Ba Nicolas aba Céline bakacana lipenshi limwi. Baku musampi waku France bakabalwiita ayi balongele kulibungano lipya. Bakaamba ayi: “Pakutaanguna twakasangalala abuumbi, sombi twakatalika kuyeeya beshicibusa besu. Paciindi ici katutana kuba abushicibusa buyumu abamakwesu abenankashi mulibungano lipya.” Aboobo ceebo cakwaamba ayi inga caba ciyumu kulongela kulibungano limwi, ino nshiinshi sheenga shamucafwa kushibila? Ino nshiinshi bamwi nsheenga bacita kwaamba ayi bamucaafwe? Alimwi ino inga mwacita buyani kwaamba ayi muyuminishe bamwi akuyuminishikwa mulibungano lipya?

NJIISHO SHILI 4 SHEENGA SHAMUCAFWA KUSHIBILA

1. Amucinke manungo muli Yehova. (Kulu. 37:5) Ba Kazumi bakala ku Japan, bakalonga kuswa mulibungano mobakalinga kubungana kwamyaaka 20 beebabo ndyebakapekwa ncito yakutalika kusebensela kumusena kumwi. Ino bakacita buyani kwaamba ayi ‘balyaabe mumaansa akwe Yehova’? Bakaamba ayi: “Ndakalinga kupaila kuli Yehova kuswa paanshi lyamoyo akumulwiita shintu shoonse shakalinga kumpa kulisukama, akulinyumfwa kuba neenka. Lyoonse na ndapaila, wakalinga kumpa nkusu nshendakalinga kuyandika.”

Ino inga mwacita buyani kwaamba ayi munoocinka manungo abuumbi muli Yehova? Bweenka cishango mbociyandika maanshi amboleshi kwaamba ayi cikomene, lushomo lwesu lulayandika maanshi amboleshi shacikoshanyo kwaamba ayi luyume. Ba Nicolas mbotwalinga twaambaawo bakakutumana kuyeeya pacakubonenaako cakwe Abulaamu, Yesu alimwi a Paulo, abo bakalyaaba munshila shiinji kwaamba ayi bacite kuyanda kwakwe Lesa. Alimwi kucita boobo kwakabacafwa kushoma cakutatoonsha kwaamba ayi Yehova alaakubacafwa. Na lyoonse kamucita ciiyo ca Baibo capalwaanu, cilaakumubeta cuubu kushibila kwaaluka kuli koonse mubuumi bwanu alimwi mulaakwiiya makani  ngeenga mwasebensesha kuyuminishako bamwi mulibungano lipya.

2. Amuleye kukoshanisha libungano nkomwakaswa ku libungano momubete. (Shiku. 7:10) Ba Jules bakalinga kweelete kushibila bukaalo bupusene abuumbi ambobakashibila, ndyebakalonga kuswa ku Benin kuya ku United States. Bakaamba ayi: “Ndakalinga kulinyumfwa ayi ndyeelete kulwiita muntu uli woonse ngondakumanya pabuumi bwangu.” Ceebo cakwaamba ayi ubu teshi mbocakalinga kucishi nkobakalinga kukala, bakatalika kulitalamusha kubamwi mulibungano. Nacibi boobo, bakacileka kulinyumfwa boobo pesule lya kubashiba kabotu bamakwesu abenankashi. Bakaamba ayi: “Ndakashiba ayi tulibo bantu bomwi kuli koonse nkotukala pacishi. Tulipusenebo mbotwaamba ambotucita shintu. Cilayandika kutakakatisha bantu kuba mbotubete.” Aboobo amuleye kukoshanisha libungano nkomwakaswa ku libungano momubete. Ubu mbwaakalinga kulinyumfwa nankashi waliina lya Anne-Lise usebensa mbuli painiya. Wakaamba ayi: “Nshina kulongela kokuno kwaamba ayi ncane nshondakashiya. Ndakalonga kwaamba ayi njiiye shintu shipya.”

