1-2. Ino Sadoki wakalinga ngani? (1 Makani 12:​22, 26-28)

 AMUYEEYE pa likoto lya basankwa beendilila 340,000 bakabungana. Bakalinga kusuni kwaamba ayi Defedi abe Mwaami wa bene Isilaeli boonse. Bakekala mutulundu kwanshiku shotatwe kufwiifwi aku Ebuloni. Bakalinga kuseka, kubandika, akwiimba nyimbo shakulumbaisha Yehova. (1 Maka. 12:39) Palikoto ili pakalinga amusankwa wacanike waliina lya Sadoki. Bantu baanji balyeelete tabakwe kushiba ayi mpwaali. Nacibi boobo, Yehova wakashinisha kwaamba ayi tushibe ayi Sadoki mpwaakalinga. (Amubelenge 1 Makani 12:​22, 26-28.) Ino Sadoki wakalinga ngani?

² Sadoki wakalinga mupailishi wakalinga kusebensa bunene pomwi a Abyata Mupailishi Munene. Alimwi Yehova wakapa Sadoki busongo abuumbi akumucafwa kunoonyumfwishisha kuyanda kwakwe Lesa. (2 Samwe. 15:27) Bantu bakalinga kusenga lucafwo kuli Sadoki na kabayandika kululikwa kwa busongo. Alimwi wakalinga musankwa utaloondi. Mumutwi uyu, tutokwiiya Sadoki mbwaakatondesha kutaloonda.

3. (a) Ino nceebonshi basebenshi bakwe Yehova balayandika kuba bataloondi? (b) Ino tutokwiiya nshi mumutwi uyu?

³ Munshiku shino shakweelaako, Satana weendaawo kweelesha kunyonyoola lushomo lwesu muli Yehova. (1 Pit. 5:8) Aboobo tulayandika kuba bataloondi ndyetutolindila kwaamba ayi Yehova anyonyoole Satana acishi cakwe cibiibi. (Kulu. 31:24) Amuleke tubandike pa nshila shotatwe mbweenga twakonkela cakubonenaako cakwe Sadoki cakuba bataloondi.

AMUBE KULUBASU LWA BWAAMI BWAKWE LESA

4. Ino nceebonshi basebenshi bakwe Yehova balayandika kutaloonda kwaamba ayi batondeshe ayi bali kulubasu lwa Bwaami bwakwe? (Amubone acikope.)

⁴ Mbuli bantu bakwe Yehova, tulatondesha ayi tuli kulubasu lwa Bwaami bwakwe amoyo woonse, sombi liinji tulayandika kutaloonda kwaamba ayi tucite boobo. (Mate. 6:33) Kucakubonenaako, mucishi cino cibiibi, tulayandika kutaloonda kwaamba ayi tunokonkela  milawo yakwe Yehova akushimikila makani abotu a Bwaami. (1 Tesa. 2:2) Kwiilikaawo, bantu baanji mucishi beendawo kuba batacatene ceebo ca shamapolitiki. Aboobo tulayandika kutaloonda kwaamba ayi tutaabanimo lubasu mushamapolitiki. (Joni 18:36) Basebenshi bakwe Yehova baanji baleenda mulipenshi lyakubula maali na kuumwa nabi kwaangwa, ceebo cakukaka kwaabanamo lubasu mushamapolitiki nabi kukaka kuba basoja.

5. Ino nceebonshi Sadoki wakalinga kuyandika kutaloonda kwaamba ayi atondeshe ayi ali kulubasu lwakwe Defedi?

⁵ Sadoki taakwe kuyabo ku Ebuloni kwaamba ayi aabanemo lubasu mukusekelela kwa kubika Defedi pa Bwaami. Wakanyamuna ashakulwanisha alimwi wakalinga kulibambite kulwana. (1 Maka. 12:38) Wakalinga kulibambite kuya a Defedi ku nkoondo akushitilisha bene Isilaeli kubalwani babo. Mpashi Sadoki taakalinga shilumamba ucishi kabotu kulwana. Sombi wakalinga musankwa utaloondi abuumbi.

