1-2. (a) Ino nciinshi Yesu ncaakacenjesha bashikwiiya bakwe? (b) Ino nceebonshi bashikwiiya bakamushiya Yesu ? (Amubone ashikope.)

 “MOYO walo ulisuni, sombi mubili ngowabula nkusu.” a (Mate. 26:41b) Yesu ndyaakaamba maswi aya wakatondesha ayi alanyumfwishisha ayi tatumaninite alimwi inga twaciita shilubo. Sombi alimwi ndyaakaamba maswi aya wakalinga kusuni kutucenjesha ayi tulyeelete kuleya kulishoma. Pabushiku bweenka ubu mashiku, bashikwiiya bakwe bakaamba cakushinisha ayi teshi bakamushiyeewo Mwaami wabo. (Mate. 26:35) Bakalinga kusuni kucita cintu ciluleme. Sombi tabana kushiba ayi na baba mubukaalo buyumu, inga caba cuubu kwaalilwa kucita ciluleme lyalo akucita cintu citaluleme. Aboobo Yesu wakabacenjesha ayi: ‘Amwikale kamulibambite, akutolelela kupaila kwaamba ayi mutanjili mumasunko.’—Mate. 26:41a.

² Cakabicaako ncakwaamba ayi bashikwiiya bakwe Yesu bakaalilwa kwikala kabalibambite. Sa Yesu ndyebakamucata bakatolelela kuba anguwe na bakaloonda akucica? Mukwiinga tabakwe kutolelela kuba balibambite, bakamushiya Yesu nabi kwaamba ayi bakalinga baamba ayi teshi bakamushiyeewo.—Mate. 26:56.

3. (a) Ino nceebonshi tulyeelete kuleya kulishoma kwaamba ayi tutolelele kushomeka kuli Yehova? (b) Ino tutokwiiya nshi mumutwi uyu?

³ Tulyeelete kuleya kulishoma. Ncakwiila kwaamba ayi tulishinishite kutacita cili coonse ceenga cakalasha Yehova. Nacibi boobo, tatumaninite alimwi ncuubu kweeleshekwa kucita shintu shitabete kabotu. (Loma. 5:12; 7:​21-23) Cakuteengashila, inga tweeleshekwa kucita cintu citabete kabotu. Kwaamba ayi tutolelele  kushomeka kuli Yehova aku Mwanaakwe, tulayandika kukonkela kululika kwakwe Yesu kwakuba balibambite kukaka na tweeleshekwa kucita cibiibi. Mutwi uyu inga watucafwa kucita boobo. Cakutaanguna, tutobandika pabukaalo mbotweelete kuba balibambite bunene kukaka meelesho. Lyalo tutobandika nsheenga twaciita kwaamba ayi tube balibambite kukaka meelesho. Mukweelaako, tutobandika mbweenga twatolelela kuba balibambite.

AMUCENJELE KUSHINTU SHIMWEELESHA BUNENE

4-5. Ino nceebonshi cilayandika kuleya kucita shilubo nabibo shiniini?

⁴ Shilubo shimwi shilaba shiniini, sombi inga shapa kwaamba ayi tutabi abushicibusa buyumu a Yehova. Alimwi inga shapa kwaamba ayi tucite shilubo shinene.

⁵ Soonse tuleeleshekwa kucita shibiibi. Sombi soonse kuli shintu shimwi nshotutaciti kabotu. Aboobo shintu shimwi shinanootupa kweeleshekwa abuumbi kucita shibiibi. Kucakubonenaako, mpashi muntu umwi inga kaeelesha kukoma bweelesho bwakucita cilubo cinene mbuli bufuule. Umwi inga kaeelesha kukoma cilabo cibiibi mbuli kulisekanya kubusankwa na kubwanakashi na kweebela shintu shileta miyeeyo yakoonana. Lyalo umwi inga kaacite lipenshi lyakuloonda bantu, kulisumpula, kufwambaana kukalala, na lipenshi limwi. Ncoceeco Jemusi ncaakaambila ayi “muntu woonse ulasunkwa na wayungoolwa akucenjeekwa alunkumbwa lwakwe mwiine.”—Jemu. 1:14.

