabo ciindi ciniini kuswa ciindi ndyebakaya mukusebensela kumusena kumwi ku West Africa mbuli bamishonali, bulwashi bwa COVID-19 bwakatalika. Ceebo cabulwashi bwa COVID-19, tabakalinga kucikonsha kubungana pomwi abamakwesu abenankashi ku Ŋanda ya Bwaami alimwi ici cakapa kwaamba ayi cibayumine kubashiba kabotu. Ino beebene aba bakacita buyani kwaamba ayi batondeshe lusuno kubamakwesu abenankashi? Bakalinga kusebensesha pulogilamu imwi yapa intaneti kubandika ambabo alimwi akubalwiita ayi bakalinga kusunishishi kubashiba kabotu. Bamakwesu abenankashi bakalumba pa lusuno bamishonali ndobakabatondesha alimwi ici cakapa kwaamba ayi liinji banotumina fooni bamishonali aba akunobalembela mameseji. Ino nceebonshi bamishonali aba bakeelesha kushibana abamakwesu abenankashi mulibungano lipya ndyebakalongelaako? Ba Anna bakaamba ayi, “Teshi nkabalubeko bamakwesu abenankashi abo bakantondesha lusuno pomwi amukwashi wangu paciindi shintu ndyeshakalinga kabotu andyeshatakalinga kabotu. Shakubonenako shabo shilanjuminisha kutondesha lusuno kubamwi.”

15. Ino nshiinshi nshomweeya kuswa kucakubonenaako caba Vanessa pamakani akusuna bamakwesu abenankashi boonse? (Amubone acikope.)

¹⁵ Sobaanji mumabungano motubete muli bamakwesu  abenankashi bakakomenena mubukalo bupusenepusene alimwi bacite mibo ipusenepusene. Kubikila maano kumibo ibotu njebacite kulaakutucafwa kubasuna abuumbi. Nankashi waliina lya Vanessa, uyo usebensela ku New Zealand, cakalinga kumubeta ciyumu kunyumfwana kabotu abamwi mulibungano. Sombi muciindi cakusalawo kubatalamuka abo bakalinga kucite mibo yakalinga kumukalasha, wakasalawo kunoocana ciindi cinene cakuba pomwi ambabo. Kucita boobo kwakamucafwa kunobona mibo ibotu Yehova njabona muli mbabo. Wakaamba ayi: “Kuswabo ciindi beebangu ndyebakatalika kusebensa mbuli mutanjilili walubasu, tulaba pomwi abamakwesu abenankashi bacite mibo ipusenepusene alimwi cilambeta cuubu kunyumfwana ambabo. Pacecino ciindi ndanyumfwa kabotu kuba pomwi abamakwesu abenankashi bapusenepusene. Yehova alakwe alisuni bantu bapusenepusene, mukwiinga alasuminisha bantu bapusenepusene kumulambila.” Na tweeya kunobona bantu bweenka Yehova mbwaababona, tulatondesha ayi tulibasuni.​—2 Koli. 8:24.

16. Ino nceebonshi tulaakuyandika kutondesha lusuno abuumbi ku bamakwesu abenankashi paciindi ca mapensho anene? (Amubone acikope.)

¹⁶ Tulaakuyandika kutondesha lusuno abuumbi kubamakwesu abenankashi paciindi ca mapensho anene. Ino Yehova alaakutushitilisha buyani na mapensho anene akatalike? Amuyeeye Yehova nshaakalwiita bantu bakwe, bene Babiloni ndyebakabalwana. Wakalwiita bantu bakwe ayi: ‘Kamuya nobene misheesu, amunjile mumaanda anu, amulicalile mushipinda shanu shamukati, kushikila bukali bwakwe Lesa bwiinde.’ (Isa. 26:20) Mpashi andiswe tulaakuyandika kukonkela butanjilishi ubu paciindi ca mapensho anene. “Shipinda shamukati” mpashi shilemikaninaako mabungano motubete. Na mapensho anene akatalike, Yehova watushomesha ayi alaakutushitilisha na tukatolelele kumusebensela pomwi abamakwesu abenankashi. Aboobo tulyeelete kusebensa cankusu kwaamba ayi tubasune abuumbi bamakwesu abenankashi. Kusuna bamakwesu abenankashi mpashi nkweshi kukape kwaamba ayi tukapuluke!

17. Ino nshiinshi nsheshi tukacikonshe kucita paciindi ca mapensho anene na twalibambilila limwi pacecino ciindi?

¹⁷ ‘Bushiku bunene bwakwe Yehova’ bulaakupa kwaamba ayi shintu shiyume abuumbi kubantu boonse. (Sefa. 1:14, 15) Bantu bakwe Yehova abalo balaakwiinda mumapensho amwi. Sombi na twalibambilila limwi pacecino ciindi, tulaakucikonsha kukalika moyo alimwi akucafwako bamwi. Tulaakucikonsha kuliyumya mumapensho ali oonse ngeshi tukeendeemo. Na bamakwesu abenankashi bakapenge, tulaakubatondesha nkumbu kwiinda mukucita nsheenga twacikonsha kwaamba ayi tukabape nsheshi bakanoyandika. Na tweeya kutondesha lusuno kubamakwesu abenankashi pacecino ciindi, tulaakutolelela kubatondesha lusuno apaciindi ca mapensho anene. Lyalo Yehova alaakutupa buumi butamaani, mucishi umo mweshi tukabule kuyeeyawo pa mapensho acitika cakuteengashila nabi mapensho amwi.​—Isa. 65:17.