6. Ino Defedi wakatondesha buyani cakubonenaako cibotu cakutaloonda ico Sadoki ncaakakonkela? (Kulumbaisha 138:3)

⁶ Ino nciinshi cakacafwa mupailishi Sadoki kuba utaloondi abuumbi? Wakalinga kushi basankwa baanji bakalinga bayumu alimwi bataloondi. Ncakutatoonsha kwaamba ayi wakakonkela cakubonenaako cabo. Kucakubonenaako, mukwiinga Defedi wakalinga mutanjilili alimwi shilumamba utaloondi, bene Isilaeli boonse bakalinga kusuni kwaamba ayi abe mwaami wabo. (1 Maka. 11:​1, 2) Lyoonse Defedi wakalinga kucinka manungo muli Yehova kwaamba ayi amucaafwe kukoma balwani bakwe. (Kulu. 28:7; amubelenge Kulumbaisha 138:3.) Alimwi Sadoki wakeeya kuba utaloondi kuswa kubasankwa bakalinga bataloondi mbuli Jeoiyada a Benaya mwanaakwe uyo wakalinga shilumamba, kwiilikaawo abamatanjilili ba mikowa bali 22 abo bakalinga kucafwa Defedi. (1 Maka. 11:​22-25; 12:​26-28) Basankwa boonse aba bakalinga kushinishite kwaamba ayi Defedi abe mwaami wabo akumushitilisha.

7. (a) Ino nshakubonenaako nshi sha munshiku shino sha bantu bakatondesha kutaloonda nsheenga twakonkela? (b) Kweelana avidyo, ino nshiinshi nshomweeya kuswa kucakubonenaako ca Mukwesu Nsilu?

⁷ Na twayeeya bamwi mbobakatondesha kutaloonda kwaamba ayi batolelele kushomeka kuli  Yehova aku Bwaami bwakwe, aswebo tulayuminishikwa kuba bataloondi. Mwaami wesu Klistu Yesu ndyaakalinga pacishi, wakakaka cakushinisha kwaabanamo lubasu mushamapolitiki mucishi cino cakwe Satana. (Mate. 4:​8-11; Joni 6:​14, 15) Lyoonse wakalinga kucinka manungo muli Yehova kwaamba ayi amucaafwe kucita ciluleme. Alimwi kuli shakubonenaako shiinji sha basankwa bacanike bamunshiku shino abo bakaka kunjila busoja nabi kwaabanamo lubasu mushamapolitiki. Tutomuyuminisha kwaamba ayi mubelenge makani aamba pa shakabacitikila acanika pa jw.org. a

AMUCAFWE BASHOMINYINAANU

8. Ino ndilili mpashi bamanene ndyeenga bayandika kutondesha kutaloonda kwaamba ayi bacafwe bamakwesu abenankashi?

⁸ Bantu bakwe Yehova balisunishishi kunoocafwana. (2 Koli. 8:4) Nacibi boobo, cimwi ciindi balayandika kutaloonda kwaamba ayi bacite boobo. Kucakubonenaako, na kwabuka nkondo, bamanene bakumusena uko balashiba ayi bamakwesu abenankashi batoyandika kuyuminishikwa alimwi mpashi akucafwikwa lwakumushimu alwakumubili. Bamanene balibasuni bamakwesu abenankashi. Aboobo balabapa nshebayandika nabi kwaamba ayi kucita boobo inga kwabika buumi bwabo mumapensho. (Joni 15:​12, 13) Na bacita boobo balakonkela cakubonenaako cakwe Sadoki cakutaloonda.