6. Ino nshiinshi nshotweelete kushiba kabotu?

⁶ Sa mulicishi shintu shimupa kweeleshekwa bunene? Ncibiibi abuumbi kusuula shintu nshotutaciti kabotu na kuyeeya ayi inga twacikonsha kuleya kubisha. (1 Joni 1:8) Na mutokwiibaluka, Paulo wakaamba ayi nabi ‘abo batanjililwa amushimu’ na bashimpite lwakumushimu, inga beeleshekwa na babula kutolelela kuba balibambite. (Gala. 6:1) Tulyeelete kulishiba kabotu akusumina ayi kuli shintu shimwi nshotutaciti kabotu.—2 Koli. 13:5.

7. Ino nshiinshi nshotweelete kubikilako bunene maano? Amwaambe cakubonenaako.

⁷ Ino nshiinshi nshotweelete kucita na twashiiba shintu shitupa kweeleshekwa bunene? Atusebense cankusu kwaamba ayi tunoocikonsha kukaka meelesho ayo! Kucakubonenaako, muciindi camu Baibo, lubasu lwa ndabala lwatakalinga kuba luyumu bunene ngu mwinjililo. Aboobo paminjililo pakalinga kuba balindilishi baanji kwaamba ayi bashitilishe ndabala. Aswebo tulayandika kubikila bunene maano kushintu nshotutaciti kabotu kwaamba ayi tucikoonshe kukaka meelesho.—1 Koli. 9:27.

 NSHEENGA TWACIITA KWAAMBA AYI TUKAKE MEELESHO AKUBISHA

8-9. Ino nshiinshi musankwa wacanike waambwa mu Tushimpi capita 7 nshaakalinga kweelete kucita kwaamba ayi aleye kucita cilubo cinene? (Tushimpi 7:​8, 9, 13, 14, 21)

⁸ Ino nshiinshi nsheenga twaciita kwaamba ayi tukake meelesho akubisha? Amuleke tubandike nsheenga tweeya kumusankwa wacanike waambwa mu Tushimpi capita 7. Wakacita bulale amwanakashi mufuule. Vesi 22 ilatulwiita ayi musankwa wacanike wakaya kuli nguwe ‘cakuteengashila.’ Kweelana amavesi akwisule lya vesi 22 mbwaatondesha, wakasalawo kucita shintu shimwi shitabete kabotu isho shakapa kwaamba ayi mukuya kwaciindi abishe.

⁹ Ino nshiinshi nshaakacita shakapa kwaamba ayi abishe? Cakutaanguna, ‘wakeenda pafwiifwi a ŋanda ya mwanakashi [mufuule]’ macolesha. Lyalo wakaya paŋanda yakwe. (Amubelenge Tushimpi 7:​8, 9.) Alimwi ndyaakamubona mwanakashi, taakwe kuya kumwi. Muciindi cakucita boobo, wakasumina kumufyonta alimwi wakatalika kumukutika ndyaakalinga kwaamba pamilambu ya bwanabwankashi njaakabenga, mpashi kwaamba ayi ape musankwa wacanike kuyeeya ayi ngumuntu uli kabotu. (Amubelenge Tushimpi 7:​13, 14, 21.) Naakwiinga musankwa wacanike taakwe kusalawo kucita shintu shoonse ishi shitabete kabotu, naakwiinga taakwe kweeleshekwa lyalo akubisha.

