1. Ino mulalinyumfwa buyani pacancine ncomwakeeya?

 BANTU bakwe Yehova balicisuni cancine cicanika mu Maswi akwe. Lushomo lwesu luliimfwi pacancine ncotwakeeya mu Baibo. (Loma. 10:17) Tulashoma cakutatoonsha kwaamba ayi Yehova wakabikako libungano lya Bwineklistu ilyo lili “ndyelicinko lya lushinisho alwiimbi lwa ndulo.” (1 Timo. 3:15) Alimwi tulasangalala ‘kunyumfwila baabo batutanjilila’ ndyebatosansulula cancine camu Baibo akutupa butanjilishi butucafwa kucita kuyanda kwakwe Lesa.—Ebu. 13:17.

2. Kweelana a Jemusi 5:​19, ino nciinshi ceenga cacitika pesule lyakwaamba ayi tweeya cancine?

² Nacibi boobo, pesule lyakwiiya cancine akusumina ayi tulayandika kukonkela butanjilishi buswa ku libunga lyakwe Lesa, inga twaswa mucancine na twabula kucenjela. (Amubelenge Jemusi 5:19.) Satana alisunishishi kwaamba ayi tucileeke kushoma Baibo nshoyaamba na butanjilishi mbotutambula kuswa kulibunga lyakwe Lesa.—Efe. 4:14.

3. Ino nceebonshi tulayandika kutolelela kukonkela cancine? (Bene Efeso 6:​13, 14)

³ Amubelenge Bene Efeso 6:​13, 14. Conoonobo Satana alaakupa kwaamba ayi bantu bashome makani akubeca ayo eshi akape kwaamba ayi shishi shoonse shipikishe Yehova. (Ciyu. 16:​13, 14) Alimwi inga twalangila ayi Satana alaakwiindawo kweelesha kubeca bantu bakwe Yehova. (Ciyu. 12:9) Aboobo cilayandika kwaamba ayi tweeya kushiba bupusano buli pacancine amakani akubeca lyalo akukonkela cancine. (Loma. 6:17; 1 Pit. 1:22) Kucita boobo kulayandika kwaamba ayi tukapuluke mapensho anene!

4. Ino tutokwiiya nshi mumutwi uyu?

 ⁴ Mumutwi uyu, tutobandika pamibo yobilo njotweelete kubaayo kwaamba ayi tushibe cancine camu Baibo akusumina butanjilishi buswa kulibunga lyakwe Lesa. Lyalo tutobandika shintu shotatwe nshotweelete kucita kwaamba ayi tutolelele kukonkela cancine.

MIBO NJOTWEELETE KUBAAYO KWAAMBA AYI TUSHIBE CANCINE

5. Ino kuloonda Yehova kulatucafwa buyani kushiba cancine?

⁵ Kuloonda Yehova. Na tweeya kuloonda Yehova munshila yeelete, tulamusuna abuumbi cakwaamba ayi inga tatuciti cili coonse ceenga camukalasha. Tulisunishishi kushiba bupusano buli pakati ka ciluleme acitaluleme alimwi acancine amakani akubeca, kwaamba ayi tusangalashe Yehova. (Tus. 2:​3-6; Ebu. 5:14) Tatweelete kunoloonda bantu abuumbi kwiinda mbotusuni Yehova, mukwiinga shintu shisangalasha bantu liinji nshoshikalasha Yehova.

6. Ino kuloonda bantu kwakapa buyani bamatanjilili bali 10 bamikowa ya bene Isilaeli kwaamba makani akubeca?

⁶ Na katuloonda bantu abuumbi kwiinda mbotuloonda Lesa, inga twatalika kushoma makani akubeca. Amuyeeye pacakubonenaako ca bamatanjilili bamikowa bali 12 abo bakaya mukusensa cishi Yehova ncaakashomesha kupa bene Isilaeli. Basenseshi bali 10 bakaloonda bene Kenani abuumbi kwiinda mbobakalinga kusuni Yehova. Bakalwiita bene Isilaelinyinaabo ayi: “Swebo tatucite nkusu sheelete ayi tubalwaane. Bantu balya balatwiindaawo nkusu.” (Shakube. 13:​27-31) Kweelana abasenseshi aba mbobakalinga kubona, bene Kenani bakalinga kucite nkusu kwiinda bene Isilaeli. Sombi uli woonse wakaamba ayi bene Isilaeli inga tabacikoonshi kukoma balwani babo taakalinga kuyeeya pali Yehova. Basenseshi aba bali 10 bakalinga kweelete kubikila maano kucintu Yehova ncaakalinga kusuni ayi bene Isilaeli bacite. Alimwi bakalinga kweelete kukutumana kuyeeya pashintu Yehova nshaakaswabo  mukubacitila. Lyalo naakwiinga bakashiba ayi bene Kenani tabakalinga kuciteewo nkusu na nkubeelanya kuli Yehova Shinkusu shoonse. Mubupusano abasenseshi aba batakalinga kuciteewo lushomo, Joshuwa a Kalebu bakalinga kusuni kusangalasha Yehova. Aboobo bakalwiita bantu ayi: ‘Na Yehova alikondetwe muli ndiswe, ulaakututola nkomunya uko akutupa cishi muli bubile abulongo bubotu.’—Shakube. 14:​6-9.

