Miipusho Kuswa Kubeshikubelenga
Ino “Jelusalemu” yaambwa pa Isaya 60:1 ‘yakabuka buyani’ alimwi ‘akubala anga ndisuba’?
Isaya 60:1 ilaamba ayi: ‘Buka webo Jelusalemu ubale anga ndisuba. Ceebo bulemu bwakwe Yehova buli pali ndiwe!’ Ndabala ya Jelusalemu na Siyoni iyo yakalinga ndabala inene ya cishi ca Juda paciindi cilya, yakalinga kwiimikaninako bene Isilaeli. (Isa. 60:14; 62:1, 2) Aboobo maswi Isaya ngaakaamba inga atupa kuliipusha miipusho yobilo itokonkelaawo: Wakutaanguna, ino ndilili alimwi munshila nshi Jelusalemu ‘ndyeyakabuka’ akumunika mumuni wakumushimu? Wabili, sa maswi Isaya ngaakalemba atokumanishikwa munshila iinditeewo munshiku shino?
Ino ndilili alimwi munshila nshi Jelusalemu ‘ndyeyakabuka’ akumunika mumuni wakumushimu? Jelusalemu a tempele shakatolelela kuba matongo baJuda ndyebakalinga mubusha ku Babiloni kwamyaaka 70. Sombi pesule lyakwaamba ayi Babiloni yakomwa kubene Mediya a Pesha, bene Isilaeli boonse bakalinga mumisena yakalinga kweendeleshekwa a bene Babiloni bakalinga kwaangulukite kuboolela kucishi cinemishaabo akutalika alimwi kulambila kwancine. (Esila 1:1-4) Kutalika mu 537 B.C.E., bene Isilaeli bashomeka bamumishobo yoonse ili 12 abalo bakaboolela. (Isa. 60:4) Bakatalika kubenga milambu kuli Yehova, kucita kusekelela alimwi akutalika kuyaka cipya tempele. (Esila 3:1-4, 7-11; 6:16-22) Paciindi ici, bulemu bwakwe Yehova bwakatalika alimwi kubala pa Jelusalemu—nkokwaamba ayi pabantu bakwe. Lyalo bantu bakwe bakaba mumuni wacikoshanyo kubantu bamushishi shimwi batakalinga kumushiwo Yehova.
Nacibi boobo, bushinshimi Isaya mbwaakalemba tabuna kukumanishikwa cakumaninina paciindi cilya. Bene Isilaeli baanji tabakwe kutolelela kunyumfwila Lesa. (Neye. 13:27; Mala. 1:6-8; 2:13, 14; Mate. 15:7-9) Mukuya kwaciindi, bakakaka Mesiya nkokwaamba ayi Yesu Klistu. (Mate. 27:1, 2) Mu 70 C.E., Jelusalemu a tempele shakanyonyoolwa ciindi cabili.
Yehova wakaambila limwi ayi ishi shilaakucitika. (Danye. 9:24-27) Ncakutatoonsha kwaamba ayi, takwakalinga kuyanda kwakwe Yehova kwaamba ayi Jelusalemu yapacishi ikumanishe bushinshimi boonse bwaamba pa kuboosha kulambila kwancine ubo bulembetwe mu Isaya capita 60.
Sa maswi Isaya ngaakalemba atokumanishikwa munshila iinditeewo munshiku shino? Ee, sombi atokumanishikwa ku “Jelusalemu ya kwiculu.” Mutumwi Paulo wakaamba pa ndabala iyi ayi: “Ngonyinawesu.” (Gala. 4:26) Jelusalemu ya kwiculu ileemikaninaako lubasu lwa kwiculu lwa libunga lyakwe Yehova lya baanjelo bashomeka. Bana banjiyo baleelikaawo Yesu a Beneklistu bananikitwe bali 144,000, abo balangila kuya mukwikala kwiculu bweenka mbuli Paulo. Beneklistu bananikitwe baleetwa ayi “mushobo usalalite”—“Isilaeli wakwe Lesa.”—1 Pit. 2:9; Gala. 6:16, NWT.