Bamanene abalo balayandika kuleya kweelanisha libungano nkobakaswa ku libungano mobabete. Na bamakwesu kabacita shintu munshila ipusene ankomwakaswa, teshi lyoonse ndyecaamba ayi tabatoocita shintu munshila iluleme. Cili kabotu kushiba kabotu bukaalo bwakumusena uko kamutana kubalwiita mbomutoyeeya. (Shiku. 3:​1, 7b) Ncibotu kwiisha bamakwesu kwiinda mukutondesha cakubonenaako cibotu muciindi cakubakakatisha kuyeeya mbomuyeeya.—2 Koli. 1:24.

3. Amusebense cankusu mulibungano lipya. (Filip. 1:​27, NWT) Nabi kwaamba ayi kulonga kulayandika kusebensa cankusu alimwi kulayandika ciindi, cilayandika kwaamba ayi na mwashikabo mwatalika kunoocanika kumabungano, bunene bunene kuya ku Ŋanda ya Bwaami na kacikonsheka. Bamakwesu abenankashi mulibungano lipya liinji balayandika kunoomubona kwaamba ayi babe abushicibusa buyumu andimwe akwaamba ayi bacikoonshe kumucafwa. Ba Lucinda abo bakalongela mu tauni imwi inene mu South Africa pomwi abana babo banakashi bobilo, bakaamba ayi: “Beshicibusa bangu bakanjuminisha kuba abushicibusa abaabo bakalinga mulibungano lipya motwakalongela, kunosebensa abamwi muncito yakushimikila akwaabanamo lubasu kumabungano. Alimwi twakalwiita bamakwesu ayi inga kabesa mukubunganina pamisheesu pakuya muncito yakushimikila.”

‘Kusebensela pomwi’ abamakwesu abenankashi muncito sha Bwaami kulaakumucafwa kuyumya lushomo lwanu alimwi alwa bamwi. Ba Anne-Lise mbotwalinga twaambaawo, bamanene ba mulibungano mobakalinga bakabayuminisha kunooya mukushimikila ashikushimikila uli woonse mulibungano lipya. Ino nshiinshi shakaswaamo? Bakaamba ayi, “Ndakesa mukushiba ayi iyi ni nshila ibotu abuumbi icafwa muntu kulinyumfwa ayi ali lubasu lwa libungano.” Alimwi kulyaaba kwaabanamo lubasu muncito mbuli kubotesha akubamba Ŋanda ya Bwaami, kulaakutondesha bamakwesu abenankashi ayi mutolinyumfwa ayi muli lubasu lwa libungano. Na kamusebensa cankusu mulibungano, teshi pakeende aciindi bamakwesu abenankashi balaakuba abushicibusa buyumu andimwe  alimwi mulaakunolinyumfwa ayi mwaba lubasu lwa mukwashi upya wakumushimu.

4. Amube abeshicibusa bapya. (2 Koli. 6:​11-13) Na bantu bashiba ayi mulababikilako maano, cilaakuba cuubu kuba bushicibusa ambabo. Aboobo amweeleshe kufwambaana kushika pa Ŋanda ya Bwaami mabungano kaatana kutalika, akutafwambaana kuya pesule lyamabungano kwaamba ayi mube aciindi cinene cakubandika abantu akubashiba kabotu. Amweeleshe cankusu kushiba meenaabo. Na kamwiibaluka meena abantu akuba muntu ngocibete cuubu kubandikaakwe, bamwi balaakusuna kumushiba kabotu alimwi mpashi mulaakuba abushicibusa buli kabotu ambabo.

Muciindi cakulitondesha mbomutabete kwaamba ayi bantu bamusuune, amucite shintu kweelana ambomubete kwaamba ayi beshicibusa banu bapya bamushibe kabotu. Inga caba cuubu bamwi kutushiba kabotu ndyetutocita shintu shimwi pomwi ambabo. Inga twakonkela cakubonenaako caba Lucinda abo bakaamba ayi, “Tulicite bushicibusa buyumu abamwi pacecino ciindi mukwiinga twakasalawo kunokwiitako bamakwesu kusa kuŋanda yesu.”