7. Ino nciinshi nceenga twaciita kwaamba ayi tunoloonda Yehova abuumbi? (Amubone acikope.)

⁷ Kwaamba ayi tunoloonda Yehova abuumbi, tulayandika kuyeeya pa sheenga shamusangalasha mushintu shoonse nshotusalawo kucita. (Kulu. 16:8) Ndyemutobelenga makani amu Baibo, amuliipushe ayi, ‘Ino naakwiinga ndakacita buyani naakwiinga kaandi mubukaalo bwamushobo uyu?’ Kucakubonenaako, amuyeeye ayi mpomwakalinga bamatanjilili bali 10 bamikowa ya bene Isilaeli ndyebakalinga kwaamba ayi bene Isilaeli inga tabacikoonshi kukoma bene Kenani. Sa naakwiinga mwakashoma makani ngobakaamba lyalo akuloonda bantu, nabi sa naakwiinga kusuna Yehova akusunishisha kumusangalasha kwakamucafwa kutaloonda bantu? Lishalane lyoonse lya bene Isilaeli tabakwe kushoma makani ancine Joshuwa a Kalebu ngobakaamba. Aboobo Yehova taakwe kusuminisha bene Isilaeli abo kunjila mu Cishi Cakashomeshekwa.—Shakube. 14:​10, 22, 23.

8. Ino ngumubo nshi ngotweelete kweelesha cankusu kubaawo alimwi ino nceebonshi?

⁸ Kuliceesha. Yehova alayubulula cancine kubaabo baliceesha. (Mate. 11:25) Twakaliceesha akusumina lucafwo kwaamba ayi twiiye cancine. (Milimo 8:​30, 31) Nacibi boobo, tulyeelete kucenjela kwaamba ayi twaleya kutalika kulisumpula. Na katulisumpula inga twatalika kunobona ayi kuyeeya kwesu kulibo kabotu alimwi kutokweendelana anjiisho shamu Malembo abutanjilishi mbotutambula kuswa kulibunga lyakwe Yehova.

9. Ino nshiinshi nsheenga twaciita kwaamba ayi tutolelele kuba baliceesha?

⁹ Kwaamba ayi tutolelele kuba baliceesha, tulyeelete kunokwiibaluka mbotubete baniini na twalyeelanya kuli Yehova. (Kulu. 8:​3, 4) Alimwi inga twapaila kuli Yehova kwaamba ayi atucaafwe kuba baliceesha akukonkela nshetwiiya. Yehova alaakutucafwa kunobona ayi kuyeeya kwakwe uko nkotwiiya kuswa mu Baibo akulibunga lyakwe, kulayandika abuumbi kwiinda kuyeeya kwesu. Ndyemutobelenga Baibo, amubone bumboni butondesha ayi Yehova alisuni bantu baliceesha alimwi alipatite kulisumpula akulibona ayi tuleendaawo bamwi. Kwiilikaawo, mulyeelete kweelesha cankusu kutolelela kuba baliceesha na mwapekwa mukuli wakutanjilila bamwi na weenga wapa kwaamba ayi mushibikwe abuumbi.

MBWEENGA TWATOLELELA KUKONKELA CANCINE

10. Ino mbaani Yehova mbaakalinga kusebensesha kupa butanjilishi kubantu bakwe alimwi ino alatutanjilila buyani pacecino ciindi?