Ino Jelusalemu yakwiculu ‘yakabuka buyani’ ‘akubala anga ndisuba’? Yakacita boobo kwiinda mubana banjiyo bali pacishi, nkokwaamba ayi Beneklistu bananikitwe. Amubone shakabacitikila mboshikoshenye abushinshimi bwakaambwa mu Isaya capita 60.
Beneklistu bananikitwe bakalinga kweelete ‘kubuka’ mukwiinga bakalinga mumunshinshe wacikoshanyo, njiisho shakubeca ndyeshakafula pesule lyakwaamba ayi batumwi boonse bafwa. (Mate. 13:37-43) Paciindi cilya, bakaba mubusha mu Babiloni Munene, na bupailishi boonse bwakubeca. Bananikitwe bakatolelela kuba mubusha kushikila ‘kumamanino acishi ca panshi,’ alimwi ciindi ici cakatalika mumwaaka wa 1914. (Mate. 13:39, 40) Ndipakeendabo ciindi ciniini, mu 1919 bakaangululwa kuswa mubusha alimwi peenkapo bakatalika kumunika mumuni wakumushimu kwiinda mukusebensa cankusu muncito yakushimikila makani abotu a Bwaami. a Kwamyaaka iinji, bantu kuswa mushishi shoonse bakesa mumumuni uyu, kwiilikaawo a bene Isilaeli bakwe Lesa bacaliteewo—nkokwaamba ayi “bamaami” baambwa mu Isaya 60:3.—Ciyu. 5:9, 10.
Kunembo, Beneklistu bananikitwe balaakumunika mumuni wakumushimu munshila iinditeewo kuswa kuli Yehova. Munshila nshi? Na bakafwe akubushikwa kuya kwiculu balaakuba lubasu lwa ‘Jelusalemu Ipya,’ na kuba banabwiinga bakwe Klistu bali 144,000 akuba bamaami abapailishi pomwi anguwe.—Ciyu. 14:1; 21:1, 2, 24; 22:3-5.
Jelusalemu Ipya ilaakuba alubasu luyandika mukukumanisha bushinshimi bwaambwa mu Isaya 60:1. (Amweelanye Isaya 60:1, 3, 5, 11, 19, 20 a Ciyubululo 21:2, 9-11, 22-26.) Bweenka Jelusalemu ya pacishi mboyakalinga musena bamaami ba bene Isilaeli mobakalinga kukala, Jelusalemu Ipya pomwi a Klistu balaakuba mbo bamaami bacishi cipya. Ino Jelusalemu Ipya ilaakusa buyani pacishi ‘kuswa kwiculu kuli Lesa’? Ilaakucita boobo kwiinda mukukushawo shoonse shikuma bantu pacishi. Bantu ba mishobo yoonse baloonda Lesa “balaakweenda mumumuni wa njiyo.” Teshi bakanobishaawo nabi kufwa. (Ciyu. 21:3, 4, 24) Aboobo “ciindi cakuboosha shintu shoonse” cilakukumanishikwa cakumaninina kweelana a Isaya alimwi abashinshimi bamwi mbobakaambila limwi. (Milimo 3:21, NWT) Ciindi ici ciyandika cakuboosha shintu shoonse cakatalika paciindi Klistu ndyakaba Mwaami alimwi cilaakumana kumamanino a Buleelo Bwakwe bwa Myaaka 1,000.
a Kuboosha kulambila kwancine kwakacitika mu 1919 kulilembetwe a mulibuku lya Esekelo 37:1-14 alya Ciyubululo 11:7-12. Esekelo wakaambila limwi kuboosha kulambila kwancine kwa Beneklistu boonse bananikitwe pesule lyakuba mubusha kwaciindi cilaamfu. Bushinshimi buli mu Ciyubululo bulaamba pa kushalwa cipya kwa cikoshanyo kwa kakoto kaniini ka bamakwesu bananikitwe bakalinga kutanjilila pesule lya kwaalilwa kusebensela Yehova kwakaciindi ceebo ca kwaangwa kabatacite mulandu. Mu 1919, bakasalwa kusebensa mbuli ‘musebenshi ushomeka alimwi ucite maano.’—Mate. 24:45; amubone libuku lyamu Chitonga licite mutwi waamba ayi Bukombi Busalala—Bwabukulusyigwa!, pe. 118.