10. Ino nshiinshi sheenga shapa kwaamba ayi muntu acite cilubo bweenka mbuli musankwa wacanike waambwa mu Tushimpi?

¹⁰ Makani aya alatondesha sheenga shacitika kumusebenshi wakwe Yehova uli woonse. Inga wacita cilubo cinene lyalo pesule watalika kulinyumfwa ayi cakacitikabo ‘cakuteengashila.’ Na mpashi inga waamba ayi, “Nshicishiiwo mbocakacitika.” Sombi na wayeeyawo kabotu pashakacitika, inga wesa mukushiba ayi kuli shintu shimwi shitabete kabotu nshaakasalawo kucita shakapa kwaamba ayi abishe. Mpashi wakasalawo kuba bushicibusa abantu batabete kabotu, kusala shakulikondelesha shitabete kabotu, kuya pama webusaiti atabete kabotu, nabi kuya mumisena itabete kabotu ku Mwineklistu. Alimwi mpashi wakalinga wacileka kupaila, kubelenga Baibo, kucanika kumabungano akwaabanamo lubasu muncito yakushimikila. Bweenka mbuli musankwa wacanike waambwa mu Tushimpi, mpashi taakwe kucita cilubo ‘cakuteengashila,’ sombi wakacita boobo pesule lya kusalaawo kucita shintu shiinji shitabete kabotu.

11. Ino nshiinshi nshotweelete kucita kwaamba ayi tutaciti cilubo?

¹¹ Ino nciiyo nshi ncotutokwiiyaawo? Tatweelete kuleyabo kucita cilubo, sombi ashintu sheenga shapa kwaamba ayi tubishe. Ishi Solomoni nshaakaamba pesulebo lyakwaamba shakacitika kumusankwa wacanike amwanakashi mufuule. Wakatucenjesha ayi: “Mutalubili munshila shakwe.” (Tus. 7:25) Alimwi wakeelikaawo akwaamba ayi: “Mwanakashi wa mushobo uyo mumusoonoke. Mutakeeleshi kuya kufwaafwi aŋanda yakwe.” (Tus. 5:​3, 8) Kwaamba ayi tuleye kucita cilubo, tulyeelete kuleya shintu abukaalo sheenga shapa kwaamba ayi tubishe. b Ici cilaamba ayi nabi kwaamba ayi cintu cimwi inga kacilibo kabotu ku Mwineklistu, inga tatuciti cintu ico na katucishi ayi inga catweelesha akupa kwaamba ayi tubishe.—Mate. 5:​29, 30.

12. Ino nciinshi Jobo ncaakalinga kushinishite kucita, alimwi ino cakamucafwa buyani kuba ulibambite kukaka meelesho? (Jobo 31:1)

¹² Kwaamba ayi tucikoonshe kuleya bukaalo bweenga bwatupa kubisha, tulayandika kushinisha kusalawo kucita cintu ceenga catucafwa kuba balibambite kukaka meelesho. Ishi Jobo nshaakacita. ‘Wakapangana cipangano ameenso [akwe]’ kwaamba ayi teshi akalangilishewo mwanakashi calunkumbwa. (Amubelenge Jobo 31:1.) Kuba ushinishite kukonkela nshaakasalawo  kucita, kwakalinga kumucafwa kuleya kucita bulale. Andiswe inga twaba bashinishite kuleya kucita cintu cili coonse mpashi ceenga capa kwaamba ayi tweeleshekwe.

13. Ino nceebonshi tulyeelete kulama miyeeyo yesu? (Amubone ashikope.)

¹³ Alimwi tulyeelete kulama miyeeyo yesu. (Kulo. 20:17) Bamwi balayeeya ayi kuyeeyabo kucita cintu citabete kabotu kulibo kabotu, mukwiinga tabatoocita cintu ico. Sombi kuyeeya kwa mushobo uyu takubete kabotu. Muntu utolelela kuyeeya pacintu citabete kabotu, alaakusunishisha kucicita. Cilababo anga walipangila bweelesho mbwaeelete kukaka. Kwalo, cimwi ciindi inga twatalika kuyeeya kucita shintu shitabete kabotu. Sombi ciyandika nkucileka kuyeeya pashintu isho peenkaapo akutalika kuyeeya pashintu shili kabotu. Na twacita boobo, tulalishitilisha kukucita cilubo cinene mukwiinga tatuna kusuminisha miyeeyo itabete kabotu kupa kwaamba ayi tusunishishe kubisha.—Filip. 4:8; Kolo. 3:2; Jemu. 1:​13-15.