¹⁰ Amutolelele kushoma butanjilishi buswa kulibunga lyakwe Yehova. Muciindi ca bene Isilaeli, Yehova wakasebensesha Mose lyalo mukuya kwaciindi wakatalika kusebensesha Joshuwa kupa butanjilishi kubantu bakwe. (Joshu. 1:​16, 17) Bene Isilaeli ndyebakalinga kubona basankwa aba ayi batokwiimikaninaako Yehova Lesa, shintu shakalinga kubeendela kabotu. Libungano lya Bwineklistu ndyelyakabaako pesule lya myaaka iinji, batumwi bali 12 mbobakalinga kupa butanjilishi. (Milimo 8:​14, 15) Mukuya kwaciindi, mulikoto ili mwakaba abamanene bamwi bakalinga kukala mu Jelusalemu. Ceebo cakukonkela butanjilishi bwakalinga kuswa kubasankwa aba bashomeka, ‘bantu bamu mabungano bakayuma mulushomo alimwi  bakalinga kufulilaako bushiku abushiku.’ (Milimo 16:​4, 5) Aswebo munshiku shino Yehova alatupa shoolwe na katukonkela butanjilishi buswa kulibunga lyakwe. Ano ino Yehova inga walinyumfwa buyani na twakaaka kukonkela butanjilishi buswa kubasankwa mbaakasala kututanjilila? Kwaamba ayi tucane cikumbulo kumwiipusho uyu, amuleke tubandike shakacitika bene Isilaeli ndyebakalinga kuya ku Cishi Cakashomeshekwa.

11. Ino nshiinshi shakacitikila bene Isilaeli bakapondokela Mose uyo Yehova ngwaakasala kutanjilila bantu bakwe? (Amubone acikope.)

¹¹ Bene Isilaeli ndyebakalinga kuya ku Cishi Cakashomeshekwa, basankwa bakalinga kupukite bakatalika kupikisha Mose akwaamba ayi taakwe kusalwa a Yehova. Bakaamba ayi: “Bantu boonse mulibungano [kuteshibo Mose] balisalalite alimwi Yehova ali pakati kabo.” (Shakube. 16:​1-3, NWT) Nabi kwaamba ayi ncakwiila Yehova wakalinga kubona “bantu boonse mulibungano” ayi balisalalite, wakasala Mose kutanjilila bantu bakwe. (Shakube. 16:28) Abo bakapondoka ndyebakalinga kwaamba shibiibi pali Mose, bakalinga kucobola Yehova. Tabakwe kubikila maano kushintu Yehova nshaakalinga kusuni, sombi bakabikila maano kushintu balo nshobakalinga kusuni mbuli kuba ankusu pabamwi akupuka. Lesa wakacaya bamatanjilili ba baabo bakapondoka, kwiilikaawo abamwi baanji bakaba kulubasu lwabo. (Shakube. 16:​30-35, 41, 49) Munshiku shino, inga twashooma ayi Yehova taabasuniiwo abo batakonkeli butanjilishi buswa kulibunga lyakwe.

12. Ino nceebonshi inga twatolelela kushoma libunga lyakwe Yehova?

¹² Inga twatolelela kushoma libunga lyakwe Yehova. Na cabonekela patuba ayi tutoyandika kwaalulako mbotunyumfwishisha cancine cimwi camu Baibo na pamakani ambotusebensela Yehova, bamu Likoto Litanjilila tabawayiwayi kwaalula mbotunyumfwishisha cancine ico ambotusebensela Yehova. (Tus. 4:18) Cinene cibapa kucita boobo nkusuna kusangalasha Yehova. Alimwi balashinisha kwaamba ayi  nshobasalawo kucita shitokweendelana a “maswi alushinisho” acanika mu Baibo, ayo bantu bakwe Yehova boonse ngobakonkela.

13. Ino “maswi alushinisho” nciinshi, alimwi ino tulyeelete kucita buyani kumaswi ayo?

¹³ “Catisha kukonkela maswi alushinisho.” (2 Timo. 1:13) “Maswi alushinisho” ni njiisho shicanika mu Baibo Beneklistu nshobakonkela. (Joni 17:17) Njiisho shoonse nshotushoma shilaswa mu Baibo. Libunga lyakwe Yehova lyakatwiisha kunoshinisha kwaamba ayi nshotushoma shitokweendelana amaswi alushinisho. Tulaakucana shoolwe na twatolelela kukonkela njiisho isho.