“AMUTAMBULANE”

Mpashi bamwi inga baloonda kunjila mu Ŋanda ya Bwaami muswitebo bantu mbobateshi. Aboobo ino inga mwacita buyani kwaamba ayi abo balongela kulibungano lyanu balinyumfwe kwaanguluka? Mutumwi Paulo wakatuyuminisha ayi “amutambulane camaansa obilo bweenka Klistu mbwaakamutambula.” (Loma. 15:7) Kwiinda mukukonkela cakubonenaako cakwe Klistu, bamanene inga bacafwa bapya kulinyumfwa kwaanguluka. (Amubone kabokosi kacite mutwi utokwaamba ayi “ Sheenga Shamucafwa Kufwambaana Kushibila na Mwalonga.”) Nacibi boobo, boonse mulibungano kwiilikaawo abacanike inga bacafwa bapya kutalinyumfwa kusoweka.

Kutambula bamwi kuleelikaawo kunokwiitako bamwi kumaanda esu, alimwi akunoobacafwa mushintu nshebatoyandika. Kucakubonenaako, nankashi umwi wakasebensesha ciindi cakwe kwaamba ayi acafwe nankashi umwi mweensu kushiba mutauni mbomubete akumusansulwita mbweenga weenda kusebensesha ma basi na sitima. Ici cakamuyuminisha abuumbi nankashi mweensu akumucafwa kunolinyumfwabo anga ali kumishaabo.

 COOLWE CAKUYA PANEMBO LWAKUMUSHIMU

Nsoshi ndyeitoya cikomena, ilalyubula mankanda aanji kaitana kutalika kucikonsha kuuluka. Amwebo na mwalongela kulibungano lipya, inga mwayandika kucileka kulisukama pashintu shili shoonse shitoomupa kwaalilwa kuuluka munshila yacikoshanyo muncito yakwe Yehova. Ba Nicolas aba Céline bakaamba ayi, “Kulonga ninshila ibotu abuumbi icafwa kwiiya shintu shimwi. Kushibila bantu bapya amusena upya, kulatuyuminisha kwiiya kutondesha mibo ipya.” Ba Jean-Charles mbotwalinga twaambaawo bakaamba mukwashi wabo mbowakafubilaamo. Bakaamba ayi: “Kulongela kulibungano lipya, kwacafwa bana besu kuba bashimpite lwakumushimu akuba abushicibusa buyumu a Yehova. Pesule lya myeenshi iniini, mwaneesu mwanakashi wakatalika kwaabanamo lubasu mu mbasu shabashikwiiya kumabungano amukati ka nsondo, lyalo mwaneesu musankwa wakaba shikushimikila utana kubombekwa.”

Ino mbuyani na inga tamucikonshi kulongela kulibungano limwi mbuli kumusena ubulishite? Mpashi inga mweelesha kukonkela shimwi nshetwabandikaawo mumutwi uyu, kwaamba ayi munolinyumfwa anga muli mulibungano lipya. Ndyemutoocinka manungo muli Yehova, amusebense cankusu mulibungano kwiinda mukusebensela pomwi abamwi muncito yakushimikila, alimwi akuba abushicibusa abamwi na kuyumya bushicibusa mbomucite kale abamwi. Mpashi inga mwacitawo comwi akucafwako bapya na abo batoyandika lucafwo. Mukwiinga lusuno ngumubo utondesha ayi tuli Beneklistu bancine, kucafwa bamwi inga kwapa kwaamba ayi mube abushicibusa buyumu a Yehova. (Joni 13:35) Inga mwashoma cakutatonsha ayi kucita boobo ‘kulasangalasha Lesa.’—Ebu. 13:16.

Beneklistu baanji bakacikonsha kushibila ndyebakalongela kulibungano limwi, nabi kwaamba ayi bakacana mapensho—amwebo inga mwacikonsha! Ba Anne-Lise bakaamba ayi, “Kulongela kumabungano apusenepusene kwakancafwa kunotondesha lusuno kubamakwesu abenankashi bapusenepusene.” Ba Kazumi balashoma cakutatonsha ayi na walongela kulibungano lipya “inga wabona Yehova mbweenga wakucafwa munshila nshotana kubonaawo kale.” Alimwi ino ba Jules balalinyumfwa buyani? Bakaamba ayi: “Bushicibusa mboncite abamwi bulampa kulinyumfwabo anga ndi kumisheesu. Pacecino ciindi ndalinyumfwa ayi ndi lubasu lwa libungano lipya mombete cakwaamba ayi inga cambeta ciyumu kushiya beshicibusa bangu.”