9. Kweelana a 2 Samwelo 15:​27-29, ino nciinshi Defedi ncaakalwiita Sadoki kucita? (Amubone acikope.)

⁹ Buumi bwakwe Defedi bwakalinga mumapensho. Abusalomu mwanaakwe Defedi wakalinga kusuni kucaya baishi kwaamba ayi lakwe abe mwaami. (2 Samwe. 15:​12, 13) Defedi wakalinga kweelete kuswa mu Jelusalemu peenkaapo! Wakalwiita basebenshi bakwe muliswi lyapeculu ayi: “Tulyeelete kuloboka bulya bweenka kwaamba ayi Abusalomu atatucaniiko. Atweendeshe mukwiinga inga washika coonoono mukukoma akucaya bali mundabala inene ino boonse!” (2 Samwe. 15:14) Basebenshi bakwe ndyebakalinga kuswa mu Jelusalemu, Defedi wakashiba ayi umwi wakalinga kweelete kucaala mundabala kwaamba  ayi anoomulwiita Abusalomu nshaatoyeeya kucita. Aboobo wakatuma Sadoki abapailishi bamwi kuboolela mundabala kwaamba ayi banomulwiita Abusalomu nshaatoyeeya kucita. (Amubelenge 2 Samwelo 15:​27-29.) Bakalinga kweelete kucenjela abuumbi. Defedi ncaakalwiita bapailishi aba kucita cakalinga cintu ciloondesha alimwi naakwiinga cakabika buumi bwabo mumapensho. Abusalomu wakalinga shinkondo alimwi ulisuni uyo wakapondokela baishi bakamushala. Amuyeeyebo nshaakalinga kweelete kucita kuli Sadoki abapailishi bamwi naakwiinga wakashiba ayi batoobona nshaatoocita kwaamba ayi bashitilishe Defedi!

10. Ino nshiinshi Sadoki ambaakalingaabo nshobakacita kwaamba ayi bashitilishe Defedi?

¹⁰ Defedi wakasenga Sadoki a Ushayi shicibusa wakwe ushomeka, kwaamba ayi bamucaafwe kukumanisha cintu cimwi ncaakalinga kuyeeya kucita. (2 Samwe. 15:​32-37) Kwaamba ayi muyeeyo uyo uswitilile, Ushayi wakalinga kweelete kucita anga ali kulubasu lwakwe Abusalomu akunomulwiitako mbweenga walwana Defedi, ico cakalinga kusa mukupa kwaamba ayi Defedi abe aciindi cakulibambila kulwana. Abusalomu ndyaakakutika Ushayi nshaakaamba, Ushayi wakalwiita Sadoki a Abyata shakacitika. (2 Samwe. 17:​8-16) Lyalo Sadoki a Abyata bakacikonsha kulwiita Defedi, Abusalomu nshaakalinga kuyeeya kucita. (2 Samwe. 17:17) Kwiinda mulucafwo lwakwe Yehova, Sadoki abapailishi bamwi bakacikonsha kushitilisha Defedi kwaamba ayi atacaikwi.—2 Samwe. 17:​21, 22.

11. Ino cakubonenaako cakwe Sadoki cakutaloonda inga twacikonkela buyani ndyetutocafwa bashominyineesu?

¹¹ Ino inga twatondesha buyani kutaloonda bweenka mbuli Sadoki na buumi bwa bamakwesu abenankashi buli mumapensho lyalo twasengwa kwaamba ayi tubacaafwe? (1) Amukonkele butanjilishi. Ndyetuli mubukaalo bwa mushobo uyo, cilayandika abuumbi kwaamba ayi twatolelela kuba bacatene. Amukonkele butanjilishi butooswa ku ofesi yamusampi yamucishi momukala. (Ebu. 13:17) Ciindi aciindi bamanene balyeelete kunokwiinduluka mubutanjilishi bwaamba pa mbweenga twalibambila mapensho akuteengashila ansheenga twaciita na acitika. (1 Koli. 14:​33, 40) (2) Amube bataloondi sombi bacenjete. (Tus. 22:3) Amuyeeyewo kamutana kucita  shintu. Amucite nsheenga mwacikonsha kwaamba ayi mulishitilishe. (3) Amucinke manungo muli Yehova. Munookwiibaluka ayi Yehova alisunishishi kwaamba ayi mwebo abashominyinaanu mushitilishikwe. Inga wamucafwa kwaamba ayi mucikoonshe kucafwa bashominyinaanu kwakubula kulicana mulipenshi.

12-13. Ino nshiinshi nshomweeya kushakacitikila ba Viktor aba Vitalii? (Amubone acikope.)