14. Ino nciinshi cimwi ceenga catucafwa kwaamba ayi tube balibambite kukaka meelesho?

¹⁴ Ino nciinshi cimwi nceenga twaciita kwaamba ayi tube balibambite kukaka meelesho? Tulayandika kushoma cakutatoonsha ayi lyoonsebo tulafubilaamo na katukonkela milawo yakwe Yehova. Cimwi ciindi inga catubeta ciyumu kuleya lunkumbwa lutabete kabotu. Sombi na tweelesha cankusu kucita boobo, tulaakuba alusangalalo lwancinencine.

15. Ino kwiiya kuleya lunkumbwa lutabete kabotu kulaakutucafwa buyani kuba balibambite kukaka meelesho?

¹⁵ Na tweeya kuleya lunkumbwa lutabete kabotu, ‘tulaakupata bubi akusuna shintu shibotu.’ Lyalo kucita boobo kulaakutucafwa kuba bashinishite kucita shintu shiluleme akuleya bukaalo bweenga bwapa kwaamba ayi tubishe. (Amosi 5:15) Na cakuteengashila twalicana mubukaalo mbotwatalinga kulangila na mbweenga tatuleyi, kuleya lunkumbwa lutabete kabotu kulaakutucafwa kuba bashinishite kukaka meelesho.

16. Ino kucita shintu shakumushimu inga kwatucafwa buyani kuba balibambite kukaka meelesho? (Amubone ashikope.)

¹⁶ Ino inga twacita buyani kwaamba ayi twiiye kuleya lunkumbwa lutabete kabotu? Tulyeelete kubikila maano kukucita shintu sheenga  shayumya lusuno lwesu pali Yehova. Na tuli kumabungano nabi muncito yakushimikila, tulayumya lusuno lwesu lwakusuna kusangalasha Yehova alimwi tatweeleshekwi kucita shintu shitabete kabotu. (Mate. 28:​19, 20; Ebu. 10:​24, 25) Na katubelenga akwiiya Maswi akwe Lesa lyalo akukutumana kuyeeyawo, tulayumya lusuno lwesu lwakucita shiluleme akupata shibiibi abuumbi. (Joshu. 1:8; Kulu. 1:​2, 3; 119:​97, 101) Mutaluubi kwaamba ayi Yesu wakalwiita bashikwiiya bakwe ayi: ‘Amutolelele kupaila kwaamba ayi mutanjili mumasunko.’ (Mate. 26:41) Na katucana ciindi cakupaila kuli Ishiwesu wakwiculu, tulamupa coolwe ca kutucafwa akuba bashinishite kucita shimusangalasha.—Jemu. 4:8.

MBWEENGA TWATOLELELA KUBA BALIBAMBITE

17. Ino ndipenshi nshi Pita ndyaakatolelela kweelesha kukoma?

¹⁷ Mpashi inga twacilekelela kucita shintu shimwi nshotutaciti kabotu. Sombi mpashi inga catubeta ciyumu kucileka kucita shintu shimwi. Amuyeeye shakacitikila mutumwi Pita. Ceebo cakuloonda bantu, wakakaka Yesu mankanda otatwe. (Mate. 26:​69-75) Ndipakeenda ciindi, cakaboneka anga Pita wacileka kuloonda bantu mukwiinga wakashimikila cakutaloonda pali Yesu kubaabo bakalinga mu kooti ya Sanihedilini. (Milimo 5:​27-29) Nacibi boobo, ndipakeenda myaaka iinji, wakalinga wacileka kulita pomwi a Beneklistu baswamashi kwakaciindi ceebo ca “kuloonda baabo bakalinga kusuni ayi baswamashi bakunsengwe banoopalulwa.” (Gala. 2:​11, 12) Pita wakaloonda bantu alimwi. Mpashi taakwe kucilekelela kuloonda bantu.