14. Ino nciinshi cakalengesha kwaamba ayi Beneklistu bamwi bacileeke kukonkela “maswi alushinisho”?

¹⁴ Ino nciinshi ceenga cacitika na twatalika kushoma shintu shiteendelani a “maswi alushinisho”? Amuyeeye pacakubonenaako ici. Muciindi ca Beneklistu bakutaanguna, Beneklistu bamwi bakalinga kwaamba makani akubeca ayi bushiku bwakwe Yehova bwashika. Mpashi kwakalinga nkalata bamwi njobakalinga kuyeeya ayi Paulo ngwaakailemba, iyo yakalinga kwaamba pamakani aya. Muciindi cakutaanguna kweelesha kushiba na makani aya ngancine, Beneklistu bamwi ku Tesalonika bakaashoma akutalika kunoolwiitako bamwi. Naakwiinga bakeebaluka shintu Paulo nshaakabaiisha ndyaakalinga pomwi ambabo, naakwiinga tabakwe kushoma makani aya akubeca. (2 Tesa. 2:​1-5) Paulo wakalwiita bashominyina ayi tabeelete kushoma makani ali oonse ngeenga banyumfwa. Kwaamba ayi Paulo abacaafwe alimwi kunembo, ndyaakalinga kumanisha kulemba nkalata yabili ya Bene Tesalonika, wakeelikamo maswi akwaamba ayi: “Nebo ne Paulo ndaleemba mooni uyu alyaansa lyangu nemwiine. Ici ncitondesho nceembika mumakalata angu oonse. Mboonemba bulya.”—2 Tesa. 3:17.

15. Ino nshiinshi nsheenga twaciita kwaamba ayi tulishitilishe kumakani akubeca ayo aboneka anga ngancine? Amwaambe cakubonenaako. (Amubone ashikope.)

¹⁵ Ino nshiinshi nsheenga tweeya kuswa kumaswi Paulo ngaakalembela bene Tesalonika? Na twanyumfwa makani amwi atatokweendelana anshotwakeeya mu Baibo na makani akankamika, tulayandika kusebensesha busongo. Mubuleelo bwa Soviet Union, balwani besu bakapa  bamakwesu nkalata yakalinga kuboneka anga yaswa ku maofesi esu anene. Nkalata iyo yakayuminisha bamakwesu bamwi kupanga libunga lyaabo beene. Nkalata iyo yakalinga kuboneka anga yakaswa kulibunga lyesu. Sombi bamakwesu bashomeka tabakwe kubecekwa. Bakashiba ayi makani akalinga munkalata iyo taakalinga kweendelana anshobakeeishikwa. Munshiku shino, bantu bapatite cancine cimwi ciindi balasebensesha intaneti anshila shimwi shakubandikishanya abantu pa intaneti kwaamba ayi batupilinganye alimwi tutabi bacatene. Muciindi cakufwambaana ‘kupilinganishikwa mumiyeeyo,’ inga twalishitilisha kwiinda mukuyeeyawo cakubikila maano na makani ngotutoonyumfwa nabi ngotutobelenga atokweendelana acancine ncotwakeeya.—2 Tesa. 2:2; 1 Joni 4:1.

16. Kweelana a Bene Loma 16:​17, 18, ino nciinshi ncotweelete kucita na umwi watalika kwaamba makani ateendelani acancine?

¹⁶ Amutolelele kuba bacatene abaabo bashomeka kuli Yehova. Lesa alisuni kwaamba ayi tube bacatene ndyetutomulambila. Tulaakutolelela kuba bacatene na katukonkela cancine. Uli woonse waamba makani ateendelani acancine alapa kwaamba ayi mulibungano mutabi lucatano, aboobo Yehova alatucenjesha ayi tulyeelete ‘kumutalamuka.’ Mukwiinga na twabula kucita boobo, aswebo inga twatalika kushoma makani akubeca akuba bantu batashomeki kuli Yehova.—Amubelenge Bene Loma 16:​17, 18.

17. Ino nshoolwe nshi nshotucana na twashiba cancine akutolelela kucikonkela?

¹⁷ Na twashiba cancine akutolelela kucikonkela, tulaakuba abushicibusa buyumu a Yehova alimwi lushomo lwesu lulaakutolelela kuba luyumu. (Efe. 4:​15, 16) Teshi tukacenjeekwe kunjiisho shakubeca shakwe Satana na kububeshi bwakwe, alimwi tulaakutolelela kuba kulubasu lwakwe Yehova muciindi ca mapensho anene. Amutolelele kukonkela cancine, ‘lyalo Lesa upa luumuno ulaakuba andimwe.’—Filip. 4:​8, 9.