¹² Amuyeeye pacakubonenaako caba Viktor aba Vitalii, bamanene bobilo bakasebensela pomwi kupa shakulya amaanshi kubashominyinaabo ku Ukraine. Ba Viktor bakaamba ayi: “Twakalinga kulangoola shakulya kuli koonse nkweenga twashicana. Liinji twakalinga kunyumfwa mafuti kaalila pafwiifwi andiswe. Mukwesu umwi wakaaba shakulya shimwi nshaakalinga wasunga. Shakulya nshakaaba shakapa kwaamba ayi beshikushimikila baanji babe anshobakalinga kuyandika kwaamba ayi batolelele kuba abuumi kwakaciindi. Ndyetwakalinga kulongela shakulya, boomu yakaloka pafwiifwi a mamita 20 kuswa mpotwakalinga, sombi cakabota ncakwaamba ayi taina kulila. Bushiku boonse ndakalinga kupaila kuli Yehova kumusenga ayi ancaafwe kutaloonda kwaamba ayi ntolelele kucafwa beshikushimikila.”

¹³ Ba Vitalii bakaamba ayi: “Ndakalinga kuyandika mubo wakutaloonda abuumbi. Lweendo lwakutaanguna ndakeenda kwa mawoola 12. Ndakalinga kuya cipailabo kuli Yehova nshila yoonse.” Ba Vitalii bakatondesha kutaloonda sombi alimwi bakalinga kucenjete. Bakeelikaawo akwaamba ayi: “Ndakatolelela kusenga Yehova kwaamba ayi ampe busongo akushiba nsheenga ndacikonsha kucita. Ndakalinga kwiindabo amotoka munshila shakasuminishikwa amfulumeende. Lushomo lwangu lwakayuminaako ndyendakabona bamakwesu abenankashi mbobakalinga kusebensela pomwi. Bakalinga kubotesha munshila kwiinda mukukushamo shili shoonse shiliimo, kubwesa akulongela shakulya, shakufwala ashintu shimwi shiyandika mumotoka akupa ba Viktor andime shakulya akwakoona ndyetwakalinga palweendo.”

AMUTOLELELE KUSHOMEKA KULI YEHOVA

14. Ino inga twalinyumfwa buyani na muntu umwi ngotusuni wacileka kusebensela Yehova?

¹⁴ Lipenshi lyomwi liyumu abuumbi ndyeenga tweendaamo nciindi na shikamukowa nabi shicibusa ngotunyumfwanaakwe abuumbi wacileka kusebensela Yehova. (Kulu. 78:40; Tus. 24:10) Na muntu uyo kamumusuni abuumbi, cilaba ciyumu abuumbi kuliyumya mubukaalo ubu. Na cintu camushobo uyu cicisa kumoyo cakamucitikilawo kale, cakubonenaako cakwe Sadoki cakushomeka inga camuyuminisha.

15. Ino nceebonshi Sadoki wakalinga kuyandika kutaloonda kwaamba ayi atolelele kushomeka kuli Yehova? (1 Baami 1:​5-8)

¹⁵ Sadoki wakatolelela kushomeka kuli Yehova Abyata shicibusa wakwe ngwakalinga kunyumfwanaakwe abuumbi ndyaakacileka kushomeka. Ishi shakacitika kumamanino abweendeleshi bwakwe Defedi. Defedi ndyaakacembela alimwi kaali pafwiifwi akufwa, Adonija mwanaakwe wakeelesha kulibika pa bwaami nabi kwaamba ayi Yehova wakalinga kusuni ayi Solomoni abe nguwe mwaami. (1 Maka. 22:​9, 10) Abyata wakasalawo kuba kulubasu lwakwe Adonija. (Amubelenge 1 Baami 1:​5-8.) Abyata ndyaakacita boobo, taakwe kutondesha kushomeka kuli Defedi akuli Yehova! Amuyeeyebo Sadoki mbwaakalinyumfwa cibiibi akulefuka! Kwamyaaka iindilila 40, lakwe a Abyata bakalinga kusebensa bunene pomwi mbuli bapailishi. (2 Samwe. 8:17) Bakalinga kulama ‘Libokoshi lya Cipangano cakwe Lesa wancine’ pomwi. (2 Samwe. 15:29) Boonse bakalinga kulubasu lwakwe Defedi mbuli mwaami wabo alimwi bakacita shintu shimwi shiinji pomwi muncito yakwe Yehova.—2 Samwe. 19:​11-14.