18. Ino nshiinshi sheenga shacitika kushintu nshotutaciti kabotu mpashi nshotuyeeya ayi shakamana?

¹⁸ Bweenka mbuli Pita, mpashi aswebo inga twayandika kweelesha kucileka cintu cimwi ncotutaciti kabotu mpashi nceenga katuyeeya ayi cakamana. Kucakubonenaako, mukwesu umwi wakaamba ayi: “Ndakacileka kweebela shintu shileta miyeeyo yakoonana kwamyaaka 10 alimwi ndakashoma cakutatoonsha ayi lipenshi ili lyamana. Sombi anu lipenshi ili lyakalingabo anga ncinyama cikali ciyubite alimwi citolindilabo ciindi ceelete cakucata cintu cimwi.” Cakabotaako ncakwaamba ayi mukwesu uyu wakatolelela kweelesha kukoma lipenshi ili. Wakashiba ayi wakalinga kuyandika kunoocitawo comwi bushiku abushiku kwaamba ayi akome lipenshi  ili alimwi ayi mpashi kucita boobo kwabuumi bwakwe boonse mucishi cino cibiibi. Kwiinda mulucafwo lwa bakaakwe abamanene mulibungano, wakasalawo kucita shintu shakamucafwa kuba ushinishite kuleya kweebela shintu shileta miyeeyo yakoonana.

19. Ino nshiinshi nsheenga twaciita na kucili lipenshi ndyetutokweelesha kukoma?

¹⁹ Ino inga twacita buyani kwaamba ayi lipenshi ndyetutokweelesha kukoma litatupi kucita cilubo? Tulyeelete kucita Yesu nshaakatulwiita ayi: ‘Amwikale kamulibambite,’ nkokwaamba ayi kuba balibambite kukaka meelesho. Nabi ndyemutolinyumfwa ayi inga mwacikonsha kukoma bweelesho buli boonse, amutolelele kuleya kulicana mubukaalo bweenga bwapa kwaamba ayi mweeleshekwe. (1 Koli. 10:12) Amutolelele kucita shintu shakamucafwa kukoma lipenshi ilyo. “Amusebense cankusu” kwaamba ayi lyoonse munooba balibambite kukaka meelesho.—2 Pit. 3:14.

SHOOLWE NSHEENGA TWACAANA NA TWATOLELELA KUBA BALIBAMBITE

20-21. (a) Ino nshoolwe nshi nsheshi tukacane na twatolelela kuba balibambite kukaka meelesho? (b) Ino nshiinshi Yehova nsheshi akatucitile na twacita lubasu lwesu? (2 Bene Kolinto 4:7)

²⁰ Inga twashoma cakutatoonsha ayi lyoonse mulaswa shibotu na twatolelela kuba balibambite kukaka meelesho. Tulaakuba alusangalalo na katukonkela milawo yakwe Yehova kwiinda “kusangalalila mububi kwaciindi ciniini.” (Ebu. 11:25; Kulu. 19:8) Ino nceebonshi? Nceebo cakwaamba ayi twakalengwa munshila yakwaamba ayi tunomunyumfwila. (Mata. 1:27) Aboobo tulaakuba anjeelacaamba isalalite akulangila kutambula buumi butamaani.—1 Timo. 6:12; 2 Timo. 1:3; Judi 20, 21.

²¹ Cancine ncakwaamba ayi ‘mubili ngootacite nkusu.’ Sombi ici tacaambi ayi taakuwo nsheenga twaciita pashintu nshotutaciti kabotu. Yehova alilibambite kutupa nkusu nshetuyandika. (Amubelenge 2 Bene Kolinto 4:7.) Lesa alatupa nkusu shiindaawo nshetucite. Sombi tulyeelete kutaanguna kucita nsheenga twacikonsha kwaamba ayi tukome bweelesho. Na twacita lubasu lwesu, inga twashoma cakutatoonsha ayi Lesa alaakutupa nkusu shiindaawo nshetucite ndyetutoyandika lucafwo lwakwe. (1 Koli. 10:13) Ncakwiila kwiinda mulucafwo lwakwe Yehova, inga twacikonsha kuba balibambite kukaka meelesho.