16. Ino nciinshi mpashi cakacafwa Sadoki kutolelela kushomeka kuli Yehova?

¹⁶ Nabi kwaamba ayi Abyata wakacileka kushomeka kuli Yehova ndyaakasalaawo kupondokela Defedi, Sadoki wakatolelela kushomeka kuli Yehova. Defedi wakatolelela kushoma Sadoki. Adonija ncaakalinga kusuni kucita ndyecakashibikwa, Defedi wakasala Sadoki, Natani a Benaya kwaamba  ayi bananike Solomoni mbuli mwaami. (1 Baam. 1:​32-34) Sadoki alyeelete wakayuminishikwa ceebo cakubona cakubonenaako cibotu ca basebenshi bakwe Yehova mbuli Natani, abo bakalinga kushomeka kuli Yehova akucafwa Mwaami Defedi. (1 Baam. 1:​38, 39) Solomoni ndyaakaba mwaami, “wakabika Sadoki kuba mupailishi pamusena wakwe Abyata.”—1 Baam. 2:35.

17. Ino cakubonenaako cakwe Sadoki inga mwacikonkela buyani na muntu umwi ngomunyumfwanaakwe abuumbi wasalawo kucileka kusebensela Yehova?

¹⁷ Ino cakubonenaako cakwe Sadoki inga mwacikonkela buyani? Na muntu umwi ngomunyumfwanaakwe abuumbi wasalawo kucileka kusebensela Yehova, amutondeshe ayi mulashomeka kuli Yehova. (Joshu. 24:15) Yehova alaakumupa nkusu shakucita ciluleme. Amupaile kuli Yehova akutolelela kuba abushicibusa buyumu abeshicibusa banu abo bashomeka kuli nguwe. Yehova alalumba pakushomeka kwanu alimwi alaakumupa cilambu.—2 Samwe. 22:26.

18. Ino nshiinshi nshomweeya kuswa kushakacitikila ba Marco aba Sidse?

¹⁸ Amuyeeye pacakubonenaako caba Marco aba Sidse bakaabo abo bacite baana banakashi bobilo bakacileka kusebensela Yehova. Ba Marco bakaamba ayi: “Kuswabo bushiku bana bako ndyebashalwa, inga koobasuni abuumbi. Inga wacita cili coonse kwaamba ayi ubashitilishe kucintu ceenga canyonyoola bushicibusa bwabo a Yehova. Aboobo na basalawo kucileka kumusebensela, cilacisa kumoyo abuumbi.” Bakatolelela akwaamba ayi: “Sombi Yehova watolelela kutucafwa kuliyumya. Alashinisha kwaamba ayi na ndamaninwa nkusu, bakaangu balaba bayumu, lyalo na bamaninwa nkusu, nebo ndaba muyumu.” Ba Sidse bakeelikaawo akwaamba ayi: “Naakwiinga Yehova taakwe kutupa nkusu nshotwakalinga kuyandika, naakwiinga tatukwe kucikonsha kuliyumya. Ndakalinga kulinyumfwa cibiibi abuumbi akulipa mulandu ayi ndime ndakalengesha ayi bana bangu bacileeke kusebensela Yehova. Aboobo ndakapaila kuli Yehova akumulwiita mbondakalinga kulinyumfwa. Bushiku bumwi ndyendakalinga kumabungano pesule lya nshiku shiniinibo, nankashi umwi ngondakabonanaakwe kwamyaaka iinji wakesa kuli ndime akuncata pacifushi, lyalo wakandanga kumeenso akundwiita ayi, ‘Ba Sidse, munokwiibaluka ayi teshi ndimwe mwakalengesha!’ Kwiinda mulucafwo lwakwe Yehova, ndacikonsha kutolelela kumusebensela calusangalalo.”

19. Ino nshiinshi nshomushinishite kucita?

¹⁹ Yehova alisuni kwaamba ayi basebenshi bakwe boonse babe bataloondi bweenka mbuli Sadoki. (2 Timo. 1:7) Nacibi boobo, taasuniiwo kwaamba ayi tunoocinka manungo munkusu shesu. Alisuni kwaamba ayi tunoocinka manungo muli nguwe. Aboobo amupaile kuli Yehova na mwalicana mubukaalo mbomutoyandika kutondesha kutaloonda. Inga mwashooma ayi alaakumucafwa kuba bataloondi bweenka Sadoki mbwaakalinga!—1 Pit. 5:10.